Ɩzayi 14
14
A Ɩsɩrayɛl nɩbɛ na lɛb'a wa a bɛ tẽw pʋɔ
1A Sore na zɔ n a Zakɔb bʋʋrɛ nɩbaalʋ, ʋ na cãà na wul k'ʋʋ kaa na ír a Ɩsɩrayɛl. Ʋ na ɩ na a Ɩsɩrayɛl nɩbɛ lɛb zɩ̃ a bɛ tẽw pʋɔ. A nʋʋrɩ na lãw nɩ bɛ na pʋɔ a Zakɔb nɩbɛ pʋɔ.
2A nɩ-bʋʋr-yoru na tɛr'ɩ a Ɩsɩrayɛl nɩbɛ lɛb wa n a bɛ tẽw pʋɔ. Ɛ́ a be a, a tẽsɔw a Sore na so a pʋɔ a, a Ɩsɩrayɛl nɩbɛ na de nɩ a nɩbɛ bɛ ŋa bɛ ɩ gbãgbaar, a dɛbr nɩ a pɔwbɛ. Bɛ na tɛr bɛ na bɛ ɩ zɛbr nɩ-nyɔwrɩ, bɛl na dãw tɛr a bɛl Ɩsɩrayɛl nɩbɛ bɛ ɩ zɛbr nɩ-nyɔwrɩ a. A Ɩsɩrayɛl nɩbɛ na so nɩ a nɩbɛ bɛ ŋa na dãw so bɛ a.
A Babɩlɔn tẽw nãà kũu
3Ɩsɩrayɛl i, a ʋlɩ bibir a Sore nãà wa ɩ fʋ nyɛ̃ pɩ̃ɛnʋ a fʋ kpɩɛrʋ, a fʋ wʋ̀ʋr nɩ a gbãgba-tuo fʋ na nyɛ̃ a pùorí a, 4fʋ na cɛ n a yielu ŋa, kɛ́ fʋ ɩ a Babɩlɔn tẽw nãà la:
Ŋmɩŋmɩn za n'a a tʋ̃ɔ́ ɩ?
A nɩ-dɔwrɛ baarʋ n'a,
a po-to-fãw-ɩb baarʋ n'a!
5A Sore sãw nɩ a nɩ-faar kpɛnʋ bɛr,
ʋ kár'ɩ a po-to-fãw sob dabɔl bɛr
6na tɩ ŋmɩɛr a nɩbɛ kʋralɛ ŋmɛ-tʋlʋ tʋlʋ a,
na mɩ́ tɩ tʋ̃ɔ́ a nɩ-bʋʋr-yoru nɩ suur a,
ɛ́ dɔwrɛ bɛ bɛ zʋmnɛ nɩ a.
7A tẽw za pãa pɩ̃ɛnɛ nɩ zoom.
A nɩbɛ ŋmɩɛr'ɩ nʋ̃ɔ̀ cɛlsɩ.
8A tɩɩr mɩ̀ cɩlɛ nɩ
a po-to-fãw sob kũu ƴãw.
A sɩpɩrɛ tɩɩr yere na kʋ̀rɛ ʋ:
«A lɛ fʋ na dɛ kpɛ a bɔw a,
nɩr bɛ lɛb cãà dúor waar wa cɩɛr tɩ lɔbr ɛ.»
9A kpɩmɛ-tẽw damnɛ nɩ a pile a fʋ ƴãw,
a fʋ waa yele bɛ na wõ a ƴãw.
Ʋ sɩ̃wnɛ nɩ a nyãakpɩmɛ a fʋ ƴãw,
a bɛlɩ dem za na tɩ dãw ɩ nɩ-bɛrɛ a tẽw zu a.
Ʋ ƴãw na a nɩ-bʋʋrɛ na-mɩnɛ
ìre a bɛ naalʋ-dà-kɔwr zuru.
10Bɛ dier'ɩ a ƴɛ̀rʋ bɛ za, ɛ́ yere kʋ̀rɛ fʋ:
«A fʋ̃ʋ mɩ̀ a, fʋ̃ʋ n'ɩ ŋan bɛ tɛr fãw ɛ,
mɛ̃ a tɩɩm a.
Fʋ ŋmɛ̃ na taa nɩ tɩ ƴɛrɛŋa!»
11A fʋ korijom ŋmɩɛrʋ pʋɔ n'a
a fʋ dɛpaalʋ siw a kpɩmɛ-tẽw.
Pʋɔrʋ n'ɩ a bʋ̃-zʋmzʋm zu fʋ na gã a,
ɛ́ a zãzule n'ɩ a fʋ gãw-vaara.
