Zeremi 12
12
1Sore e, fʋ ɩ n nɩ-mɩŋa zuo,
nɩ ɩ̃ na na ƴɛ̀rɛ a fʋ sãwna ƴɛ̀rʋ a.
Ɛcɛ ɩ̃ bɔbr'a kɛ́ mãa nɩ fʋ̃ʋ
nãá ƴɛ̀r mɩnʋ ƴɛ̀rʋ:
Bʋ̃ʋ n'ʋ so a nɩ-faar yele mɩ́ cere vla?
Bʋ̃ʋ n'ʋ so a bɛlɩ dem na bɛ tu b a
bɛ mɩ́ bãw damnʋ?
2Fʋ sɛl bɛ na, bɛ tɛ n nyɩgɛ,
bɛ kɛrɛ na, bɛ wɔnɛ nɩ wɔmɛ.
A fʋ yúor be n a bɛ nʋɔrɩ́ kʋralɛ,
ɛ́ a bɛ socir zãá nɩ fʋ.
3A fʋ̃ʋ a, Sore, fʋ nyɛ̃ mɛ̃ na,
fʋ jɛl'ɩ a ɩ̃ tɩɛrʋ: a lãw nɩ fʋ na.
Ƴãw a nɩ-faar bɛ tʋɔra zie,
mɛ̃ píir bɛ na cere nɩ a kʋb ƴãw a.
Ƴãw bɛ bɛ tʋɔra zie gùre nɩ a kʋb bibir.
4Debor'a a tẽw na be a wahala pʋɔ tɩ ta? Debor'a a póru na ko gã tɩ ta? A dʋn nɩ a lili za kpiir'a, a tẽw dem ɩ-faar zũú. Bɛ yere na: «Zeremi kʋ̃ cãà be nyɛ̃ a lɛ a na ŋmɛ̃ tɩ a ɩ.»
5A Sore yere na:
«Fʋ̃ʋ kʋ̃ wa tʋ̃ɔ́ zɔ tu
nɩbɛ na zɔrɛ nɩ gbɛ́ɛ a,
ŋmɩŋmɩn n'a fʋ̃ʋ nɩ wie na dãw taa?
Tẽw ƴã-ɓaarʋ na be a yõ pʋɔ wa n'a
fʋ mɩ́ bɛr tɩɛrʋ a,
ŋmɩŋmɩn n'a fʋ na ɩ
a Zurdɛ̃ man nʋɔr va-pɔrɛ pʋɔ?
6Bʋ̃ʋ n'ʋ vɛ̃, a fʋ dɔwlʋ nɩbɛ tɛɛ za, a fʋ yir dem tɛɛ za, mɩlɛ fʋ na. Bɛ bʋɔlɛ nɩ nɩbɛ ɓanɛ taa a fʋ ƴãw, ɛ́ fʋ bɛ bãwnɩ a ɩ. Gùre fʋ tʋɔra a bɛ ƴãw, bɛlɛ wa ƴɛ̀rɛ vla vla a fʋ zie a.»
Naaŋmɩn zawrɛ nɩ a ʋ yir nɩ a ʋ nɩbɛ bɛrɛ
7«Ɩ̃ zawrɛ nɩ a ɩ̃ yir bɛrɛ,
ɩ̃ tɩ̀ɛrɛ nɩ a ɩ̃ bom ɩ̃ na tɩ so a bɛrɛ.
A ʋlɩ bom ɩ̃ na tɩ nɔnɛ nɩ a ɩ̃ pʋɔ za a,
ɩ̃ dier ʋ na ƴãwnɛ
a dɔ̃ dem nuru pʋɔ.
8A bɛlɩ dem ɩ̃ na so a,
ɩ n a ɩ̃ zie mɛ̃ gben na be mʋ̃ɔ pʋɔ a.
Bɛ ùore nɩ a ɩ̃ ƴãw,
alɛ so ɩ̃ bɛ cãà nɔnɛ bɛ ɩ.
9A na ɩ lɛ a, a bɛlɩ dem ɩ̃ na so a
ɩ na mɛ̃ lili-kpɛrɛ kpɛrɛ
sidume na diwr a ziir za a bɩɩ?
