Ezekɩɛl 41

1Al pùorí, a nɩr nɛ tɩ tɛr mɛ̃ cen nɩ a Ŋmɩn-yir-kpɛ̃ɛ di-kpɛ̃ɛ pʋɔ. A zie nɛ fʋ na mɩ́ tu cen tɩ ta a ʋ pʋɔ a dacine yɛ̀lʋ tɩ ɩ n mɛtɩr ata. 2A tu-kpɛb zie wogo tɩ ɩ n mɛtɩr anũu ɛ́ a lõbowe dacine yɛ̀lʋ ɩ mɛtɩr ayi nɩ ŋmãa. A di-kpɛ̃ɛ wogo tɩ ɩ n mɛtɩr lɩzɛr ɛ́ a yɛ̀lʋ ɩ mɛtɩr pie. 3Al pùorí, a nɩr nɛ tɩ kpɛ n a di-nidaa pʋɔ. Ʋ tɩ manɩ nɩ a tu-kpɛb zie. Ʋ tɩ tɛr'ɩ wogo mɛtɩr been, yɛ̀lʋ mɛtɩr ata, de nɩ dacine a yɛ̀lʋ na tɩ ɩ mɛtɩr ata nɩ ŋmãa a. 4Al pùorí, ʋ tɩ manɩ nɩ a dĩo mɩŋa. A wogo tɩ ɩ n mɛtɩr pie, a yɛ̀lʋ mɩ̀ ɩ a pie. Ʋ tɩ yel mɛ̃ na: «A ka ɩ n a zi-sõw-za-zi-sõw.»

A yir-kpɔwlɩ

5A nɩr nɛ tɩ manɩ nɩ a Ŋmɩn-yir-kpɛ̃ɛ pʋ̃ɔmɩ dacin zɛ̃a. A yɛ̀lʋ tɩ ɩ n mɛtɩr ata. Bɛ tɩ ŋma n yir-kpɔwlɩ viiri koli, a zie yɛ̀lʋ cen tɩ ta mɛtɩr ayi. 6A yir-kpɔwlɩ á ŋá tɩ tɛr'ɩ di-suwli ata, ɛ́ yir-kpɔwla za mɩ́ tɩ tɛr diru lɩzɛr'ɩ pie. Bɛ tɩ ŋmãa nɩ dĩo za nyɔw nɩ a yẽw dacin, ʋʋ bɛ kpɛ a Ŋmɩn-yir-kpɛ̃ɛ mɩŋa dacin pʋɔ ɩ. 7Di-suwle za zie a, a na viiri koli a Ŋmɩn-yir-kpɛ̃ɛ a, a di-pʋʋr yɛ̀lʋ tɩ dɔwlɛ na, bʋ̃ʋ n'ʋ vɛ̃, a mɩ́ tɩ de nɩ a dacin yɛ̀lʋ blã. Alɛ n'a so, a lɛ fʋ na dúor a na a zie mɩ̀ yɛlɛ a pʋ̃ɔmɩ. Fʋ na tʋ̃ɔ́ na yi a di-suwle dãw-niwn sob pʋɔ ɛ́ do a ayi sob nɩ a ata sob pʋɔ. 8A yir-kpɔwlɩ na viiri koli a Ŋmɩn-yir-kpɛ̃ɛ a ƴãw a, ɩ̃ nyɛ̃ na k'aa kɛrɩ na zuo a al na cɛ a. A tɛr'ɩ mɛtɩr ata dɔwlɩ. 9-10A yir-kpɔwlɩ yẽw dacin yɛ̀lʋ ɩ n mɛtɩr ayi nɩ ŋmãa. A lõbowe ƴãw a, diru be n be tɔ a Ŋmɩn-yir-kpɛ̃ɛ yẽw dacin, ɛ́ diru cãà lɛb be be viiri koli. A diru á ŋá nɩ a al na cɛ a cará a, vo-zawla na viiri koli a Ŋmɩn-yir-kpɛ̃ɛ a be n be, tɛr mɛtɩr pie. 11A yir-kpɔwlɩ dɩ̃dɛɛ ayi n'a mɩ́ ɩ fʋ ta a vo-zawla ŋa: a dɩ̃dɔr kãw a saa-pɛrɩ́-gʋba-lowr ɛ́ a kãw a saa-pɛrɩ́-dʋrʋ-lowr. A dacin na viiri koli a vo-zawla ŋa a yɛ̀lʋ ɩ n mɛtɩr ayi nɩ ŋmãa. 12A Ŋmɩn-yir-kpɛ̃ɛ mʋ̃tɔ̃w-kpɛb-lowr a, yir be n be tori a vo-zawla. A ʋ wogo ɩ n mɛtɩr lɩz'a ayi nɩ anũu ɛ́ a yɛ̀lʋ ɩ mɛtɩr lɩz'a ayi ŋmãa anũu. A ʋ dacine yɛ̀lʋ ɩ n mɛtɩr ayi nɩ ŋmãa. 13A nɩr nɛ tɩ manɩ nɩ a Ŋmɩn-yir-kpɛ̃ɛ. A ʋ wogo tɩ ɩ n mɛtɩr lɩz'a ayi nɩ pie. A vo-zawla, a yir na be a mʋ̃tɔ̃w-kpɛb-lowr a nɩ a ʋ dacine wogo mɩ̀ tɩ ɓã n taa ɩ mɛtɩr lɩz'a ayi nɩ pie. 14A Ŋmɩn-yir-kpɛ̃ɛ zie ʋl na be a saa-pɛrɩ́ a nɩ a lõbowr za vo-zawlɛ yɛ̀lʋ tɩ ɓã n taa ɩ mɛtɩr lɩz'a ayi nɩ pie. 15A nɩr nɛ mɩ̀ tɩ manɩ nɩ a yir na be a Ŋmɩn-yir-kpɛ̃ɛ pùorí a wogo. A wogo, de nɩ a tɔlʋ ziir na be a lõbowe a za ayi a ɩ n mɛtɩr lɩz'a ayi nɩ pie.

