Ezekɩɛl 16

A Sore kaa nɩ a Zerizalɛm zie

1A Sore tɩ yel mɛ̃ na: 2«A fʋ̃ʋ nɩsaal bie, wul a Zerizalɛm a lɛ a ʋ cenu na tɩ kpɛ faa bɛ maal'ɩ wob a. 3Yel kʋ̀ ʋ a lɛ a mãa Sore Naaŋmɩn na yere a : Kanãa tẽw n'ɩ a fʋ sãàkʋm-kore tẽw, a tẽsɔw ʋl zu fʋ na dɔw a. A fʋ sãà tɩ ɩ n Amoritɩ, ɛ́ a fʋ mã ɩ Hititɩ#16:3 Daviir'ʋ tɩ zɛb de a tẽw ŋa, ɩ k'ʋ ɩ a ʋ tẽ-kpɛ̃ɛ. Alɛ bɛ ɩ lɛ, a koro za a, a Zerizalɛm bɛ tɩ pʋɔ a Ɩsɩrayɛl tẽw pʋɔ ɩ, Kanãa tẽw pʋɔ n'a ʋ tɩ pʋɔ. . 4A ʋlɩ bibir fʋ na dɔw a, nɩr za bɛ tɩ ŋmãa a fʋ nyũo ɩ. Bɛ bɛ tɩ pɛ́w fʋ kʋ̃ɔ pʋɔ fʋ yi ɛ. Bɛ bɛ tɩ fɔw nɩ fʋ nyaarʋ ɛ#16:4 A koro za a, bɛ mɩ́ tɩ fɔw nɩ a bibile na dɔw a paalʋ a nɩ nyaarʋ, k'aa ʋ ƴã-gan tʋ̃ɔ́ kpɛmɛ. , bɛ bɛ tɩ pili nɩ fʋ pɛnɛ ɩ. 5Nɩr za bɛ tɩ jɩ́r fʋ nɩ nɔ̃wfʋ, ɩ à á ŋá a fʋ zie ɩ. Nɩr za bɛ tɩ zɔ fʋ nɩbaalʋ ɛ. Bɛ nɩ̃ɛ na tɩ lɔb fʋ bin tẽsɔw a fʋ dɔwfʋ bibir, bɛ na tɩ jewre fʋ a ƴãw. 6Ɩ̃ tɩ cen na tɔl pɩɛlɩ fʋ, Zerizalɛm i, ɛ́ nyɛ b fʋ na tɩ kpere a fʋ zɩ̃ɩ pʋɔ a. A zɩ̃ɩ na saa tɩ pàw fʋ a, ɩ̃ tɩ yel fʋ na kɛ́ fʋ vʋʋrɛ! Sɩza n'a, ɩ̃ tɩ yel fʋ na kɛ́ fʋ vʋʋrɛ! 7Ɩ̃ tɩ ɩ na fʋ kɛrɩ mɛ̃ póru pʋɔ mʋ̃ɔ a. Fʋ tɩ bul'a, fʋ tɩ yɛ̀r'a ɛ́ pɔl yaga za. Fʋ tɩ yi n bɩrɛ ɛ́ bul kɔblʋ. Ɛcɛ fʋ tɩ ɩ n ƴã-gã-kpãkpol. 8A tɩ kɔwr'a ɩ̃ɩ lɛb cen tɔl pɩɛlɩ fʋ, Zerizalɛm i. Ɩ̃ tɩ jɩ́r fʋ na kaa nyɛ̃ fʋ ta a dɛb nɔ̃wfʋ. Lɛ n'a ɩ̃ tɩ dɔl a ɩ̃ kpar-kpɛ̃ɛ a fʋ zu k'ɩ̃ɩ pàw a fʋ ƴã-gã-kpãkpol#16:8 Ɩ̃ tɩ dɔl'ɩ a ɩ̃ kpar-kpɛ̃ɛ k'ɩ̃ɩ pàw a fʋ ƴã-gã-kpãkpol: A Sɛb-sõw pʋɔ a, a tub ŋa ɩ n faafʋ bãwfʋ ɛ́ mɩ̀ ɩ kul-taa bãwfʋ. . Ɩ̃ tɩ pɔ n nɩ a ɩ̃ nyɔ-vʋʋrʋ k'ɩ̃ɩ na be n a fʋ ƴãw kʋ̃ lɛb pùor ɛ, ɛ́ maal'ɩ fʋ wõ-taa. Lɛ n'a fʋ tɩ be a ɩ̃ ƴãw, a mãa Sore Naaŋmɩn n'ʋ yel.

