Zeremi 51
51
1À ŋá n'a a Sore yere:
«Ɩ̃ na ɩ na sɛsɛb na sãwnɛ bom za a,
ʋ fu a Babɩlɔn tẽw nɩ a ʋ nɩbɛ zu.
2Ɩ̃ na bɛr'ɩ nɩ-sãanbɛ bɛ wa a Babɩlɔn tẽw ƴãw,
wa diw a ʋ nɩbɛ yaarɩ,
mɛ̃ sɛsɛb na mɩ́ yɛ́lɩ mɔ̃-kon a.
Bɛ na sãw nɩ a ʋ tẽw bɛr.
Bʋ̃ʋ n'ʋ vɛ̃, bɛ na ìr'a jil koli ʋ a kpɩɛrʋ bibir.»
3A tam-tɛbrbɛ, bɛ tɛbr a dɔ̃ dem tam-tɛbrbɛ!
Ɛ́ a dɔ̃ dem ta pɔrɛ nɩ a bɛ zɛbr-nyãa-kpali ɛ!
Nyɩ ta bɛr a Babɩlɔn soja-pɔlɛ bɛ vʋʋrɛ ɩ!
Nyɩ kʋ a ʋ zɛbr-nɩbɛ pàw pɛr!
4A bɛlɩ dem bɛ na ƴãw a bàalʋ a,
na gã gã nɩ tẽw a Babɩlɔn tẽw pʋɔ,
ɛ́ a bɛlɩ dem bɛ na kʋ a zɛbr zie a
pàw a tẽ-bɛrɛ sɛ́ɛ.
5Bʋ̃ʋ n'ʋ vɛ̃, a bɛ tẽw paal'ɩ a sãwfʋ
bɛ na ɩ sãw a Ɩsɩrayɛl Naaŋmɩn na ɩ sõw a.
Ɛcɛ a Ɩsɩrayɛl nɩ a Zuda bɛ bɔr a bɛ Naaŋmɩn,
a Sore kpɛnʋ-za-sob, bɛr ɛ.
6Nyɩ yi záa a Babɩlɔn tẽw pʋɔ,
ŋa mɩ́ zɔ faa ʋ tʋɔra!
Alɛ bɛ ɩ lɛ, nyɩ na kpi n
a lɛn daar ʋlɛ wa yarɛ a ʋ ɩ-faar san a.
Bʋ̃ʋ n'ʋ vɛ̃, a Sore san-yaafʋ daar'ʋ ta.
Ʋ na ya ʋ na mɛ̃ a lɛ a na sɛw taa nɩ ʋ a.
7A Babɩlɔn tɩ ɩ n salm-zɩɛ koli-nyúura a Sore nũú.
Ʋ mɩ́ tɩ ɩ n a tẽ-daa za ʋ kuoli.
A nɩ-bʋʋrɛ mɩ́ tɩ nyũ n a ʋ divɛ̃ tɩ bol'ɩ.
8Bɛ wa bere na a Babɩlɔn lo, lo ŋmɛr yàarɩ.
«Nyɩ kone ʋ! Nyɩ ɩ kãá sɔ a ʋ natɩɛ,
kapaw ʋ na sanɩ na.»
9«Tɩ yel kɛ́ tɩ sanɩ a Babɩlɔn,
ɛcɛ ʋ bɛ tɛr sanʋ ɛ.
Nyɩ ɩ tɩ bɛr ʋ, ɛ́ ŋa za mɩ́ kul a ʋ tẽw!
Bʋ̃ʋ n'ʋ vɛ̃, a ʋ dɔwrʋ do na tɩ tɔ a salom,
ʋ do na tɩ tɔ a zũzuwe.
10A Sore dɩ n a ƴɛ̀rʋ kpɛ tɩ.
Nyɩ ɩ tɩ cen a Sɩyɔ̃ tɩ manɩ
a lɛ za a Sore tɩ Naaŋmɩn na ɩ a.»
