Sɛb-sõw yielu 63
63
Sɛb-sõw yielu 63 (62) sob
Naaŋmɩn i, a fʋ vʋla kpɩɛr mɛ̃ na
1Sɛb-sõw yielu Daviir na maalɩ a. A lɛn daar a Daviir na tɩ be a Zuda tẽw wɛja-kpalɛ pʋɔ a n'a.
2Naaŋmɩn i, fʋ̃ʋ n'ɩ a ɩ̃ Naaŋmɩn,
ɩ̃ bɔbr fʋ na, a fʋ vʋla kpɩɛr mɛ̃ na.
Ɩ̃ kʋɔlɛ nɩ ɩ̃ za bɔbr'ɩ fʋ,
mɛ̃ tẽsɔw na bɛ páw kʋ̃ɔ ko a, ko welwel a.
3Ɩ̃ jɩ́r fʋ nɩ a zi-sõw pʋɔ,
k'ɩ̃ɩ nyɛ̃ a fʋ kpɛnʋ nɩ a fʋ yúor-vɩɛlʋ-danʋ,
4a fʋ nɔ̃wfʋ sɩrɩ na sa a nyɔ-vʋʋrʋ.
Ɩ̃ na danɛ fʋ na.
5Ɩ̃ na puore fʋ nɩ yãanɩ a ɩ̃ cãafʋ daar za,
ɛ́ bɛlɛ wa por a fʋ yúor a, ɩ̃ na mɩ́ zɛw nɩ a nuru.
6Ɩ̃ na nyɛ̃ nɩ maalʋ,
mɛ̃ nɩr na 'wɔb nɛn-kãánɩ nɩ nɛn-buge tɩw a.
Nʋ̃ɔ̀ za na luw nɩ a ɩ̃ kɔrɛ, ɩ̃ íre a fʋ yúor.
7Mãa wa gã a, ɩ̃ mɩ́ lɛb'a tɩɛrɛ a fʋ yele,
ɩ̃ mɩ́ tɛr fʋ na tɩɛrɛ a tɩ̃ɩsɔw tɛm gbele pʋɔ:
8fʋ wa na wa sõw mɛ̃.
Ɩ̃ ŋmɩɛr'ɩ nʋ̃ɔ̀ cɛlsɩ a fʋ pɩgɛ ɓaarʋ́.
9Ɩ̃ tu b'a nɩ ɩ̃ pʋɔ za,
ɛ́ a fʋ dʋrʋ nũu tɩɛ mɛ̃ tɛr.
10Ɛcɛ a bɛlɩ dem na bɔbr a ɩ̃ kʋb a,
bɛ tɔl siw a kpɩmɛ tẽw!
11A zɛbr-sɔ-kpɛ̃ɛ, ʋ baarɩ bɛ,
bɛ lɩɛbɩ gbõgbo-cili dɩb!
12A nãà ʋl na cɩlɛ nɩ a Naaŋmɩn ƴãw!
Sob nɛ za na pɔrɛ ƴãwn
a Naaŋmɩn ƴãw a na nyɛ̃ nɩ danʋ,
bʋ̃ʋ n'ʋ vɛ̃, a zir-ŋmarbɛ nɛ́ɛ na pàw na.
La Bible en Dagara © Alliance Biblique du Burkina Faso, 2013.