Ezekɩɛl 30

A Sore na wul'ɩ a suur ʋ na nyɛ̃ a Eziptɩ tẽw ƴãw a

1A Sore tɩ lɛb'a yel mɛ̃: 2«A fʋ̃ʋ nɩsaal bie, ƴɛ̀r a ɩ̃ yúor ƴãw, yel: À ŋá n'a a Sore Naaŋmɩn yere: Nyɩ kone a kpɩɛrʋ bibir ŋa ƴãw. 3Sɩza, ʋ waar'a, ʋ pɩɛl'a, a Sore bibir#30:3 Sore bibir: Nyɛ̃ 2.11-12. . Ʋ na ɩ n zũzuwr bibir. Ʋ na ɩ n a daar ʋl bɛ na na dɩ n a nɩ-bʋʋr-yoru a ƴɛ̀rʋ a. 4A zɛbr na kpɛ n a Eziptɩ tẽw pʋɔ, a nɩbɛ na màwr'ɩ dɛ̃bɩ̃-mawfʋ tɩ tɔ a Etiopi tẽw. Bɛ na kʋ n a Eziptɩ tẽw dem, bɛ na za n a bɛ na-bome, ɛ́ sãw a bɛ tẽw bɛr. 5Etiopi, Putɩ nɩ Ludɩ, Arabi nɩ Libi ten nɩbɛ nɩ a Ɩsɩrayɛl nɩbɛ mɔ̃ mɩ̀ na kpi n a zɛbr zie. 6A mãa Sore Naaŋmɩn yere na: A na tĩ a Migɩdɔl a saa-pɛrɩ́-gʋba-lowr tɩ tɔ a Asuã a saa-pɛrɩ́-dʋrʋ-lowr a, bɛ na kʋ n a bɛlɩ dem na gùre a Eziptɩ tẽw a, a zɛbr zie, ɛ́ a Eziptɩ tẽw dem kpɛnʋ na ɩ pɔ̀lʋ̀ tɛwr a na lo n tẽw. A mãa Sore Naaŋmɩn n'ʋ yere. 7A Eziptɩ tẽw na lɩɛb'ɩ wɛja-kpalɛ na kpal zuo a wɛja-kpalɩ za a. A ʋ tẽ-bɛrɛ na ɩ n deboru tɛwr. 8A lɛn daar mãa wa nyɩw a tẽw za, ɛ́ a ʋ gùrbɛ lo tẽw a, lɛ n'a nɩr za na bãw kɛ́ mãa n'ɩ a Sore. 9A ʋlɩ bibir nɛ a, nɩbɛ bɛ na tõ a na kpɛ n gbor cen. Bɛ na cen nɩ a ɩ̃ yúor ƴãw tɩ ɩ a Etiopi tẽw na tɩɛr k'ʋʋ be n ƴã-ɓaarʋ pʋɔ a, ʋ màwr. Ɛ́ a ʋlɩ bibir ɩ̃ nãà wa sãw a Eziptɩ tẽw bɛr a, a bɛlɩ dem na kpɩɛr a ʋ pʋɔ a na màwr'ɩ dɛ̃bɩ̃-mawfʋ. A bibir ŋa pɩɛl'a!

10À ŋá n'a a mãa Sore naaŋmɩn yere: Ɩ̃ na ƴãw nɩ a Babɩlɔn tẽw nãà, a Nabikodonozɔɔr, ʋ ɩ a bɛlɩ dem za na kpɩɛr a Eziptɩ tẽw a bɔr. 11Ʋ na wa n nɩ a ʋ nɩbɛ, nɩ-bʋʋrɛ na kpɛ po-tuo zuo a bɛ za a, wa sãw nɩ a tẽw ŋa bɛr. Bɛ na wa vɔ̃ n a bɛ zɛbr-sɔ-bɛrɛ a Eziptɩ tẽw dem ƴãw, ɛ́ ɩ a tẽw ʋ paalɩ kũuni. 12Ɩ̃ na ɩ n a Nɩl bà-gbɛ́ɛ a sɩr, ɩ̃ɩ ƴãw a tẽw po-to-dem nuru pʋɔ. Ɩ̃ na ƴãw na nɩ-sãanbɛ sãw a tẽw nɩ a ʋ tɛra za bɛr. A mãa Sore Naaŋmɩn n'ʋ yel.

