Ɩzayi 44

1Ɛcɛ ƴɛrɛŋa a, bɛrɛ wone,

ɩ̃ tõ-tõ-bie Zakɔb i,

fʋ̃ʋ Ɩsɩrayɛl ɩ̃ na kaa ír a.

2À ŋá n'a ɩ̃ yere,

a mãa Sore na maalɩ fʋ a,

na cɔbrɩ fʋ ɛ́ fʋ bɛ dɔw sɛr

ɩ̃ɩ waar a fʋ sõwfʋ a:

Ta zɔrɛ dɛ̃bɩ̃ɛ ɩ, ɩ̃ tõ-tõ-bie Zakɔb i,

fʋ̃ʋ Yesurun#44:2 Yesurun: A yúor ŋa n'ʋ bɛ kʋ̀ a Zakɔb a Wulu-ayi-sob sɛbɛ pʋɔ 32.15 nɩ 33.5, 26 nɩ a manʋ. Kapaw, a yúor ŋa pɛr'ɩ «Nɩsaal-dẽdẽ», ɛ́ a Zakɔb pɛr'ɩ «Nɩsaal-libelibe». ɩ̃ na kaa ír a.

3Bʋ̃ʋ n'ʋ vɛ̃, ɩ̃ na cir'ɩ kʋ̃ɔ ƴãw

a tẽsɔw kʋ̃ɔ-nyúur na kpɛ a,

ɛ́ ɩ bàrʋ zɔ pàw a tẽ-kõw.

Ɩ̃ na pɛbl'ɩ a ɩ̃ Vʋʋrʋ a fʋ bibiir zu,

ɛ́ ɩ a ɩ̃ maalʋ siw a fʋ bʋʋrɛ zu.

4Bɛ na bul'a ɛ́ kɛrɛ

mɛ̃ mɔ̃-ɓaar púo pʋɔ a,

mɛ̃ tɩɩr na àr bàa nʋɔr a.

5Kãw na yel a: “A Sore so m”,

kãw na bɔbr'a k'ʋʋ tɛr a Zakɔb yúor.

Ŋa sob na sɛb'ɩ a ʋ nũu zu:

“A Sore bʋ̃-sora nɛ m”,

ɛ́ de a Ɩsɩrayɛl yúor.»

Naaŋmɩn-been yõ n'ʋ be

6À ŋá n'a a Sore, a Ɩsɩrayɛl Nãà,

a ʋl na yarɛ dier ʋ a,

a Sore kpɛnʋ-za-sob, yere:

«Mãa n'ɩ a niw-diere,

mãa n'ɩ a po-pàwrɛ.

Mãa bɛ wa n'ʋ a, Naaŋmɩn bɛ ka be ɩ.

7Ãa n'ʋ ɩ mɛ̃ a mãa a?

Ʋ yel a lɛ na be be a, ɛ́ man ʋ kʋ̀ m!

Ʋ yel a yele na ɩ a lɛ ɩ̃ na tĩ

kɛ́ cɔbrɩ a nɩ-bʋʋr-dãw-niwn sob a,

ʋ yel a yele al na na ɩ a!

8Nyɩɩm, ɩ̃ nɩ-bʋʋrɛ ɛ,

nyɩ ta zɔrɛ dɛ̃bɩ̃ɛ màwr ɛ.

Ɩ̃ bɛ yel a yel ŋa kʋ̀ nyɩ koro za

ɛ́ ɩ nyɩ bãw ʋ ɛ?

Nyɩmɛ bɛ n'ɩ a ɩ̃ dãsɩɛ dem ɛ?

Mãa bɛ wa n'ʋ a, Naaŋmɩn lɛb'a be be e?

Ʋ̃ʋ'hʋ̃, Pìir kãw bɛ lɛb ka be ɩ,

ɩ̃ bɛ bãw a kãw za ɩ.»

A tɩbɛ maalbɛ

9A bɛlɩ dem na maalɛ a tɩbɛ a,

bɛ za bɛ ɩ bom za ɩ,

ɛ́ a bɛ bʋ̃-vɩɛlɩ bɛ tɛr yel-ɩra kãw za ɩ.

A ɩ n a bɛ dãsɩɛ dem,

ɛ́ ɩ dãsɩɛ dem na bɛ nyɛrɛ bom za a,

na bɛ bãw bom za ɛ́ na ƴãw bɛ vĩ a.

10Fʋ maal'ɩ ŋmɩn,

fʋ nyɩl'ɩ kure maal'ɩ tɩɩb

na kʋ̃ tɛr yel-ɩra kãw za a,

nyɛ̃ dãbolu a!

11Bɛlɩ dem za na tu a a, bɛ na nyɛ̃ nɩ vĩ.

A nuru tõ-tonbɛ na maalɛ a a, bɛ ɩ n nɩsaalbɛ tɛwr!