11A Sore tɛr'ɩ tɩɛrʋ k'ʋʋ sãw a Babɩlɔn tẽw. Ʋ sɩ̃wnɛ nɩ a Mɛdɩ mɩnɛ na-mɩnɛ tɩɛrʋ a al ƴãw. A Sore san-yaafʋ n'a, ʋ yáarɛ nɩ a ʋ yir-sõw san.
Nyɩ kàr a nyɩ pime, nyɩ ƴãw a paalɩ a nyɩ lɔwr.
12Nyɩ zɛw a dɩrapo#51:12 Dɩrapo: Pɛn bɛ na mɩ́ 'lẽ ƴãw dàa ƴãw, ʋ ɩ nɩbɛ bɛ mɩnɛ kãw, bɩɩ bom kãw bãwfʋ a n'ʋ. Nyɛ̃ Ety 17.15, Sɔr-n 1.52, Ssy 20.6, Ɩza 5.26. a zɛbr tib ƴãw,
a Babɩlɔn tẽw dacĩ-bɛrɛ ŋmɛr bɛ́rʋ ƴãw.
Nyɩ ɩ a sojarɩ yãwmɛ dɔwlɩ, a ziir bɛ na gùre a pʋɔ.
Nyɩ ƴãw zi-piwrbɛ!
Nyɩ sɔwlɩ nɩbɛ a zɛbr ƴãw!
À à ŋá n'a a Sore maalɛ a lɛ ʋ na tɩɛrɩ bin a,
a ʋlɩ bom nɛ ʋ na yel a Babɩlɔn tẽw dem ƴãw a.
13Babɩlɔn i, fʋ̃ʋ na kpɩɛr a man-kpɛ̃ɛ nʋɔr a,
fʋ̃ʋ na tɛr na-bome bɛ dɩ vuo a,
a fʋ baarʋ ta na, fʋ zu n a fʋ taabɛ a sɛw.
14A Sore, a kpɛnʋ-za-sob,
pɔ n nɩ a ʋl mɩŋa à ŋá:
«Sɩza, ɩ̃ na paalɩ fʋ na nɩ nɩbɛ mɛ̃ sãsoge a,
ɛ́ bɛ na ŋmɛ n a zɛb-tʋ̃ɔ́fʋ cɛlsɩ a fʋ ƴãw.»
15A Sore maal'ɩ a tẽw nɩ a ʋ fãw,
ʋ ɩ n a tẽ-daa ʋ àr nɩ a ʋ yã-bãwfʋ,
ɛ́ dɔl a salom nɩ a ʋ yã.
16Ʋlɛ wa ƴɛ̀rɛ a,
a kʋ̃ɔnɩ mɩ́ ɓanɛ nɩ taa a salom zu,
zũzu-bɛrɛ mɩ́ yi n saa-pɛrɩ́ dúor,
a saa-nyɩwrʋ mɩ́ ɩ na a saa waar,
a sɛsɛb mɩ́ yi n a ʋ beba ziir.
17A nɩbɛ za dɛ na mɩ́ àr lɛ,
gem, ɛ́ bɛ bãw a pɛr ɛ.
Vĩ nyɔw nɩ salm-nyɩlɛ za a ʋ tɩɩb ƴãw.
A ʋ tɩbɛ dasuli ɩ n bɛ̀lʋ:
vʋʋrʋ kãw za bɛ be a pʋɔ ɩ.
18A bɛ tɛr pɛr ɛ, laarʋ tɛwr'a a ɩrɛ.
A Sore wa ìr a ƴãw a lɛn daar a, a na bɔr a.
19Ɛcɛ a Zakɔb Naaŋmɩn, na ɩ a Ɩsɩrayɛl na-bom a,
ʋ bɛ ŋmɛ̃ taa nɩ a ɩ.
A ʋl a, ʋlɛ n'ɩ a bome za íre,
ɛ́ a Ɩsɩrayɛl'ɩ a dɔwlʋ ʋ na so a.
A ʋ yúor'ɩ: «A Sore, a kpɛnʋ-za-sob.»