9Ɩ̃ tɩ so b'ɩ kʋ̃ɔ, ɩ̃ tɩ sɔ́w nɩ a zɩ̃ɩ na tɩ be a fʋ zu a bɛr, ɛ́ zɛ b kãá-nyũu. 10Ɩ̃ tɩ kʋ̀ b'ɩ bʋ̃-suuri na maw maw a, gán-ɓɛrɓɛr nafawr-ɓɛwlɩkɛl, lɛ̃ kpàwr, ɛ́ pili nɩ fʋ pɛn-yée. 11Ɩ̃ tɩ ƴãw fʋ nɩ pɩ̃ɛmɛ, ƴãw bamɛ a fʋ kpãkpamɛ ƴãw ɛ́ ƴãw bãzɔlɛ a fʋ kɔkɔrɩ́. 12Ɩ̃ tɩ ƴãw nɩ bãw-vilovilo a fʋ nyʋɔrɩ́, ƴãw tokpamɛ a fʋ tobe ƴãw ɛ́ vɔblɩ fʋ nãà-kpawʋɔ na vɩɛl vɩɛl a. 13A fʋ pɩ̃ɛmɛ tɩ ɩ n salm-zɩɛ nɩ salm-pla, a fʋ bʋ̃-suuri ɩ lɛ̃ nɩ pɛn-yée nɩ pɛn-mawrɩ. Zɔ̃-bàalʋ nɩ sɩwr nɩ kãá n'a fʋ tɩ dɩrɛ. Lɛ n'a fʋ tɩ pɔl bɛ cɛ ɩ, ɛ́ sɛwnɩ na ɩ a nãà-pɔw. 14A fʋ na tɩ pɔ̀l a, Zerizalɛm i, bɛ tɩ ƴɛ̀rɛ nɩ a fʋ ƴɛ̀rʋ a tẽ-daa za zu. Bʋ̃ʋ n'ʋ vɛ̃, a fʋ vɩɛlʋ bɛ tɩ cɛ ɩ, ɩ̃ na tɩ su b yúor-vɩɛlʋ-danʋ a ƴãw. A mãa Sore Naaŋmɩn n'ʋ yel.»

