Ɩzayi 25
25
Barka puoru yielu
1Sore e, fʋ̃ʋ n'ɩ a ɩ̃ Naaŋmɩn,
ɩ̃ zɛwr fʋ na ɛ́ íre a fʋ yúor.
Bʋ̃ʋ n'ʋ vɛ̃, fʋ maal'ɩ a yel-vɩɛlɩ fʋ na tɩɛrɩ a.
Koro za n'a fʋ tɩɛrɩ a,
a gã na ɛ́ bɛ lɩɛbɛ ɩ.
2Fʋ ɩ na a tẽ-kpɛ̃ɛ lɩɛbɩ
kʋsɛbɛ na gbõ taa a,
a tẽ-kpɛ̃ɛ na cɔbrɩ kpɛmɛ
a zɛbr ƴãw a, ʋ lo.
A nɩ-sãanbɛ zɛbr-yir-kpɛ̃w
bɛ cãà ɩ tẽ-kpɛ̃ɛ ɩ,
bɛ kʋ̃ lɛb mɛ ʋ towtow ɛ.
3Alɛ so nɩ-bʋʋrɛ kãw na kpɛmɛ a íre a fʋ yúor,
nɩ-bʋʋrɛ na ɩrɛ po-to-fãw-ɩb a tẽ-bɛrɛ ƴãwnɛ fʋ na.
4Bʋ̃ʋ n'ʋ vɛ̃, fʋ̃ʋ n'ʋ mɩ́ piw a bãbàalbɛ tɛr,
fʋ mɩ́ piw nɩ a nan dem tɛr a bɛ kpɩɛrʋ pʋɔ.
Fʋ ɩ n taw-lanʋ zie a saa ƴãw,
ɓaarʋ a mʋ̃tɔ̃-tʋlʋ ƴãw.
— A po-to-fãw dem suur
ɩ na mɛ̃ saa na waar'ɩ sɛsɛb ŋmɩɛr dacin a,
5mɛ̃ a mʋ̃tɔ̃-tʋlʋ na dɩrɛ tẽ-kõw a—.
Fʋ mɩ́ ɩ na a nɩ-sãanbɛ damnʋ baarɩ.
Mɛ̃ a lɛ zũzuwr ɓaarʋ
na mɩ́ ɩ a mʋ̃tɔ̃w tʋlʋ ɓãa a,
fʋ mɩ́ ɩ na a po-to-fãw dem
zɛb-tʋ̃ɔ́fʋ yielu baarɩ.
A Sore cɔbrɛ nɩ cuw dɩb a nɩ-bʋʋrɛ za ƴãw
6A Sore, a kpɛnʋ-za-sob,
cɔbrɛ nɩ cuw dɩb a nɩ-bʋʋrɛ za ƴãw
a Sɩyɔ̃ tãw zu,
nɛn-kãánɩ nɩ divɛ̃-kore cuw dɩb,
— nɛn-kãánɩ nɩ nɛn-buge,
divɛ̃-kore na bɩ tɔ a —.
7A be n'a ʋ na ír a kuor pɛn
na pàw a nɩ-bʋʋrɛ za a bɛr,
a kũuni gãw na pàw a ten za a.
8Ʋ na ír'ɩ a kũu bɛr a nʋɔr kʋ.
A Sore Naaŋmɩn na fɩɛl'ɩ a mʋta-kʋ̃ɔ bɛr
a niŋe za ƴãw.
Ʋ na ír'ɩ a ʋ nɩ-bʋʋrɛ vĩ bɛr a tẽw za pʋɔ.
A Sore n'ʋ yel.
Ɩsɩrayɛl so nʋ̃ɔ̀ ɛ́ Mowab so loba
9Bɛ na yere nɩ a ʋlɩ bibir nɛ:
«Ʋlɛ n'ɩ a tɩ Naaŋmɩn.
Tɩ tɩ ƴãw nɩ a tɩ tɩɛrʋ a ʋ ƴãw,
ʋʋ faa tɩ na.
Sɩza, a Sore ƴãw n'a tɩ ƴãw a tɩ tɩɛrʋ.
Nyɩ ɩ tɩ cɩlɛ ƴawr'ɩ, tɩ cáarɛ,
ʋ na faa tɩ a ƴãw.
10A Sore nũu na ɩ nũ-vla a
na gù n a tãw ŋa.»
Ɛcɛ bɛ ƴɛ́r'ɩ a Mowab ŋmɛr bɛr ʋ gã,
mɛ̃ mɔ̃-kon bɛ na nɛb kʋ̀rkʋr
pʋɔrʋ bɔw pʋɔ a.
11A be a, ʋ na mɩ́ dɔl'ɩ a kpãkpamɛ
mɛ̃ a lɛ bɛ na mɩ́ dɔl a a duwru ƴãw a.
Ɛcɛ, nɩ a fãw za ʋ na saa na ƴãw a,
a Sore na siwr'ɩ a ʋ pɔ̀lʋ.
12A fʋ dacine ziir al bɛ na cɔbrɩ
a kpɛmɛ a zɛbr ƴãw bɛ tɛr tab a, Mowab i,
a Sore lɔb a na, ʋ da a na lɔb,
ʋ ɩ na a siw gã tẽw, a uuru pʋɔ.
Currently Selected:
Ɩzayi 25: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