A Babɩlɔn tẽw baarʋ
20A Sore yere na: «Babɩlɔn i,
fʋ ɩ n dakpuli-ŋmãa a ɩ̃ zie, zɛbr bom.
Fʋ̃ʋ n'ʋ ɩ̃ pɔb'ɩ ten tʋ̃ɔ́ pelẽpelẽ,
ɛ́ sãw nɩ naalʋ-ten bɛr.
21Fʋ̃ʋ n'ʋ ɩ̃ pɔb'ɩ wie nɩ a zɔmnbɛ tʋ̃ɔ́ pelẽpelẽ,
zɛbr-torkori nɩ a dãan-dãanbɛ.
22Fʋ̃ʋ n'ʋ ɩ̃ pɔb'ɩ dɛbr nɩ pɔwbɛ tʋ̃ɔ́ pelẽpelẽ,
dɛb-nyamɛ nɩ pɔlbili, dɛbli nɩ powli.
23Fʋ̃ʋ n'ʋ ɩ̃ pɔb'ɩ dʋ̃-cɩ̃ɩnbɛ
nɩ a bɛ dʋn tʋ̃ɔ́ pelẽpelẽ,
ka-kʋ́ɔrbɛ nɩ a bɛ na-kʋɔrɩ na caw caw a,
na-kpɛ̃ɛ-lɩɛrbɛ nɩ tẽli-kaarbɛ.
24Ɛcɛ, a mãa Sore, ɩ̃ yere na:
nyɩ na nyɛ̃ nɩ a lɛ ɩ̃ na na ƴãw
a Babɩlɔn tẽw nɩ a Babɩlɔn tẽw dem ya
a faa al za bɛ na maalɩ a Sɩyɔ̃ tẽw a.
25Mãa nɩ fʋ̃ʋ nɛbɛ, Babɩlɔn i, a Sore n'ʋ yel.
A sãw-bɛrʋ ƴãw a,
fʋ kpɛmɛ na mɛ̃ tãw a,
ɛ́ fʋ sãwnɛ nɩ a tẽ-daa za!
Ɩ̃ na zɛw nɩ nũu a fʋ ƴãw,
ɩ̃ na ɩ na fʋ yi a pìe nyʋɔrɩ́ za bili siw,
ɩ̃ na ɩ na fʋ lɩɛb'ɩ tãw na ɩ vũu a.
26Bɛ kʋ̃ lɛb tuw ír dacĩ-goraa kʋsɩɛr
nɩ yir-pɛr kʋsɩɛr a fʋ pʋɔ ɩ.
Fʋ na lɩɛb'ɩ wɛja-kpalɛ na ɩrɛ nɩbaalʋ kʋralɛ a.»
À à ŋá n'a a Sore yel.
27Nyɩ zɛw a dɩrapo a tẽw pʋɔ,
nyɩ pɛblɩ ɩɩl a nɩ-bʋʋr-yoru sɔgɔ.
Nyɩ ɓã a nɩ-bʋʋrɛ taa a Babɩlɔn tẽw ƴãw,
nyɩ bʋɔlɩ a Araratɩ, a Mini,
a Asɩkenaazɩ#51:27 A naalʋ-ten ata á ŋá tɩ be n a Mezopotami saa-pɛrɩ́-gʋba-lowr, a pɛr lɛ kɛ́ a dɩ̃a Iirakɩ tẽw saa-pɛrɩ́-gʋba-lowr. naalʋ-ten a ʋ ƴãw.
Nyɩ ƴãw sojarɩ nɩ-bɛrɛ bɛ ír sojarɩ.
Nyɩ ƴãw wie na yãwmɛ mɛ̃ sãsoge a, a cen a ʋ ƴãw.
28Nyɩ ɓã a nɩ-bʋʋrɛ taa a ʋ ƴãw,
baa zuo a za a Mɛdɩ mɩnɛ na-mɩnɛ,
a bɛ na-kpɛ̃ɛ-lɩɛrbɛ, a bɛ tẽli-kaarbɛ
nɩ a tẽw ʋl za bɛ na kaarɛ a.