A Zerizalɛm tõ n pɔw-yɛm tome

15«Ɛcɛ, fʋ tɩ ɩrɛ na ƴãwn fʋ na pɔ̀l a ƴãw, Zerizalɛm i! Bɛ na tɩ bãw fʋ a ziir za a zũú a, fʋ tɩ tõ n pɔw-yɛm tome. Fʋ gã nɩ nɩ a dɛbr za na tɩ tɔlɛ a, bɛ tɩ so b'a. 16A maalʋ-ziir fʋ na tɩ yel kɛ́ fʋ cɔbrɩ a vɩɛl a ƴãw a, fʋ de nɩ a fʋ gàn-vɩɛlɩ ɓalɛ ɓalɛ tõ pɔw-yɛm tome a zu#16:16 Tõ pɔw-yɛm tome a zu: A Wõ-ta-kʋra sɛbɛ pʋɔ a, a pɔw-yɛm tome ɩ n tɩbɛ puoru. Nyɛ̃ Ety 34.15, Oze 2.4. . A bɛ tɩ dãw ɩ ɛ, ɛ́ kʋ̃ lɛb ɩ towtow ɛ. 17Fʋ de nɩ a salm-zɩɛ nɩ a salm-pla pɩ̃ɛmɛ ɩ̃ na tɩ kʋ̀ b a maal'ɩ ŋmɩn-bɛlɛbɛlɛ na ɩ bʋ̃-daar a, ɛ́ tõ pɔw-yɛm tome a zu. 18Fʋ pàw a na nɩ a fʋ kpar-mawrɩ. Fʋ de nɩ a ɩ̃ kãá nɩ a ɩ̃ tɩ-suur-zɔ̃-na-nyùur-vla-vla-a kʋ̀ a. 19Fʋ na tɩ bɔbr kɛ́ fʋ ɩ a pʋʋr pɛlɩ a, fʋ de nɩ a bʋ̃-dɩrɩ za ɩ̃ na tɩ kʋ̀rɛ fʋ a maal'ɩ bàwr kʋ̀ a: a zɔ̃-vla vla, a kãá nɩ a sɩwr. A mãa Sore Naaŋmɩn n'ʋ yere. 20Zerizalɛm i, fʋ de nɩ a bidɛbr nɩ a pɔwyaar fʋ na tɩ kʋ̀ m a, maal'ɩ bàwr#16:20 A nyɔw a bibile maal'ɩ bàwr ciir'ɩ a Naaŋmɩn nɛ-ƴãwnɩ pʋɔ. Nyɛ̃ Lev 20.2, Wl-ayi 12.31, 18.10. kʋ̀ a ŋmɩn-bɛlɛbɛlɛ kɛ́ bɛ ɩ a bʋ̃-dɩrɩ! A na ɩ lɛ a, a fʋ pɔw-yɛm nyɔ-vʋʋrʋ bɛ tɩ man ɛ? 21Fʋ kʋ n a ɩ̃ bibiir ɛ́ ƴãw bɛ nyɩw bɛ a fʋ ŋmɩn-bɛlɛbɛlɛ ƴãw! 22Zerizalɛm i, fʋ na tɩ ɩrɛ a ɩb á ŋá na bɛ maal'ɩ wob a, fʋ na tɩ tone a pɔw-yɛm tome á ŋá a, fʋ bɛ tɩ tɩɛrɩ a fʋ pɔ̀lʋ̀ daar ɛ! Fʋ tɩ yiir'ɩ a daar nɛ fʋ na tɩ ɩ ƴã-gã-kpãkpol a, a daar nɛ fʋ na tɩ kpere a fʋ zɩ̃ɩ pʋɔ a.

