Zeremi 50
50
A Babɩlɔn tẽw loba nɩ a Ɩsɩrayɛl nɩbɛ na lɛb so bɛ tʋɔra a
1Nyɛ̃ a ƴɛ̀rʋ a Sore na ƴãw a naaŋmɩn-ƴɛ̀r-manɛ Zeremi ƴɛ̀r càar'ɩ a Babɩlɔn tẽ-kpɛ̃ɛ nɩ a Babɩlɔn tẽw za a.
2«Nyɩ yel a yel ŋa kʋ̀ a nɩ-bʋʋrɛ za,
nyɩ bà bãwfʋ bom ɩ kɛ̀ bɛ bãw ʋ,
nyɩ ɩ bɛ bãw ʋ, nyɩ taa sɔwlɛ bom za ɩ.
Nyɩ yel: Bɛ zɛb'a de a Babɩlɔn tẽw,
vĩ nyɔw nɩ a ʋ ŋmɩmɛ dasuli,
a ʋ tɩbɛ kanyir za baar'a.
Vĩ nyɔw nɩ a Bɛl#50:2 Bɛl: A pɛr lɛ kɛ́ zu-sob. A bʋɔlʋ ŋa n'ʋ a Babɩlɔn tẽw dem mɩ́ tɩ tɛr a bɛ ŋmɩn Maardukɩ ƴãw.,
a ŋmɩn Maardukɩ kanyir za baar'a.
3Bʋ̃ʋ n'ʋ vɛ̃, nɩ-bʋʋrɛ kãw yi n
saa-pɛrɩ́-gʋba-lowr waar a ʋ ƴãw,
bɛ na wa ɩ na a ʋ tẽw lɩɛbɩ wɛja-kpalɛ
na ɩrɛ nɩbaalʋ a,
nɩr za kʋ̃ lɛb kpɩɛr a ʋ pʋɔ towtow ɛ,
a nɩsaalbɛ za nɩ a dʋn za na zɔ na,
bɛ za na bɔr a.
4A Sore yere na: a lɛn daar a,
a Ɩsɩrayɛl nɩbɛ nɩ a Zuda nɩbɛ na lãw na waar,
bɛ na kone na cere nɩ,
bɔbr'ɩ mɛ̃, a mãa, bɛ Naaŋmɩn.
5Bɛ na sowr'a bãw a sɔ́r
na cere a Sɩyɔ̃ a,
ɛ́ bɛ na lɩɛb'ɩ a niŋe cɔw a ʋ lowr.
Bɛ na wa na wa lãw nɩ mɛ̃,
wõ-taa na be kʋralɛ a pʋɔ,
wõ-taa bɛ na kʋ̃ yiiri bɛr towtow a pʋɔ.
6A ɩ̃ nɩbɛ tɩ ɩ na mɛ̃ píir na bɔr a,
a cɩ̃ɩnbɛ tɩ bɔr a na bɛr,
a cɔlɛ gʋɔr a tan pʋɔ,
mɩ́ yi a tã-bɛrɛ zu tɩ sãá a tãli zu,
ɛ́ yiiri a zàw bɛr.
7A bɛlɩ dem za na mɩ́ tɩ tuori a a,
mɩ́ tɩ vɔl a na, ɛ́ a dɔ̃ dem mɩ́ tɩ yere:
“Tɩ bɛ tɛr sãwna ɩ.
Bʋ̃ʋ n'ʋ vɛ̃, a nɩbɛ bɛ ŋa sãw nɩ a Sore
na ɩ a bɛ taw-lanʋ zie,
ɛ́ a bɛ sãàkʋm-kore
tɩ ƴãw a bɛ tɩɛrʋ a ʋ ƴãw a.”»
8Nyɩ yi zaa a Babɩlɔn tẽw pʋɔ,
nyɩ yi a tẽw ŋa pʋɔ,
nyɩ ɩ mɛ̃ bʋrɩ na de dʋn niwn a.
9Bʋ̃ʋ n'ʋ vɛ̃, ɩ̃ na ɩ na tẽ-bɛrɛ
na ɓã taa a, ìr,
ɩ̃ɩ ƴãw a cen tɩ zɛb'ɩ a Babɩlɔn tẽw.