29A tẽsɔw màwr'a, ʋ màwr'ɩ dɛ̃bɩ̃-mawfʋ
a lɛn daar a Sore na tuur
a lɛ ʋ na tɩɛrɩ a Babɩlɔn tẽw ƴãw a:
ʋ ɩrɛ na a Babɩlɔn tẽw
lɩɛbɛ wɛja-kpalɛ na ɩrɛ nɩbaalʋ a,
tẽw nɩr za na bɛ cãà kpɩɛr a.
30A Babɩlɔn tẽw soja-gãdaar bɛr'ɩ a zɛbr,
bɛ sɔwlɛ nɩ a gõgone pʋɔ.
A bɛ gãdaalʋ baar'a, bɛ lɩɛb'ɩ pɔwbɛ!
A tẽ-kpɛ̃ɛ dɩ̃dɛɛ yuori na, a ʋ yie dɩrɛ nɩ vũu.
31A nɩbɛ bɛ na tõ a zɔrɛ na lɩɛrɛ taa
kɛ́ bɛ tɩ yel kʋ̀ a Babɩlɔn tẽw nãà:
«Bɛ zɛb'a de a tẽ-kpɛ̃ɛ ʋ za,
32a tɔlʋ ziir piw na,
bɛ nyɩw nɩ a zi-kpɛn na gù ʋ a bɛr,
pʋl-vʋ̃ɔ tɛr'ɩ a sojarɩ.»
33À ŋá n'a a Sore, a kpɛnʋ-za-sob,
a Ɩsɩrayɛl Naaŋmɩn, yere:
«Bɛ nɛbr'ɩ a Babɩlɔn na ɩrɛ nɩbaalʋ a,
mɛ̃ zie bɛ na cɔbrɛ ble vab ƴãw a.
Ka nɩ blã a, a na ɩ n a bʋ̃-dieri-deb daar a ʋ zie.»
A Sore na yáa nɩ a ʋ nɩbɛ san
Zerizalɛm
34«A Babɩlɔn tẽw nãà, Nabikodonozɔɔr, za mɛ̃ na vɔl,
ʋ ŋmɔwrɩ mɛ̃ na ɛ́ bɛr mɛ̃, mɛ̃ la-zawla a.
Ʋ vɔl mɛ̃ na mɛ̃ wa-bɩɛ#51:34 Wa-bɩɛ: Koro za dem suolu pʋɔ dʋ̃-bɩɛ kãw n'ʋ. Ʋlɛ tɩ n'ɩ a faalʋ kpɛnʋ za bãwfʋ. Nyɛ̃ Zɔb 3.8 nɩ a manʋ. a.
Ʋ paal'ɩ a ʋ púor nɩ a ɩ̃ bʋ̃-vɩɛlɩ vɩɛlɩ zie, ɛ́ diw mɛ̃ bɛr.
35A Sɩyɔ̃ tẽw dem na tʋ̃ɔ́ na yel:
a kpɩɛrʋ nɩ a dɔwrʋ a Babɩlɔn na ƴãw tɩ a,
a lɛb lo a ʋ zu!
A Zerizalɛm tẽw dem na tʋ̃ɔ́ na yel:
a tɩ zɩ̃ɩ a Babɩlɔn tẽw dem na ɩ a cir a, a sãwna,
a lɛb lo a bɛ zu!»
*
36A na ɩ à ŋá a, nyɛ̃ a lɛ a Sore na yere a Zerizalɛm ƴãw a:
«Ɩ̃ na tu n a fʋ yele pùor ɛ́ yáa a fʋ san:
ɩ̃ na ɩ na a Babɩlɔn tẽw man ʋ ko,
ɛ́ ɩ a ʋ bul-nʋɔr ʋ sɩr.
