Wulu-ayi-sob 6
6
«Fʋ na nɔnɛ nɩ a Sore fʋ Naaŋmɩn»
1Nyɛ̃ a nɛ-ƴãwnɩ, a wulu nɩ a tub a Sore nyɩ Naaŋmɩn na yel k'ɩ̃ɩ wul nyɩ, kɛ̀ nyɩ tɩ tuur a tẽw nyɩ na kʋ̃ yaa kɛ́ de so a pʋɔ a. 2À ŋá n'a a nyɩ cãafʋ daar za nyɩ na zɔrɛ a Sore nyɩ Naaŋmɩn, nyɩmɛ nɩ a nyɩ bʋʋrɛ. A nyɩ nyɔ-vʋʋrʋ na wõwme na nyɩmɛ wa sàwr a wulu á ŋá nɩ a nɛ-ƴãwnɩ á ŋá ɩ̃ na kʋ̀rɛ nyɩ a. 3Ɩsɩrayɛl nɩbɛ ɛ, nyɩ bɛrɛ wone a nɛ-ƴãwnɩ á ŋá, ɛ́ ƴãw fãw tuur a. Lɛ n'a nyɩ na wone nʋ̃ɔ̀, ɛ́ yɛ̀r ɩ nɩ-bʋʋr-yaga yaga a tẽw ŋa bʋ̀rʋ nɩ sɩwr na gbɔlɛ a pʋɔ, mɛ̃ a lɛ a Sore, a nyɩ sãàkʋm-kore Naaŋmɩn, na yel kʋ̀ nyɩ a.
4«Nyɩ wone, Ɩsɩrayɛl bʋʋrɛ ɛ, a Sore tɩ Naaŋmɩn n'ɩ a Sore been yõ#6:4 Nyɛ̃ Sɔr-n 15.37 nɩ Mark 12.29.. 5Fʋ na nɔnɛ nɩ a Sore fʋ Naaŋmɩn nɩ a fʋ pʋɔ za, nɩ a fʋ sɩ́ɛ za, nɩ a fʋ fãw za#6:5 Nyɛ̃ Mat 22.37, Mark 12.30, Luk 10.27.. 6A nɛ-ƴãwnɩ ɩ̃ na kʋ̀rɛ fʋ a dɩ̃a a na be n a fʋ pʋ̃ɔmɩ. 7Fʋ na zanɩ nɩ a nɩ a fʋ bibiir, fʋ na ƴɛ̀rɛ nɩ a ƴɛ̀rʋ a bɛ zie, a lɛn daar fʋ na zɩ̃ a fʋ yir a, bɩɩ fʋ na cere a sɔ́r zu a, a lɛn daar fʋ na gã bɩɩ fʋ na ìr a. 8Fʋ na 'lẽ a na ƴãw a fʋ kpãkpãw ƴãw nɩ a fʋ gbẽé taa yiire a bɛrɛ ɩ. 9Fʋ na sɛb a na ƴãw a fʋ yir dɩ̃dɔ-mimir dàar ƴãw, nɩ a fʋ tẽ-bɛrɛ dɩ̃dɛɛ ƴãw.»
