Sɛb-sõw yielu 7
7
Sɛb-sõw yielu 7 sob
Nɩr bɛ na dɔwrɛ a puoru
1Daviir nɩbaal-yielu n'ʋ. A Sore n'ʋ ʋ tɩ yieli kʋ̀, càar'ɩ Kusɩ na ɩ Bɛ̃zamɛ dɔwlʋ nɩr kãw a.
2Sore ɩ̃ Naaŋmɩn i, fʋ̃ʋ n'ɩ a ɩ̃ taw-lanʋ zie!
Faa mɛ̃, ír mɛ̃ bɛr a nɩbɛ bɛl za
na dɔwrɛ mɛ̃ a nuru pʋɔ.
3Alɛ bɛ ɩ lɛ, bɛ na taw mɛ̃ na cɩɛrɩ mɛ̃ gben a,
ɛ́ nɩr za kʋ̃ faa mɛ̃ ɩ, kʋ̃ taw faa mɛ̃ a bɛ zie ɩ.
4Sore ɩ̃ Naaŋmɩn i, mãa wa ɩ a lɛ bɛ na yere a,
a ɩ̃ nuru wa tõ tõ-faa a,
5mãa wa maalɩ faa a ɩ̃ kpɛ-ta-sob zie,
bɛr a ɩ̃ dɔ̃ sob ʋ zɔ a,
6ɩ̃ dɔ̃ sob kãw, ʋ diw mɛ̃ nyɔw,
ʋ nɛb'ɩ mɛ̃ gbɛ́ɛ a tẽsɔw,
ɩ̃ na cãà vʋʋrɛ a, ʋ ɓiil'ɩ mɛ̃ tanɛ! Tɛw-àrʋ.
7Sore e, ìr nyɛ̃ suur fʋ za,
piw a ɩ̃ dɔ̃ dem su-yãya-ɩb.
Ìr àr a ɩ̃ lõbowrí, fʋ̃ʋ na mɩ́ yel a lɛ-na-tu-sɔr-a.
8A nɩ-bʋʋrɛ bʋʋrɛ, bɛ ɓã taa jil koli fʋ,
ɛ́ fʋ̃ʋ a, zɩ̃ a fʋ naalʋ-dà-kɔw zu do gãw bɛ.
9Sore e, fʋ̃ʋ na dɩrɛ nɩ a nɩ-bʋʋrɛ ƴɛ̀rʋ a,
dɩ n mɛ̃ a ƴɛ̀rʋ, Sore e, tu n a ɩ̃ mɩnʋ
nɩ ɩ̃ na bɛ tɛr sãwna a.
10Ɩ a nɩ-faar po-tuolu a baarɩ
ɛ́ fʋ ɩ a nɩ-mɩŋa ʋ kpɛmɛ,
fʋ̃ʋ na mɩ́ jɛl a pʋ-tɩɛr-sɔwlɩ a,
fʋ̃ʋ Naaŋmɩn na tuur yel-mɩnʋ a.
11A Naaŋmɩn n'ɩ a ɩ̃ zɛbr-kur-pãgala na piw mɛ̃ a,
a soci-dẽdẽ dem faarɛ.
12Naaŋmɩn ɩ n ƴɛ̀r-dɩrɛ na tuur yel-mɩnʋ a,
ɛcɛ bibir za na vɩɛrɛ a,
ʋ ɩ n Naaŋmɩn na bɛ tɛr dɩ̃ɛnʋ a.
13Bʋnʋ bɛ ka be ɩ, a dɔ̃ sob lɛb'a tine:
ʋ saalɛ nɩ a ʋ zɛbr-sɔ-kpɛ̃ɛ,
ʋ dúore nɩ a ʋ tam ɛ́ càrɛ a pime.
14Ʋ cɔbrɛ nɩ zɛbr bome na kʋrɛ a,
a ʋl mɩŋa ƴãw, nɩ pime na mɩ́ ƴãw vũu a.
15Ʋlɛ n'ɩ ŋan ŋmãa a ʋ ɩ-faar sɩɛ,
tɛr a yel-faa pʋɔ, ɛ́ dɔwr a ziri.
16Ʋ tuwr'ɩ bɔw-zulu,
ɛ́ lore a bɔw ʋl mɩŋa na tuw a pʋɔ.
17A ɩ-faa ʋ na cɔbrɩ a lɛb'a waar a ʋ zu,
a po-to-ɩb ʋ na tɩɛrɩ a lɛb'a lore a ʋ zu.
18Ɩ̃ na puore nɩ a Sore yãanɩ, a ʋ mɩnʋ zũú,
ɩ̃ na yiele na íre nɩ a Naaŋmɩn-na-do-saa-bɛ-pɩɛl-a yúor.
La Bible en Dagara © Alliance Biblique du Burkina Faso, 2013.