A nɩbɛ bɛ ŋa na yi n
saa-pɛrɩ́-gʋba-lowr wa,
wa pɩɛrɩ a zɛbr pɩɛrʋ a ʋ ƴãw, zɛb de ʋ.
A bɛ pime bɛ nyɩrɛ bom ɛ,
mɛ̃ gãdaa na bɛ lɛbr waar nũ-zawl a.
10A Sore yere na:
Bɛ na za n a Babɩlɔn tẽw bome,
ɛ́ a bɛlɩ dem za na na za a tẽw a,
na de nɩ na-bome sɛw lɛ za
bɛ na bɔbr a, cen nɩ.
11Nyɩ cɩlɛ, nyɩ cɩlɛ ƴawr'ɩ,
nyɩɩm na sãw a ɩ̃ zi-sóra bɛr a!
Nyɩ ƴawr dúor saa
mɛ̃ náli-pɔlɛ mɔ̃-ɓaar pʋɔ a!
Nyɩ kone mɛ̃ wur-daar a!
12Vĩ-kpɛ̃ɛ nyɔw nɩ a nyɩ tẽ-dɔwra,
vĩ ɩrɛ nɩ a sob nɛ na dɔw nyɩ a.
Ʋ lɩɛb'ɩ a ten za po-pàwrɛ,
wɛja-kpalɛ, tẽsɔw-kõw nɩ dɩlãpʋɔ n'ʋ.
13A Sore suur zũú a,
nɩr bɛ cãà kpɩɛr ʋ ɛ,
wɛja-kpalɛ na ɩrɛ nɩbaalʋ a n'ʋ.
Nʋɔr mɩ́ ɓãa nɩ a bɛlɩ dem za
na mɩ́ tɔlɛ pɩɛlɛ a Babɩlɔn a.
Bɛ mɩ́ ŋmɛ n pʋl-vʋ̃ɔ cɛlsɩ
bɛ na mɩ́ nyɛ̃ a ʋ sãwna sɛw à à ŋá a.
14Nyɩɩm za, tam-tɛbrbɛ ɛ,
nyɩ wa pɩɛrɩ zɛbr pɩɛrʋ
jil koli a Babɩlɔn tẽw.
Nyɩ tɛbr ʋ! Nyɩ ta gbɔb a pime tɛr ɛ!
Bʋ̃ʋ n'ʋ vɛ̃, ʋ maal'ɩ yel-bier sãw a Sore.
15Nyɩ lɔb a zɛbr cɛlsɩ jil koli nɩ ʋ,
ʋ zɛw nɩ a nuru wul k'ʋʋ bɛ cãà zɛbr ɛ.
A ʋ yir-cõcowli ŋmɛr'a,
a ʋ dacine lo na.
A Sore n'ʋ yarɛ a san,
a lɛ pʋɔ a, nyɩ yáa a san a Babɩlɔn zu.
Nyɩ ɩ ʋ mɛ̃ a lɛ ʋ na tɩ ɩ a ʋ taabɛ a.
16Nyɩ ír a bʋ̀r-bʋ̀rbɛ
nɩ a bʋ̃-dierbɛ za bɛr a Babɩlɔn tẽw pʋɔ.
A zɛbr na zɛbr bɛ tɛr'ɩ
mimi-baalʋ a pʋɔ a,
ŋa za ʋ mɩ́ lɛb ta a ʋ nɩbɛ zie,
ŋa za ʋ mɩ́ lɛb zɔ kul a ʋ tẽw.
17A Ɩsɩrayɛl tɩ ɩ na mɛ̃ pɛrʋ na bɔr
kɛ̀ gben diwr a.