Bɛ ɓã taa bɛ za, bɛ yi àr:

dɛ̃bɩ̃ɛ na nyɔw bɛ na ɛ́ vĩ ɩrɛ bɛ za.

12A sãa-kpɩɛrɛ kpaalɛ nɩ lɛr

vũu-bi-cõcole zu.

'Hama n'ʋ ʋ pɔbr'ɩ ʋ nɩ a ʋ kpãkpã-kpɛ̃w

maalɛ nɩ ʋ.

Ɛcɛ kɔ̃ wa dɛ nyɔw a,

ʋ bɛ mɩ́ cãà tɛr fãw ɛ.

Ʋlɛ bɛ wa nyũ kʋ̃ɔ a,

ʋlɛ mɩ́ n'ɩ ŋan bàl.

13A dà-pɛnɛ de nɩ miwr manɩ nɩ a ʋ dàa.

Ʋ tʋ̃ɔ̀ nɩ a tɩɩb dasule nɩ gʋɔr-pla.

Ʋ pɛnɩ nɩ a dàa nɩ lɛr ɛ́ sal ʋ nɩ kara.

Ʋ ɩ na ʋ ŋmɛ̃ taa nɩ nɩr,

nɩr na pɔ̀l yaga

ɛ́ na be zi-sõw kãw pʋɔ a.

14Ʋ cɛ n tɩɛ na vɩɛl mɛ̃ a sɛɛdɩr tɩɛ a,

ʋ kaa na ír tɩ-kpɛ̃w mɛ̃ a sɛn tɩɛ,

bɩɩ tɩ-kpɛ̃w-yũo kãw a.

Ʋ bɛr a na a kɛrɩ a tuw pʋɔ.

Bɩɩ ʋ sɛl'ɩ tɩ-kpɛ̃ɛ kãw mɛ̃ a pɛ̃ tɩɛ a,

a saa waar ƴãwn ʋ kɛrɩ.

15A dàar na tɛr'ɩ yel-ɩra a nɩsaalbɛ zie,

a vũu gbɔwfʋ ƴãw.

A nɩbɛ mɩ́ de a na gbɔw nɩ vũu kɛ́ bɛ ʋʋrɩ,

bɩɩ kɛ́ bɛ dʋw nɩ a bʋ̃-dɩrɩ.

Bɩɩ bɛ mɩ́ cãà na maal'ɩ ŋmɩn,

lore gbine dume a ʋ pile,

bɛ mɩ́ maal'ɩ tɩɩb gũune a ʋ niŋé.

16Bɛ mɩ́ de nɩ a dàar ŋmãa gbɔw nɩ vũu,

ƴãw a nɛn a be sɛ̃ 'wɔb tɩw.

Bɩɩ bɛ mɩ́ ʋʋrɛ nɩ a vũu yere nɩ:

«Ʋ̃'hʋ̃ʋ, ɩ̃ ʋʋrɛ nɩ vũu,

nyɛ̃ a vũu nyɛ́b na nʋmɛ a!»

17A dàar na cɛ a,

bɛ mɩ́ maal'ɩ nɩ ŋmɩn, tɩɩb.

Bɛ mɩ́ gũune na ɛ́ gbine dume a ʋ niŋé,

ɛ́ puore ʋ à ŋá:

«Fʋ̃ʋ n'ɩ a ɩ̃ ŋmɩn, faa mɛ̃!»

18A nɩbɛ bɛ ŋa bɛ bãw bom za ɩ,

bɛ bɛ bãw bom za pɛr ɛ.

Bʋ̃ʋ n'ʋ vɛ̃, dɛwr paal'ɩ a bɛ mimie

bɛ bɛ cãà nyɛrɛ ɩ,

a bɛ tɩɛrʋ ɩ n ŋmãa zuo

bɛ kʋ̃ tʋ̃ɔ́ bãw bom pɛr ɛ.

19Kãw za bɛ mɩ́ lɛb tɩɛrɩ ɛ,

kãw za bɛ tɛr a yã

nɩ a tɩɛrʋ na mɩ́ yel ʋ tʋɔra à ŋá ɩ:

«Ɩ̃ nyɩw nɩ a dàar ŋmãa,

ɩ̃ dʋw nɩ a ɩ̃ bʋ̃-dɩrɩ a vũu-bie zu,

ɛ́ sɛ̃ a nɛn ɩ̃ na 'wɔbr a.

Ɛ́ na de a ŋmãa maal'ɩ tɩɩb-faa faa,

gũune dà-ŋmãa niŋé!»

20A nɩbɛ bɛ ŋa tu n bom na ɩ tãpɛlʋ tɛwr a.

A bɛ tɩɛrʋ be n tulu pʋɔ,

ɛ́ bɛ tɩ́ɛrɛ a bɛ tore ɩ.

Bɛ kʋ̃ faa a bɛ nyɔ-vʋʋrʋ ɛ.

