Sɛb-sõw yielu 37
37
Sɛb-sõw yielu 37 (36) sob
A Sore zie n'a a nɩ-mɩn faafʋ yire
1Daviir so ʋ.
Taa nyɛrɛ nɩ a yel-fa-maalbɛ suur ɛ,
ta nyùur'ɩ a bɛlɩ dem na ɩrɛ faa a ɩ:
2bɛ na var'ɩ fɔ̃wlɛ, mɛ̃ a mʋ̃ɔ a,
bɛ na ko na mɛ̃ a váar na mɩ́ ko a.
3Ƴãw a fʋ tɩɛrʋ a Sore ƴãw ɛ́ ɩrɛ vla,
lɛ n'a fʋ na kpɩɛr a tẽw ɛ́ tɛr ƴã-ɓaarʋ.
4Ɩ a Sore ʋ ɩ a fʋ nʋ̃ɔ̀,
ʋʋ na mɩ́ kʋ̀ b'ɩ ʋlɩ bom nɛ fʋ na bɔbr a.
5De a fʋ yele ƴãw a Sore nũú,
tɩɛrɛ ʋ, ʋʋ na maal'ɩ a lɛ na n'a a.
6Ʋ na ɩ na a fʋ mɩnʋ sãá mɛ̃ zi-wɛl-paala cãà a,
ɛ́ a fʋ yel-mɩŋa ɩ mɛ̃ mʋ̃tɔ̃-tuo a.
7Ɩ gbili a Sore niŋé, ɛ́ tɩɛrɛ ʋ.
Taa nyɛrɛ nɩ a sob nɛ yele na cere vla a suur ɛ,
a nɩr na mɩ́ tɛr libelibe a ɩ.
8Bɛr a suur, zawrɩ a fʋ su-yãyaar bɛr.
Ta nyɛrɛ suur ɛ, faa tɛwr'a a na wa n.
9Bʋ̃ʋ n'ʋ vɛ̃, bɛ na ír'ɩ a yel-fa-maalbɛ bɛr,
ɛcɛ a bɛlɩ dem na tɩɛrɛ a Sore a na so nɩ a tẽw.
10A cãà na cɛ blã, ɛ́ nɩ-faa yee!
Fʋ na bɛl bɛl'ɩ a be ʋ na tɩ be a,
nɩr za kʋ̃ cãà be ɩ!
11Ɛcɛ a su-siwri dem na so nɩ a tẽw,
bɛ na tɛr'ɩ ƴã-ɓaarʋ bɔkɔɔ!
12A nɩ-faa mɩ́ sɔwl'a cɔbrɛ yel-faar a nɩ-mɩŋa ƴãw,
ʋ mɩ́ nyɛ̃ nɩ ʋ nɩ suur pi kɔkɛɛ.
13Ɛcɛ a Sore laar ʋ na,
ʋ na nyɛ̃ a ʋ san-yaafʋ bibir ʋ tarɛ a ƴãw.
14A nɩ-faar vʋ̃ɔnɛ nɩ a zɛbr-sɔ-kpɛ̃ɛ,
bɛ dúore nɩ a tam, kɛ́ bɛ tɛ a bãbàal nɩ a nã́w sob lɔb,
kɛ́ bɛ kʋ a bɛlɩ dem na cere vla a.
15Ɛcɛ a bɛ zɛbr-sɔ-kpɛ̃ɛ na lɛb'a ŋmɛlɩ cɔ̀r a bɛ socir,
ɛ́ a bɛ tam kar.
16A blã a nɩ-mɩŋa na tɛr a
sa n a nɩ-faa na-bome yaga yaga,
17bʋ̃ʋ n'ʋ vɛ̃, a nɩ-faar fãw na baar'a,
ɛcɛ Sore mɩ́ tɩɛ nɩ a nɩ-mɩn tɛr.
18A bɛlɩ dem na bɛ tɛr sãwna a,
a Sore mɩ́ kaarɛ nɩ a bɛ nyɔ-vʋʋrʋ zie,
ɛ́ a tẽw na ɩ a bɛ gbã-dɩ-bom a, bɛ na so ʋ nɩ kʋralɛ.
19Bɛ kʋ̃ nyɛ̃ vĩ a kpɩɛrʋ daar ɛ,
ɛ́ a kɔ̃ bibie wa ta a, bɛ na mɩ́ tɩw na.
20A nɩ-faar na kpi na wɛ,
a Sore dɔ̃ dem kʋ̃ cɛlɩ zuo,
a dʋn mʋ̃ɔ 'wɔbrʋ ziir mɔ̃-puuru ɛ.
Bɛ na tɔl'a, bɛ na lɩɛb'ɩ zʋ̀ʋ́r tɔl.
21A nɩ-faa mɩ́ pɛ̃w na ɛ́ bɛ lɛb tɩr ɛ,
ɛcɛ a nɩ-mɩŋa ʋl zɔrɛ nɩ nɩbaalʋ mɩ́ tɩr.