37A Babɩlɔn na lɩɛb'ɩ kʋsɛbɛ na gbõ taa a,
gbõgbo-cili kpɛb zie,
zi-faa bɛ na mɩ́ nyɛ̃ ŋmɩɛr pʋl-vʋ̃ɔ cɛlsɩ a.
Nɩr za kʋ̃ cãà kpɩɛr ʋ ɛ.
38Ƴɛrɛŋa a, a Babɩlɔn tẽw dem za
ɩ na mɛ̃ gben na ùore a,
bɛ kone na mɛ̃ wɛ-dʋ̃-faar a.
39A bɛ bʋ̃-bɔbra tuo dɩrɛ bɛ na,
ɩ̃ɩ cɔbrɛ cuw dɩb a bɛ ƴãw.
Ɩ̃ na ƴãw na bɛ nyũ tɩ kuoli gã kpãlãkpãlã.
Bɛ na gúr'ɩ gʋ̃ɔ na bɛ tɛr baarʋ a,
bɛ kʋ̃ lɛb ìr towtow ɛ,
a mãa Sore, mãa n'ʋ yere.
40Ɩ̃ tɛr bɛ na cere nɩ a kʋb zie mɛ̃ píir a,
mɛ̃ pʋ́rɩ bɩɩ bʋrɩ a.»
Kon na kõ a Babɩlɔn tẽw ƴãw a
41Ŋmɩŋmɩn za n'a?
A Sesakɩ#51:41 Sesakɩ: A Babɩlɔn tẽw n'ʋ bɛ mɩ́ tɩ kpɔwrɩ bʋɔlɩ a Sesakɩ. Nyɛ̃ 25.26. tẽ-kpɛ̃ɛ a yúor na yi a tẽ-daa za zu a,
bɛ de ʋ na, bɛ zɛb'a de ʋ!
Ŋmɩŋmɩn za n'a?
A Babɩlɔn tẽw lɩɛb'ɩ wɛja-kpalɛ
na ɩrɛ nɩbaalʋ a nɩ-bʋʋrɛ sɔgɔ a!
42A kʋ̃ɔ-kpɛ̃ɛ do na ta a Babɩlɔn tẽw,
a ʋ kʋ̃ɔ-mie na ɩrɛ gɔmɛ a, paal'a pàw ʋ.
43A ʋ tẽ-bɛrɛ lɩɛb'ɩ ziir na kpɛ faar a.
A tẽw lɩɛb'ɩ dɩlãpʋɔ-kõw,
zie nɩr za na bɛ kpɩɛr a, nɩr za na bɛ tɔlɛ a.
44A Sore yere na: «Ɩ̃ na ìr'ɩ a Bɛl,
a Babɩlɔn tẽw ŋmɩn ƴãw.
A bom ʋl ʋ na vɔlɛ a, ɩ̃ na ír ʋ nɩ a ʋ nʋɔrɩ́.
A nɩ-bʋʋrɛ kʋ̃ cãà darɛ taa cere a ʋ zie ɩ.
A dacĩ-kpɛ̃ɛ na piw a Babɩlɔn tẽ-kpɛ̃ɛ a lo na.
45Nyɩɩm, ɩ̃ nɩbɛ ɛ, nyɩ yi záa a ʋ pʋɔ,
ŋa za ʋ mɩ́ zɔ zãá nɩ a ɩ̃ su-tʋlʋ,
tʋ̃ɔ́ faa a ʋ nyɔ-vʋʋrʋ.
46Nyɩ taa wa sàw a nyɩ kanyir wa báarɛ ɩ! Nyɩ ta zɔrɛ dɛ̃bɩ̃ɛ a yele bɛ na yere a tẽw pʋɔ a ƴãw ɛ. Yũon ŋa, bɛ mɩ́ yel'ɩ à ŋá, yũon waar bɛ yel bʋ̃-yoru: po-to-fãw-ɩb tɛwr'a a tẽw pʋɔ, nɩ-kpɛ̃ɛ na dɩrɛ nɩ-kpɛ̃ɛnʋ mɛ̃ a lɛ ʋ na bɔbr a diw nɩ a ƴen sob...