A Ŋmɩn-yir-kpɛ̃ɛ pʋɔ

A zawle, a di-kpɛ̃ɛ nɩ a di-nidaa dacine tɩ pàw nɩ da-pãgalɩ. 16A tokori dàar, a fʋɔlɩ na viiri koli be a di-suwli ata zu a, bɛ mɩ̀ tɩ pàw a na nɩ dàar. Dàar tɩ be n a ziir za, a na tĩ a tẽsɔw ɛ́ tɩ ta a tokorí a, ɛ́ mɔ̃ mɩ̀, bɛ pàw nɩ a tokori nɩ dàar bɛ na pɛnɩ a ɩ ɓɛrɓɛr a. 17A Ŋmɩn-yir-kpɛ̃ɛ yẽw nɩ a pʋ̃ɔmɩ a, a na tĩ a yẽw dɩ̃dɔr ɛ́ tɩ ta a di-nidaa a, bɛ ƴãw nɩ pɩ̃ɛmɛ a dacine za ƴãw. 18Bʋ̃-wiri na ɩ seribɛ̃ mɩnɛ nɩ kpãkparmɛ tɩɛ wuli a be n be. Kpãkparmɛ tɩɛ wule mɩ́ tɩ be n seribɛ̃ ayi cará kʋralɛ. Seribɛ̃ kãw za tɩ tɛr'ɩ niŋe ayi: 19nɩsaal niwn na lɩɛbɩ cɔw kpãkparmɛ tɩɛ wule a, gbẽw niwn na lɩɛbɩ cɔw kpãkparmɛ tɩɛ wul-yũo a. A bʋ̃-wiri á ŋá be n be viiri koli a Ŋmɩn-yir-kpɛ̃ɛ. 20Bɛ tɩ wi n a seribɛ̃ mɩnɛ nɩ a kpãkparmɛ tɩɛ wuli a dacine zu, a na tĩ a tẽsɔw a, ɛ́ tɩ ta a pamɛ zu-sɔw. 21A di-kpɛ̃ɛ dɩ̃dɔr dàar wogo nɩ a yɛ̀lʋ tɩ ɩ n been. A zi-sõw-za-zi-sõw niŋé a, bʋ̃-kãw tɩ be n be ŋmɛ̃ mɛ̃ 22dàar bàwr-maal-kuur a kɛrʋ́ na ɩ mɛtɩr nɩ ŋmãa a, ɛ́ a yɛ̀lʋ ɩ mɛtɩr been a. Ʋ tɩ tɛr'ɩ gɔrɩ, dɔwlʋ zie nɩ lõbowe na ɩ dàar a. A nɩr nɛ tɩ yel mɛ̃ na: «A tabal na be a Sore niŋé a n'ʋ.»

23A Ŋmɩn-yir-kpɛ̃ɛ nɩ a zi-sõw tɩ tɛr'ɩ dɩ̃dɛɛ ayi. A been tori nɩ a di-kpɛ̃ɛ ɛ́ a been ʋl na cɛ a tori a zi-sõw-za-zi-sõw. 24A dɩ̃dɛɛ á ŋá kãw za tɩ tɛr'ɩ pàwrɩ ayi. 25A di-kpɛ̃ɛ pamɛ ƴãw a, bɛ tɩ wi n seribɛ̃ mɩnɛ nɩ kpãkparmɛ tɩɛ wuli ƴãw mɛ̃ a dacine zu a. A yẽw a, bɛ-caar bɛ na maal'ɩ dàar a tɩ be n a dɩ̃dɔr zu-sɔw. 26A kpɛb zie dacine zu a, tokori na ƴãw kur-vɛɛ vɛɛ a nɩ pɩ̃ɛmɛ na ɩ kpãkparmɛ tɩɛ vaɩ a tɩ be n be.

Currently Selected:

Ezekɩɛl 41: DBDC

Highlight

Copy

Compare