A dãw-niwn sob na tĩ 'wɔb ʋ a n'ɩ a Asiiri tẽw nãà. Al pùorí, a Babɩlɔn tẽw nãà, Nabikodonozɔɔr, wa kar ʋ a kɔbɛ#50:17 A Asiiri tẽw dem na tɩ zɛb de a Samaari tẽw a Yeezu Kɩrɩta na bɛ tɩ wa sɛr a yome 722 tɩ tɔ 721 a, bɛlɛ nɛbɛ tɩ de niwn zɛb de a Ɩsɩrayɛl naalʋ-tẽw. Al pùorí a Babɩlɔn tẽw dem wa zɛb de a Zerizalɛm nɩ a Zuda naalʋ-tẽw a Yeezu Kɩrɩta na bɛ tɩ wa sɛr a yome 587 daar.. 18A lɛ pʋɔ a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Ɩ̃ na ìr'ɩ a Babɩlɔn tẽw nɩ a ʋ nãà ƴãw, mɛ̃ a lɛ ɩ̃ na tɩ ìr a Asiiri tẽw nãà ƴãw a.»
19Ɩ̃ na tɛr'ɩ a Ɩsɩrayɛl lɛb wa n
a ʋ zi-sóra pʋɔ,
ʋʋ na páw nɩ a bʋ̃-dɩrɩ a Karmɛl tãw zu
nɩ a Basan tã-sɛr zu.
Ʋ kʋ̃ mɩ́ bɔ bom gú a Efarayim tãw zu
nɩ a Galaadɩ tẽw pʋɔ ɩ.
20A mãa, a Sore, mãa n'ʋ yere:
A lɛn daar a, bɛ na bɔ n a Ɩsɩrayɛl sãwna,
ɛ́ kʋ̃ nyɛ̃ ʋ ɛ.
Bɛ na bɔ n a Zuda yel-bebe,
ɛ́ kʋ̃ nyɛ̃ a ɩ.
Bʋ̃ʋ n'ʋ vɛ̃, ɩ̃ na dɩ n suur kʋ̀
a bɛlɩ dem ɩ̃ na na bɛr bɛ cãà vʋʋrɛ a.
21A Sore yere nɩ a Babɩlɔn tẽw dɔ̃ sob:
«Ŋmãa a zɛbr nɩ a kʋ̃ɔ-tuo tẽw.
Ŋmãa nɩ ʋ a zɛbr,
ɛ́ mɩ̀ ŋmãa nɩ a Pekɔdɩ tẽw dem a zɛbr!
Kʋ kʋ bɛ,
kʋ kʋ bɛ tɩ kʋ pàw pɛr.
Ɩ a lɛ za ɩ̃ na yel kɛ́ fʋ ɩ a.
22Zɛbr gɔmɛ tɛwr'a a tẽw pʋɔ.
Nyɛ̃ yel-sãwna na bɛ dɩ vuo a!
23Ŋmɩŋmɩn za n'a?
A Babɩlɔn tẽw tɩ ɩ n a 'hama
na tɩ ŋmɩɛr a tẽ-daa za ŋmɛrɛ a.
Ɛcɛ, ʋlɛ n'ʋ ŋmɛr, ŋmɛr yaarɩ.
Ŋmɩŋmɩn za n'a?
A nɩ-bʋʋrɛ sɔgɔ a,
a Babɩlɔn tẽw lɩɛb'ɩ wɛja-kpalɛ
na ɩrɛ nɩbaalʋ a!
24Babɩlɔn tẽw i, ɩ̃ ƴãw fʋ nɩ bɛra,
ɛ́ fʋ̃ʋ n'ɩ ŋan lo a bɛra pʋɔ, ɛ́ bɛ bãwnɩ a ɩ.
Bʋ̃ʋ n'ʋ vɛ̃, a mãa Sore n'ʋ
fʋ ŋmãa nɩ a zɛbr.»
25A Sore yuo nɩ a ʋ zɛbr bome dĩo,
ɛ́ na wul a ʋ suur nɩ a ʋ zɛbr bome ʋ na ír a.
A Babɩlɔn tẽw a, tome gã nɩ a Sore,
a Naaŋmɩn kpɛnʋ-za-sob ƴãw.
26Nyɩ yi ziir za wa a tẽ-kpɛ̃ɛ ŋa pʋɔ!
Nyɩ yuori a ʋ boge,
nyɩ wob a ʋ na-bome ɓã ɓã taa, ɛ́ sãw ʋ bɛr!
Bom za taa cɩ́ɛr ɛ.
27Nyɩ kʋ a bɛ soja-vɩɛlɩ vɩɛlɩ za,
nyɩ tɛr bɛ cen nɩ a kʋb zie!