22A bɛlɩ dem a Naaŋmɩn na mɩ́ maalɩ a,
na so nɩ a tẽw,
ɛ́ a bɛlɩ dem ʋ na mɩ́ ŋmɛ ƴãw a,
bɛ na ír bɛ na bɛr.
23A Sore zũú n'a a nɩsaal cenu mɩ́ vɩɛl,
ɛ́ a Sore nɔnɛ a sob sɔ́r.
24Ʋlɛ wa ɩ mɛ̃ ʋ lo na a, ʋ bɛ mɩ́ gã a tẽw ɛ,
a Sore na nyɔw ʋ a nũú a ƴãw.
25Ɩ̃ tɩ dãw na ɩ pɔlbile, ɛ́ mãa n'ɩ ŋan kor.
Ɛcɛ ɩ̃ bɛ dãw nyɛ̃ bɛ zawrɩ a nɩ-mɩŋa bɛr ɛ,
mɩ̀ bɛ dãw nyɛ̃ a ʋ bibiir bɛ zɛlɛ dɩrɛ ɩ.
26Ʋ zɔrɛ nɩ nɩbaalʋ kʋralɛ, ɛ́ pɛ̃wn a ʋ bome,
ɛ́ a ʋ bibiir ɩ Naaŋmɩn maalʋ.
27Dɛrɛ a faa, ɛ́ maalɛ a vla,
ɛ́ fʋ na tɛr'ɩ kpɛb zie kʋralɛ,
28bʋ̃ʋ n'ʋ vɛ̃, a Sore nɔnɛ na kɛ́ bɛ ɩrɛ
mɛ̃ a lɛ-na-tu-sɔr-a,
ɛ́ bɛ zawrɛ a ʋ nɩbɛ na sàw de ʋ a bɛrɛ ɩ.
Ʋ gùre bɛ nɩ kʋralɛ,
ɛcɛ bɛ na ír'ɩ a nɩ-faar bʋʋrɛ bʋʋrɛ bɛr.
29A nɩ-mɩn na so nɩ a tẽw,
bɛ na kpɩɛr ʋ nɩ kʋralɛ.
30A nɩ-mɩŋa mɩ́ tɛr'ɩ a yã-bãwfʋ suole,
a lɛ-na-tu-sɔr-a n'a ʋ mɩ́ yere.
31A ʋ Naaŋmɩn wulu
be n a ʋ socir pʋɔ, ʋ bɛ cere dẽdere ɩ.
32A nɩ-faa jɩɛrɛ nɩ a nɩ-mɩŋa ɛ́ bɔbr a ʋ kʋb,
33ɛcɛ a Sore bɛ bɛrɛ a nɩ-mɩŋa kʋ̀rɛ ʋ ɛ.
Bɛlɛ wa dɩrɛ nɩ a nɩ-mɩŋa ƴɛ̀rʋ a,
a Sore bɛ bɛrɛ bɛ ƴãwnɛ ʋ dɔwrʋ ɛ.
34Ƴãw a fʋ tɩɛrʋ a Sore ƴãw, ɛ́ tuur a ʋ sɔ́r,
ʋ na zɛw fʋ na, ɩ fʋ so a tẽw,
ɛ́ fʋ na nyɛ̃ nɩ a nɩ-faar bɛ na ír bɛr a.
35Ɩ̃ tɩ nyɛ̃ nɩ a nɩ-faa, ʋ ɩrɛ a nɩbɛ dɛ̃bɩ̃ɛ,
ɛ́ tɩ ìr àr mɛ̃ Libã tẽw sɛɛdɩr tɩɛ a.
36Ɩ̃ lɛb'a tu tɔl a be: nɩr zaa yee!
Ɩ̃ bɔ ʋ na, ɛ́ bɔ gù.
37Jɩ́rɛ a nɩ-vla, ɛ́ nyɛ̃ a nɩr na cere dẽdẽ a:
a nɩr na nɔnɛ a ƴã-ɓaarʋ a mɩ́ tɛr'ɩ bʋʋrɛ.
38Ɛcɛ a nɩ-gaarɩ na kpi n bɛ za pàw pɛr,
bɛ na ír'ɩ a nɩ-faar bʋʋrɛ bɛr.
39A Sore zie n'a a nɩ-mɩn faafʋ yire,
ʋlɛ n'ɩ a bɛ zɛbr-yir-kpɛ̃w a kpɩɛrʋ daar.
40Ʋ mɩ́ sõw bɛ na, ɛ́ faa bɛ.
Ʋ mɩ́ ír bɛ nɩ a nɩ-faar nuru pʋɔ,
ɛ́ faa bɛ, bɛ na mɩ́ zɔ kpɛ a ʋ naayir a ƴãw.
La Bible en Dagara © Alliance Biblique du Burkina Faso, 2013.