Ɛsɩtɛɛr-gɩrɛkɩ 2
2
A Ɛsɩtɛɛr lɩɛb'ɩ a nãà-pɔw
1A yele á ŋá pùorí a, a nãà Artazɛrsɛsɩ suur na wa ɓãá a, ʋ bɛ tɩ lɛb ƴãw bɛ bʋɔlɩ a Asɩtin a ʋ zie ɩ, bʋ̃ʋ n'ʋ vɛ̃, ʋ tɩ lɛb'a tɩɛrɩ a lɛ a Asɩtin na tɩ yel a, nɩ a lɛ ʋ na tɩ yel kɛ́ bɛ ɩ ʋ a. 2A nãà tõ-tõ-bi-bɛrɛ tɩ yel ʋ na: «Bɛ bɔ pɔwsɩrali na bɛ dãw gã nɩ dɛb ɛ́ pɔ̀l a, a nãà ƴãw. 3A na ɩ lɛ a, ír tõ-tõ-biir a fʋ naalʋ-tẽw tẽ-ŋma-kʋ̀rɩ za pʋɔ, bɛ tɛr a pɔwsɩrali bɛl za na pɔ̀l a, wa n a Siizɩ tẽ-kpɛ̃ɛ pʋɔ, a nãà pɔwbɛ yir pʋɔ. Bɛ na de bɛ na kʋ̀ a dɛ-vár ʋl na kaarɛ a nãà pɔwbɛ yir zie a, ɛ́ kʋ̀ bɛ a bɛ vɩɛlʋ bome. 4A pɔwsɩrale ʋl na na pɛlɩ a fʋ pʋɔ a na lɩɛb'ɩ a nãà-pɔw, lɩɛrɩ a Asɩtin.» A yã ŋa tɩ pɛlɩ nɩ a nãà pʋɔ, ʋ tu a lɛ.
5Zifʋ dɛb kãw na dɩ Maadose a, tɩ kpɩɛr'ɩ a Siizɩ tẽw pʋɔ be. Zayirɔsɩ bidɛb tɩ n'ʋ, Simeyasɩ nɩ Kisayasɩ bʋʋrɛ, ɛ́ yi Bɛ̃zamɛ dɔwlʋ pʋɔ. 6Ʋ tɩ pʋɔ nɩ a nɩ-diw-ceni bɛl pʋɔ, a Babɩlɔn tẽw nãà Nabikodonozɔɔr na tɩ diw a Zerizalɛm cen nɩ a. 7A Maadose tɩ de nɩ a ʋ sãà-yɛb, Amɩnadab, pɔwyaa. A pɔwsɩrale nɛ tɩ dɩ na kɛ́ Ɛsɩtɛɛr, a ʋ sãà mɩnɛ tɩ kpi na ɛ́ a Maadose de ʋ guoli k'ʋʋ wa tʋ̃ɔ́ kul ʋ. Ʋ tɩ sɩrɩ na pɔ̀l.
8Bɛ na wa mʋɔlɩ a lɛ a nãà na yel a, bɛ tɩ wa n nɩ pɔwsɩrali yaga wa ɓã taa a Siizɩ tẽ-kpɛ̃ɛ pʋɔ, ƴãw a Gaɩ na kaarɛ a nãà yir pɔwbɛ zie a, ʋ kaarɛ a bɛ zie. A Ɛsɩtɛɛr tɩ pʋɔ nɩ a bɛ pʋɔ. 9A Ɛsɩtɛɛr tɩ pɛlɩ nɩ a Gaɩ pʋɔ yaga za, ʋ wul ʋ a ʋ pʋ-pɩɛlʋ. Ʋ tɩ kʋ̀ ʋ nɩ a ʋ vɩɛlʋ bome daadaalɛ nɩ a ʋ bʋ̃-dɩrɩ. Ʋ tɩ kaa na ír a pɔwbɛ na tone a nãà yir pʋɔ a tõ-tõ-bi-pɔwli ayopõi kʋ̀ ʋ. A nãà-pɔwbɛ yir pʋɔ be a, ʋ tɩ sʋ̃ɔm'a bul kaa a Ɛsɩtɛɛr nɩ a ʋ tõ-tõ-bi-pɔwli zie vla. 10A Ɛsɩtɛɛr bɛ tɩ wul k'ʋʋ ɩ n Zifʋ ɛ, bʋ̃ʋ n'ʋ vɛ̃, a Maadose tɩ diw ʋ na bɛr k'ʋʋ taa yere ɩ. 11Bibir za, a Maadose mɩ́ tɩ cere na tɔlɛ a pɔwbɛ yir davʋra niŋé, k'ʋʋ bãw bom nɛ na na ɩ a Ɛsɩtɛɛr a.
