Ɛsɩtɛɛr-gɩrɛkɩ 9
9
A Zifʋ mɩnɛ kʋ n a bɛ dɔ̃ dem
1A cuwr pie nɩ ayi sob, a pɛr lɛ k'aa Adaar cuw, bibie pie nɩ ata sob, a tɩ fɛr'a k'aa lɛ a nãà na yel a tu. 2A ʋlɩ bibir tɔr za, bɛ tɩ kʋ n a Zifʋ mɩnɛ dɔ̃ dem. A nɩbɛ za tɩ zɔrɛ nɩ a Zifʋ mɩnɛ yaga, ɛ̀ nɩr za bɛ mɩ́ tɩ sàw bà gbɛ́r a bɛ niŋé ɩ. 3A tẽ-ŋma-kʋ̀rɩ pʋɔ nãà-lɩɛrbɛ, a tẽw nɩ-bɛrɛ nɩ a nãà sɛ-sɛbrbɛ tɩ ƴãwnɛ nɩ a Zifʋ mɩnɛ, bʋ̃ʋ n'ʋ vɛ̃, bɛ tɩ zɔrɛ nɩ a Maadose, 4a lɛn daar za a nãà nʋɔr na tɩ ɩ bɛ bãw a Maadose yúor a naalʋ-tẽw za pʋɔ a#9:4 A kan-nɛ́ɛ 5 sob bɛ ka a gɩrɛkɩ sɛbɛ pʋɔ ɩ..
6A Siizɩ tẽ-kpɛ̃ɛ pʋɔ a, a Zifʋ mɩnɛ tɩ kʋ n nɩbɛ kɔbr anũu (500). 7-10A Bugayɔsɩ dɔɔ Haman, a Hamedata bidɛb, na ɩ Zifʋ mɩnɛ dɔ̃ sob a, bɛ mɩ̀ tɩ kʋ n a ʋ bidɛbr pie: Farisanɛsɩtayin, Dɛlfon, Fasɩga, Faridata, Bareya, Sarɩbaka, Maremasim, Arufayɔsɩ, Arisayɔsɩ nɩ Zabutayɔsɩ. Al pùorí, bɛ za a bɛ bome. 11A ʋlɩ bibir tɔr za, bɛ tɩ yel'ɩ a nɩbɛ lɛ nʋɔr bɛ na kʋ a Siizɩ tẽ-kpɛ̃ɛ pʋɔ a, kʋ̀ a nãà. 12Lɛ n'a a nãà tɩ yel a Ɛsɩtɛɛr: «A Siizɩ tẽ-kpɛ̃ɛ pʋɔ tɛwr a, a Zifʋ mɩnɛ kʋ n nɩbɛ kɔbr anũu (500). A fʋ̃ʋ zie a, ŋmɩŋmɩn n'a bɛ ɩ a zi-yoru? Ɛcɛ fʋ̃ʋ cãà lɛb zɛlɩ bom a ɩ̃ zie a, ɩ̃ na ɩ na.» 13A Ɛsɩtɛɛr tɩ sɔw nɩ a nãà: «Ɩ̃ zɛlɛ fʋ na, sàw k'aa Zifʋ mɩnɛ na be a ka a, lɛb ɩ a bio mɛ̃ à à ŋá bɛ na ɩ a dɩ̃a a, ɛ́ yawlɩ a Haman bidɛbr pie a dàar zu.» 14A nãà tɩ sàw na k'aa ɩ a lɛ, ɛ́ ƴãw bɛ sɛb nʋɔr na kʋ̀ sɔ́r a Siizɩ tẽ-kpɛ̃ɛ pʋɔ Zifʋ mɩnɛ, kɛ́ bɛ yawlɩ a Haman bidɛbr kũuni a dàar zu a. 15Lɛ n'a a Siizɩ tẽ-kpɛ̃ɛ pʋɔ Zifʋ mɩnɛ tɩ lɛb ɓã taa a Adaar cuw bibie pie nɩ anaar sob: bɛ tɩ kʋ n nɩbɛ kɔbr ata (300), ɛcɛ bɛ bɛ za a bɛ bome ɩ.
