Sɔr-nɛ́ɛ 24
24
1A Balaam tɩ nyɛ̃ na a Sore na bɔbr a Ɩsɩrayɛl nɩbɛ maalʋ tuotuo a. Alɛ na so ʋ bɛ lɛb tɩ bɔ bãw a lɛ a Naaŋmɩn na yel, mɛ̃ a dãwdãw a ɩ. Ɛcɛ ʋ tɩ lɩɛb'a tori a wɛja-kpalɛ. 2Ʋ tɩ dʋɔ nɩ a zu nyɛ̃ a Ɩsɩrayɛl nɩbɛ na be a bɛ laɩ pʋɔ dɔwlʋ dɔwlʋ a. Lɛ n'a a Naaŋmɩn Vʋʋrʋ tɩ siw ʋ, 3ʋ ƴɛ̀r lɔb'ɩ a zʋkpar ŋa:
«À ŋá n'a ɩ̃ yere,
a mãa, Bewɔɔr bidɛb, Balaam,
a nɩr ʋl na nyɛrɛ parpar a.
4À ŋá n'a ɩ̃ yere,
mãa na mɩ́ wõ a Naaŋmɩn ƴɛ̀rʋ
ɛ́ nyɛ̃ a bʋ̃-nyɛrɩ a Kpɛnʋ-za-sob
na mɩ́ bɛr a wa a.
Ʋ mɩ́ sɩrɩ na ɩ ɩ̃ nyɛ̃ ʋ
a lɛn daar ɩ̃ na mɩ́ puore ʋ nɩ ɩ̃ tʋɔra-siwru a.
5Ɩsɩrayɛl nɩbɛ ɛ, nyɩɩm Zakɔb bʋʋrɛ ɛ,
nyɛ̃ a pɛnɛ-sɛwr nyɩ na kpɩɛr a na vɩɛl a!
6A wɩɛr'a tɩ cere mɛ̃ fʋɔlɩ kʋ̃ɔ na darɛ taa a,
mɛ̃ zaadɛnɩ na be man nʋɔr a,
mɛ̃ alowɛsɩ bɩɩ sɛɛdɩr tɩɩr
a Sore na sɛl bàa nʋɔr a.
7A ɩ na mɛ̃ kʋ̃ɔ na paalɩ yi a ƴãwfʋ zie
gbɔlɛ yaga za a bʋ̃-kʋ́ɔrɩ pʋɔ a.
A Ɩsɩrayɛl nɩbɛ nãà na tʋ̃ɔ́ nɩ a Agagɩ#24:7 Agagɩ: Nyɛ̃ 1Sa 15.8.,
ɛ́ a bɛ naalʋ-tẽw yɛlɛ cere.
8A Naaŋmɩn ɩ n nɩ fãw bɛ yi a Eziptɩ,
fãw na bɛ tɛr tʋ̃ɔ́fʋ mɛ̃ wɛ-náab fãw a.
Bɛ vɔlɛ nɩ a nɩ-bʋʋr-yoru
na ŋmãa nɩ bɛ zɛbr a,
bɛ karɛ nɩ a bɛ kɔbɛ,
a bɛ pime kpɩɛr bɛ na cole.
9Bɛ ũúne na mɛ̃ gben a,
bɛ ganɛ na mɛ̃ wɛ-dʋ̃-faar a.
Ãa n'ʋ na fɛr bɛ bɛ ìr?
Ɩsɩrayɛl nɩbɛ ɛ, a maalʋ, a tuur sob nɛ
na ƴɛ̀rɛ nɔ-vla kʋ̀rɛ nyɩ a,
ɛ́ a ŋmɛ-ƴãw tuur sob nɛ
na ŋmɩɛr ƴãwn nyɩ a#24:9 Nyɛ̃ Yzt 49.9.!»
10A Balakɩ tɩ nyɛ̃ nɩ nɩ a Balaam suur. Ʋ tɩ vɛlɩ nɩ nũu cɔw ʋ ɛ́ yel ʋ à ŋá: «Ɩ̃ bʋɔlɩ fʋ na wa n a ka kɛ́ fʋ wa ŋmɛ ƴãw a ɩ̃ dɔ̃ dem, ɛcɛ a gb'a ata sob'ɩ à ŋá, fʋ na ƴɛ̀r a nɔ-vla kʋ̀ bɛ a! 11A na ɩ à ŋá a, cere, lɛb kul a fʋ tẽw! Ɩ̃ tɩ yel'a k'ɩ̃ɩ na ƴãw fʋ nɩ yaga za, ɛcɛ a Sore sɩb fʋ nɩ a ƴãwfʋ ŋa!»
