Zɔb 40
40
A Zɔb'ʋ cɛ a sɔwfʋ
1A Sore tɩ bʋɔl'ɩ a Zɔb sowr'ʋ:
2Zɔb i, fʋ ŋmɩɛr'ɩ nɩ a Kpɛnʋ-za-sob nɔkpɛn,
ƴɛrɛŋa a, fʋ na bɛr'a bɩɩ fʋ na sɔw na?
3Lɛ n'a a Zɔb tɩ sɔw a Sore yel:
4Ɩ̃ bɛ tɛr pɛr ɛ, bʋ̃ʋ n'ʋ ɩ̃ na sɔw fʋ?
Ɩ̃ pàw nɩ a ɩ̃ nʋɔr.
5Ɩ̃ ƴɛ̀r'ɩ gb'a-been, ɩ̃ bɛ lɛb ƴɛ̀rɛ ɩ.
Ɩ̃ ƴɛ̀r'ɩ gb'a ayi, ɩ̃ bɛ lɛb ƴɛ̀rɛ ƴɛ̀rʋ za ɩ.
A Zɔb nɔ̃w bʋɔlɛ nɩ ʋ tʋɔra Naaŋmɩn bɩɩ?
6A Sore tɩ be n a saa-sɛsɛb pʋɔ ɛ́ bʋɔlɩ a Zɔb yel ʋ à ŋá:
7Cɔbrɩ gù mɛ̃ dɛb a:
ɩ̃ na sowri fʋ na fʋ sɔw kʋ̀ m.
8Fʋ bɔbr'a kɛ́ fʋ yel k'ɩ̃ɩ bɛ ɩ nɩ-mɩŋa ɩ?
Fʋ bɔbr'a k'ɩ̃ɩ ɩ sãwna sob fʋ tʋ̃ɔ́ tɛr yel-mɩŋa a?
9A fʋ kpãkpãw kpɛmɛ na man a ɩ̃ dem ɩ?
A fʋ kɔkɔr mɩ́ tanɩ na mɛ̃ a ɩ̃ dem a?
10Alɛ wa ɩ lɛ a, fʋ̃ʋ ƴãw
a yúor-vɩɛlʋ-danʋ nɩ a kpɛ̃ɛnʋ pɩ̃ɛmɛ,
su a dɛpaalʋ nɩ a vɩɛlʋ.
11Ɩ a fʋ su-tʋlʋ kpãkpã ìr a nɩsaalbɛ zu,
jɩ́r a pɔ̀lʋ dem za gb'a-been bɛ su zu.
12Ʋ̃ʋ, jɩ́r bɛ gb'a-been,
ɛ́ bɛ siwri bɛ tʋɔra bɛ za!
Nɛb a nɩ-faar kʋ a ʋlɩ pɛr nɛ pʋɔ.
13Ũù bɛ sãsaralɛ bɛr a tẽw,
pàw bɛ bɛr a kũu gaso pʋɔ.
14Lɛn daar'a mãa mɩŋa na mʋʋrɩ fʋ
a fʋ fãw na ɩ fʋ zɛb tʋ̃ɔ́ a ƴãw!
A ƴɛ́n
15Jɩ́r nyɛ̃ a ƴɛ́n a: mãa n'ʋ ír ʋ mɛ̃ ɩ̃ na ír fʋ a.
Ʋ 'wɔbr'ɩ mʋ̃ɔ mɛ̃ a náab a.
16Nyɛ̃ a fãw na be a ʋ sɩɛmɩ́ sɛw a,
maal bɛl a ʋ po-jiile na kpɛmɛ a kaa!
17Ʋ mɩ́ tãà nɩ a ʋ zʋʋr mɛ̃ sɛɛdɩr tɩɛ sɩɛ a,
a ʋ gbɛbɛrɛ jiile mĩ na mɛ̃ mie a.
18A ʋ kɔbɛ kpɛmɛ na mɛ̃ kur-dà-zɩɩr na ɩ vɛɛ a,
ɛ́ a ʋ nyabie ɩ mɛ̃ kur-dàar a.
19A ɩ̃ bʋ̃-maalɩ za pʋɔ bʋ̃-dãw n'ʋ!
Mãa yõ na ɩ a ʋ íre a, mãa n'ʋ tʋ̃ɔ́ ʋ.
20Tan zu n'a ʋ nyɛrɛ a ʋ mʋ̃ɔ 'wɔbr,
be a wɛ-dʋn na mɩ́ ƴawr dɩ̃ɛnɛ gʋɔr a.
21Ɛcɛ tɩɩr pile n'ɩ a ʋ gaa zie,
bà-ƴɔrɛ bàa-kɛkɛɛ pʋɔ n'a ʋ mɩ́ sɔwlɩ.
22A tɩɩr na viiri koli a bàa a ɓaarʋ mɩ́ pàw ʋ na.
23A man saa damnɛ nɩ fãw a, ʋ bɛ mĩin a ɩ.
A kʋ̃ɔ saa do tɩ tɔ a ʋ nʋɔr a,
ʋ bɛ damnɛ damnʋ za ɩ.
24Ʋlɛ wa bãwnɩ a a, ãa n'ʋ na tʋ̃ɔ́ nyɔw ʋ
ɛ́ cɔ̀r ʋ a nyɔbɔw puo?
A Levɩatã
25Zʋm-pĩi n'ʋ fʋ na ƴãw nyɔw nɩ a Levɩatã#40:25 Levɩatã: Nyɛ̃ 3.8 nɩ 26.13 nɩ a manʋ. bɩɩ?
A fʋ zʋm-pĩi n'ʋ fʋ na nyɔw nɩ ʋ a zɛl ƴãw ɩ?
26Fʋ na tʋ̃ɔ́ na tõ bàa-kɛkɛr ƴãw a ʋ nyɔbɔgɛ pʋɔ ɔ?
Fʋ na tʋ̃ɔ́ na cɔ̀r a ʋ kokam puo nɩ kure dale e?
27Ʋlɛ n'ʋ na lɔbr nuru zɛlɛ nɩ fʋ,
ɛ́ ƴɛ̀rɛ a fʋ zie bàalʋbàalʋ ʋ?
28Ʋ na sàw na fʋ̃ʋ nɩ ʋl maalɩ wõ-taa
ʋ ɩ a fʋ gbãgbaa kʋralɛ ɛ?
29Fʋ na dɩ̃ɛnɛ nɩ ʋ na mɛ̃ mʋ̃ɔ pʋɔ lile fʋ na dɩ̃ɛnɛ nɩ a?
Fʋ na 'lẽ ʋ na mɛ̃ bale a
ƴãw a fʋ powli dɩ̃ɛnɛ nɩ ɩ?
*
30A zʋm-nyɔwrbɛ na tʋ̃ɔ́ na lãw taa kʋɔrɩ ʋ bɩɩ?
Bɛ na tʋ̃ɔ́ na ŋma ʋ põ yɛ-yɛrbɛ ɛ?
31Fʋ na tʋ̃ɔ́ na cɔ̀r a ʋ gán puori ziir za ɛ́ tɛ a ʋ zu puo o?
32Ír nũu dɔwlɩ a ʋ zu ɛ́ nyɛ̃:
a mɔb nyɩ na na mɔ̃ a tɩɛrʋ tɛwr na ɩ na fʋ bɛ lɛb ɩrɛ lɛ ɩ!
La Bible en Dagara © Alliance Biblique du Burkina Faso, 2013.