A bɛ kãw za kʋ̃ yel:

«A bom ɩ̃ na tɛr a nũú a

ɩ n ŋmɩn-bɛlɛbɛlɛ, a sãá na» ɩ.

A ɩ̃ tõ-tõ-bie nɛ b, taa yiire ɩ

21«Bãwnɩ a yel ŋa, Zakɔb i,

nɩ fʋ̃ʋ Ɩsɩrayɛl i, bʋ̃ʋ n'ʋ vɛ̃,

fʋ ɩ n a ɩ̃ tõ-tõ-bie.

Ɩ̃ cɔbrɩ fʋ na kɛ́ fʋ ɩ a ɩ̃ tõ-tõ-bie.

Ɩsɩrayɛl i, ɩ̃ bɛ yiire fʋ bɛrɛ ɩ.

22A fʋ nɩ-gaara ɩ-ɩrɩ a,

ɩ̃ ɩ na a bɔr mɛ̃ zũzuwr a,

ɛ́ a fʋ sãwna baarɩ mɛ̃ ulu a.

Lɛb wa a ɩ̃ zie, ɩ̃ ɩ n a fʋ ya-diere.»

23Salom i, lɔbr nʋ̃ɔ̀ cɛlsɩ,

bʋ̃ʋ n'ʋ vɛ̃, a Sore ɩrɛ nɩ bom!

Tẽsɔw pʋ̃ɔmɩ za a, cáarɛ,

nyɩɩm, tan nɩ tuwr tɩɩr i,

nyɩ ŋmɩɛr nʋ̃ɔ̀ cɛlsɩ.

Bʋ̃ʋ n'ʋ vɛ̃, a Sore ya na de a ʋ nɩ-bʋʋrɛ,

ʋ wul'ɩ a ʋ vɩɛlʋ a Ɩsɩrayɛl tẽw pʋɔ.

A tẽ-daa Íre n'ɩ a yele za zu-sob

24Ɩsɩrayɛl i, a Sore, a fʋ ya-diere

na cɔbrɩ fʋ a fʋ mã puori a,

ƴɛ̀rɛ nɩ a fʋ zie à ŋá:

«Mãa n'ɩ a Sore na maalɛ bom za a.

Mãa n'ʋ dɔl a salom, mãa ɩ̃ yõ tẽtẽ,

ɩ̃ yɛ́r'ɩ a tẽw ɛ́ nɩr za bɛ sõw mɛ̃ ɩ.

25Ƴɛrɛŋa a, ɩ̃ ɩrɛ na a bàwr-bʋwrbɛ

ƴɛ̀rʋ bɛ cãà tɛr pɛr ɛ.

Ɩ̃ ɩrɛ na a bɛlɩ dem na yere

a nɩdaar yele a, bɛ bʋ̀nɛ ƴɛ̀rɛ.

Ɩ̃ fɛrɛ nɩ a yã-bãwnbɛ bɛ lɛbr pùor,

ɩ̃ mɩ́ wul'ɩ a lɛ a bɛ bãwfʋ na ɩ gẽgemi a.

26Ɛcɛ ɩ̃ mɩ́ ɩ n a ɩ̃ tõ-tõ-bie ƴɛ̀rʋ tu,

ɛ́ ɩ a lɛ a ɩ̃ nɩ-toni na yel a maalɩ.

Ɩ̃ yere nɩ a Zerizalɛm ƴãw:

“Nɩbɛ na lɛb'a kpɛ ʋ,

bɛ na lɛb a libri a ʋ deboru”.

Ɩ̃ yere nɩ a Zuda tẽ-bɛrɛ ƴãw:

“Bɛ na lɛb'a mɛ a”.

27Ɩ̃ yere nɩ a kʋ̃ɔ-kpɛ̃ɛ na zulme a:

“Ko gã, ɩ̃ na ɩ n a fʋ mamɛ a sɩr”.

28Ɩ̃ yere nɩ à ŋá a Siirisɩ ƴãw:

“A cɩ̃ɩnɛ#44:28 Siirisɩ: Nyɛ̃ 41.2 nɩ a manʋ. Cɩ̃ɩnɛ: A Wõ-ta-kʋra sɛbɛ pʋɔ a, gb'a à ŋá za, bɛ mɩ́ bʋɔl'ɩ a nɩ-bʋʋrɛ kaarbɛ kɛ́ cɩ̃ɩnbɛ. ɩ̃ na kaa ír a n'ʋ.

Ʋ na ɩ n a lɛ za ɩ̃ na bɔbr a tu.

ʋ na tɩr'ɩ nʋɔr ɛ́ a Zerizalɛm lɛb mɛ,

ɛ́ a Ŋmɩn-yir-kpɛ̃ɛ lɛb mɛ àr.”»

Currently Selected:

Ɩzayi 44: DBDC

Highlight

Copy

Compare