Nyɛ̃ kpɩɛrʋ na ta bɛ a,
bʋ̃ʋ n'ʋ vɛ̃, a bibir vɩɛ na
a Sore na na ìr a bɛ ƴãw a.
28Nyɩ wone!
Nɩbɛ n'a yi a Babɩlɔn tẽw zɔrɛ,
nɩbɛ na cɩ̃ɛ a be a nɛbɛ
waar wa yere a Sɩyɔ̃ tẽw pʋɔ:
«A Sore tɩ Naaŋmɩn yáa nɩ a san kʋ̀ fʋ,
ʋ yáa ʋ nɩ a ʋ yir-sõw ƴãw.»
29Nyɩ bʋɔlɩ a tam-tɛbrbɛ za ɓã taa,
nyɩ ɩ bɛ cen a Babɩlɔn tẽw dem ƴãw.
Nyɩ maalɩ laɩ jil koli ʋ,
nyɩ ta bɛr ʋ cɩ̃ɛ ɩ,
nyɩ ya ʋ manɩ a ʋ tome.
A lɛ ʋ na ɩ a ʋ taabɛ a,
nyɩ mɩ̀ ɩ ʋ a lɛ.
Ʋ ɩ n pɔ̀l-ɩb a Sore zie,
a Ɩsɩrayɛl Naaŋmɩn na ɩ sõw a zie.
30«Alɛ n'a so, a ʋlɩ bibir nɛ a, a ʋ soja-pɔlɛ na lo n a ʋ nɩbɛ tuor-taa ziir, ɛ́ a ʋ zɛbr-nɩbɛ kpi bɛ za.»
À à ŋá n'a a Sore yel.
31«Pɔ̀lʋ sob Babɩlɔn i,
mãa nɩ fʋ̃ʋ nɛbɛ!
A Sore Naaŋmɩn, a kpɛnʋ-za-sob'ʋ yere.
A fʋ bibir vɩɛ na,
a daar ʋl ɩ̃ na na sowri fʋ bom a ta na.
32A pɔ̀lʋ sob na kaw na lo,
nɩr bɛ ka be na nyɔw ʋ, ʋ ìr ɛ.
Ɩ̃ ƴãwnɛ nɩ vũu a ʋ tẽ-bɛrɛ,
ʋ na dɩ n bom za na jil koli a a.»
33À ŋá n'a a Sore, a kpɛnʋ-za-sob, yere:
«Bɛ ɩrɛ nɩ po-to-fãw ɩb a Ɩsɩrayɛl nɩbɛ zie,
ɛ́ lɛ mɩ̀ n'a a Zuda nɩbɛ zie.
A bɛlɩ dem na tɩ diw bɛ cen nɩ a,
tɛr bɛ na nɩ fãw.
Bɛ bɛ sàwr na lɛb bɛr bɛ ɩ.
34A mãa, a bɛ faarɛ, ɩ̃ tɛr'ɩ fãw,
mãa n'ɩ a Sore, a kpɛnʋ-za-sob.
Ɩ̃ na faa bɛ na nɩ fãw,
ɩ a ƴã-ɓaarʋ lɛb be a tẽw zu,
ɛ́ a Babɩlɔn tẽw dem màwr.»
A Sore tɩɛr'a k'ʋʋ sãw a Babɩlɔn tẽw bɛr
35A Sore yere na:
«Zɛbr, a lo a Babɩlɔn tẽw pʋɔ,
a lo a bɛlɩ dem na kpɩɛr
a Babɩlɔn tẽw pʋɔ a zu,
a ʋ tõ-tõ-bi-bɛrɛ nɩ a ʋ yã-bãwnbɛ zu!
36Zɛbr, a lo a bɛ bàwr-bʋwrbɛ zu,
ɩ bɛ bʋnɩ ƴɛ̀rɛ!
Zɛbr, a lo a ʋ sojarɩ zu,
ɩ a bɛ kanyir baarɩ!
37Zɛbr, a lo a bɛ wie
nɩ a bɛ zɛbr-torkori zu,
a lo a nɩbɛ na jɛr-taa
ɛ́ zɛbr a ʋ ƴãw a zu!
Bɛ lɩɛbɩ pɔwbɛ na bɛ tɛr fãw a!
