Wulu-ayi-sob 17

1Náab bɩɩ pɛ́rʋ a ƴã-gan zie kãw na bɛ maal ɩ a, nyɩ kʋ̃ maal'ɩ ʋ bàwr kʋ̀ a Sore nyɩ Naaŋmɩn ɛ. Bʋ̃ʋ n'ʋ vɛ̃, ɩ-faa na bɛ maal'ɩ wob a n'ɩ à ŋá a Sore nyɩ Naaŋmɩn zie.

2Kapaw bibir kãw, a tẽ-bɛrɛ a Sore nyɩ Naaŋmɩn na kʋ̀rɛ nyɩ a kãw pʋɔ a, dɛb bɩɩ pɔw na ɩ n bom na bɛ pɛlɩ a Sore pʋɔ a, ʋ kʋ̃ tu a wõ-taa a Sore na maal'ɩ nyɩ a pùor ɛ: 3ʋ na cen na tɩ maalɛ ŋmɩn-yoru, ɛ́ gbine dume a niŋé, ɛ́ gbine dume a mʋ̃tɔ̃w, a cuw nɩ a saa-zu bʋ̃-nyɩwrɩ niŋé. — A Sore bɛ dãw yel kɛ́ nyɩ ɩrɛ à à ŋá towtow ɛ! — 4Nyɩmɛ wa wõ bɛ ƴɛ̀rɛ a yel ŋa tɔ ƴɛ̀rʋ a, nyɩ na sowri sowri nɩ vla kaa. Nyɩmɛ wa nyɛ̃ a yel-faa ŋa na bɛ maal'ɩ wob ʋ sɩrɩ maalɩ a Ɩsɩrayɛl tẽw pʋɔ a, 5nyɩ na tɛr'ɩ a sãwna sob, dɛb bɩɩ pɔw, cen nɩ a tẽ-kpɛ̃ɛ dɩ̃dɔrɩ́ tɩ lɔb'ɩ ʋ kʋsɛbɛ kʋ.

6Dãsɩɛ dem ayi bɩɩ ata dãsɩɛ-dɩb zũú n'a bɛ na mɩ́ kʋ a sob nɛ a na sɛw k'ʋʋ kpi a. Bɛ bɛ kʋrɛ ʋ dãsɩ-been sob yõ dãsɩɛ-dɩb zũú ɛ. 7A dãsɩɛ dem nɛbɛ na mɩ́ de niwn lɔb'ɩ ʋ a kʋsɛbɛ, a ʋ kʋb ƴãw, ɛ́ a nɩbɛ za pãa tu. Nyɩ na ír'ɩ a faalʋ bɛr à à ŋá a nyɩ sɔgɔ.

A ƴɛ̀rʋ al na dɩrɛ a zi-sõw pʋɔ a

8Bɛlɛ wa dɩ ƴɛ̀rʋ kpáa nɩr kʋb ƴãw, ŋmɩɛrʋ na yi bàalʋ a ƴãw, bɩɩ taw-taa yel kãw za ƴãw, a ƴɛ̀rʋ-dɩb zie kãw a, nyɩ na cen nɩ a zie ʋl a Sore na na kaa ír a. 9Nyɩ na cen na tɩ páw a levitɩ mɩnɛ bɛl na ɩ bàwr-maalbɛ#17:9 Levitɩ mɩnɛ bɛl na ɩ bàwr-maalbɛ a: À à ŋá n'a bɛ tɩ bʋɔlɛ a Levi bʋʋrɛ bɛl na tɩ tone a zi-sõw pʋɔ a, kɛ́ bɛ tʋ̃ɔ́ mɩ́ bãw bɛ owri nɩ a levitɩ mɩnɛ bɛl na yaarɩ be a tẽw pʋɔ a. a, nɩ a ƴɛ̀r-dɩrɛ ʋl na n'ʋ tone a lɛn daar a. Bɛ na wul nyɩ nɩ a lɛ nyɩ na na dɩ a ƴɛ̀rʋ a yel ŋa ƴãw a. 10Nyɩ na tu n a lɛ bɛ na dɩ a ƴɛ̀rʋ bin, ɛ́ yel a zie ʋl a Sore na na kaa ír a kʋ̀ nyɩ. Nyɩ na ƴãw nɩ fãw tu a lɛ bɛ na yel kʋ̀ nyɩ a. 11Nyɩ na tu n a lɛ bɛ na yel kʋ̀ nyɩ a, a lɛ bɛ na dɩ a ƴɛ̀rʋ bin a, nyɩ bɛ bɛrɛ bom kãw za ɩ. 12Ɛcɛ nɩr wa ɩ pɔ̀l-ɩb bɛ bɛr wõ a bàwr-maalɛ na tone a Sore nyɩ Naaŋmɩn niŋé a, bɛ bɛr wõ a ƴɛ̀r-dɩrɛ a, a fɛr'a k'aa nɩr ŋa kpi. Nyɩ na ír'ɩ a yel-faa bɛr à à ŋá a Ɩsɩrayɛl nɩbɛ sɔgɔ. 13A nɩbɛ za na wõ n a yel ŋa, bɛ na zɔrɛ nɩ dɛ̃bɩ̃ɛ, ɛ́ nɩr za bɛ lɛb sàwr ɩrɛ pɔ̀l-ɩb ɛ.

