Zeremi 46
46
A ZEREMI LƐB'A YERE A NƖ-BƲƲR-YORU
46—51
1A ƴɛ̀rʋ a Sore na ƴɛ̀r kʋ̀ a naaŋmɩn-ƴɛ̀r-manɛ Zeremi a nɩ-bʋʋr-yoru ƴãw a n'ɩ à á ŋá.
A Babɩlɔn tẽw nãà zɛb'a tʋ̃ɔ́ a Eziptɩ tẽw dem Karkemisɩ
2Ƴɛ̀rʋ na càarɩ a Eziptɩ tẽw nɩ a Eziptɩ tẽw nãà, Faarawɔ̃ Neko, zɛbr-nɩbɛ a. A Eziptɩ tẽw nãà tɩ be n a Efaratɩ man nʋɔr a Karkemisɩ#46:2 A zɛbr na tɩ zɛb a Karkemisɩ a, a tɩ ɩ n a Yeezu Kɩrɩta na bɛ tɩ wa sɛr a yome 605 tɩ ta n 604 daar., a lɛn daar a Babɩlɔn tẽw nãà, Nabikodonozɔɔr, na tɩ zɛb tʋ̃ɔ́ ʋ a. A tɩ ɩ n a Zozɩasɩ bidɛb, Yoyakim, na ɩ a Zuda tẽw nãà a, naalʋ-dɩb, yome anaar sob.
3A zɛbr-nɩbɛ nɩ-bɛrɛ yere na:
«Nyɩ cɔbrɩ a zɛbr-kur-pãgalɩ,
a bɛrɛ nɩ a pʋrmɛ!
Nyɩ cen a zɛbr ƴãw!
4Nyɩ caw a wie!
Nyɩ cen, soja-wi-zɔmnbɛ ɛ!
Nyɩ vɔblɩ a nyɩ zɛbr kpawɔ-kpowr!
Nyɩ pɩɛrɩ!
Nyɩ kàr a nyɩ kafine a nyɩwrɛ,
nyɩ su a nyɩ zɛbr-nyãa-kpali!»
5A Sore yere na:
Ɛ́ bʋnʋ yaa? Bʋ̃ʋ n'ʋ ɩ̃ nyɛ̃ a?
A bɛ kanyir baar'a, bɛ tɩ̃wnɩ nɩ pùor.
Bɛ zɛb'a tʋ̃ɔ́ a bɛ soja-gãdaar,
a zɔ-ŋmɛ-taa n'a, nɩr bɛ lɩɛbɛ kaar ɛ,
a pʋl-vʋ̃ɔ n'a a ziir za.
6A sob nɛ na zɔrɛ zuo bɛ za a kʋ̃ tʋ̃ɔ́ zɔ cɩ̃ɛ ɩ,
a soja-gãdaar pʋɔ gãdaa kʋ̃ tʋ̃ɔ́ faa ʋ tʋɔra ɩ.
A saa-pɛrɩ́-gʋba-lowr be a,
a Efaratɩ man nʋɔr, bɛ dẽdere na lore.
7Ãa n'ʋ ŋmɛ̃ mɛ̃ a Nɩl man na paalɩ yi nɛ́ɛ a,
mɛ̃ a man ŋa a kʋ̃ɔ na ìre a?
8A Eziptɩ tẽw n'ʋ. Ʋ tɩ yere na:
«Mɛ̃ a Nɩl man na paalɩ yi nɛ́ɛ a,
mɛ̃ a ʋ kʋ̃ɔnɩ na paalɛ dúor a,
ɩ̃ na paal'a páw a tẽ-daa,
sãw a tẽ-bɛrɛ nɩ a nɩbɛ na kpɩɛr a pʋɔ bɛr.
9Wie e, nyɩ ƴaw kpɛ a zɛbr pʋɔ!
Zɛbr-torkori i, nyɩ ŋmʋrɛ!
Gãdaar i, nyɩ kpɛ a zɛbr pʋɔ:
Kusɩ nɩ a Putɩ tẽw dem
na tɛr a zɛbr-kur-pãgalɩ a,
nɩ Ludɩ tẽw dem na tɛr a tamɛ a!»
10Ɛcɛ a Sore, a kpɛnʋ-za-sob zie a,
a bibir ŋa ɩ n san-yaafʋ bibir.
Ʋ na yáa nɩ a san a ʋ dɔ̃ dem zu.
