Ɩzayi 13
13
A Babɩlɔn tẽw loba pɩɛl'a
1Ƴɛ̀rʋ na càarɩ a Babɩlɔn tẽw bɛ ƴɛ̀r kʋ̀ Amɔtɩsɩ bidɛb, Ɩzayi, yel-nyɛra pʋɔ a.
2A Sore yere na:
«Nyɩ zɛw bãwfʋ tã-kpalɛ zu.
Nyɩ lɔbr nʋ̃ɔ̀ cɛlsɩ yere kʋ̀rɛ a zɛbr-nɩbɛ.
Nyɩ wul bɛ nɩ a nũu,
bɛ tu a nɩ-yée dɩ̃dɛɛ ƴãw kpɛ.
3Mãa n'ʋ tɩr a ɩ̃ nʋɔr kʋ̀
a bɛlɩ dem ɩ̃ na so a.
Ɩ̃ bʋɔl'ɩ a ɩ̃ soja-gãdaar,
a bɛl a ɩ̃ zɛb-tʋ̃ɔ́fʋ na ɩrɛ nʋ̃ɔ̀ a,
k'ɩ̃ɩ wa wul'ɩ a ɩ̃ suur.»
4Nyɩ bɛrɛ wone a gɔmɛ á ŋá a tan pʋɔ,
a ɩ na mɛ̃ zu-sɛbla na bɛ dɩ vuo a nɛbɛ a.
Nyɩ bɛrɛ wone a naalʋ-ten damnʋ ŋa,
nɩ-bʋʋrɛ na ɓã taa a.
A Sore, a kpɛnʋ-za-sob'ʋ
jɩ́rɛ a zɛbr-nɩbɛ kaar a zɛbr ƴãw.
5A Sore nɩ a bɛlɩ dem
ʋ na na wul'ɩ a ʋ suur a,
yi n tẽ-zãána, bɛ yi n a tẽw tʋra ƴãw waar.
Bɛ na wa sãw nɩ a tẽw za bɛr.
6Nyɩ ŋmɩɛr kuor cɛlsɩ!
A Sore bibir#13:6 Sore bibir: Nyɛ̃ 2.11-12. pɩɛl'a,
ʋ tarɛ na mɛ̃ bom-za-sãwfʋ
na yi a Kpɛnʋ-za-sob zie a.
7Alɛ n'a so a kpãkpamɛ za kpi,
ɛ́ nɩsaal za kanyir baarɩ.
8Pʋl-vʋ̃ɔ nyɔw bɛ na,
'wɔbrʋ nɩ vãwkuur tɛr bɛ na,
bɛ ŋmɩɩlɛ na mɛ̃ pɔw na dɔwr a.
Bɛ háa háa nɩ nɛ́ɛ jɩ́rɛ nɩ taa.
A bɛ niŋe mʋ̃ɔ̀ nɩ kãkãkã.
9A Sore bibir'ɩ ŋan tarɛ,
bibir nɩbaalʋ zɔba na bɛ ka be a,
su-tʋlʋ kpãkpã bibir tɛwr
na na ɩ a tẽw lɩɛbɩ wɛja-kpalɛ ɩrɛ nɩbaalʋ,
ɛ́ ɩ a yel-bebe dem kpi pàw pɛr a ʋ pʋɔ a.
10A saa ŋmar-bi-beƴeni nɩ a al na mɩ́ ɓã taa a
kʋ̃ cãà nyɩwrɛ ɩ.
A mʋ̃tɔ̃w na mɩ́ pure na wa báarɛ ɛ́ liw,
ɛ́ a cuw cãà kʋ̃ cãà caalɛ ɩ.
11A Sore yere na:
«Ɩ̃ na dɔwr'ɩ a tẽ-daa a ʋ faalʋ ƴãw,
a nɩ-faar a bɛ ɩ-faar ƴãw.
Ɩ̃ na ɩ na a pɔ̀lʋ dem nyɔka-ɩb baarɩ,
ɩ̃ na siwr'ɩ a bɛlɩ dem
na dɩrɛ gãda-nɩ-kpɛ̃ɛnʋ a pɔ̀l-ɩb.