Nyɩ bʋɔlɩ a wɛ-dʋn za ɓã taa!
Nyɩ ƴãw a wa a dɩb ƴãw!
10Dʋ̃-cɩ̃ɩnbɛ yaga sãw nɩ
a ɩ̃ divɛ̃ tɩɩr púo bɛr,
bɛ nɛb nɛb'ɩ a ɩ̃ púo nɩ gbɛ́ɛ,
ɩ a po-vla ŋa lɩɛbɩ zi-kpalɛ na ɩrɛ nɩbaalʋ a.
11Bɛ ɩ ʋ na ʋ lɩɛbɩ zie na ɩrɛ nɩbaalʋ a.
Ʋlɛ n'ɩ ŋan a ɩ̃ niŋé
bɛ tɛr ŋmɛ̃a ɩ, ɩrɛ nɩbaalʋ.
A tẽw za ɩrɛ nɩ nɩbaalʋ,
ɛ́ a bɛ ɩrɛ nɩr kãw za bom ɛ.»
12A zi-sãwnbɛ be n
a wɛja-kpalɛ sɛ́ɛ za zu waar.
A Sore zɛbr-sɔ-kpɛ̃ɛ sãwnɛ nɩ bom za bɛrɛ
a tẽw lowr ŋa tɩ tɔ lowr ŋa.
Ƴã-ɓaarʋ bɛ ka be nɩr za ƴãw ɛ.
13Nyɩ tɩ bʋ̀r'ɩ ble, ɛ́ wa cɛ gʋʋr.
Nyɩ tɩ bàl'ɩ nyɩ tʋɔra yaga za, ɛ́ a wa ɩ zawla.
Vĩ, a nyɔw nyɩ a bʋ̃-dieri á ŋá ƴãw!
A Sore n'ʋ kʋ̀ nyɩ a lɛ, a ʋ su-tʋlʋ zũú.
A Sore nɩ a Ɩsɩrayɛl kpɛ-pɩɛl dem
14À ŋá n'a a Sore yere cáarɛ nɩ a ɩ̃ nɩ-bʋʋrɛ kpɛ-pɩɛl dem na kpɛ faa a: «Bɛ tɔ n a bom ɩ̃ na so a, a zie ɩ̃ na kʋ̀ a ɩ̃ nɩ-bʋʋrɛ Ɩsɩrayɛl a. Ɩ̃ na ír bɛ nɩ a bɛ tẽsɔw zu, ɛcɛ ɩ̃ mɩ̀ na ír'ɩ a Zuda tẽw nɩbɛ a bɛ sɔgɔ. 15Al pùorí, ɩ̃ na lɛb'a zɔ a bɛ nɩbaalʋ, ɛ́ lɛb tɛr ŋa za cen nɩ a ʋ zi-sóra pʋɔ, a ʋ tẽw pʋɔ. 16Bɛ tɩ zanɩ nɩ nɩ a ɩ̃ nɩ-bʋʋrɛ bɛ mɩ́ pɔ a Báàl yúor ƴãw. Ɛcɛ bɛlɛ mɩ̀ wa sɩrɩ zanɩ a tub a na fɛr k'aa ɩ̃ nɩ-bʋʋrɛ tuur a, bɛlɛ mɩ́ wa pɔ a ɩ̃ yúor ƴãw yel: “Ɩ̃ pɔrɛ nɩ nɩ a Sore na vʋʋrɛ a”, a lɛ pʋɔ a, bɛ na nyɛ̃ nɩ zie a ɩ̃ nɩ-bʋʋrɛ pʋɔ. 17Ɛcɛ a nɩ-bʋʋrɛ bɛ ŋa kãw bɛ wa bɛrɛ wone a ɩ̃ ƴɛ̀rʋ a, ɩ̃ na ír ʋ nɩ a ʋ tẽw pʋɔ a baarɩ, ɛ́ bɛr ʋ ʋ kpi.» A Sore n'ʋ yel.
Currently Selected:
Zeremi 12: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
