Sɛb-sõw yielu 65
65
Sɛb-sõw yielu 65 (64) sob
Naaŋmɩn danʋ yielu, a ʋ maalʋ ƴãw
1Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Daviir na maalɩ a. Yielu.
2Naaŋmɩn i, fʋ sɩrɩ na sɛwnɩ danʋ a Sɩyɔ̃ tẽw pʋɔ,
ɛ́ bɛ na mɩ́ ír'ɩ a nɛ́ɛ bɛ na kõ kʋ̀ b a,
3fʋ̃ʋ na mɩ́ sàw de a puoru a.
A nɩsaalbɛ za waar'ɩ a fʋ zie,
4tuo a bɛ sãwna.
A tɩ sãwna tɩbrɛ na zuo tɩ,
ɛcɛ fʋ na tʋ̃ɔ́ na ɩ a baarɩ.
5Zu-nʋ̃ɔ̀ dem'ɩ a bɛl fʋ na kaa ír, ɛ́ ɩ kɛ̀ bɛ taw pɩɛlɩ a,
bɛ na kpɩɛr'ɩ a fʋ davʋrɩ pʋɔ.
Tɩ na dɩ n a fʋ yir bome tɩw,
a bʋ̃-son na be a fʋ yir pʋɔ a.
6Naaŋmɩn tɩ Faarɛ ɛ, fʋ ŋmɛ̃ n fʋ ŋmɛ̃a,
fʋ mɩ́ maal'ɩ nɔ-ɓãa-yele sɔw nɩ tɩ,
fʋ̃ʋ a tẽw baarʋ zie nɩbɛ,
nɩ a kʋ̃ɔ-kpɛ̃ɛ-sɔgɔ-ten na zãá a nɩbɛ na tɩɛrɛ a.
7Fʋ ɩ n a tan a kpɛmɛ àr nɩ a fʋ fãw,
fʋ sɛ n a kpɛnʋ mɛ̃ kpàwr a.
8Fʋ mɩ́ ɩ n a kʋ̃ɔ-bɛrɛ gɔmɛ a baarɩ,
a kʋ̃ɔ-bɛrɛ kʋ̃ɔ-mie gɔmɛ, nɩ a nɩ-bʋʋrɛ damnʋ.
9A nɩbɛ na kpɩɛr a tẽw baarʋ ziir a,
bɛ nyɛ̃ nɩ a fʋ nɔ-ɓãa-yele, na ɩ bãwfʋ sãá a,
a ɩ bɛ dɛ̃bɩ̃ɛ.
Fʋ ɩ na a mʋ̃tɔ̃w-puru-lowr
nɩ a mʋ̃tɔ̃w-kpɛb-lowr ten lɔbr nʋ̃ɔ̀ cɛlsɩ.
10Fʋ mɩ́ kaa nɩ a tẽsɔw zie, ɩ k'ʋ nyũ kʋ̃ɔ,
fʋ mɩ́ paal'ʋ na nɩ na-bome.
A Naaŋmɩn man-gbɛ́r paal'ɩ kʋ̃ɔ yi nʋɔr,
fʋ cɔbrɛ nɩ a ble a nɩsaalbɛ ƴãw.
À ŋá n'a fʋ cɔbrɛ a tẽsɔw:
11fʋ mɩ́ cɔr'ɩ a ʋ garɩ fʋɔlɩ,
fʋ mɩ́ ŋmɛr'ɩ a ʋ tã-dɛgɛ,
fʋ mɩ́ ɩ na a saa wa ƴãw ʋ bur ʋ za,
fʋ mɩ́ maal'ɩ a ʋ bʋ̃-bule.
12Yũon-ɓil za n'ʋ mɩ́ nyɛ̃ a fʋ maalʋ,
fʋ mɩ́ cere na tɔlɛ ɛ́ bom za ʋr.
13A dʋn mʋ̃ɔ 'wɔbrʋ zie a wɛja-kpalɛ pʋɔ ʋr'a,
ɛ́ a tãli sɛ a nʋ̃ɔ̀ mɛ̃ kpàwr a.
14A dʋn yɛ́r'a pàw a dʋn mʋ̃ɔ 'wɔbrʋ ziir,
ɛ́ a bà-fʋɔlɩ ɩ ble tɛwr.
Nʋ̃ɔ̀ cɛlsɩ nɩ yielu n'a pàw a ziir za.
La Bible en Dagara © Alliance Biblique du Burkina Faso, 2013.