Ezekɩɛl 31

A sɛɛdɩr tɩ-kpɛ̃ɛ zʋkpar

1A diw-cenu pùorí yome pie nɩ been sob, a cuwr ata sob bibi-dãw-niwn sob daar, a Sore tɩ yel mɛ̃ na: 2«A fʋ̃ʋ nɩsaal bie, nyɛ̃ a lɛ fʋ na na yel kʋ̀ a Eziptɩ tẽw nãà, Faarawɔ̃, nɩ a nɩ-bʋʋr-yaga ʋ na kaarɛ a:

Bʋ̃ʋ n'ʋ ɩ̃ na de fʋ manɩ nɩ,

fʋ̃ʋ a fãw na sɛw à ŋá za a?

3Fʋ ŋmɛ̃ na taa nɩ a Libã tẽw sɛɛdɩr tɩɛ

a wul-vɩɛlɩ vɩɛlɩ na tɩ tɩrɛ ɓaarʋ vla vla a,

sɛɛdɩr tɩɛ na kɛrɩ kɛrɩ za,

a nyʋɔr tɩ tɔ a zũzuwe a.

4A saa tɩ ɩ na ʋ baa.

Bàa na be a tẽsɔw pʋ̃ɔmɩ a tɩ ɩ na ʋ kɛrɩ do saa.

A kʋ̃ɔ tɩ jil'a koli a ʋ nyɩgɛ,

ɛ́ tɩ gbɔlɛ wɩɛr a wɩ̀ɛ pʋɔ tɩɩr zie.

5A kʋ̃ɔ yaga á ŋá zũú a,

ʋ tɩ kɛrɩ na zuo a wɩ̀ɛ pʋɔ tɩɩr za.

A ʋ wuli tɩ yãwmɛ na ɛ́ wõwme.

6A lili za tɩ wóbr'ɩ a cowr a ʋ wuli zu,

a wɛ-dʋn za tɩ dɔwr'ɩ a ʋ wuli pile,

ɛ́ nɩ-bʋʋr-yaga tɩ kpɩɛr a ʋ ɓaarʋ́.

7Tɩ-vla vla tɩ n'ʋ, ʋ tɩ kɛrɩ na ɛ́ ta,

a ʋ wuli tɩ yɛ́r'ɩ yaga. Bʋ̃ʋ n'ʋ vɛ̃,

a ʋ nyɩgɛ tɩ kpɛ n tẽsɔw na paalɩ kʋ̃ɔ a pʋɔ.

8A Naaŋmɩn zaadɛ̃#31:8 Naaŋmɩn zaadɛ̃: A zaadɛ̃ ʋl a Naaŋmɩn na tɩ ƴãw a Edɛn a n'ʋ bɛ yere. Nyɛ̃ Yzt 2.8-9. pʋɔ a,

sɛɛdɩr tɩɛ kãw za bɛ tɩ ŋmɛ̃ taa nɩ ʋ ɛ,

sɩpɩrɛ tɩɛ kãw za bɛ tɩ tɛr wuli

a maal vɩɛl a lɛ ɩ, tɩɛ kãw za

bɛ tɩ tɛr ɓaarʋ man ʋ ɛ,

tɩɛ kãw za bɛ tɩ vɩɛl ta ʋ ɛ.

9Ɩ̃ tɩ kʋ̀ ʋ nɩ wuli na vɩɛl vɩɛl a,

lɛ so a Edɛn tɩɩr za,

a Naaŋmɩn zaadɛ̃ pʋɔ, tɩ nyùur'ɩ ʋ.»