12Ɩ̃ na ɩ na a nɩsaalbɛ bɛ cãà nyɛrɛ
mɛ̃ a salm-zɩɛ mɩŋa mɩŋa a ɩ,
bɛ bɛ cãà nyɛrɛ mɛ̃ a Ofɩɩr tẽw salm-zɩɛ a ɩ.»
13Al ƴãw n'a a salom na dam,
ɛ́ a tẽsɔw gbiwri a ʋ pɛr zu,
a Sore, a kpɛnʋ-za-sob, su-yãyaar ƴãw,
a ʋ su-tʋlʋ kpãkpã bibir.
14Lɛ n'a ŋa za na mɩ́ lɛb tɩ páw a ʋ bʋʋrɛ,
ŋa za na mɩ́ lɛb zɔ tu a ʋ tẽw lowr,
mɛ̃ mɔlʋ bɛ na diwr a,
mɛ̃ píir nɩr za na bɛ kparɛ ɓanɛ taa a.
15Bɛlɩ dem za bɛ na na nyɛ̃ a,
bɛ na baw bɛ na nɩ pime,
ɛ́ bɛlɩ dem za bɛ na na nyɔw a,
zɛbr-sɔ-kpɛ̃ɛ n'ʋ bɛ na kʋ n bɛ.
16Bɛ na ƴɛ́r'ɩ a bɛ bi-cãpʋrmɛ ŋmɛr a bɛ mimié,
bɛ na za n a bɛ yie,
ɛ́ fɛr a bɛ pɔwbɛ gã nɩ.
17A Sore yere na:
«Ɩ̃ na ƴãw na Mɛdɩ#13:17 Mɛdɩ mɩnɛ: A koro za Saa-pɛrɩ́ nɩ-bʋʋrɛ kãw nɛbɛ. Bɛ tɩ pʋɔ na zɛb de a Nɩnɩɩvʋ tẽw na ɩ a Asiiri tẽw tẽ-kpɛ̃ɛ a, a Yeezu Kɩrɩta na bɛ tɩ wa sɛr a yome 612, ɛ́ mɩ̀ lɛb pʋɔ zɛb de a Babɩlɔn tẽw, a Yeezu Kɩrɩta na bɛ tɩ wa sɛr a yome 539. mɩnɛ wa a bɛ ƴãw,
nɩbɛ a salm-pla na bɛ ɩrɛ bɛ bom a,
ɛ́ bɛ tobr bɛ ka a salm-zɩɛ ƴãw a.
18A bɛ pime tɛbr'ɩ a pɔlbili lɔbr,
bɛ bɛ jɩɩrɛ a bi-pɩɩlɛ bɛrɛ ɩ,
bɛ bɛ zɔrɛ a bibiir nɩbaalʋ ɛ.»
19A Babɩlɔn tẽw,
a naalʋ-tẽw tẽ-kpɛ̃ɛ na vɩɛl zuo a za a,
a Babɩlɔn tẽw dem pɩ̃ɛmɛ na tɛr yúor a,
na ɩ na mɛ̃ a Sodɔm nɩ a Gomɔɔr#13:19 Sodɔm nɩ Gomɔɔr: Nyɛ̃ 1.9 nɩ a manʋ. ten
a Naaŋmɩn na sãw bɛr a.
20Nɩr kʋ̃ lɛb kpɛ ʋ towtow ɛ,
ʋ na gã nɩ zawla a yome yome za.
A wɛja-kpalɛ nɩ-yʋɔrɩ tɛɛ za
kʋ̃ lɛb maalɩ a bɛ pɛnɛ-sɛwr a be ɩ,
dʋ̃-cɩɩnbɛ kʋ̃ lɛb tɛw àr a be ɩ.
21Ɛcɛ a nyãanyũ-gaarɩ na kpɩɛr'ɩ a be,
ɛ́ a vìíri paalɩ a yie.
A kʋlãdisowli na kpɩɛr'ɩ a be,
ɛ́ a bʋrali ƴáwr dɩ̃ɛnɛ a be.
22A jɩbʋrɩ na kpɛ na paalɩ a ʋ yir-bɛrɛ,
ɛ́ a gbõgbo-cili kpɩɛr a ʋ na-yir-vɩɛlɩ pʋɔ.
A Babɩlɔn baarʋ daar pɩɛl'a, ʋ tarɛ na,
bibi-been bɛ lɛb dɔwlɛ ɩ.
Currently Selected:
Ɩzayi 13: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