A zɛbr-sɔ-kpɛ̃ɛ dɩrɛ bɛ na,
ʋ dɩrɛ na tɩwr, a bɛ zɩ̃ɩ kuole ʋ na.
A ɩ na mɛ̃ bàwr'ʋ a Sore, a kpɛnʋ-za-sob, ƴãw
a saa-pɛrɩ́-gʋba-lowr, a Efaratɩ man nʋɔr a.
11Eziptɩ tẽw na ɩrɛ nɩbaalʋ a,
do Galaadɩ tẽw tɩ bɔ tɩ̃ɩ-kãá
a fʋ natɩɛ sanʋ ƴãw.
Ɛcɛ a tɩ̃ɩnɩ yaga deb bɛ tɛr pɛr ɛ,
a fʋ natɩr kʋ̃ sanɩ ɛ.
12A nɩ-bʋʋrɛ wõ n a fʋ vĩ,
bʋ̃ʋ n'ʋ vɛ̃, a fʋ kon yi n a ziir za.
A gãdaa zɔ na ŋmɛ gãdaa,
bɛ dẽderi tɩ lo a bɛ za ayi.
A Nabikodonozɔɔr kpɛ na so a Eziptɩ tẽw
13A Sore tɩ ƴɛ̀r'ɩ a naaŋmɩn-ƴɛ̀r-manɛ Zeremi zie, a lɛn daar a Babɩlɔn tẽw nãà, Nabikodonozɔɔr, na tɩ wa k'ʋʋ wa zɛb'ɩ a Eziptɩ tẽw a:
14«Nyɩ yel a yel a Eziptɩ tẽw pʋɔ,
nyɩ ɩ bɛ bãw ʋ a Migɩdɔl,
a Mɛmfisɩ nɩ a Dafine tẽ-bɛrɛ pʋɔ.
Nyɩ yel bɛ: “Nyɩ ìr!
Nyɩ cɔbrɩ a zɛbr ƴãw!”
A zɛbr kʋ n a bɛlɩ dem
na viiri koli nyɩ a baarɩ!
15Ɛ́ bʋnʋ yaa! A Apisɩ zɔrɛ na!
A fʋ nadɛr#46:15 A nadɛr ŋa wule nɩ a ŋmɩn ʋl na tɩ gùre a Mɛmfisɩ tẽw a. bɛ bàrɛ gbɛ́r ɛ!
A Sore dáa ʋ na.
16Ʋ dãdawlɛ nɩ faa faa.
A nɩbɛ mɩ̀ lore na dɔwlɛ taa.
Bɛ yere na kʋ̀rɛ taa: “Nyɩ ìr!
Tɩ lɛb kul a tɩ tẽw,
zãá nɩ a zɛbr ŋa na bɛ tɛr nɩbaalʋ a!”
17A Eziptɩ tẽw nãà, Faarawɔ̃ ƴãw a,
nyɩ kʋ̀ ʋ a yo-kpɔwla ŋa:
“Gɔmɛ yaga zawlalɛ!”
18A nãà a yúor na dɩ kɛ́:
“Sore kpɛnʋ-za-sob” a, yere nɩ à ŋá:
“Mãa bɛ wa vʋʋrɛ a na,
alɛ bɛ ɩ lɛ, a dɔ̃ sob na wa na.
A bɛ tɛr bʋnʋ, mɛ̃ a Tabɔɔr tãw a ɩ,
a bɛ tɛr bʋnʋ, mɛ̃ a Karmɛl tãw
na do gãw a kʋ̃ɔ-kpɛ̃ɛ a ɩ.”
19Eziptɩ tẽw dem i,
nyɩ cɔbrɩ a nyɩ tuor a tẽ-yũo cenu ƴãw.
A Mɛmfisɩ tẽ-kpɛ̃ɛ na lɩɛb'ɩ zie
na kpɛ faa yaga a.
Ʋ na sãw nɩ ʋ za, nɩr za kʋ̃ lɛb kpɩɛr ʋ ɛ.
20A Eziptɩ tẽw ɩ na mɛ̃ na-sɩra na vɩɛl a!
Ɛcɛ, nakpon na yi saa-pɛrɩ́-gʋba-lowr a,
wa na wa dɔm a ʋ zu.
21A Eziptɩ tẽw a,
bɛ tɩ kaarɛ nɩ a soja-libi-bɔbrbɛ zie vla za.