A Eziptɩ tẽw nãà na lo na mɛ̃ a sɛɛdɩr tɩɛ a

10A na ɩ à ŋá a, à ŋá n'a a mãa Sore Naaŋmɩn yere: «A sɛɛdɩr tɩɛ baa na, ʋ kɛrɩ na do tɩ tɔ a zũzuwe ɛ́ ɩrɛ pɔ̀lʋ̀. 11Alɛ n'a so ɩ̃ jɛ ʋ bɛr, ɛ́ ƴãw ʋ a tẽ-daa za nãà#31:11 Tẽ-daa za nãà: A Babɩlɔn tẽw nãà Nabikodonozɔɔr'ʋ bɛ yere a ka. na kpɛmɛ zuo bɛ za a nuru pʋɔ. A sob ŋa na ɩrɛ ʋ na tu n a faa ʋ na maalɩ a. 12Nɩ-sãanbɛ, a bɛl na kpɛ po-tuo zuo a nɩ-bʋʋrɛ za a, cɛ ʋ na lɔb bin bɛr a be. A ʋ wuli za kár'a lo. A pàw nɩ a tẽw tan nɩ a fʋɔlɩ. A nɩ-bʋʋrɛ nɩbɛ za na tɩ kpɩɛr a ʋ ɓaarʋ́ a bɛr ʋ na ɛ́ jɛ a tẽw bɛr. 13A lili za zɩnɛ nɩ a sɩɛ bɛ na cɛ a zu, ɛ́ a wɛ-dʋn za nɛbr a ʋ wuli. 14A ɩ n à à ŋá kɛ́ tɩɛ za na páwr kʋ̃ɔ ɛ́ tɛr'a yaga a, ta tʋ̃ɔ́ lɛb kɛrɩ do tɩ tɔ a zũzuwe, ɛ́ ɩrɛ pɔ̀lʋ̀ a ʋ kɛrʋ zũú ɛ. Bʋ̃ʋ n'ʋ vɛ̃, a tɩɩr bɩɩ a nɩsaalbɛ za na kpi n bibir kãw. Bɛ na siw na kpɛ tẽw lãwnɩ a bɛl na siw a yaa-bɔw pʋɔ a.

15À ŋá n'a a mãa Sore Naaŋmɩn yere: A ʋlɩ bibir nɛ a sɛɛdɩr tɩɛ na na cen a kpɩmɛ tẽw a, ɩ̃ na ɩ n a wɛja za be ko-tuolu pʋɔ. A sɛɛdɩr tɩɛ zũú a, ɩ̃ na diw nɩ a bàa na be a tẽsɔw pʋ̃ɔmɩ a gbɔlʋ bɛr, ɩ̃ na ɩ n a ʋ mamɛ a tɛw àr, ɩ̃ɩ bɩw a kʋ̃ɔ yaga yaga. A ʋ zũú a, a Libã tẽw tan na liw na, ɛ́ a wɩ̀ɛ pʋɔ tɩɩr za ko. 16A lɛn daar ɩ̃ na na ƴãw a tɩɛ ŋa ʋ siw a kpɩmɛ tẽw nɩ a bɛl na be a yaa-bɔw pʋɔ a, a nɩ-bʋʋrɛ na na wõ ʋ lo a na màwr'ɩ dɛ̃bɩ̃-mawfʋ. A tẽw pʋ̃ɔmɩ a, a Edɛn tɩɩr za, a Libã tẽw tɩ-vɩɛlɩ vɩɛlɩ nɩ a tɩɩr al bɛ na cɔ̀r vla zuo a za a na cɩlɛ na. 17A al mɩ̀ na lãw na siw nɩ a sɛɛdɩr tɩɛ a kpɩmɛ tẽw lãwnɩ a zɛbr nɩ-kũuni. A sõw ʋ na ɛ́ vʋʋrɩ a ʋ kpɛnʋ ɓaarʋ́ a nɩ-bʋʋrɛ sɔgɔ.

18A Edɛn zaadɛ̃ pʋɔ a, tɩɛ kãw za bɛ tɩ vɩɛl ɛ́ kɛrɩ ta b ɛ. Ɛcɛ, ɩ̃ na ɩ na fʋ lãw siw nɩ a tɩɩr á ŋá a kpɩmɛ tẽw. A be a, fʋ na tɩ lãw na gã nɩ a yɔ-ɓile dem nɩ a zɛbr nɩ-kũuni. À à ŋá n'a a na ɩ a Eziptɩ tẽw nãà nɩ a ʋ nɩ-bʋʋrɛ za ƴãw. A mãa Sore Naaŋmɩn n'ʋ yel.»

Currently Selected:

Ezekɩɛl 31: DBDC

Highlight

Copy

Compare