Ezekɩɛl 14

A fɛr'a k'aa Ɩsɩrayɛl nɩbɛ zawrɩ a tɩbɛ bɛr

1Bibir kãw, a Ɩsɩrayɛl nɩ-kore bɛ mɩnɛ tɩ wa na wa zɩ̃ a ɩ̃ niŋé kɛ́ bɛ nyɛ̃ m#14:1 Nyɛ̃ 8.1 nɩ a manʋ. . 2Lɛ n'a a Sore tɩ yel mɛ̃: 3«Fʋ̃ʋ nɩsaal bie e, bɛrɛ wone! A nɩbɛ bɛ ŋa ƴãw nɩ a bɛ ŋmɩn-bɛlɛbɛlɛ a bɛ socir pʋɔ. Bɛ bɔbr'ɩ kʋralɛ a bom nɛ na mɩ́ ɩ bɛ lo a yel-bier pʋɔ a. Ɩ̃ na bɛr'a bɛ tɛr sowru a ɩ̃ zie e? 4A na ɩ lɛ a, ƴɛ̀r a ƴɛ̀rʋ ŋa kʋ̀ bɛ: À ŋá n'a a mãa Sore Naaŋmɩn yere: A ɩ mɛ̃ Ɩsɩrayɛl nɩr kãw wa ƴãw nɩ a ʋ ŋmɩn-bɛlɛbɛlɛ a ʋ socir pʋɔ, ɛ́ bɔbr kʋralɛ a bom nɛ na mɩ́ ɩ ʋ lo a yel-bier pʋɔ a, ɛ́ wa k'ʋʋ wa nyɛ̃ naaŋmɩn-ƴɛ̀r-manɛ a, a mãa Sore n'ʋ na sɔw ʋ. Ɩ̃ na sɔw ʋ na tu n a ŋmɩn-bɛlɛbɛlɛ yaga ʋ na puore a. 5A ɩ̃ sɔwfʋ na dam'ɩ a Ɩsɩrayɛl nɩbɛ yaga, bɛl na jɛ m bɛr a bɛ ŋmɩn-bɛlɛbɛlɛ nɔ̃wfʋ zũú a. 6Alɛ n'a so, yel kʋ̀ a Ɩsɩrayɛl nɩbɛ: “A Sore Naaŋmɩn zɛlɛ nyɩ na kɛ́ nyɩ lɩɛbɩ a nyɩ nyɔ-vʋʋrʋ, kɛ́ nyɩ ír nũu ɛ́ bɛr a nyɩ ŋmɩn-bɛlɛbɛlɛ, kɛ́ nyɩ ŋmɛlɩ kpaar cɔw a nyɩ ɩb na bɛ maal'ɩ wob a.”

7A ɩ mɛ̃ Ɩsɩrayɛl nɩr kãw bɩɩ sãan na kpɩɛr a Ɩsɩrayɛl tẽw pʋɔ a#14:7 Sãan na kpɩɛr a Ɩsɩrayɛl tẽw pʋɔ a: A nɩr ŋa wa ŋmãa yʋ̀ɔr a, a fɛrʋ al na càarɩ a Ɩsɩrayɛl biir a mɩ̀ càarɩ ʋ na, ɛ́ a wulu al na faarɛ a Ɩsɩrayɛl biir a mɩ̀ faarɛ ʋ. A pɛr lɛ kɛ́ ʋlɛ nɩ a Ɩsɩrayɛl biir ɩ n been. jɛ m'a bɛr. Ʋlɛ wa ƴãw a ʋ ŋmɩn-bɛlɛbɛlɛ a ʋ socir pʋɔ, ɛ́ bɔbr kʋralɛ a bom nɛ na mɩ́ ɩ ʋ lo a yel-bier pʋɔ, ɛ́ wa k'ʋʋ wa nyɛ̃ naaŋmɩn-ƴɛ̀r-manɛ tʋ̃ɔ́ bãw a ɩ̃ pʋ-tɩɛrʋ a, a mãa Sore mɩŋa n'ʋ na sɔw ʋ. 8Ɩ̃ na ír'ɩ mimir ƴãw a nɩr ŋa. Ɩ̃ na ɩ na a ʋ yel ɩ zʋkpar bɛ lɔbr, ɩ̃ɩ ír ʋ bɛr a ɩ̃ nɩ-bʋʋrɛ sɔgɔ. Lɛ n'a nyɩ na bãw kɛ́ mãa n'ɩ a Sore.

9Naaŋmɩn-ƴɛ̀r-manɛ wa bɛr bɛ bɛlɩ ʋ, ʋ sɔw ʋl mɩŋa a, a mãa Sore n'ʋ na ƴãw ʋ ʋ ɩ a lɛ. Ɩ̃ na dɔl'ɩ nũu a ʋ ƴãw, ɛ́ ɩ ʋ bɔr a ɩ̃ nɩ-bʋʋrɛ Ɩsɩrayɛl sɔgɔ. 10A naaŋmɩn-ƴɛ̀r-manɛ ŋa nɩ a ʋlɩ sob na sowri ʋ a, bɛ za ayi so a sãwna been nɛ. 11À ŋá n'a a Ɩsɩrayɛl nɩbɛ kʋ̃ lɛb bɔr zãá nɩ mɛ̃ ɩ. Bɛ kʋ̃ lɛb ɩ dɛwr dem a bɛ sãwna za zũú ɛ. Ɛcɛ bɛ na ɩ n a ɩ̃ nɩ-bʋʋrɛ, ɩ̃ɩ ɩ a bɛ Naaŋmɩn.» À ŋá n'a a Sore Naaŋmɩn yel.