A bɛ tɛr k'aa Ɩsɩrayɛl yiiri a ʋ Naaŋmɩn bɛr ɛ
10A Sore nyɩ Naaŋmɩn wa tɛr nyɩ kpɛ n a tẽw ʋ na kʋ̀rɛ nyɩ a pʋɔ, mɛ̃ a lɛ ʋ na tɩ pɔ a nyɩ sãàkʋm-kore Abraham, Ɩzaakɩ nɩ Zakɔb zie a, nyɩ na tɩ nyɛ̃ nɩ a be tẽ-bɛrɛ vɩɛlɩ nyɩ na bɛ mɛ a, 11yie na paalɩ bʋ̃-vɩɛlɩ bʋʋrɛ za nyɩ na bɛ ƴãw a. Nyɩ na tɩ nyɛ̃ nɩ a be buli nyɩ na bɛ tuw a, divɛ̃ tɩɩr nɩ olivʋ tɩɩr nyɩ na bɛ sɛl a. Nyɩmɛ wa dɩ tɩw baar a, 12nyɩɩm gù vla a lɛn daar taa yiire a Sore bɛrɛ ɩ, ʋl na ɩ nyɩ yi a Eziptɩ tẽw, a be nyɩ na tɩ ɩ gbãgbaar a. 13Nyɩ na zɔrɛ nɩ a Sore nyɩ Naaŋmɩn, ʋl yõ n'ʋ nyɩ na mɩ́ lo gbĩ dume puori#6:13 Nyɛ̃ Mat 4:10, Luk 4:8., ʋl yõ yúor'ʋ nyɩ na mɩ́ pɔ n. 14Nyɩ kʋ̃ tuur ŋmɩn-yoru pùor ɛ, a nɩ-bʋʋrɛ na na jil koli nyɩ a ŋmɩmɛ. 15Bʋ̃ʋ n'ʋ vɛ̃, a Sore nyɩ Naaŋmɩn na be a nyɩ sɔgɔ a ɩ n Naaŋmɩn na kpɛ nyuur#6:15 Naaŋmɩn na kpɛ nyuur a: Nyɛ̃ 4.24 nɩ a manʋ. a. Nyɩ gù vla taa damnɛ a ʋ suur ɛ, ʋ nãà mab'a ɩ nyɩ kpi pàw pɛr a tẽw zu. 16Nyɩ taa ɩrɛ a Sore nyɩ Naaŋmɩn kaar mɛ̃ a lɛ nyɩ na tɩ ɩ a Masa#6:16 Masa: Nyɛ̃ Ety 17:1-7. a ɩ. 17A nɛ-ƴãwnɩ, a fɛrʋ nɩ a wulu a Sore nyɩ Naaŋmɩn na kʋ̀ nyɩ a, nyɩ sàwr a vla vla. 18Nyɩ ɩrɛ a lɛ na tu sɔ́r a, nyɩ ɩrɛ a lɛ na pɛlɩ a Sore pʋɔ a. A lɛn daar a, nyɩ na wone nɩ nʋ̃ɔ̀, ɛ́ nyɩ na tʋ̃ɔ́ na so a tẽ-vla a Sore na pɔ yel k'ʋʋ na kʋ̀ n a nyɩ sãàkʋm-kore a. 19Nyɩ na diw nɩ a nyɩ dɔ̃ dem za bɛr zi-zãána mɛ̃ a lɛ a Sore na yel a.
20Nɩdaar kãw a, a nyɩ bibiir na sowre nyɩ na: «Bʋnʋ ƴãw n'a a Sore tɩ Naaŋmɩn kʋ̀ nyɩ a fɛrʋ, a wulu, nɩ a tub á ŋá?» 21Nyɩ na sɔw bɛ na: «Tɩ tɩ ɩ n a Faarawɔ̃ gbãgbaar a Eziptɩ, ɛcɛ a Sore tɩ Naaŋmɩn ɩ n nɩ a ʋ fãw na bɛ tɛr tʋ̃ɔ́fʋ a tɩ yi a be. 22A Sore tɩ maal'ɩ yel-bɛ-dãw-nyɛrɩ nɩ nɔ-ɓãa-yele a tɩ niŋé. À à ŋá n'a ʋ tɩ ɩ dɔwrʋ páw a Faarawɔ̃, a ʋ yir dem nɩ a ʋ tẽw dem za. 23A tɩɩm a, ʋ ɩ na tɩ yi a Eziptɩ, k'ʋʋ tɛr tɩ cen nɩ a tẽw ʋ na bɔbr k'ʋʋ kʋ̀ tɩ a pʋɔ, mɛ̃ a lɛ ʋ na tɩ pɔ yel kʋ̀ a tɩ sãàkʋm-kore a. 24A Sore yel'a kʋ̀ tɩ kɛ́ tɩ sàwr a wulu á ŋá za, ɛ́ zɔrɛ ʋ. Lɛ n'a tɩ na wone nʋ̃ɔ̀ kʋralɛ, ʋʋ bɛr tɩ tɩ vʋʋrɛ, mɛ̃ à à ŋá a na ŋmɛ̃ tɩ a dɩ̃a a. 25Tɩmɛ wa maal tɛr ɛ́ tuur a nɛ-ƴãwnɩ á ŋá za a Sore niŋé mɛ̃ a lɛ ʋ na yel kʋ̀ tɩ a, tɩ na ɩ n nɩ-mɩn.»
Currently Selected:
Wulu-ayi-sob 6: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