16A Zifʋ mɩnɛ bɛl na tɩ kpɩɛr a naalʋ-tẽw tẽ-ŋma-kʋ̀rɩ al na cɛ a pʋɔ a, tɩ ɓã n taa kɛ́ bɛ zɛb faa bɛ tʋɔra a bɛ dɔ̃ dem zie. A Adaar cuw bibie pie nɩ ata sob, bɛ tɩ zɛb'a tʋ̃ɔ́ a bɛlɩ dem na tɩ zɛbr'ɩ bɛ a, kʋ nɩbɛ tùr-pie nɩ anũu (15 000), ɛcɛ bɛ bɛ tɩ za a bɛ bome ɩ. 17A cuw nɛ tɔr za bibie pie nɩ anaar sob, bɛ tɩ zɩ̃ na pɩ̃ɛnɩ, ɛ́ ɩ a pɩ̃ɛnʋ-bibir ŋa ɩ nʋ̃ɔ̀-kpɛ̃ɛ bibir. 18Ɛcɛ a Siizɩ tẽ-kpɛ̃ɛ pʋɔ Zifʋ mɩnɛ mɩ̀ na tɩ ɓã taa a bibie pie nɩ anaar sob kɛ́ bɛ zɛb'ɩ a bɛ dɔ̃ dem a bɛ tɩ tʋ̃ɔ́ zɩ̃ pɩ̃ɛnɩ ɛ. Lɛ n'a bɛ tɩ de a bibie pie nɩ anũu sob ʋ ɩ cuw-kpɛ̃ɛ bibir. 19Alɛ n'a so a Zifʋ mɩnɛ bɛl na kpɩɛr a naalʋ-tẽw tẽ-ŋma-kʋ̀rɩ al na zãá a pʋɔ a, mɩ́ de a Adaar cuw bibie pie nɩ anaar sob, ʋ ɩ pɩ̃ɛnʋ-bibir. Bɛ mɩ́ maal'ɩ cuw nɩ nʋ̃ɔ̀ ɛ́ tɩr bʋ̃-kʋ̀rɩ kʋ̀ taa. Ɛcɛ a bɛl na kpɩɛr a tẽ-bɛrɛ pʋɔ a mɩ́ tɛr a pɩ̃ɛnʋ-bibir a Adaar cuw bibie pie nɩ anũu sob. Bɛ mɩ̀ mɩ́ maal'ɩ cuw, tɩr'ɩ bʋ̃-kʋ̀rɩ kʋ̀ taa.
A Puurim cuw
20A Maadose tɩ sɛb'ɩ a yele á ŋá za ƴãw sɛbɛ pʋɔ tɩr kʋ̀ a Zifʋ mɩnɛ za na kpɩɛr a Artazɛrsɛsɩ naalʋ-tẽw pʋɔ a, a bɛl na zãá zãá za a, nɩ a bɛl na pɩɛlɩ a. 21Ʋ tɩ yel bɛ na kɛ́ bɛ ɩ a Adaar cuw bibie pie nɩ anaar nɩ a pie nɩ anũu sob, a ɩ cuwr bibie. 22Bʋ̃ʋ n'ʋ vɛ̃, a bibie á ŋá pʋɔ n'a a Zifʋ mɩnɛ tɩ zɛb tʋ̃ɔ́ a bɛ dɔ̃ dem. A mɩ̀ tɩ fɛr'a k'aa Zifʋ mɩnɛ de a Adaar cuw vuo za, lɛb tɩɛrɛ a bɛ faafʋ yele, a cuw ŋa vuo pʋɔ na n'a a bɛ kpɩɛrʋ tɩ lɩɛbɩ nʋ̃ɔ̀, ɛ́ a bibir nɛ bɛ nãá kone a, lɩɛbɩ cuw bibir a. A na ɩ à ŋá a, a tɩ fɛr'a kɛ́ bɛ ɩ a cuw ŋa lɩɛbɩ cuw dɩb vuo nɩ cɩlʋ vuo, bɛ cɩlɛ kʋ̀rɛ nɩ bʋ̃-kʋ̀rɩ a bɛ bárɩ nɩ a nan dem. 23A Zifʋ mɩnɛ tɩ de nɩ a sɛbɛ a Maadose na tɩ kʋ̀ bɛ a, a ɩ a bɛ vla. 24A sɛbɛ pʋɔ a, ʋ tɩ manɩ nɩ lɛ a Masedʋan dɔɔ Haman, a Hamedata bidɛb, na tɩ zɛb'ɩ bɛ a, a lɛ ʋ na tɩ sɛb ƴãw nʋɔr ɛ́ lɔb gbã-bie ƴãw bibir k'ʋʋ kʋ bɛ pàw pɛr a, 25nɩ a lɛ ʋ na tɩ cen tɩ páw a nãà k'ʋʋ ƴãw bɛ yawlɩ a Maadose a dàa zu kʋ a. Ɛcɛ a kpɩɛrʋ á ŋá za a Haman na tɩ cɔbrɩ a Zifʋ mɩnɛ ƴãw a tɩ lɛb'a lo a ʋ zu, ɛ̀ bɛ yawlɩ ʋ dàa zu, ʋlɛ nɩ a ʋ bibiir za.
