Ezekɩɛl 40

A ŊMƖN-YIR-KPƐ̃Ɛ-PAALA A EZEKƖƐL NA NYƐ̃ A

40—48

A man-wulu

1A tɩ diw-cenu pùorí yome lɩzɛr'ɩ anũu sob tib daar, a cuw bibie pie sob, a Zerizalɛm zɛb-deb#40:1 A Yeezu Kɩrɩta na bɛ tɩ wa sɛr a yome 573 daar a. pùorí yome pie nɩ anaar daar tɔr za, a Sore fãw tɩ siw nɩ a ɩ̃ zu. Ʋ tɩ tɛr mɛ̃ na cen nɩ a be. 2Yel-nyɛra kãw daar a, a Naaŋmɩn tɩ ɓáw mɛ̃ na cen nɩ a Ɩsɩrayɛl tẽw. Ʋ tɩ bɛr mɛ̃ nɩ tãw na kɛrɩ bɛ dɩ vuo a zu. A tãw saa-pɛrɩ́-dʋrʋ-lowr a, yie na ɓã taa ŋmɛ̃ mɛ̃ tẽ-kpɛ̃ɛ yie a tɩ be n be. 3Ʋ tɩ tɛr mɛ̃ na cen nɩ a be, ɛ́ bom ŋa n'ʋ ɩ̃ tɩ nyɛ̃: nɩr na ŋmɛ̃ taa nɩ kur-zɩɛ a tɩ àr'ɩ saaƴẽwn pɩɛlɩ dɩ̃dɔr. Ʋ tɩ tɛr'ɩ lɛ̃ miwr a nũú nɩ dali-mána a manʋ ƴãw. 4Ʋ tɩ yel mɛ̃ na: «A fʋ̃ʋ nɩsaal bie, yuo a fʋ mimie nɩ a fʋ tobe vla. Tɛr maal-ɩb yaga a al za ɩ̃ na na ɩ fʋ nyɛ̃ a ƴãw. Bʋ̃ʋ n'ʋ vɛ̃, a al nyɛ́b ƴãw n'a bɛ tɛr fʋ wa n a ka. Al pùorí, fʋ na tɩ man nɩ a al za fʋ na nyɛ̃ a kʋ̀ a Ɩsɩrayɛl nɩbɛ.»

