Zɔb 41
41
1Nɩr wa manɛ k'ʋʋ na tʋ̃ɔ́ ʋ na a, ʋ bɛlɛ nɩ ʋ tʋɔra!
A ʋ nyɛ́b tɛwr mɩ́ ɩ na fʋ lɩɛb tɩ lo!
2Ãa n'ʋ kpɛ pʋra na sàw damnɛ ʋ?
A na ɩ à ŋá a, ãa n'ʋ pãa na sàw bà gbɛ́r a ɩ̃ niŋé?
3Ãa san n'ʋ ɩ̃ dɩ a fɛr k'ɩ̃ɩ ya ʋ?
Mãa so bom za na be a tẽw zu a.
*
4Ɛcɛ ɩ̃ kʋ̃ bɛr a ʋ ƴã-gã-ɓɛrmɛ manʋ ɛ,
a ʋ fãw nɩ a ʋ mɩɛrʋ na mɛ vla za a manʋ ɛ!
5Ãa n'ʋ sɩ a ʋ po-gan?
Ãa n'ʋ sàw tɔl a ʋ kokamɛ ayi cara pʋɔ?
6Ãa n'ʋ fɛr ʋ ƴãw ʋ háa a ʋ nʋɔr ʋ za?
A ʋ nyɩmɛ ɩrɛ nɩ dɛ̃bɩ̃ɛ.
7A pɛgɛ ɩ na mɛ̃ zɛbr kur-pãgalɩ
na pɩɛrɩ pɩɛrɩ pàw a ʋ zikur za a,
a mɛ n taa ɩ pɛwr-kpãkara.
8Pɛwr ŋa mɩ́ nyɔw nɩ pɛwr ŋa,
kɛ̀ pɩɛl-bir kʋ̃ tʋ̃ɔ́ kpɛ a cara pʋɔ ɩ.
9Pɛwr ŋa mɩ́ mɛr'ɩ pɛwr ŋa
kɛ̀ bom za kʋ̃ tʋ̃ɔ́ a wɛl ɛ.
*
10Ʋ mɩ́ pʋnɩ na, a cãà caalɩ,
ɛ́ a ʋ mimie ɩ mɛ̃ zi-wɛl-paala cãà a.
11Vũu-zɛlɛ yire nɩ a ʋ nʋɔrɩ́,
vũu mɩ́ ɩ n pʋ̀rpʋ̀rpʋ̀r wa yi.
12Uuru yire nɩ a ʋ nyɔbɔgɛ pʋɔ,
mɛ̃ a uuru na mɩ́ yire
bom na karɛ ziduwle pʋɔ
bɩɩ dʋw bɛ na dʋwlɩ a pʋɔ a.
13A ʋ nyɔbɔgɛ pɩɛlʋ mɩ́ ɩ n vũu bie a hɛw,
vũu-zɛlɛ yire nɩ a ʋ nʋɔrɩ́.
14A ʋ nyũumɩ́ n'a a ʋ fãw be,
a ʋ niŋé a, pʋ̀lá mɩ́ ƴaw fʋ na.
*
15A ʋ ƴã-gan pili pili na,
fʋ̃ʋ saa nɛbr fʋ kʋ̃ tʋ̃ɔ́ nɛ̃ kpɛ ɩ.
16A ʋ socir kpawl'a mɛ̃ kʋsɩɛr a,
ʋ kpɛmɛ na mɛ̃ nɩɛr a.
17Ʋlɛ wa ìr a, dɛ̃bɩ̃ɛ mɩ́ nyɔw nɩ a gãdaar bɛ zɔ yaarɩ.
18Bʋ̃ʋ n'ʋ vɛ̃, zɛbr-sɔ-kpɛ̃ɛ bɛ ɩrɛ ʋ bom za ɩ,
kafin-wogo, kafin-ŋmãa nɩ pĩi a, ʋ bɛ zɔrɛ a ɩ.
19Ʋl zie a, a kure ɩ n mur,
ɛ́ a kur-zɩɛ ɩ dà-pʋ̃ɔn.
20Bɛ kʋ̃ tʋ̃ɔ́ tɛ ʋ ʋ zɔ ɩ,
ʋl zie a, a kpala kube ɩ na mɛ̃ mur a.
21Ʋl zie a, kukuli-ŋmãa ɩ n mur-ŋmale,
a kafine gɔmɛ ɩrɛ ʋ nɩ laarʋ.
*
22A ʋ púor ɩ n pime nyãnyãa,
ʋ mɩ́ nya n a mɛ̃mɛrɛ tɔl'ɩ mɛ̃ kur-jajaa a.
23Ʋlɛ wa kpɩɛr a kʋ̃ɔ pʋɔ wa báarɛ a,
a kʋ̃ɔ mɩ́ kárɛ na.
Ʋ mɩ́ ɩ n kʋ̃ɔ puuru pàw a kʋ̃ɔ-kpɛ̃ɛ.
24Ʋ mɩ́ tɔl'a ɛ́ puo sɔr-pla parpar.
A kʋ̃ɔ-zulu mɩ́ ɩ na mɛ̃ a bul'ɩ zukɔbr-pɛlɛ a.
25Ʋ bɛ tɛr ʋ tɔ a tẽw zu ɛ,
ɩ̃ ír ʋ na ʋ bɛ bãw dɛ̃bɩ̃ɛ ɩ.
26Ʋ bɛ zɔrɛ a dʋn al na yel kɛ́ a bɛ wõ a ɩ,
ʋlɛ n'ɩ a wɛ-dʋ̃-faar za nãà.
La Bible en Dagara © Alliance Biblique du Burkina Faso, 2013.