A Balaam ƴɛ̀rɛ nɩ a Ɩsɩrayɛl nɩbɛ yúor na na yi a nɩdaar a ƴɛ̀rʋ
12A Balaam tɩ sɔw nɩ a Balakɩ à ŋá: «Ɩ̃ tɩ sʋ̃ɔm'a bul yel à ŋá kʋ̀ a nɩbɛ fʋ na tɩ tõ a ɩ̃ zie a: 13“A Balakɩ saa na kʋ̀ m a salm-pla za nɩ a salm-zɩɛ za na paalɩ a ʋ yir a, ɩ̃ kʋ̃ tʋ̃ɔ́ zawrɩ a Sore nʋɔr towtow ɛ. A ƴɛ̀rʋ a Sore na kʋ̀rɛ mɛ̃ a, al tɛwr'a ɩ̃ yere.” 14Ƴɛrɛŋa a, ɩ̃ lɛbr'a kule a ɩ̃ nɩ-bʋʋrɛ zie. Ɛcɛ wa, ɩ̃ bɔbr'a k'ɩ̃ɩ yel a ʋlɩ bom nɛ a Ɩsɩrayɛl nɩbɛ na na ɩ a fʋ nɩ-bʋʋrɛ a nɩdaar a kʋ̀ b!» 15Lɛ n'a a Balaam tɩ ƴɛ̀r lɔb a zʋkpar ŋa:
«À ŋá n'a ɩ̃ yere,
a mãa Bewɔɔr bidɛb, Balaam,
a nɩr ʋl na nyɛrɛ parpar a.
16À ŋá n'a ɩ̃ yere,
mãa na mɩ́ wõ a Naaŋmɩn ƴɛ̀rʋ a,
mãa na bãw a Naaŋmɩn-na-do-saa-bɛ-pɩɛl-a yel-sɔwlɩ,
ɛ́ nyɛrɛ a bʋ̃-nyɛrɩ
a Kpɛnʋ-za-sob na mɩ́ bɛr a wa a.
Ʋ mɩ́ sɩrɩ na ɩ ɩ̃ nyɛ̃ ʋ,
a lɛn daar ɩ̃ na mɩ́ puore ʋ nɩ ɩ̃ tʋɔra-siwru a.
17Ɩ̃ nyɛ̃ nɩ a bom ʋl na na ɩ a,
ɛcɛ ƴɛrɛŋa bɛ n'a ɩ, ɩ̃ nyɛ̃ nɩ yel kãw,
ɛcɛ nɩdaar'a a yel ʋl na ɩ:
Ŋmar-bir'ʋ pur a Zakɔb bʋʋrɛ pʋɔ,
nãà ìr'ɩ a Ɩsɩrayɛl bʋʋrɛ sɔgɔ.
Ʋ ŋmɩɛr'ɩ a Mowab tẽw dem tacɩlɛ nɩ a ʋ nãà dàa,
ʋ kʋrɛ nɩ a tẽw nɩ-yʋɔrɩ.
18Ʋ mɩ̀ zɛb'a de a Seyiir,
a ʋ dɔ̃ dem, Edɔm tẽw nɩbɛ, tẽw.
A Ɩsɩrayɛl nɩbɛ zɛb'a tʋ̃ɔ́.
19Nɩ-kpɛ̃ɛ yi n a Zakɔb bʋʋrɛ pʋɔ,
ʋ kʋrɛ nɩ a bɛ dɔ̃ dem tẽ-kpɛ̃ɛ nɩbɛ na cɛ a.»
A Balaam ƴɛ̀rɛ nɩ a Ɩsɩrayɛl dɔ̃ dem baarʋ ƴɛ̀rʋ
20A Balaam tɩ nyɛ̃ nɩ a Amalesitɩ mɩnɛ a pùorí, ɛ́ ƴɛ̀r a ƴɛ̀rʋ ŋa:
«Amalɛkɩ n'ɩ ŋan ɩ tẽw na kpɛmɛ zuo a za a,
ɛcɛ ʋ na sãw nɩ ʋ za nɩdaar.»
21A Balaam mɩ̀ tɩ nyɛ̃ nɩ a Kenitɩ mɩnɛ, ɛ́ yel à ŋá:
«A nyɩɩm, Kenitɩ mɩnɛ,
bom bɛ damnɛ nyɩ a nyɩ tẽw pʋɔ,
mɛ̃ pìir zu cow pʋɔ n'a nyɩ be a.
22Ɛcɛ bɛ na nyɩw nɩ a nyɩ yie bɛr,
ɛ́ a Asiiri tẽw dem nyɔw nyɩ cen nɩ.»
23A Balaam tɩ cãà na lɛb yel à ŋá:
«'Woi! Ãa n'ʋ na cãà vʋʋrɛ a Naaŋmɩn wa ɩ baar'a?
24Gbee na yi n Sɩɩpʋr wa,
a nɩbɛ bɛ ŋa na dɔwr'ɩ a Asiiri tẽw dem,
bɛ na dɔwr'ɩ a Ebɛɛr#24:24 Ebɛɛr: A Ɩsɩrayɛl nɩbɛ sãàkʋm-kʋra n'ʋ. bʋʋrɛ,
ɛcɛ a bɛl mɩ̀ wɩɛr'ɩ a bɛ kũu zie.»
25A ƴɛ̀rʋ á ŋá pùorí a, a Balaam tɩ lo n a sɔ́r kule a ʋ tẽw, ɛ́ a Balakɩ mɩ̀ cere a ʋ cenu zie.
Currently Selected:
Sɔr-nɛ́ɛ 24: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