A yẽw davʋra nɩ a ʋ pamɛ

5Bom ŋa n'ʋ ɩ̃ tɩ nyɛ̃: yẽw dacin tɩ viiri na koli a Ŋmɩn-yir-kpɛ̃ɛ. A nɩr nɛ tɩ tɛr'ɩ a ʋ dali-mána a wogo na ta mɛtɩr ata a. Ʋlɛ n'ʋ ʋ tɩ manɛ nɩ a dacin. A yɛ̀lʋ tɩ ɩ n mɛtɩr ata, a kɛrʋ mɩ̀ ɩ mɛtɩr ata. 6Ʋ tɩ cen nɩ a dɩ̃dɔr na be a Ŋmɩn-yir-kpɛ̃ɛ saa-pɛrɩ́ a ƴãw. Ʋ tɩ do n a tanɛ dɛr-mimie. Al pùorí ʋ manɩ a vuo ŋa: a wogo tɩ ɩ n mɛtɩr ata. 7A zi-gùrbɛ dili na pɩɛrɩ a tɔlʋ zie na be a dɩ̃dɔr sɔwlɩsɔw a mɩ̀ tɩ tɛr'ɩ ŋa za wogo mɛtɩr ata nɩ yɛ̀lʋ mɛtɩr ata. A dacine na bʋ́r a a tɩ tɛr'ɩ yɛ̀lʋ mɛtɩr ayi nɩ ŋmãa. Fʋ mɩ́ tɩ ta n tu-kpɛb zie na tɛr wogo mɛtɩr ata a, ɛ́ bãw ta a dĩo ʋl na be a Ŋmɩn-yir-kpɛ̃ɛ niŋé a. 8-9A nɩr nɛ mɩ̀ tɩ manɩ nɩ a di-sɔwlɩsɔw ŋa. A ʋ wogo tɩ ɩ n mɛtɩr anaar, ɛ́ a ʋ yẽw dacine yɛ̀lʋ ɩ mɛtɩr been. A dɩ̃dɔr pʋɔ a, a dĩo na pɩɛlɩ a Ŋmɩn-yir-kpɛ̃ɛ zuo a za a n'ʋ. 10A dɩ̃dɔr ʋl na be a Ŋmɩn-yir-kpɛ̃ɛ saa-pɛrɩ́ a gùrbɛ dili a za tɩ tɛr'ɩ a zɛ̃a been. Ata n'a mɩ́ tɩ be a sɔwlɩsɔw tɔlʋ zie lõbowr za ƴãw. A dacine za na bʋ́r a a tɩ tɛr'ɩ yɛ̀lʋ been. 11A nɩr nɛ tɩ manɩ nɩ a vuo ʋl a dɩ̃dɔr na na tʋ̃ɔ́ mɩ́ yuo bɛr a: a yɛ̀lʋ tɩ ɩ n mɛtɩr anũu. A sɔwlɩsɔw tɔlʋ zie yɛ̀lʋ tɩ tɛr'ɩ mɛtɩr ayʋɔb nɩ ŋmãa. 12A zi-gùrbɛ dili na tɛr wogo mɛtɩr ata nɩ yɛ̀lʋ mɛtɩr ata a niŋé a, bɩwra na tɛr kɛrʋ́ na bɛ ta mɛtɩr ŋmãa a tɩ be n be. Ʋ tɩ be n a tɔlʋ zie dʋrʋ lowr nɩ a gʋba lowr. 13A nɩr nɛ tɩ manɩ nɩ a vuo na be a dili á ŋá kãw za pɛrɩ́ dacin nɩ a dĩo ʋl na àr a niŋé dacin cara pʋɔ a, a tɔlʋ zie gãwn: a tɩ ɩ n mɛtɩr pie nɩ ayi nɩ ŋmãa. 14Ʋ mɩ̀ tɩ manɩ nɩ a dĩo ʋl a Ŋmɩn-yir-kpɛ̃ɛ yẽw davʋra na viiri koli a lõbowe za a. A dĩo ŋa yɛ̀lʋ tɩ ɩ n mɛtɩr pie. 15Mɛtɩr lɩzɛr'ɩ anũu n'a be a vuo na be a dɩ̃dɔr na be a yẽw dacin pʋɔ nɩ a sɔwlɩsɔw davʋra dɩ̃dɔr cara pʋɔ. 16Tokoro vɛɛ bɛ na pàw nɩ kure mɩ̃ɛ a#40:16 Tokoro na ɩ vɛɛ vɛɛ a: A Ŋmɩn-yir-kpɛ̃ɛ kpɛb ziir piwru ƴãw n'a bɛ tɩ ƴãw a tokori á ŋá. Nyɛ̃ 1Na 6.4. tɩ viiri na koli a yie, be a kpɛb zie dili dacine zu, nɩ a dacine al na bʋ́r bʋ́r a dili á ŋá a zu. A mɩ̀ tɩ be n a dĩo pʋ̃ɔmɩ dacine zu. Kpãkparmɛ tɩɛ wuli pɩ̃ɛmɛ n'a bɛ tɩ ƴãw a dacine á ŋá a vɩɛl.