26Alɛ n'a so bɛ bʋɔlɛ a gbã-bie á ŋá: «Puurim», a gbã-bie bɛ na tɩ lɔb a ƴãw. Bʋ̃ʋ n'ʋ vɛ̃, a kɔkɔr ʋl a Zifʋ mɩnɛ na tɩ ƴɛ̀rɛ a pʋɔ a, a «puurim» pɛr'ɩ «gbã-bie». A bibie á ŋá pʋɔ a, bɛ mɩ́ tɩ lɛb'a tɩɛrɛ a yele al za na manɩ a Maadose sɛb-tʋɔla pʋɔ a, nɩ a wʋ̀ʋr al za a Zifʋ mɩnɛ na tɩ nyɛ̃ a. 27A Maadose tɩ ƴãw nɩ a bibie á ŋá a ɩ cuw bibie, ɛ́ a Zifʋ mɩnɛ sàw a lɩɛbɩ tub a bɛl mɩŋa ƴãw, a bɛ bʋ̃-dɔwrɩ ƴãw, nɩ a bɛlɩ dem za na na sàw lɩɛbɩ Zifʋ a ƴãw. Bɛ tɩ ƴãw nɩ nʋɔr kɛ́ bɛ na maalɛ nɩ a bibie á ŋá cuw kʋralɛ. A nɩbɛ na dɔwr lɩɛrɛ taa a, a tẽ-ŋmãa-kʋ̀ra za pʋɔ nɩ a naalʋ-tẽw tẽ-kpɛ̃ɛ za pʋɔ, Zifʋ yir za pʋɔ a, a fɛr'a k'aa bibie á ŋá mɩ́ lɛb ɩ bɛ tɩɛrɩ a lɛ a yele na tɩ ɩ a. 28A fɛr'a kɛ́ bɛ maalɛ a Puurim bibie cuw taa bɛrɛ towtow ɛ, a fɛr'a kɛ́ bɛ tɩɛrɛ a bom nɛ na ɩ a kʋralɛ.
29A Amɩnadab pɔwyaa Ɛsɩtɛɛr, na ɩ a nãà-pɔw a, nɩ a Zifʋ dɔɔ Maadose tɩ sɛb'ɩ a lɛ za bɛ na ɩ a, kɛ́ bɛ wul k'aa sɛb-tʋɔla na càarɩ a Puurim a ɩ n sɩza#9:29 a kan-nɛ́ɛ 30 sob bɛ ka a gɩrɛkɩ sɛbɛ pʋɔ ɩ.. 31A Ɛsɩtɛɛr nɩ a Maadose mɩ̀ tɩ ƴãw nɩ a cuw ŋa a bɛl mɩŋa ƴãw, ɛ́ a nʋɔr bɛ na ƴãw a, mɩ̀ tɩ cãà ɩ a bɛ vla ƴãw. 32A lɛ a Ɛsɩtɛɛr na tɩ yel a, tɩ ɩ na a cuw ŋa lɩɛbɩ tub kʋralɛ ƴãw, al pùorí bɛ sɛb ʋ kɛ́ bɛ taa yiire ʋ bɛrɛ ɩ.
La Bible en Dagara © Alliance Biblique du Burkina Faso, 2013.