12Ŋmɩŋmɩn za n'a fʋ yi a salom zu lo,
fʋ̃ʋ, zi-vɩɛ-ŋmar-bir-nyɩwra?
Ŋmɩŋmɩn za n'a bɛ lɔb fʋ bɛr a tẽw zu,
fʋ̃ʋ na mɩ́ tɩ tʋ̃ɔ́ a nɩ-bʋʋrɛ a?
13Fʋ mɩ́ tɩ yere na:
«Ɩ̃ na do na tɩ tɔ a salom,
ɩ̃ na bin nɩ a ɩ̃ naalʋ-dà-kɔw
a Naaŋmɩn ŋmar-bie zu-sɔw,
ɩ̃ na zɩ̃ n a tãw ʋl zu
a ŋmɩmɛ na mɩ́ tuori taa a,
a saa-pɛrɩ́-gʋba-lowr saa-zu za#14:13 A koro za Saa-pɛrɩ́ nɩbɛ puoru a mɩnɛ tɩ yere na k'aa ŋmɩmɛ mɩ́ ɓã n taa tãw kãw zu yũon za, a saa-pɛrɩ́-gʋba-lowr saa-zu za, k'aa ƴãw a lɛ a nɩsaalbɛ yele na na tu a..
14Ɩ̃ na do n a zũzuwe nyʋɔrɩ́,
ɩ̃ na ɩ na mɛ̃ a Naaŋmɩn-na-do-saa-bɛ-pɩɛl-a.»
15Ɛcɛ a kpɩmɛ-tẽw n'a a wa fɛr fʋ siw,
a bɔw-zulu pɛrɩ́.
16A bɛlɩ dem na nyɛrɛ fʋ a,
mɩ́ maal'a bɛl fʋ,
bɛ mɩ́ jɩ́rɛ fʋ nɩ gbẽgbẽ, tɩ́ɛrɛ nɩ bɛ pʋɔ:
«A nɩr ʋl na mɩ́ tɩ ɩ a tẽw màwr a,
a ʋl na mɩ́ tɩ damnɛ a naalʋ-ten a,
ʋlɛ sɩrɩ n'ɩ à ŋà a?
17Ʋlɛ sɩrɩ n'ʋ mɩ́ tɩ ɩ a tẽ-daa ʋ lɩɛbɩ wɛja-kpalɛ,
mɩ́ tɩ sãw a tẽ-bɛrɛ bɛr,
ɛ́ bɛ sàw na lɛb bɛr a zɛbr nɩ-nyɔwrɩ ɛ?»
18A nɩ-bʋʋrɛ na-mɩnɛ za,
bɛ za nyɛ̃ nɩ ƴãwfʋ gã nɩ,
ŋa za a ʋ yàa pʋɔ.
19Ɛcɛ a fʋ̃ʋ a, bɛ lɔb fʋ na bɛr
zãá nɩ a fʋ ũùfʋ zie,
mɛ̃ bi-cur-bɛra na ɩrɛ kɔkɔrʋ a,
mɛ̃ kũu bɛ na nɛb'ɩ gbɛ́ɛ a.
Nɩbɛ bɛ na kʋ a nɛbɛ pàw fʋ,
Nɩbɛ a zɛbr-sɔ-kpɛ̃ɛ na kʋ a.
Bɛ bin bɛ nɩ a kʋsɛbɛ
na pɩɛrɩ pàw a bɔw-zulu pɛr a zu.
20Ɛcɛ bɛ kʋ̃ ũù fʋ lãwnɩ bɛ ɩ,
fʋ na sãw a fʋ tẽw bɛr a ƴãw,
fʋ na kʋ a fʋ nɩ-bʋʋrɛ a.
A nɩ-faar bʋʋrɛ yúor kʋ̃ lɛb por towtow ɛ.
21Nyɩ cɔbrɩ a bidɛbr kʋb
a bɛ sãà mɩnɛ sãwna ƴãw,
bɛ taa wa mab ìr lɛb zɛb de a tẽw,
ɛ́ mɛ tẽ-bɛrɛ paalɩ a tẽ-daa ɩ.
22A Sore, a kpɛnʋ-za-sob, yere na: «Ɩ̃ na ìr'ɩ a Babɩlɔn tẽw dem ƴãw. Ɩ̃ na ɩ na a Babɩlɔn yúor bɔr, lãwnɩ a ʋ nɩbɛ na cãà vʋʋrɛ a, a bɛ bibiir nɩ a bɛ pùorí nɩbɛ. 23Ɩ̃ na ɩ na a Babɩlɔn tẽw lɩɛbɩ bà-ƴɔrɛ, zɔ̃põ kpɛb zie. Ɩ̃ na pɩɩr'ʋ na nɩ saar na pɩɩrɛ cãlãcãlã a, a Sore, a kpɛnʋ-za-sob'ʋ yere.»