13À ŋá n'a a mãa Sore Naaŋmɩn yere: Ɩ̃ na sãw nɩ a Mɛmfisɩ#30:13 Mɛmfisɩ: A Eziptɩ tẽw pɛrɩ́ tẽ-kpɛ̃ɛ-kʋra n'ʋ. tẽw ŋmɩn-bɛlɛbɛlɛ nɩ a dasuli za bɛr. Nɩr za kʋ̃ cãà be dɩrɛ naalʋ a Eziptɩ tẽw zu ɛ, ɩ̃ɩ na ɩ n dɛ̃bɩ̃ɛ lo a tẽw za pʋɔ. 14Ɩ̃ na sãw nɩ a Eziptɩ tẽw saa-pɛrɩ́-dʋrʋ-lowr bɛr, ɩ̃ na nyɩw nɩ a Tanisɩ tẽ-kpɛ̃ɛ bɛr, ɛ́ ɩ a lɛ ɩ̃ na dɩ a ƴɛ̀rʋ yel a, a Tɛb tẽ-kpɛ̃ɛ ƴãw. 15A tẽ-kpɛ̃ɛ na gùre a Eziptɩ tẽw a, a Sin, ɩ̃ na ɩ n a ɩ̃ su-tʋlʋ kpãkpã ìr a ʋ ƴãw. Ɩ̃ na ɩ n a nɩ-yaga na kpɩɛr a Tɛb tẽw a bɔr. 16Ɩ̃ na nyɩw nɩ a Eziptɩ tẽw bɛr. A bɛlɩ dem na kpɩɛr a Sin tẽw a na màwr'ɩ dɛ̃bɩ̃-mawfʋ. Bɛ na puo nɩ vʋɔr a Tɛb tẽ-kpɛ̃ɛ dacine ƴãw, ɛ́ kʋ̃ɔ na paal'a pàw a tẽ-kpɛ̃ɛ. 17Bɛ na kʋ n a On nɩ a Pi-Bɛsɛtɩ ten pɔ́lɛ́ a zɛbr zie, ɛ́ diw a nɩbɛ bɛl na cɛ a cen nɩ. 18A lɛn daar mãa wa siwri a Eziptɩ tẽw fãw ɛ́ a ʋ kpɛnʋ na ɩrɛ pɔ̀lʋ̀ a baarɩ a, mʋ̃tɔ̃w kʋ̃ pur a Dafine tẽw zu ɛ. Zũzuwr-sɛbla na yɛ́r'a pàw a tẽw, ɛ́ bɛ na diw nɩ a vuo ʋl nɩbɛ cen nɩ. 19Ɩ̃ na ɩ n a lɛ ɩ̃ na dɩ a ƴɛ̀rʋ yel a Eziptɩ tẽw ƴãw a, ɛ́ nɩr za na bãw na kɛ́ mãa n'ɩ a Sore.»

A Babɩlɔn tẽw nãà ɩ n tõ-tõ-bom a Naaŋmɩn nũú

20A diw-cenu pùorí yome pie nɩ been sob, a cuw-dãw-niwn sob bibie ayopõi sob daar, a Sore tɩ yel mɛ̃ na: 21«A fʋ̃ʋ nɩsaal bie, bɛrɛ wone! Ɩ̃ ka n a Eziptɩ tẽw nãà, a Faarawɔ̃, kpãkpãw#30:21 A Sɛb-sõw pʋɔ a, a kpãkpãw ɩ n a fãw bãwfʋ. Nyɛ̃ Luk 1.51. bɛr. Nɩr za bɛ sanɩ ʋ ɛ, nɩr za bɛ kʋ̀ ʋ tɩ̃ɩ ɛ. Nɩr za bɛ 'lẽ a ʋ kpãkpãw nɩ pɛn k'ʋʋ lɛb páw fãw a zɛbr-sɔ-kpɛ̃ɛ nyɔwfʋ ƴãw ɛ. 22A na ɩ à ŋá a, a mãa Sore Naaŋmɩn yere na: Ɩ̃ na ìr'ɩ a Eziptɩ tẽw nãà, Faarawɔ̃, ƴãw. Ɩ̃ na kár'ɩ a ʋ kpãkpamɛ a za ayi bɛr: a ʋl na kpɛmɛ a na ɩ na mɛ̃ a ʋl na faa ka a. Lɛ n'a ɩ̃ na ɩ a zɛbr-sɔ-kpɛ̃ɛ yi a ʋ nũú lo! 23Ɩ̃ na ɩ n a Eziptɩ tẽw dem yaarɩ a nɩ-bʋʋr-yoru nɩ a tẽ-sãanbɛ sɔgɔ. 24Ɩ̃ na ɩ n a Babɩlɔn tẽw nãà fãw lɛb dɔwlɩ, ɩ̃ɩ na ƴãw nɩ a mãa mɩŋa zɛbr-sɔ-kpɛ̃ɛ a ʋ nuru pʋɔ. A Faarawɔ̃ ɩ̃ na na ka a kpãkpãw bɛr a na kone nɩ 'woi 'woi a ʋ dɔ̃ sob niŋé tɩ kpi. 25Sɩza, ɩ̃ na ɩ n a Babɩlɔn tẽw nãà kpãkpamɛ lɛb kpɛmɛ, ɛ́ a Eziptɩ tẽw nãà kpãkpamɛ na bàl'a, lo. Ɩ̃ na ƴãw nɩ a ɩ̃ zɛbr-sɔ-kpɛ̃ɛ a Babɩlɔn tẽw nãà nuru pʋɔ, ʋʋ na zɛwrɩ zɛwrɩ ʋ na cɔw a Eziptɩ tẽw. Lɛ n'a nɩr za na bãw kɛ́ mãa n'ɩ a Sore. 26Ɩ̃ na yaar'ɩ a Eziptɩ tẽw dem a nɩ-bʋʋr-yoru sɔgɔ tẽ-sãanbɛ pʋɔ. Lɛ n'a nɩr za na bãw kɛ́ mãa n'ɩ a Sore.»

Currently Selected:

Ezekɩɛl 30: DBDC

Highlight

Copy

Compare