17A nɩr nɛ tɩ tɛr mɛ̃ na kpɛ n a Ŋmɩn-yir-kpɛ̃ɛ sɔwlɩsɔw davʋra pʋɔ. Kʋsɛ-pãgalɩ n'a bɛ tɩ ƴãw pàw a davʋra ŋa. Diru lɩzɛr'ɩ pie tɩ viiri na koli ʋ. 18A kʋsɛ-pãgalɩ na bin bin a tɩ pàw nɩ a tẽsɔw viiri koli a dɩ̃dɛɛ been been. A diru tẽsɔw tɩ siw nɩ pile zuo a sɔwlɩsɔw davʋra dem. 19A nɩr nɛ tɩ manɩ nɩ a vuo na be a Ŋmɩn-yir-kpɛ̃ɛ dɩ̃dɔr na tori a yẽw davʋra dacin nɩ a sɔwlɩsɔw davʋra dacin a. A tɩ ɩ n mɛtɩr lɩz'a ayi nɩ pie. A saa-pɛrɩ́ dem tɩ n'a. 20Al pùorí, ʋ tɩ gãw nɩ a saa-pɛrɩ́-gʋba-lowr. Ʋ tɩ manɩ nɩ a saa-pɛrɩ́-gʋba-lowr dɩ̃dɔr na tori a yẽw davʋra a wogo nɩ a yɛ̀lʋ. 21Ʋ tɩ tɛr'ɩ sɔwlɩsɔw tɔlʋ zie nɩ dili ata a tɔlʋ zie lõbowr za, a gùrbɛ ƴãw. A dacine nɩ a dĩo zɛ̃a tɩ ɩ n been nɩ a saa-pɛrɩ́ dɩ̃dɔr. A saa-pɛrɩ́-gʋba-lowr dɩ̃dɔr wogo tɩ ɩ n mɛtɩr lɩzɛr'ɩ anũu, ɛ́ a yɛ̀lʋ ɩ mɛtɩr pie nɩ ayi nɩ ŋmãa. 22A dĩo, a tokori nɩ a kpãkparmɛ tɩɛ wuli pɩ̃ɛmɛ bɛ na maalɩ ƴãw a tɩ lãw na tɛr zɛ̃a been nɩ a dɩ̃dɛ-yoru. A saa-pɛrɩ́-gʋba-lowr dɩ̃dɔr tab ƴãw a, fʋ mɩ́ do n tanɛ dɛr-mimie ayopõi. A dĩo àr'a tori a tanɛ dɛr-mimie. 23A saa-pɛrɩ́-gʋba-lowr dɩ̃dɔr niŋé a, dɩ̃dɔr be n be mɩ́ yuo tori a sɔwlɩsɔw davʋra. A bʋ̃-been nɛ n'a a saa-pɛrɩ́. A nɩr nɛ tɩ manɩ nɩ a vuo na be a dɩ̃dɛɛ ayi á ŋá cará a: a tɩ ɩ n mɛtɩr lɩz'a ayi nɩ pie. 24Al pùorí, ʋ tɩ tɛr mɛ̃ na cen nɩ a saa-pɛrɩ́-dʋrʋ-lowr, dɩ̃dɔr kãw mɩ̀ na tɩ be be a. Ʋ tɩ manɩ nɩ a zi-gùrbɛ dili, a dĩo nɩ a dacine. A tɩ lãw na tɛr zɛ̃a been nɩ a dɩ̃dɛ-yoru. 25A be mɩ̀ a, tokori tɩ be n be viiri koli a dɩ̃dɛɛ nɩ a dĩo. A ŋmɛ̃ na taa nɩ a saa-pɛrɩ́ nɩ a saa-pɛrɩ́-gʋba-lowr dem. A saa-pɛrɩ́-dʋrʋ-lowr dɩ̃dɔr wogo za tɩ ɩ n mɛtɩr lɩzɛr'ɩ anũu ɛ́ a yɛ̀lʋ ɩ mɛtɩr pie nɩ anũu. 26A saa-pɛrɩ́-dʋrʋ-lowr dɩ̃dɔr tab ƴãw a, fʋ mɩ́ do n tanɛ dɛr-mimie ayopõi. A di-kpɛ̃ɛ be n a tanɛ dɛr-mimie niŋé. Bɛ maal'ɩ nɩ kpãkparmɛ tɩɛ wuli a pʋ̃ɔmɩ dacine a vɩɛl, a sɔwlɩsɔw tɔlʋ zie dʋrʋ lowr nɩ a gʋba lowr. 27A dɩ̃dɔr ŋa niŋé a, dɩ̃dɔr kãw be n be mɩ́ yuo kpɛ a sɔwlɩsɔw davʋra pʋɔ. A nɩr nɛ tɩ manɩ nɩ a vuo na be a saa-pɛrɩ́-dʋrʋ-lowr dɩ̃dɛɛ ayi cará a. A tɩ ɩ n mɛtɩr lɩz'a ayi nɩ pie.