A Sore na sãw nɩ a Asiiri tẽw dem kpɛnʋ bɛr
24A Sore, a kpɛnʋ-za-sob, pɔ na yel à ŋá:
«A lɛ ɩ na tɩ́ɛrɩ a, lɛ n'a a na ɩ,
a lɛ ɩ̃ na yel a, lɛ n'a na maalɩ.
25Ɩ̃ na sãw nɩ a Asiiri tẽw dem kpɛnʋ bɛr a ɩ̃ tẽw pʋɔ,
ɩ̃ na nɛb'ɩ bɛ nɩ gbɛ́ɛ a ɩ̃ tan zu.
A bɛ kpɛnʋ dĩ nɩ a ɩ̃ nɩbɛ
mɛ̃ ni-kʋ́ɔrɩ dàa a, ɩ̃ na ír ʋ na bɛr.
Bɛ dɔwl'ɩ to-tɩbrʋ a bɛ bawŋmamɛ zu,
ɩ̃ na tow ʋ na bɛr.»
26A lɛ a Sore na yel
a tẽ-daa za ƴãw a n'ɩ à à ŋá,
nɩ a nũu ʋ na zɛw a nɩ-bʋʋrɛ za ƴãw a.
27A Sore, a kpɛnʋ-za-sob,
wa yel k'ʋʋ na ɩ n bom,
ãa n'ʋ na ɩ a bɛ tʋ̃ɔ́?
Ʋlɛ wa zɛw a nũu a,
ãa n'ʋ na ɩ ʋ lɛb bɛr?
Filisɩtɛ̃ mɩnɛ ɛ, nyɩ ta cɩlɛ ɩ
28Yel ŋa n'ʋ bɛ tɩ yel a nãà Akaazɩ kũu yũon#14:28 A na ɩ n a Yeezu Kɩrɩta na bɛ tɩ wa sɛr a yome 716 vuo pʋɔ..
29Nyɩɩm, Filisɩtɛ̃ mɩnɛ za a,
nyɩ ta cɩlɛ a dabɔl na tɩ ŋmɩɛr nyɩ a
na kar a ƴãw ɛ.
Bʋ̃ʋ n'ʋ vɛ̃, dɔpan na yi n a wa-kũu pʋɔ,
ɛ́ wa-bɩɛ, na mɩ́ ƴaw a, yi a dɔpan pʋɔ.
30A nɩ-kɔmɛ za pʋɔ nɩ-kɔmɛ na tɛr'ɩ bʋ̃-dɩrɩ,
a bãbàalbɛ na pɩ̃ɛnɛ na, ɛ́ bom bɛ damnɛ bɛ ɩ.
Ɛcɛ a nyɩɩm, Filisɩtɛ̃ mɩnɛ a,
a nyɩ dɔ̃ dem na ɩ na nyɩ kpi kɔ̃ pàw pɛr,
ɛ́ bɛ na kʋ n a bɛlɩ dem nãà wa cãà vʋʋrɛ a.
31Tẽ-bɛrɛ dɩ̃dɛɛ ɛ, nyɩ kone!
Nyɩɩm tẽ-bɛrɛ ɛ, nyɩ lɔbr cɛlsɩ!
A Filisɩtɛ̃ tẽw za kanyir baar'a,
bʋ̃ʋ n'ʋ vɛ̃, zʋ̀ʋ́r yi n a saa-pɛrɩ́-gʋba-lowr#14:31 A lɛn daar a, a Saa-pɛrɩ́-gʋba-lowr tɛwr'a a Zuda naalʋ-tẽw dɔ̃ dem mɩ́ tɩ tʋ̃ɔ́ yi wa. waar.
A dɔ̃ dem zie a, nɩr bɛ tawr yire
a zɛbr-nɩbɛ pʋɔ ɩrɛ ʋ yõ ɩ.
32Bɛ sɔw kɛ́ bʋnʋ kʋ̀ a nɩbɛ
a Filisɩtɛ̃ mɩnɛ na tõ a?
K'aa Sore mɩŋa n'ʋ mɛ a Sɩyɔ̃ tẽw.
Be n'a a ʋ nɩ-bʋʋrɛ bãbàalbɛ kʋ̃ bãw damnʋ ɛ.
Currently Selected:
Ɩzayi 14: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