23A faa al za fʋ na wa maalɩ baar'a, fʋ̃ʋ n'ɩ ŋan be kpɩɛrʋ pʋɔ. Sɩza, nyɛ̃ kpɩɛrʋ na tɛr fʋ a! A mãa Sore Naaŋmɩn n'ʋ yere. 24Ɛcɛ fʋ mɛ n gboro nɩ zi-kɛrɩ a tuor-taa ziir za#16:24 A bɛlɩ dem na kpɩɛr a Zerizalɛm a mɩ́ tɩ mɛ n bàwr-maal-ku-cãpili dɔwlɩ a gboro nɩ a ziir na kɛrɩ a zu, ɛ́ mɩ́ tɩ cere tɩ ƴãwnɛ a bɛ de-kʋ̀b bome a be. . 25A sɔ́r za tib zie a, fʋ mɛ n gboro a fʋ ƴãw, ɛ́ a be a, fʋ sãw nɩ a fʋ vɩɛlʋ bɛr, fʋ de nɩ fʋ tʋɔra kʋ̀ a nɩ-tɔlɩ za, fʋ tõ n pɔw-yɛm tome tɩ dɔwlɩ. 26Fʋ tõ n pɔw-yɛm tome nɩ a Eziptɩ tẽw dem, a fʋ kpɛ-pɩɛl dem na tɛr ƴã-gã-vɩɛlɩ vɩɛlɩ a, ɛ́ fʋ ɩ n à à ŋá dɔwlɩ kʋralɛ k'ɩ̃ɩ tʋ̃ɔ́ nyɛ̃ suur. 27Alɛ so ɩ̃ wul fʋ a ɩ̃ kpɛnʋ: ɩ̃ ŋmãa nɩ a fʋ bʋ̃-dɩrɩ ɛ́ bɛr fʋ kʋ̀ a fʋ dɔ̃ dem, a Filisɩtɛ̃ tẽ-bɛrɛ, al vĩ na tɩ ɩrɛ, a fʋ ɩb na bɛ maal'ɩ wob a zũú a. 28Fʋ tõ n pɔw-yɛm tome nɩ a Asiiri tẽw dem, fʋ na bɛ tɩ sɛw a ƴãw. Fʋ tõ n bɛ nɩ pɔw-yɛm tome, ɛcɛ a vʋla cãà bɛ tɩ baarɩ fʋ mɩ̀ ɛ. 29Fʋ tõ n a pɔw-yɛm tome suwlisuwli taa a yɛ-yɛrbɛ tẽw kãw pʋɔ, a Babɩlɔn tẽw pʋɔ. Ɛcɛ fʋ mɔ̃ mɩ̀ cãà bɛ tɩ tɩw ɛ. 30'Woi Zerizalɛm i! A mãa Sore Naaŋmɩn n'ʋ yere, fʋ sɩrɩ na ɩ dɛ̃bɩ̃ɛ sob. Fʋ na maalɩ à á ŋá za a, fʋ ɩ n a ɩb mɛ̃ a pɔw-yɛm faa faa za a. 31A sɔ́r za tib zie a, fʋ mɛ n gboro. Fʋ mɛ n zi-kɛrɩ a ziir za. Ɛcɛ fʋ bɛ zɛlɩ libie mɛ̃ a pɔw-yɛmɛ bɛ mɩnɛ a ɩ. 32Fʋ ɩ na mɛ̃ a pɔw-pɩ̃ɔ-yel-maalɛ na mɩ́ bɔbr a nɩ-sãanbɛ ɛ́ bɛr a ʋ sɩr a. 33A pɔw-yɛmɛ za páwr'ɩ libie, ɛcɛ fʋ̃ʋ a, fʋ kʋ̀ n bʋ̃-kʋ̀rɩ a fʋ sɛnbɛ. Fʋ ya bɛ na kɛ́ bɛ yi a ziir za wa gã nɩ fʋ. 34Fʋ na tone a pɔw-yɛm tome à à ŋá a, fʋ ɩ n a lɛ a pɔw-yɛmɛ bɛ mɩnɛ na bɛ ɩrɛ a. A nɩbɛ bɛ tɩ bɔbr fʋ ɛ, bɛ bɛ tɩ yarɛ fʋ ɛ, ɛcɛ fʋ̃ʋ n'ʋ mɩ́ tɩ tɩr a libie. Fʋ sɩrɩ na ɩ a lɛ a bɛ mɩnɛ na bɛ ɩrɛ a.