Ɛcɛ a bɛl mɩ̀ a, bɛ lɩɛbɛ nɩ pùor,
bɛ lãw na zɔrɛ.
Kãw za bɛ bàrɛ gbɛ́r,
a kpɩɛrʋ bibir na vɩɛrɛ a bɛ zu,
a lɛn daar ɩ̃ na ìre a bɛ ƴãw a ɩ.
22A Eziptɩ tẽw zɛbr-nɩbɛ
mʋɔlɛ na tɔlɛ mɛ̃ waab a,
a lɛn daar a bɛ dɔ̃ dem
na waar'ɩ fãw a bɛ ƴãw,
tɛr lɛ́ɛ mɛ̃ tɩ-cɩɛrbɛ a.
23A Sore yere na:
Bɛ sáwr'ɩ a ʋ tuw,
a ʋ tuw-zũgulu na bɛ tɛr kpɛb a.
Bʋ̃ʋ n'ʋ vɛ̃, bɛ yãwmɛ na zuo sãsoge,
nɩr kʋ̃ tʋ̃ɔ́ bɛ sɔr ɛ.
24Vĩ nyɔw nɩ a Eziptɩ tẽw:
Bɛ de ʋ na ƴãw
a saa-pɛrɩ́-gʋba-lowr tẽw dem nuru pʋɔ.»
25A Sore, a kpɛnʋ-za-sob, a Ɩsɩrayɛl Naaŋmɩn, yere na: «Ɩ̃ na wa n a Tɛb tẽ-kpɛ̃ɛ ŋmɩn Amɔ̃ ƴãw, a Eziptɩ tẽw, a ʋ ŋmɩmɛ nɩ a ʋ na-mɩnɛ ƴãw, a Faarawɔ̃ nɩ a bɛlɩ dem na ƴãw a bɛ tɩɛrʋ a ʋ ƴãw a, ƴãw. 26Ɩ̃ na de bɛ na ƴãw a bɛlɩ dem na bɔbr a bɛ kʋb a nuru pʋɔ: a Babɩlɔn tẽw nãà, Nabikodonozɔɔr, nɩ a ʋ sojarɩ.
Ɛcɛ, a pùorí a, nɩbɛ na lɛb'a wa, wa kpɩɛr a Eziptɩ tẽw pʋɔ mɛ̃ a dãwdãw a.» A Sore n'ʋ yel.
A Sore na faa nɩ a Ɩsɩrayɛl
(Nyɛ̃ Zer 30:10-11)
27«Fʋ̃ʋ Ɩsɩrayɛl, ɩ̃ tõ-tõ-bie e,
ta zɔrɛ dɛ̃bɩ̃ɛ ɩ.
Ta ɩ kɛ́ dɛ̃bɩ̃ɛ tɛr fʋ yaga za ɩ,
fʋ̃ʋ na ɩ a Zakɔb bʋʋrɛ a.
Ɩ̃ na faa fʋ nɩ a tẽ-zãánɩ á ŋá pʋɔ,
ɛ́ faa a fʋ bʋʋrɛ a ten al pʋɔ
bɛ na diw bɛ cen nɩ a.
Ɩsɩrayɛl i, fʋ na lɛb'a wa, wa vʋʋrɛ zoom,
ɛ́ bɛ bãw damnʋ ɛ.
Ɛ́ nɩr za kʋ̃ be be lɛb dam fʋ ɛ.
28Fʋ̃ʋ Ɩsɩrayɛl, ɩ̃ tõ-tõ-bie e, ta zɔrɛ dɛ̃bɩ̃ɛ ɩ,
ɩ̃ lãw nɩ fʋ na k'ɩ̃ɩ tʋ̃ɔ́ faa fʋ, a Sore n'ʋ yel.
Ɩ̃ na kʋ n a nɩ-bʋʋr-yoru bɛl pʋɔ
ɩ̃ na diw fʋ cen nɩ a, pàw pɛr.
Ɛcɛ, fʋ̃ʋ a, ɩ̃ kʋ̃ kʋ fʋ pàw pɛr ɛ.
Sɩza n'a, ɩ̃ kpãa fʋ na
mɛ̃ a lɛ a na sɛw a.
Bʋ̃ʋ n'ʋ vɛ̃, ɩ̃ k'ʋʋ tʋ̃ɔ́ ɩrɛ a fʋ zie
mɛ̃ fʋ bɛ tɛr sãwna a ɩ!»
Currently Selected:
Zeremi 46: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