47Bibie waar'a ɩ̃ na ìr a Babɩlɔn tẽw tɩbɛ ƴãw,
vĩ na nyɔw nɩ a tẽw za.
A kũuni za na gã gã nɩ a tẽ-kpɛ̃ɛ pʋɔ.
48Lɛ n'a a salom nɩ a tẽw
nɩ bom za na be a pʋɔ a,
na lɔbr zɛb-tʋ̃ɔ́fʋ cɛlsɩ a Babɩlɔn tẽw ƴãw.
Bʋ̃ʋ n'ʋ vɛ̃, a bɛlɩ dem na na sãw ʋ bɛr a
na yi n saa-pɛrɩ́-gʋba-lowr ta.»
À à ŋá n'a a Sore yel.
A naaŋmɩn-ƴɛ̀r-manɛ
49Kũuni kpi n a tẽ-daa za zu a Babɩlɔn ƴãw.
A Babɩlɔn n'ʋ cɛ na lo,
a Ɩsɩrayɛl nɩbɛ ʋ na ɩ bɛ kpi a ƴãw.
50Nyɩɩm ʋ na bɛ páw kʋ a,
nyɩ ìr lo a sɔ́r! Nyɩ ta be a ka ɩ.
Nyɩ be a zi-zãána be, ɛ́ tɩɛrɛ a Sore,
nyɩ tɛr a Zerizalɛm tɩɛrʋ.
A Naaŋmɩn nɩ-bʋʋrɛ
51«Nʋ̃ɔ̀ bɛ mɩ́ tɩ ɩrɛ tɩ
a zʋmɛ tɩ na mɩ́ tɩ wone a ƴãw ɛ.
Vĩ tɩ nyɔw tɩ na a lɛn daar a nɩ-sãanbɛ
na tɩ kpɛ a Sore zi-sõw pʋɔ a.»
A Sore
52A Sore yere na: «Alɛ n'a so, bibie waar
ɩ̃ na ìr a Babɩlɔn tẽw tɩbɛ ƴãw.
A ʋ tẽw za pʋɔ a, bɛ na wone nɩ a nɩbɛ
bɛ na ƴãw a bàalʋ bɛ na kpi a kon.
53A Babɩlɔn saa tɩ tʋ̃ɔ́ do a salom zu,
ɛ́ tɩ ɩ a saa-zu be a ʋ kpɛb zie bɛ tɛr tab a,
a ɩ̃ ƴɛ̀rʋ zũú a, a zi-sãwnbɛ na ta ʋ na.»
À à ŋá n'a a Sore yel.
A naaŋmɩn-ƴɛ̀r-manɛ
54Cɛlsɩ ŋmɩɛr'ɩ a Babɩlɔn tẽw pʋɔ,
zie na sãw faa faa a gɔmɛ yire nɩ a tẽw ŋa pʋɔ.
55A Sore n'ʋ sãwnɛ a Babɩlɔn tẽw,
ʋ ɩ na a ʋ gɔmɛ na yire yaga za a baarɩ.
A dɔ̃ dem zɛbr-nɩbɛ ɩrɛ nɩ gɔmɛ
mɛ̃ a kʋ̃ɔ-kpɛ̃ɛ kʋ̃ɔ-mie a.
A bɛ gɔmɛ ɩ na mɛ̃ saa na tanɛ a.
56A zi-sãwnɛ waar'ɩ a Babɩlɔn ƴãw,
ʋ na wa zɛb'ɩ ʋ na nyɔw a ʋ soja-gãdaar
bɛ ɩ gaso nɩbɛ, ʋʋ kar a bɛ tamɛ bɛr.
Sɩza, a Sore ɩ n Naaŋmɩn na bãw a san yáafʋ,
ɛ́ mɩ́ kʋ̀ ŋa a lɛ ʋ na sɛw taa nɩ a.