35A na ɩ à ŋá a, Zerizalɛm i, fʋ̃ʋ na tone pɔw-yɛm tome a, bɛrɛ wone a Sore ƴɛ̀rʋ! 36À ŋá n'a a mãa Sore Naaŋmɩn yere: Fʋ wul'ɩ fʋ tʋɔra ɩ ƴã-gã-kpãkpol fʋ za, fʋ ɩ na bɛ nyɛ̃ a fʋ ƴã-gan ziir za, fʋ na tõ a pɔw-yɛm tome nɩ a fʋ sɛnbɛ nɩ a ŋmɩn-bɛlɛbɛlɛ na bɛ vɩɛl towtow a zũú. Mɔ̃ mɩ̀, fʋ kʋ n a fʋ bibiir kʋ̀ a fʋ ŋmɩmɛ. 37Alɛ n'a so, a sɛnbɛ bɛl za pʋɔ fʋ na pɛlɩ a, ɩ̃ na ɓã bɛ nɩ taa, a bɛl za fʋ na nɔ̃w nɩ a bɛl za fʋ na hɛ̃ a. Mãa wa ɩ bɛ yi a ziir za wa a, ɩ̃ na yaar'ɩ a fʋ bʋ̃-suuri a bɛ niŋé, ɛ́ fʋ na bɛr'ɩ a fʋ ƴã-gã-kpãkpol za kʋ̀ bɛ bɛ jɩ́rɛ. 38Zerizalɛm i, ɩ̃ na dɩ n fʋ nɩ ƴɛ̀rʋ ƴãw fʋ dɔwrʋ, mɛ̃ a lɛ bɛ na mɩ́ dɩ n ƴɛ̀rʋ ƴãw dɔwrʋ a pɔw-pɩ̃ɔ-yel-maalbɛ nɩ a bɛl na kʋrɛ a nɩbɛ a. A ɩ̃ suur nɩ a ɩ̃ nyuur zũú a, ɩ̃ na ɩ na fʋ ɩ zɩ̃ɩ tɛwr. 39Ɩ̃ na ƴãw fʋ nɩ a fʋ sɛnbɛ nuru pʋɔ. Bɛ na ŋmɛr'ɩ a fʋ gboro ɛ́ sãw a fʋ zi-kɛrɩ bɛr. Bɛ na yaa nɩ a fʋ bʋ̃-suuri, bɛ na de nɩ a fʋ pɩ̃ɛmɛ ɛ́ bɛr fʋ fʋ ɩ ƴã-gã-zawla kpõlõkpõlõ. 40Lɛb waar, bɛ na dam'ɩ a zu-sɛbla ƴãw fʋ. Bɛ na lɔb'ɩ fʋ nɩ kʋsɛbɛ kʋ, bɛ na ŋma b'ɩ ɓɛlɛɓɛlɛ nɩ a bɛ zɛbr-sɔ-bɛrɛ, 41bɛ na nyɩw nɩ a fʋ yie. Bɛ na ɩ n a ƴɛ̀rʋ bɛ na dɩ n fʋ ƴãw fʋ a dɔwrʋ a ʋ tu pɔw-yaga yaga mimirí. Ɩ̃ na ɩ n a fʋ pɔw-yɛm tome nʋɔr kʋ, ɛ́ fʋ kʋ̃ lɛb tʋ̃ɔ́ mɩ́ ya a fʋ sɛnbɛ ɩ. 42A ɩ̃ su-tʋlʋ na ìr'ɩ a fʋ ƴãw tɩ ta a ʋ tab zie. A pùorí, a bom nɛ ƴãw ɩ̃ na kpɛ nyuur a kʋ̃ cãà be ɩ, a ɩ̃ ƴãw na ɓãa na, ɩ̃ɩ kʋ̃ lɛb nyɛ̃ suur ɛ. 43Zerizalɛm i, fʋ bɛ lɛb tɩɛrɩ a bom nɛ ɩ̃ na ɩ kʋ̀ b a fʋ pɔ̀lʋ̀ daarɩ́ a ɩ. Fʋ bɔ m'ɩ nɔhaarʋ nɩ a fʋ ɩ-ɩrɩ. A na ɩ à ŋá a, ɩ̃ na ɩ na fʋ ya a fʋ ɩb san, a mãa Sore Naaŋmɩn n'ʋ yere! Bʋ̃ʋ n'ʋ vɛ̃, fʋ ɩ n vĩ-ɩb ƴãw pʋɔ a ɩb al za na bɛ maal'ɩ wob fʋ na ɩ n a fʋ ŋmɩn-bɛlɛbɛlɛ a.»