A sɔwlɩsɔw davʋra nɩ a ʋ pamɛ

28Al pùorí, a nɩr nɛ tɩ tɛr mɛ̃ na tu n a saa-pɛrɩ́-dʋrʋ-lowr dɩ̃dɔr ƴãw kpɛ n a sɔwlɩsɔw davʋra pʋɔ. Ʋ tɩ manɩ nɩ a dɩ̃dɔr ŋa. Ʋ tɩ lãw na tɛr a zɛ̃a been nɩ a yẽw dacin dɩ̃dɛɛ. 29A zi-gùrbɛ dili, a dĩo nɩ a dacine na bʋ́r a a tɩ lãw na tɛr a zɛ̃a been nɩ a dɩ̃dɛ-yoru. Tokori tɩ be n be viiri koli a dĩo. A saa-pɛrɩ́-dʋrʋ-lowr dɩ̃dɔr wogo za tɩ ɩ n mɛtɩr lɩzɛr'ɩ anũu, ɛ́ a yɛ̀lʋ ɩ mɛtɩr pie nɩ ayi nɩ ŋmãa. 30Dĩo tɩ be n be viiri koli, a wogo ɩ mɛtɩr pie nɩ ayi nɩ ŋmãa ɛ́ a yɛ̀lʋ ɩ mɛtɩr ayi nɩ ŋmãa. 31A dĩo ŋa tori nɩ a yẽw davʋra. Bɛ ƴãw nɩ kpãkparmɛ tɩɛ wuli a pʋ̃ɔmɩ dacine ƴãw a vɩɛl. A be tab ƴãw a, fʋ mɩ́ do n tanɛ dɛr-mimie ani. 32Al pùorí, a nɩr nɛ tɩ ƴãw na ɩ̃ tu a saa-pɛrɩ́ dɩ̃dɔrɩ́ kpɛ a sɔwlɩsɔw davʋra pʋɔ. Ʋ tɩ manɩ nɩ a dɩ̃dɔr: ʋ tɩ lãw na tɛr a zɛ̃a been nɩ a dɩ̃dɛ-yoru. 33A zi-gùrbɛ dili, a dĩo nɩ a dacine na bʋ́r a a tɩ lãw na tɛr a zɛ̃a been nɩ a dɩ̃dɛ-yoru dem. Tokori tɩ be n be viiri koli a dɩ̃dɔr nɩ a dĩo. A dɩ̃dɔr wogo za tɩ ɩ n mɛtɩr lɩzɛr'ɩ anũu ɛ́ a yɛ̀lʋ ɩ mɛtɩr pie nɩ ayi nɩ ŋmãa. 34A dĩo tori nɩ a yẽw davʋra. Bɛ maal'ɩ nɩ kpãkparmɛ tɩɛ wuli a pʋ̃ɔmɩ dacine a vɩɛl, a sɔwlɩsɔw tɔlʋ zie gʋba lowr nɩ a dʋrʋ lowr. A be tab ƴãw a, fʋ mɩ́ do n tanɛ dɛr-mimie ani.

35Al pùorí, a nɩr nɛ tɩ tɛr mɛ̃ na cen nɩ a saa-pɛrɩ́-gʋba-lowr dɩ̃dɔrɩ́. Ʋ tɩ manɩ ʋ na. A dɩ̃dɔr ŋa tɩ lãw na tɛr a zɛ̃a been nɩ a dɩ̃dɛ-yoru. 36Ʋ mɩ̀ tɩ tɛr'ɩ diru a zi-gùrbɛ ƴãw, dacine a bʋ́rʋ ƴãw, dĩo de nɩ tokori a viiri koli a ziir za. A saa-pɛrɩ́-gʋba-lowr dɩ̃dɔr wogo za tɩ ɩ n mɛtɩr lɩzɛr'ɩ anũu ɛ́ a yɛ̀lʋ ɩ mɛtɩr pie nɩ ayi nɩ ŋmãa. 37A dĩo tɩ tori nɩ a yẽw davʋra. Bɛ maal'ɩ nɩ kpãkparmɛ tɩɛ wuli a pʋ̃ɔmɩ dacine a vɩɛl, a sɔwlɩsɔw tɔlʋ zie gʋba lowr nɩ a dʋrʋ lowr. A be tab ƴãw a, fʋ mɩ́ do n tanɛ dɛr-mimie ani.

