Sɛb-sõw yielu 40
40
Sɛb-sõw yielu 40 (39)
Ɩ̃ Naaŋmɩn i, ɩ̃ nɔnɛ nɩ a fʋ nʋɔr-sàwfʋ
(Kan-nɛ́ɛ 14-18: nyɛ̃ 70.2-6)
1Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Sɛb-sõw yielu Daviir na maalɩ a.
2Ɩ̃ tɩ sɩrɩ na ƴãw a ɩ̃ tɩɛrʋ a Sore ƴãw,
ʋ jɩ́r'a kaa mɛ̃, ʋ wõ n a cɛl ɩ̃ na lɔb a.
3Ʋ ír mɛ̃ nɩ a kũu bɔw pʋɔ bɛr,
a mɛ̃mɛrɛ bɔw pʋɔ.
Ʋ nyɔw mɛ̃ na ɩ̃ ìr àr,
a gbɛ́ɛ a za ayi be pìir zu, ʋ ɩ n a ɩ̃ gbɛ́ɛ a kpɛmɛ.
4Ʋ ƴãw nɩ yiel-paala a ɩ̃ nʋɔrɩ́,
a tɩ Naaŋmɩn danʋ yielu.
Nɩ-yaga na nyɛ̃ na, bɛ na zɔrɛ nɩ a Sore,
ɛ́ bɛ na ƴãw nɩ a bɛ tɩɛrʋ a ʋ ƴãw.
5Zu-nʋ̃ɔ̀ sob'ɩ a nɩr ʋl na ƴãw a ʋ tɩɛrʋ a Sore ƴãw,
ɛ́ bɛ ŋmɛlɛ kaar a pɔ̀lʋ dem a,
nɩ a bɛlɩ dem na nɔnɛ a ziri ŋmab a!
6Sore ɩ̃ Naaŋmɩn i, a fʋ nɔ-ɓãa-yele tɛr'ɩ tɛwr ɩ?
Fʋ bɛ tɛr fʋ tɔ ɩ!
A yele fʋ na tɩɛrɩ ɛ́ maalɩ a tɩ ƴãw a, tɛr'ɩ tɛwr ɩ?
A yãwmɛ na zuo ɩ̃ na na tʋ̃ɔ́ manɩ a za a,
ɩ̃ na na tʋ̃ɔ́ yel a za a!
7Fʋ ɩ na ɩ̃ bãw a pɛr vla,
kɛ́ bàwr nɩ de-kʋ̀b bome bɛ n'a fʋ tɩ bɔbr ɛ,
nyɩw-a-za-bàwr nɩ sãwna bàwr bɛ n'a fʋ tɩ bɔbr ɛ.
8Lɛ n'a ɩ̃ tɩ yel: «Mãa n'ɩ ŋan waar.
Bɛ sɛb'ɩ a Wulu sɛbɛ pʋɔ
a ʋlɩ bom nɛ a na fɛr k'ɩ̃ɩ ɩ a.»
9Ɩ̃ Naaŋmɩn i, ɩ̃ nɔnɛ nɩ a fʋ pʋ-tɩɛrʋ maalʋ,
ɛ́ a fʋ Wulu be a ɩ̃ socir pʋɔ.
10Ɩ̃ hier'a yel a faafʋ yel-nʋ̃ɔ̀ a lãw-kpɛ̃ɛ pʋɔ.
Nyɛ̃, ɩ̃ bɛ pàw a nʋɔr ɛ, Sore e, fʋ bãwnɩ a na.
11A faafʋ fʋ na faa mɛ̃ a, ɩ̃ bɛ sɔwlɩ bɛr ɛ,
ɛcɛ ɩ̃ yel kɛ́ fʋ ɩ n faarɛ tɔr za.
Ɩ̃ bɛ sɔwlɩ a fʋ nɔ̃wfʋ nɩ a fʋ yel-mɩŋa
a lãw-kpɛ̃ɛ zie ɩ.
12Fʋ̃ʋ a, Sore e, fʋ bɛ sɩbr mɛ̃ a fʋ su-ɓaarʋ ɛ,
a fʋ nɔ̃wfʋ nɩ a fʋ yel-mɩŋa
na gùre mɛ̃ nɩ kʋralɛ.
*
13Yel-faar na bɛ tɛr nʋɔr a jil a pàw mɛ̃.
A ɩ̃ sãwna bɛ bɛrɛ mɛ̃ ɩ, ɩ̃ bɛ cãà tʋ́ɔr jɩ́rɛ a ɩ,
a yãwmɛ na zuo a ɩ̃ zukɔbɛ,
a ɩ̃ kanyir za baar'a.
14Sore e, sàw faa mɛ̃,
Sore e, wa fɔ̃w wa sõw mɛ̃!
15A bɛlɩ dem na bɔbr a ɩ̃ kũu a,
bɛ nyɛ̃ vĩ bɛ za!
A bɛlɩ dem na bɔbr k'aa nãá ɩ m faa a,
bɛ nyɛ̃ vĩ lɛb'ɩ pùor!
16A bɛlɩ dem na mɩ́ la m a «'Ha! 'Ha!» a,
a vĩ, a dĩ bɛ bɛ mɩ́ dam gù!
17Bɛlɩ dem za na bɔbr fʋ a,
nʋ̃ɔ̀ nɩ cɩlʋ, a tɛr bɛ a fʋ ƴãw,
ɛ́ a bɛlɩ dem za na nɔnɛ fʋ, fʋ̃ʋ na ɩ a Faarɛ a,
bɛ yere kʋralɛ: «A Sore ɩ n kpɛ̃ɛ!»
18Mãa ɩ n bãbàal nɩ nã́w sob,
ɛcɛ a Sore tɛr'ɩ a ɩ̃ tɩɛrʋ.
Fʋ̃ʋ n'ɩ a ɩ̃ sõwne nɩ a ɩ̃ faarɛ,
ɩ̃ Naaŋmɩn i, taa cɛlɛ ɩ!
La Bible en Dagara © Alliance Biblique du Burkina Faso, 2013.