Bom za kʋ̃ tʋ̃ɔ́ piw a Naaŋmɩn ƴɛ̀rʋ-dɩb sɔ́r ɛ

12A Sore tɩ yel mɛ̃ na: 13«Nɩsaal bie e, bɛrɛ wone! A ɩ mɛ̃ tẽw kãw nɩbɛ ɩ n sãwna dem a ɩ̃ zie bɛ na bɛ tu a ɩ̃ pùor a ƴãw. A lɛ pʋɔ a, ɩ̃ na wul bɛ nɩ a ɩ̃ kpɛnʋ. Ɩ̃ na ɩ n a bɛ bʋ̃-dɩrɩ baarɩ. Ɩ̃ na ɩ na kɔ̃ lo a bɛ zu. Ɩ̃ na ɩ n a tẽw nɩbɛ nɩ a dʋn kpi. 14A ɩ mɛ̃ nɩbɛ ata na ŋmɛ̃ taa nɩ Nowe, Danɩɛl nɩ Zɔb a be n a tẽw ŋa nɩbɛ pʋɔ. A nɩbɛ ata bɛ ŋa tɛwr nɛbɛ na tʋ̃ɔ́ faa a bɛl mɩŋa nyɔ-vʋʋrʋ a bɛ pùor-bɛ-lɛbrʋ zũú. A mãa Sore n'ʋ yel à ŋá.

15Bɩɩ ɩ̃ na bɛr'ɩ dʋ̃-faar a wa a nɩbɛ bɛ ŋa ƴãw. A dʋn na kʋ n bɛ za ɛ́ a tẽw na lɩɛb'ɩ wɛja-kpalɛ. Nɩr za kʋ̃ lɛb tɔl a be ɩ, a dʋn á ŋá zũú. 16A ɩ mɛ̃ a nɩbɛ ata bɛ ŋa na ŋmɛ̃ taa nɩ a Nowe, a Danɩɛl nɩ a Zɔb a be n a nɩbɛ pʋɔ a, bɛl tɛwr nɛbɛ na vʋʋrɛ. A mãa Sore Naaŋmɩn n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ, ɛ́ a tẽw na lɩɛb'ɩ wɛja-kpalɛ.

17Bɩɩ ɩ̃ na ɩ n zɛbr lo a nɩbɛ bɛ ŋa zu. Ɩ̃ na kʋ̀ n nʋɔr zɛbr-nɩbɛ kɛ́ bɛ sãw a tẽw bɛr ɛ́ kʋ a nɩbɛ nɩ a dʋn. 18A ɩ mɛ̃ a nɩbɛ ata bɛl na ŋmɛ̃ taa nɩ a Nowe, a Danɩɛl nɩ a Zɔb a be n a nɩ-bʋʋrɛ bɛ ŋa pʋɔ a, bɛl tɛwr nɛbɛ na vʋʋrɛ. A mãa Sore Naaŋmɩn n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ.

19Bɩɩ ɩ̃ na ƴãw nɩ jɛ̀lmɛ̃ bàalʋ na nyɔwr nɩbɛ lʋɔrɛ taa a a nɩ-bʋʋrɛ bɛ ŋa. Ɩ̃ na ɩ n a ɩ̃ suur ìr a bɛ ƴãw, a kpɩɛrʋ kpɛ̃ɛ ŋa na na kʋ a tẽw nɩbɛ nɩ a dʋn a ƴãw. 20A ɩ mɛ̃ a nɩbɛ ata bɛ ŋa na ŋmɛ̃ taa nɩ a Nowe, a Danɩɛl nɩ a Zɔb a be n a nɩ-bʋʋrɛ bɛ ŋa pʋɔ a, bɛl tɛwr nɛbɛ a bɛ pùor-bɛ-lɛbrʋ na tʋ̃ɔ́ faa. A mãa Sore n'ʋ yere, ɩ̃ pɔ n nɩ a ɩ̃ nyɔ-vʋʋrʋ, bɛ kʋ̃ tʋ̃ɔ́ faa a bɛl mɩŋa bibiir ɛ.»

21Al pùorí, a Sore Naaŋmɩn tɩ yel mɛ̃ na: «Ɩ̃ ɩ na kpɩɛrʋ bɛrɛ anaar ta a Zerizalɛm: a zɛbr, a kɔ̃, a dʋ̃-faar nɩ a jɛ̀lmɛ̃ bàalʋ, k'aa tʋ̃ɔ́ kʋ a nɩbɛ nɩ a dʋn pàw pɛr. 22Ɛcɛ nɩbɛ bɛ mɩnɛ, dɛbr nɩ pɔwbɛ, cãà na vʋʋrɛ. Bɛ na yi n a Zerizalɛm wa páw nyɩ. Nyɩmɛ wa nyɛ̃ a bɛ cenu nɩ a bɛ ɩb a, nyɩ na nyɛ̃ nɩ mɔwlʋ a kpɩɛrʋ ɩ̃ na ɩ a ta a Zerizalɛm a ƴãw. 23Nyɩ na nyɛ̃ nɩ mɔwlʋ nyɩmɛ wa nyɛ̃ bɛ a. Bʋ̃ʋ n'ʋ vɛ̃, nyɩ na bãw na k'ɩ̃ɩ tɛr'ɩ yel-mɩŋa ɩ a lɛ ɩ̃ na ɩ a tẽ-kpɛ̃ɛ ŋa a. A mãa Sore n'ʋ yel.»

Currently Selected:

Ezekɩɛl 14: DBDC

Highlight

Copy

Compare