Zɛbr, a lo a bɛ na-bome zu, bɛ zá a.
38Zɛbr, a lo a ʋ mamɛ zu,
ɩ a ko! Bʋ̃ʋ n'ʋ vɛ̃, tɩbɛ tẽw n'ʋ,
a bʋ̃-faar faar á ŋá ɩ na,
a bɛlɩ dem na puore a a yã yi.
39Alɛ n'a so, a nyãanyũ-gaarɩ na lãw nɩ a jɩbʋrɩ
kpɩɛr a Babɩlɔn tẽw pʋɔ,
a Kʋlãdisowli na kpɩɛr'ɩ a be.
Nɩr kʋ̃ lɛb kpɛ a be towtow ɛ,
a tẽ-kpɛ̃ɛ ŋa na gã nɩ zawla yome yome za.
40A Sore yere na:
Ɩ̃ na sãw ʋ na bɛr,
mɛ̃ a lɛ ɩ̃ na tɩ sãw
a Sodɔm, a Gomɔɔr
nɩ a tẽli-kpɔwlɩ bɛr a.
Nɩr kʋ̃ cãà kpɩɛr a be ɩ,
nɩsaal kãw za kʋ̃ lɛb vʋʋrɩ a be ɩ.
41Nɩ-bʋʋrɛ kãw yi n
a saa-pɛrɩ́-gʋba-lowr waar,
nɩ-bʋʋr-yaga nɩ na-mɩnɛ na tɛr fãw a
yi n a tẽw baarʋ zie, lo a sɔ́r waar.
42A bɛ zɛbr-nɩbɛ tɛrɩ tamɛ nɩ kafine,
bɛ kpɛ n po-tuo ɛ́ bɛ zɔrɛ nɩbaalʋ ɛ.
A gɔmɛ bɛ na ɩrɛ a,
ɩ na mɛ̃ a kʋ̃ɔ-kpɛ̃ɛ gɔmɛ a.
Bɛ zɔm'ɩ wie,
bɛ pɩɛrɩ na tu taa vla vla
kɛ́ bɛ zɛb'ɩ fʋ, Babɩlɔn i.
43A Babɩlɔn tẽw nãà wõ n a yel ŋa,
kpãkpamɛ yʋɔrɛ ʋ,
pʋl-vʋ̃ɔ nyɔw ʋ na,
'wɔbrʋ 'wɔbr ʋ na mɛ̃ pɔw na dɔwr a.
44A Sore yere na:
Ɩ̃ na ɩ na mɛ̃ gbẽw
na yire Zurdɛ̃ man tuwr pʋɔ
cere zie mɔ̃-ɓaar na be kʋralɛ a.
Fɔ̃wlɛ, ɩ̃ na ƴãw na a nɩbɛ za ìr a be.
Lɛ n'a ɩ̃ na ƴãw a nɩ-kpɛ̃ɛ ɩ̃ na na kaa ír a,
a Edɔm tẽw pʋɔ.
Bʋ̃ʋ n'ʋ vɛ̃, ãa n'ʋ ŋmɛ̃ a mãa?
Ãa n'ʋ na tʋ̃ɔ́ sowri mɛ̃ bom?
Ɛ́ nɩ-kpɛ̃ɛ buor'ʋ
na tʋ̃ɔ́ bà gbɛ́r a ɩ̃ niŋé?»
45Nyɩ bɛr wõ a lɛ a Sore na tɩɛrɩ
a Edɔm tẽw ƴãw a,
a lɛ ʋ na cɔbrɩ a Teman tẽw nɩbɛ ƴãw a.
A bɛ tɛr à ŋá ɩ,
bɛ na vu bɛ na nɩ fãw mɛ̃ dʋn a,
a dʋn bili tɛɛ za mɩ̀, a bɛ tɛr à ŋá ɩ.
A bɛl ƴãw a, ʋ na sãw nɩ a zàw bɛr.
46A yel na wa yi kɛ́ bɛ de nɩ a Babɩlɔn tẽw a,
a tẽsɔw damnɛ na,
cɛlsɩ ŋmɩɛr'ɩ a ten za pʋɔ.
Currently Selected:
Zeremi 50: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
