Sɛb-sõw yielu 72
72
Sɛb-sõw yielu 72 (71)
Naaŋmɩn i, kʋ̀ a fʋ ƴɛ̀rʋ-dɩb fãw a nãà
1Salomɔ̃ so ʋ.
Naaŋmɩn i, ɩ a nãà mɩ́ dɩ a ƴɛ̀rʋ mɛ̃ a fʋ̃ʋ a!
Kʋ̀ a nãà bidɛb a fʋ ƴɛ̀rʋ-dɩb yã.
2Ʋ mɩ́ dɩ a ƴɛ̀rʋ nɩ mɩnʋ kʋ̀ a fʋ nɩ-bʋʋrɛ,
ʋ mɩ́ dɩ a ƴɛ̀rʋ kʋ̀ a fʋ bãbàalbɛ a tu sɔ́r.
3Tan i, nyɩ wa n a ƴã-ɓaarʋ wa kʋ̀ a nɩbɛ,
tãli i, nyɩ wa n a mɩnʋ wa kʋ̀ bɛ!
4A nãà, ʋ mɩ́ kpɛ a nɩ-bʋʋrɛ bãbàalbɛ,
ʋ mɩ́ ɩ a nan dem faarɛ,
ɛ́ mɩ́ ƴɛ́r a sob nɛ na dɔwrɛ bɛ a ŋmɛr!
5Ʋ be be, mɛ̃ a mʋ̃tɔ̃w nɩ a cuw a,
tɩ ta a tẽw baarʋ daar.
6Ʋ ɩ mɛ̃ a saa na mɩ́ wa ƴãw a mʋ̃ɔ na lɛb tɔmnɛ a,
mɛ̃ a sa-pla na mɩ́ wa bur a tẽw a!
7A ʋ daar a, mɩnʋ na be n be yaga,
ɛ́ a ƴã-ɓaarʋ ʋr, lɛn daar za a cuw na na be be a!
8Ʋ na mɩ́ dɩ n naalʋ kʋ̃ɔ-kpɛ̃ɛ ƴãw tɩ tɔ n kʋ̃ɔ-kpɛ̃ɛ,
a Efaratɩ man ƴãw tɩ tɔ n a tẽw baarʋ zie.
9A wɛja-kpalɛ pʋɔ dem na gbĩ n dume a ʋ niŋé,
a ʋ dɔ̃ dem na mɔw nɩ a tanɛ.
10Tarsisɩ tẽw nɩ a kʋ̃ɔ-kpɛ̃ɛ-sɔgɔ-ten na zãá a na-mɩnɛ
na wa n nɩ bome wa kʋ̀ ʋ,
Saba nɩ Seva ten na-mɩnɛ na ya n a zuru yar kʋ̀ ʋ.
11A na-mɩnɛ za na gbĩ n dume a ʋ niŋé,
a nɩ-bʋʋrɛ za na tone nɩ a ʋ tome.
12Ʋ na faa nɩ a nã́w sob na kone bʋɔlɛ a,
nɩ a bãbàal na bɛ tɛr kpa-tɩɛrɛ a.
13Ʋ na zɔ n a bãbàal nɩ a nã́w sob nɩbaalʋ,
ʋ na faa bɛ na.
14Ʋ na faa bɛ nɩ a nɩbɛ na dɔwrɛ bɛ a zie,
ɛ́ ɩrɛ po-to-fãw-ɩb a bɛ zie a,
a bɛ nyɔ-vʋʋrʋ na ɩ bʋ̃-sɩza a ʋ zie a ƴãw.
15A nãà, ʋ vʋʋrɛ!
Bɛ na kʋ̀ ʋ nɩ a Saba tẽw salm-zɩɛ,
bɛ na puore na kʋ̀rɛ ʋ kʋralɛ.
A Naaŋmɩn, ʋ maalɛ ʋ bibi-vɩɛrɩ za!
16Ble na ʋr'ɩ a tẽw pʋɔ,
a bʋ̃-kʋ́ɔrɩ zuru na zaalɛ a tan zu a
na ɩ na mɛ̃ a Libã tẽw tãw tɩɩr na zaalɛ a,
ɛ́ a tẽ-bɛrɛ pʋɔ a,
a nɩbɛ na vɩɛl'a mɛ̃ a póru pʋɔ mʋ̃ɔ a.
17A nãà yúor, ʋ be be kʋralɛ,
bɛ pore a ʋ yúor
lɛn daar za a mʋ̃tɔ̃w na na pure a.
A nɩsaalbɛ, bɛ mɩ́ por a ʋ yúor ƴɛ̀r'ɩ a nɔ-vla kʋ̀ taa,
ɛ́ a nɩ-bʋʋrɛ za yere k'aa nãà ɩ n zu-nʋ̃ɔ̀ sob.
18A Sore, a Ɩsɩrayɛl Naaŋmɩn tɛr'ɩ puoru,
ʋl yõ na n'ʋ maalɛ nɔ-ɓãa-yele a!
19A ʋ yúor-vɩɛlʋ-danʋ, ʋ paalɩ a tẽw za!
Amɛn! Lɛb maal Amɛn!
*
20A Zese bidɛb Daviir puoru baarʋ zie n'ɩ a ka.
La Bible en Dagara © Alliance Biblique du Burkina Faso, 2013.