38Dile kãw tori nɩ a saa-pɛrɩ́-gʋba-lowr dɩ̃dɔr dĩo. A dile ŋa pʋɔ a, bɛ mɩ́ pɛ́w nɩ a dʋn bɛ na kʋ a nyɩw-a-za-bàwr ƴãw a. 39A ziir ayi al a dĩo na mɩ́ cen tɩ tɔ a, tabalɛ ayi be n be. A tabalɛ ayi á ŋá zu a, bɛ mɩ́ kʋ n a dʋn a nyɩw-a-za-bagɛ nɩ a bagɛ al bɛ na mɩ́ maalɩ a yel-bebe ír-bɛrʋ ƴãw a. 40A yẽw a, tabalɛ anaar be n be. Fʋ̃ʋ wa dúor a saa-pɛrɩ́-gʋba-lowr dɩ̃dɔrɩ́ a, fʋ na tʋ̃ɔ́ na nyɛ̃ ayi a lõbowr za ƴãw. 41A na ɩ lɛ a, tabalɛ ani n'a mɩ́ be be a dʋn bɛ na mɩ́ wa n a bàwr maalʋ a kʋb ƴãw: anaar a dɩ̃dɔr lõbowr kãw ƴãw, ɛ́ a anaar a lõbowr kãw ƴãw mɩ̀. 42A tabalɛ anaar bɛ na mɩ́ de a nyɩw-a-za-bàwr cɔbrʋ ƴãw a mɩ́ ɩ n kʋsɛ-pɛnɩ tabalɛ. A wogo nɩ a yɛ̀lʋ za ɩ n been. A lõbowr tɛr'ɩ mɛtɩr põ-zɛ̃-taa nɩ blã ɛ́ a kɛrʋ́ tɛr mɛtɩr põ-zɛ̃-taa. Bɛ mɩ́ bin nɩ a bome a na fɛr kɛ́ bɛ cɔbrɩ a, nɩ a dʋn bɛ na wa n a bàwr maalʋ a, a tabalɛ zu. 43Bɛ wɛr'ɩ bɔwrɩ a yɛ̀lʋ na man nũ-ɓal a, viiri koli a tabalɛ. Bɛ mɩ́ bin nɩ a bàwr nɛnɛ a tabalɛ á ŋá zu. 44A nɩr nɛ tɩ tɛr mɛ̃ na kpɛ n a pʋ̃ɔmɩ davʋra pʋɔ. A be a, yiel-yielbɛ diru tɩ be n be. A kãw pɩɛl'ɩ a saa-pɛrɩ́-gʋba-lowr dɩ̃dɔr ɛ́ tori a saa-pɛrɩ́-dʋrʋ-lowr, ɛ́ a kãw pɩɛlɩ a saa-pɛrɩ́-dʋrʋ-lowr dɩ̃dɔr ɛ́ tori a saa-pɛrɩ́-gʋba-lowr. 45Ʋ tɩ yel mɛ̃ na: «A bàwr-maalbɛ bɛl na tone a Ŋmɩn-yir-kpɛ̃ɛ pʋɔ a so a dĩo ʋl na tori a saa-pɛrɩ́-dʋrʋ-lowr a. 46A bàwr-maalbɛ bɛl na tone a bàwr-maal-kuur tome a so a dĩo ʋl na tori a saa-pɛrɩ́-gʋba-lowr a. A Levi dɔwlʋ nɩbɛ pʋɔ a, a bɛl na ɩ a Sadɔkɩ#40:46 Sadɔkɩ: Ʋlɛ n'ɩ a bàwr-maalɛ ʋl a nãà Salomɔ̃ na tɩ kaa ír a (nyɛ̃ 1Na 2.35). Ʋ tɩ pʋɔ nɩ a Levi dɔwlʋ pʋɔ (nyɛ̃ 1Bi-yel 5.27-34). bʋ̃-dɔwrɩ a tɛwr nɛbɛ na tʋ̃ɔ́ kpɛ a zi-sõw pʋɔ tone a Sore tome.»

A lɛ a Ŋmɩn-yir-kpɛ̃ɛ na ɩ a manʋ

47A nɩr nɛ tɩ manɩ nɩ a sɔwlɩsɔw davʋra. A ʋ wogo nɩ a ʋ yɛ̀lʋ tɩ ɩ n been, ɛ́ a lõbowr za tɩ tɛr mɛtɩr lɩz'a ayi nɩ pie. A bàwr-maal-kuur tɩ be n a Ŋmɩn-yir-kpɛ̃ɛ niŋé. 48A nɩr nɛ tɩ tɛr mɛ̃ na cen nɩ a Ŋmɩn-yir-kpɛ̃ɛ zawle pʋɔ. A be fʋ na mɩ́ tu tɔl tɩ kpɛ a ʋ tu-kpɛb zie a, a dacine tɩ tɛr'ɩ yɛ̀lʋ mɛtɩr ayi nɩ ŋmãa a kãw za, ɛ́ a zawle yɛ̀lʋ ɩ mɛtɩr ayopõi. A lõbowe dacine yɛ̀lʋ tɩ ɩ n mɛtɩr been nɩ ŋmãa. 49A zawle wogo tɩ ɩ n mɛtɩr pie ɛ́ a yɛ̀lʋ ɩ mɛtɩr ayʋɔb. A be tab ƴãw a, fʋ mɩ́ tɩ do n tanɛ dɛr-mimie pie. A tu-kpɛb zie lõbowr za ƴãw a, kpul tɩ be n be.

Currently Selected:

Ezekɩɛl 40: DBDC

Highlight

Copy

Compare