A Zerizalɛm kpɛ n faa zuo a tẽ-bɛrɛ na cɛ a

44A Sore tɩ lɛb'a yel: «Zerizalɛm i, a zʋkpa-lɔbrbɛ nãà wa yel'ɩ à ŋá càar'ɩ fʋ: “Mã ŋmɛ̃ lɛ, pɔwyaa ŋmɛ̃ lɛ!” 45Fʋ sɩrɩ na ɩ a fʋ mã pɔwyaa, a pɔw ŋa na hɛ̃ a ʋ sɩr nɩ a ʋ bibiir a. Fʋ̃ʋ nɩ a fʋ yɛbr na hɛ̃ a bɛ sɩrbɛ nɩ a bɛ bibiir a ɩ n been. A nyɩ mã tɩ ɩ n Hititɩ ɛ́ a nyɩ sãà tɩ ɩ Amoritɩ. 46A fʋ yɛ-kpɛ̃ɛ n'ɩ Samaari na be a saa-pɛrɩ́-gʋba-lowr a nɩ a ʋ tẽ-kpɔwlɩ. A fʋ yɛ-bile n'ɩ Sodɔm na be a saa-pɛrɩ́-dʋrʋ-lowr a nɩ a ʋ tẽ-kpɔwlɩ. 47Fʋ bɛ cɔwrɩ a bɛ ɩb tɛwr ɛ, fʋ bɛ maalɩ a alɩ yel-been nɛ na bɛ maal'ɩ wob a tɛwr ɛ, a bɛ tɩ zɛ̃ fʋ bom ɛ! A fʋ ɩb tɩ kpɛ n faa yaga zuo a tẽ-bɛrɛ al na cɛ a dem! 48Ɩ̃ pɔ n nɩ a ɩ̃ nyɔ-vʋʋrʋ, a mãa Sore Naaŋmɩn n'ʋ yere, a fʋ yɛb Sodɔm nɩ a ʋ tẽ-kpɔwlɩ bɛ dãw maalɩ faa man a fʋ̃ʋ nɩ a fʋ tẽ-kpɔwlɩ ɛ. 49A Sodɔm nɩ a ʋ tẽ-kpɔwlɩ sãwna n'ɩ á ŋá: A tɩ ɩrɛ nɩ pɔ̀l-ɩb, a tɩ dɩrɛ na tɩ maal zuo, a bɛ tɩ tɛr tɩɛrʋ ɛ, a bɛ sõw a nɩ-kɔmɛ nɩ a bãbàalbɛ ɩ. 50A wa tɩ ɩrɛ nɩ pɔ̀lʋ̀ ɛ́ maalɩ yele na bɛ maal'ɩ wob a, a ɩ̃ niŋé. Lɛ n'a ɩ̃ ɩ a bɔr mɛ̃ fʋ na bãw a. 51Ɛcɛ a Samaari ʋl a, ʋ bɛ maalɩ a faa fʋ na maalɩ a põ-zɛ̃-taa zie ɩ. A fʋ ɩ-faar yãwmɛ na zuo a ʋ dem. Bɛlɛ de a fʋ yɛbr Sodɔm nɩ a Samaari man nɩ fʋ a, a Sodɔm nɩ a Samaari bɛ ɩ sãwna dem ɛ! 52Ɛcɛ a ƴɛrɛŋa a, sàw fʋ na bɛ cãà tɛr yúor a fʋ sãwna zũú a. Sɩza, fʋ ɩ n ɩb na kpɛ faa zuo a fʋ yɛbr dem a. Lɛ so bɛ sãá nɩ-mɩn zuo fʋ. A vĩ mɩ̀ na páw fʋ na ɛ́ a na kpɛ b'a, fʋ na bɛ cãà tɛr yúor a. 53Ɩ̃ na lɛb'a maalɩ a tẽ-bɛrɛ á ŋá ƴãw a vɩɛl: ɩ̃ na lɛb'a maalɩ a Sodɔm nɩ a ʋ tẽ-kpɔwlɩ, a Samaari nɩ a ʋ tẽ-kpɔwlɩ ƴãw. A pùorí, ɩ̃ mɩ̀ na maalɩ fʋ na ƴãw, Zerizalɛm i. 54Lɛ n'a a na kpɛ b, fʋ na bɛ cãà tɛr yúor a. Vĩ na nyɔw fʋ na a al za fʋ na ɩ a zũú: a na ɩ n mɔwlʋ a tẽ-bɛrɛ á ŋá zie. 55A Sodɔm, a Samaari nɩ a tẽ-kpɔwlɩ na lɛb'a ŋmɛ̃ a dãwdãw ŋmɛ̃a. A mɩ̀ na ŋmɛ b'ɩ a lɛ, a fʋ̃ʋ Zerizalɛm nɩ a fʋ tẽ-kpɔwlɩ. 56A lɛn daar fʋ na tɩ pɔrɛ a, fʋ tɩ ƴɛ̀rɛ na jewre nɩ a Sodɔm. 57Bɛ bɛ tɩ nyɛ̃ a fʋ faalʋ sɛr ɛ. Ƴɛrɛŋa a, a Edɔm tẽ-bɛrɛ nɩ a ʋ tẽ-kpɔwlɩ lãwnɩ a Filisɩtɛ̃ mɩnɛ tẽ-bɛrɛ mɩ̀ na tʋ b'a. Bʋ̃ʋ n'ʋ vɛ̃, a ziir za a, a ten á ŋá yere na k'aa jewre fʋ na. 58À à ŋá a, fʋ so nɩ a fʋ vĩ-ɩb na bɛ maal'ɩ wob a, a mãa Sore Naaŋmɩn n'ʋ yel.