57«Ɩ̃ na ɩ na a ʋ tõ-tõ-bi-bɛrɛ, a ʋ yã-bãwnbɛ, a ʋ tẽli-kaarbɛ, a ʋ na-kpɛ̃ɛ-lɩɛrbɛ nɩ a ʋ gãdaar nyũ kuoli. Bɛ na gúr'ɩ gʋ̃ɔ na bɛ tɛr baarʋ a, bɛ kʋ̃ lɛb zaw ìr towtow ɛ. A nãà a yúor na dɩ kɛ́ “Sore kpɛnʋ-za-sob a” n'ʋ yere.» 58À ŋá n'a a Sore, a kpɛnʋ-za-sob, yere:
«A Babɩlɔn tẽw dacĩ-yɛlsɩ ŋmɛr'ɩ a za,
ɛ́ vũu dɩ a ʋ pamɛ na kɛrɩ kɛrɩ a.
A nɩ-bʋʋrɛ bàlɛ nɩ bɛ tʋɔra zawlalɛ
ɛ́ a ten nɩbɛ kʋrɛ bɛ tʋɔra vũu ƴãw!»
Ƴɛ̀rʋ bɛ na lɔb ƴãw a Efaratɩ man pʋɔ a
59-60Seraya, na ɩ Neriya bidɛb nɩ Maaseya yãw a, tɩ ɩ n a sojarɩ nɩ-kpɛ̃ɛ ʋl na tone a Zuda tẽw nãà, Sedesɩasɩ, tome a. A Sedesɩasɩ naalʋ-dɩb yome anaar sob daar, a Seraya tɩ bɩɛlɩ ʋ na cen nɩ a Babɩlɔn#51:59-60 A Sedesɩasɩ na tɩ cen a Babɩlɔn a Yeezu Kɩrɩta na bɛ tɩ wa sɛr a yome 594 daar a, a Seraya n'ʋ tɩ bɩɛlɩ ʋ cen nɩ. A Seraya tɩ ɩ n a Barukɩ yɛb. Ɛ́ a Barukɩ tɩ ɩ a Zeremi bá nɩ a ʋ sɛ-sɛbrɛ. Nyɛ̃ 32.12 nɩ a manʋ.. Zeremi mɩ̀ tɩ sɛb'ɩ sɛb-pila zu a kpɩɛrʋ al za na sɛw k'aa páw a Babɩlɔn a, a ƴɛ̀rʋ al za bɛ na sɛb a tẽ-kpɛ̃ɛ ŋa ƴãw a. 61Lɛ n'a a Zeremi tɩ yel a Seraya: «Fʋ̃ʋ wa ta a Babɩlɔn a, fʋ na ƴãw nɩ fãw kanɩ a ƴɛ̀rʋ á ŋá za vla vla. 62Al pùorí, fʋ na yel'a: “Sore e, fʋ̃ʋ mɩŋa n'ʋ yel k'aa tẽ-kpɛ̃ɛ ŋa na sãw na, kɛ́ nɩsaal nɩ dʋ̃w za kʋ̃ cãà kpɩɛr a ʋ pʋɔ ɩ, k'ʋʋ na lɩɛb'ɩ wɛja-kpalɛ na ɩrɛ nɩbaalʋ kʋralɛ a.” 63Fʋ̃ʋ wa kanɩ a sɛbɛ ŋa baar'a, fʋ na de nɩ kʋsɩɛr 'lẽ mɛr'ɩ ʋ, ɛ́ lɔb ʋ ƴãw a Efaratɩ man pʋɔ, 64ɛ́ yel à ŋá: “À ŋá n'a a Babɩlɔn mɩ̀ na bɔr. Ʋ kʋ̃ lɛb ìr a kpɩɛrʋ a Sore na na ɩ a páw ʋ a pùorí ɛ.”»
«A nɩ-bʋʋrɛ bàlɛ nɩ bɛ tʋɔra»: a Zeremi ƴɛ̀rʋ nʋɔr kʋb zie n'ɩ a ka.
Currently Selected:
Zeremi 51: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
