Sɛb-sõw yielu 71
71
Sɛb-sõw yielu 71 (70) sob
Ƴɛrɛŋa ɩ̃ na kor baar'a, Sore e, taa zawrɛ mɛ̃ bɛrɛ ɩ
1Sore e, a fʋ naayir'a ɩ̃ zɔrɛ kpɩɛr,
ta sàw k'ɩ̃ wa nyɛrɛ vĩ towtow ɛ.
2Faa mɛ̃ ɛ́ gùre mɛ̃, a fʋ mɩnʋ zũú.
Cɩɩl tobr cɔw mɛ̃ ɛ́ faa mɛ̃.
3Ɩ a pì-kpɛ̃w ɩ̃ na mɩ́ taw lanɩ a,
zɛbr-yir-kpɛ̃w pʋɔ ɩ̃ na mɩ́ nyɛ̃ a faafʋ a.
Fʋ̃ʋ sɩrɩ n'ɩ a ɩ̃ pìir, a ɩ̃ zɛbr-yir-kpɛ̃w.
4Ɩ̃ Naaŋmɩn i, faa mɛ̃ a nɩ-faa nuru pʋɔ,
a nɩr na bɛ tɛr yel-mɩŋa a nɩ a po-to-sob nuru pʋɔ.
5Sore Naaŋmɩn i, fʋ̃ʋ n'ʋ ɩ̃ tɩɛrɛ,
fʋ̃ʋ zie n'a ɩ̃ ƴãw a ɩ̃ tɩɛrʋ a ɩ̃ pɔ̀lʋ daarɩ́ za.
6Fʋ̃ʋ n'ʋ tɩɛ mɛ̃ a ɩ̃ dɔwfʋ daarɩ́ za,
fʋ̃ʋ n'ʋ ɩ k'ɩ̃ yi a ɩ̃ mã púorí.
Fʋ̃ʋ só a ɩ̃ danʋ kʋralɛ.
7A nɩ-yaga zie a, nɩ-bɩɛ tɩ nɛ m,
ɛcɛ fʋ̃ʋ tɩ n'ɩ a ɩ̃ sɔwlʋ zie na bɛ tɛr dɛ̃bɩ̃ɛ a.
8A fʋ danʋ ƴɛ̀r-bie n'a paalɩ a ɩ̃ nʋɔr,
ɩ̃ yiele nɩ a fʋ vɩɛlʋ bibie za.
9Ƴɛrɛŋa ɩ̃ na kor baar'a, taa lɔbr mɛ̃ bɛrɛ ɩ,
taa zawrɛ mɛ̃ bɛrɛ a ɩ̃ fãw na báarɛ a ɩ.
10A ɩ̃ dɔ̃ dem ƴɛ̀rɛ nɩ a ɩ̃ ƴɛ̀rʋ,
a nɩbɛ na piwre mɛ̃ a, bʋ̀rɛ nɩ taa.
11Bɛ yere na: «Naaŋmɩn zawr'ʋ na bɛr,
nyɩ diw nyɔw ʋ, nɩr bɛ ka be na faa ʋ ɛ.»
12Naaŋmɩn i, ta àr zãá nɩ mɛ̃ ɩ,
ɩ̃ Naaŋmɩn i, wa fɔ̃w wa sõw mɛ̃.
13A bɛlɩ dem na jɩɛrɛ a ɩ̃ nyɔ-vʋʋrʋ a,
bɛ́ lo, ɛ́ vĩ nyɔw bɛ.
Zʋmɛ nɩ vĩ, a nyɔw a bɛlɩ dem na bɔbr
k'aa nãá ɩ m faa a.
14Mãa ƴãw a, ɩ̃ na tɩɛrɛ fʋ nɩ kʋralɛ,
ɛ́ ɩ̃ na danɩ fʋ na lɛb maal danɩ.
15Fʋ ɩ n Naaŋmɩn na tuur yel-mɩŋa ɛ́ faarɛ tɩ a,
ɩ̃ manɛ nɩ à à ŋá bibie za,
a fʋ yel-maalɩ na yãwmɛ bɛ tɛr sɔ́rʋ a ƴãw.
16Sore Naaŋmɩn i, a fʋ gãda-tome n'a ɩ̃ na manɛ,
ɩ̃ lɛb'a yere kɛ́ fʋ̃ʋ yõ n'ʋ ɩ nɩ-mɩŋa.
17Naaŋmɩn i, a ɩ̃ pɔ̀lʋ daar za n'a fʋ wul mɛ̃,
ɛ́ wa tɩ tɔ ka a, ɩ̃ manɛ nɩ a fʋ nɔ-ɓãa-yele.
18Dɩ̃a ɩ̃ na kor pɛlɩ zu a, Naaŋmɩn i,
taa zawrɛ mɛ̃ bɛrɛ ɩ,
lɛ n'a ɩ̃ na tʋ̃ɔ́ manɩ a fʋ fãw tome
kʋ̀ a dɩ̃a pɔlbili nɩ a bibiir na na dɔw a.
19Naaŋmɩn i, a fʋ mɩnʋ do n saa,
ɛ́ fʋ maalɩ yel-bɛrɛ bɛrɛ!
Naaŋmɩn i, ãa n'ʋ ŋmɛ̃ mɛ̃ a fʋ̃ʋ a?
20Fʋ ɩ na k'ɩ̃ nyɛ̃ kpɩɛrʋ nɩ yel-faar yaga.
Ɛcɛ fʋ na wa na lɛb wa kʋ̀ m a nyɔ-vʋʋrʋ,
wa ɩ k'ɩ̃ lɛb yi a yàa-bɔw pʋɔ.
21Fʋ na lɛb'a maal mɔwlɩ mɛ̃,
fʋ na ɩ na k'ɩ̃ lɛb tɛr yúor.
22Ɛ́ mãa a, ɩ̃ na ŋmɛ n korijom puor'ɩ fʋ barka.
Naaŋmɩn i, ɩ̃ na yiele nɩ a fʋ yel-mɩnʋ.
Ɩ̃ na ŋmɩɛr'ɩ pɛ̀nɛ́ íre nɩ a fʋ yúor,
fʋ̃ʋ Ɩsɩrayɛl Naaŋmɩn na ɩ sõw a.
23Ɩ̃ na ŋmɩɛr'ɩ bʋ̃-ŋmɩɛrɩ íre nɩ a fʋ yúor,
ɩ̃ na cáarɛ na danɛ nɩ fʋ, fʋ na faa mɛ̃ a.
24Ɩ̃ na manɛ nɩ a fʋ yel-mɩnʋ bibi-vɩɛrɩ za,
bʋ̃ʋ n'ʋ vɛ̃, a bɛlɩ dem na tɩ bɔbr a ɩ̃ faa a,
bɛlɛ n'ɩ bɛ ŋan nyɛ̃ vĩ nɩ zʋmɛ.
La Bible en Dagara © Alliance Biblique du Burkina Faso, 2013.