59À ŋá n'a a mãa Sore Naaŋmɩn yere: fʋ bɛ cɛlɩ be a pɔb fʋ na pɔ a ƴãw ɛ, ɛ́ sãw a wõ-taa a mãa nɩ a fʋ̃ʋ cara pʋɔ bɛr. Alɛ n'a so ɩ̃ na ɩ b mɛ̃ a lɛ fʋ na ɩ a ɩ̃ zie a. 60Ɛcɛ mãa a, ɩ̃ na cãà na bãwnɩ a wõ-taa ɩ̃ na tɩ maal'ɩ fʋ a fʋ pɔ̀lʋ̀ daar a, ɩ̃ɩ na ɩ na ʋ lɩɛbɩ wõ-taa na be kʋralɛ a. 61Fʋ̃ʋ wa tɩɛrɩ a fʋ nyɔ-vʋʋrʋ a, vĩ na kpɛ b'a, a lɛn daar fʋ nãà wa nyɛ̃ a fʋ yɛbr, a bɛrɛ nɩ a bili a. Ɩ̃ na ɩ na fʋ dɩ naalʋ a bɛ zu mɛ̃ bɛ ɩ n a fʋ pɔwyaar a. Ɛcɛ, a bɛ pʋɔ a wõ-taa ɩ̃ na maal'ɩ fʋ a pʋɔ ɩ. 62Zerizalɛm i, ɩ̃ na maal'ɩ fʋ nɩ wõ-taa, lɛ n'a fʋ na bãw kɛ́ mãa n'ɩ a Sore. 63Lɛ n'a fʋ na cãà bãwnɩ a koro, vĩ na paalɩ fʋ na fʋ bɛ cãà tɛr nʋɔr ɛ, fʋ na bɛ cãà tɛr yúor a zũú. Ɛcɛ mãa a, ɩ̃ na dɩ n a sãwna al za fʋ na maalɩ a suur kʋ̀ b. A mãa Sore Naaŋmɩn n'ʋ yel.»

Currently Selected:

Ezekɩɛl 16: DBDC

Highlight

Copy

Compare