A tub na càarɩ a nãà a

14Nyɩmɛ wa kpɛ a tẽw a Sore nyɩ Naaŋmɩn na na kʋ̀ nyɩ a pʋɔ a, nyɩmɛ wa de ʋ so ʋ, ɛ́ zɩ̃ a ʋ pʋɔ baar'a, kapaw nyɩ na yel'ɩ à ŋá: «Tɩ bɔbr'ɩ nãà k'ʋʋ dɩrɛ naalʋ a tɩ zu, mɛ̃ a nɩ-bʋʋrɛ za na jil koli tɩ a.» 15A lɛn daar a, nyɩ na de nɩ a nɩr ʋl, a Sore nyɩ Naaŋmɩn mɩŋa na na kaa ír a, ʋ ɩ a nãà. Ʋ na ɩ n Ɩsɩrayɛl nɩr, nyɩ bɛ sàwr nɩ-sãan ɩrɛ a nãà ɩ, nɩr na bɛ ɩ a nyɩ bʋʋrɛ nɩr a ɩ. 16A nyɩ nãà a, ʋ ta tɛr wie yaga ɩ, ʋ mɩ̀ ta tõ nɩbɛ a Eziptɩ bɛ tɩ dà a ɩ. Bʋ̃ʋ n'ʋ vɛ̃, a Sore yel nyɩ na: «Towtow, nyɩ bɛ lɛbr cere a tẽw ŋa pʋɔ ɩ!» 17Ʋ mɩ̀ ta tɛr pɔw-yaga ɩ, a na ɩ na a ʋ socir bɛ cãà tu a Naaŋmɩn ɛ. Ʋ ta tɛr salm-pla nɩ salm-zɩɛ zuo ɩ.

18Ʋlɛ wa zɩ̃ a naalʋ-dà-kɔw zu baar'a, ʋ na ƴãw na bɛ lɛb sɛb a wulu#17:18 Wulu ŋa: A ƴɛ̀r-bie na be a kan-nɛ́ɛ 14 sob tɩ tɔ a 17 sob a n'a. Ʋlɛ mɩ̀ cãà n'ɩ a wulu na be a kan-zuru 12 sob tɩ tɔ a kan-zuru 26 sob a. A ƴɛ̀r-bie á ŋá n'a mɩ̀ cãà lɛb wa n'ɩ a sɛbɛ ŋa yúor: Wulu-ayi-sob. ŋa a levitɩ mɩnɛ bɛl na ɩ bàwr-maalbɛ a na tɩ maal bin a ƴãw sɛbɛ pʋɔ kʋ̀ ʋ. 19Ʋ na be n a ʋ zie, ʋ kanɛ ʋ a ʋ nyɔ-vʋʋrʋ bibie za. À ŋá n'a ʋ na bãw a Sore ʋ Naaŋmɩn zɔba. Ʋ na ƴãw nɩ fãw sàwr a wulu ŋa ƴɛ̀r-bie nɩ a ʋ tub kʋralɛ. 20À ŋá n'a ʋ kʋ̃ tɩɛrɛ k'ʋʋ zuo nɩ a ʋ bʋʋrɛ nɩbɛ ɩ, ɛ́ kʋ̃ mɩ́ gãw nɔ-ƴãwna cãpile kãw za bɛr towtow ɛ. Lɛ n'a ʋlɛ nɩ a ʋ bʋʋrɛ na dɩ naalʋ cɛlɩ a Ɩsɩrayɛl nɩbɛ zu.

Currently Selected:

Wulu-ayi-sob 17: DBDC

Highlight

Compare

Copy