12Yũon-ɓil'ʋ a tɩ fɛr k'aa pɔwsɩrali, na be a pɔwbɛ yir a, tu a vɩɛlʋ páwfʋ tub bɛ na ƴãw kʋ̀ bɛ a: a cuwr ayʋɔb na de niwn a, bɛ tɩ zɩɛr'ɩ mɩ́ɩ̀r kãa-nyũu, ɛ́ a cuwr ayʋɔb na tu a, bɛ zɩɛr tʋrali nɩ a pɔwbɛ vɩɛlʋ bome a mɩnɛ. Al pùorí, pɔwsɩrale za mɩ́ tɩ tɛr'ɩ a ʋ bibir ʋ na na cen a nãà Artazɛrsɛsɩ zie a. 13Lɛ n'a pɔwsɩrale za mɩ́ tɩ cen a nãà zie. A nãà mɩ́ tɩ ƴãw nɩ nɩr tɛr ʋ yi n a pɔwbɛ yir tɩ ta n a nãà yir. 14Ʋ mɩ́ tɩ cen nɩ a nãà zie a zaanʋɔra, ɛ́ a biɓaara ʋ lɛb wa a pɔwbɛ yie ayi sob pʋɔ. A nãà dɛ-vár Gaɩ n'ʋ tɩ kaarɛ a yir ŋa zie. A pɔwsɩrale bɛ mɩ́ tɩ lɛb cen a nãà zie, a bɛ ɩ a nãà n'ʋ bɔbr ʋ, ƴãw bɛ tɩ sʋ̃ɔmɩ bʋɔlɩ ʋ ɛ.
15Bibir kãw, a Amɩnadab pɔwyaa, Ɛsɩtɛɛr, na ɩ a Maadose sãà-yɛb pɔwyaa a, tɩ cɔbr'a baarɩ na tʋ̃ɔ́ cen a nãà zie. A lɛ za a dɛ-vár na kaarɛ a nãà yir pɔwbɛ zie na tɩ wul ʋ a, ʋ bɛ tɩ zawrɩ been kãw za bɛr ɛ, ʋ tɩ tu n a za. A bɛlɩ dem za na tɩ nyɛrɛ a Ɛsɩtɛɛr a, a bɛ pʋɔ mɩ́ tɩ pɛlɩ nɩ a ʋ ƴãw. 16A nãà Artazɛrsɛsɩ naalʋ-dɩb yome ayopõi sob daar'a a Ɛsɩtɛɛr tɩ cen a nãà zie, a cuwr pie nɩ ayi sob daar, a pɛr lɛ k'aa Adaar cuw daar. 17A nãà tɩ kpi na lo a Ɛsɩtɛɛr ƴãw, ɛ́ a pɔwsɩrali za pʋɔ a, ʋlɛ n'ʋ tɩ pɛlɩ a ʋ pʋɔ. Ʋ tɩ vɔblɩ ʋ nɩ a nãà-pɔw kpawʋɔ. 18A Ɛsɩtɛɛr kulu ƴãw a, a nãà tɩ cɔbr'ɩ da-ɓil cuw-kpɛ̃ɛ dɩb, bʋɔlɩ a ʋ bárɩ#2:18 Bárɩ: Nyɛ̃ 1.2-3. za nɩ a nɩ-tɩbr tɩbr za. Ʋ tɩ ír'ɩ a zuru-yar bɛr a ʋ naalʋ-tẽw nɩbɛ za zie.
19A Maadose tɩ tɛr'ɩ tõ-nʋɔr a nãà yir pʋɔ a lɛn daar. 20A Ɛsɩtɛɛr mɩ̀ bɛ tɩ yel k'ʋʋ ɩ n Zifʋ ɛ. A Maadose tɩ yel ʋ na k'ʋʋ taa yere ɩ, ɛ́ yel ʋ k'ʋʋ vʋʋrɛ mɛ̃ a lɛ ʋ na tɩ vʋʋrɛ a lɛn daar ʋ na tɩ be a ʋ zie a, k'ʋʋ sàwr a Naaŋmɩn pʋ-tɩɛrʋ, ɛ́ tuur a ʋ nɛ-ƴãwnɩ. Lɛ tɔr za n'a a Ɛsɩtɛɛr tɩ ɩ, ʋ bɛ lɩɛbɩ a ʋ ɩb ɛ.
A Maadose wõ n nɩbɛ na bʋ taa a nãà kʋb ƴãw a
21Bɛ tɩ zɛw nɩ a Maadose a ʋ tome pʋɔ. Lɛ n'a a dɛ-vaɩ ayi bɛl na tɩ ɩ a sojarɩ bɛl na gùre a nãà a nɩ-bɛrɛ a suur tɩ ìr. Bɛ tɩ bʋ n taa kɛ́ bɛ kʋ a nãà Artazɛrsɛsɩ. 22A Maadose tɩ wõ n a yel, yel kʋ̀ a Ɛsɩtɛɛr, ʋ mɩ̀ manɩ a bʋ-taa ŋa pɔ̀lɛ́ kʋ̀ a nãà. 23A nãà tɩ sowr'ɩ a dɛ-vaɩ ayi bɛl, ɛ́ ƴãw bɛ yawlɩ bɛ dàa zu. Al pùorí ʋ ƴãw bɛ sɛb a yele á ŋá ƴãw a naalʋ-tẽw Yele-sɛbɛ pʋɔ, a Maadose ƴãwfʋ ƴãw nɩ k'aa nɩbɛ cãà bãwnɩ a ʋ ɩ-vɩɛlɩ.
La Bible en Dagara © Alliance Biblique du Burkina Faso, 2013.