2 Samɩɛl 23
23
A Daviir ƴɛ̀r-pɛ-baara
1Nyɛ̃ a Daviir ƴɛ̀r-pɛ-baara:
Nyɩ bɛrɛ wone
a Zese bidɛb Daviir ƴɛ̀rʋ,
a nɩr nɛ bɛ na zɛw ʋ do saa
bɛ dɩ vuo a ƴɛ̀rʋ,
a Zakɔb Naaŋmɩn nɩ-kabra,
nɩ a sob ʋl a Ɩsɩrayɛl nɩbɛ
na nɔnɛ a bɛ yielu pʋɔ a:
2Mãa zie n'a
a Sore Vʋʋrʋ mɩ́ tu ƴɛ̀rɛ,
a ʋ ƴɛ̀rʋ be n a ɩ̃ nʋɔrɩ́.
3A Ɩsɩrayɛl Naaŋmɩn ƴɛ̀r'a,
a Sob nɛ na piw a Ɩsɩrayɛl tɛr a
yel mɛ̃ na:
«A nãà ʋl na kaarɛ
a nɩbɛ nɩ mɩnʋ,
ɛ́ sàwr a Naaŋmɩn nʋɔr
a ʋ nɩbɛ kaafʋ pʋɔ a,
4ŋmɛ̃ na mɛ̃ mʋ̃tɔ̃w
na pur caalɩ
biɓaara salom
na bɛ tɛr zũzuge a.
A saa wa wa yʋɔ a,
a mʋ̃tɔ̃w tʋlʋ
mɩ́ ɩ na a mɔ̃-ɓaar bul
yi pàw a tẽw.»
5Nyɛ̃ a lɛ a Naaŋmɩn
na ɩ a ɩ̃ yir ƴãw a:
ʋ bin nɩ wõ-taa
na bɛ tɛr baarʋ a,
mãa nɩ a ʋl cará,
ʋ bin ʋ na nɩ tub na gù ʋ a.
A yele za pʋɔ a,
ʋ mɩ́ ɩ na ɩ̃ zɛb tʋ̃ɔ́,
ʋ mɩ́ maal'ɩ a ɩ̃ pʋ-tɩɛrʋ.
6Ɛcɛ a nɩ-bɛ-tɛr-bir mɩnɛ za,
ɩ na mɛ̃ wuli na tɛr gʋʋr
bɛ na mɩ́ lɔb bɛr a.
Nɩr bɛ nyɔwr a nɩ nũ-zawla ɩ.
7Nɩr wa tʋɔr a a,
kure bom bɩɩ kafin dàa n'ʋ
ʋ mɩ́ tɛr,
ʋʋ mɩ́ nyɩw nɩ a za bɛr a be,
daadaalɛ.
A Daviir zɛbr-nɩbɛ
(Nyɛ̃ 1Bi-yel 11:10-47)
8A Daviir soja-gãdaar yée n'ɩ à á ŋá:
A Takemonitɩ dɔɔ, Ɩsɩbaal, tɩ pʋɔ nɩ a sojarɩ bɛl na gùre a Daviir ɛ́ bɛ tɛr bɛ tɔ a pʋɔ. Bɛ mɩ̀ tɩ bʋɔlɛ ʋ na kɛ́ Ɛsɩnitɩ dɔɔ, Adino, ʋlɛ n'ʋ tɩ kʋ nɩbɛ kɔbr ani (800) zɛbr been pʋɔ.
9Dodo bidɛb, Eleazaar, na ɩ Ahowa tẽw nɩr kãw yãw a n'ʋ tɩ tu a Ɩsɩbaal zu. A lɛn daar bɛ na tɩ pɔrɛ ciere nɩ a Filisɩtɛ̃ mɩnɛ na tɩ ɓã taa a zɛbr ƴãw a, ʋ tɩ pʋɔ nɩ a gãdaar ata bɛl na tɩ bɩɛlɛ a Daviir a pʋɔ. A Ɩsɩrayɛl zɛbr-nɩbɛ tɩ lɩɛb'a zɔ, 10ɛcɛ a Eleazaar tɩ ba n gbɛ́r, ɛ́ kʋ Filisɩtɛ̃ mɩnɛ lɛɛɛ a nũu tɩ bàl kpi mɛr a zɛbr-sɔ-kpɛ̃ɛ nyɔwfʋ zie. A Sore tɩ ɩ na a Ɩsɩrayɛl nɩbɛ zɛb tʋ̃ɔ́ pẽlẽpẽlẽ a ʋlɩ bibir nɛ. A sojarɩ tɩ lɩɛb'a wa a Eleazaar zie a pùorí, ɛ́ a ɩ a nɩbɛ na kpi a bome deb tɛwr ƴãw.
11Haraar tẽw Age bidɛb, Sama, n'ʋ tu a Eleazaar zu. A Filisɩtɛ̃ mɩnɛ tɩ ɓã n taa Lehi. Puo kãw tɩ be n a be, ɩ bɛ̃w-bʋʋrɛ kãw bɛ na bʋɔlɛ lãtɩɩ a tɛwr. A Ɩsɩrayɛl zɛbr-nɩbɛ tɩ lɩɛb'a zɔ a Filisɩtɛ̃ mɩnɛ niŋé. 12Ɛcɛ a Sama tɩ àr'ɩ a púo sɔwlɩsɔw, lɛb de a púo, ɛ́ zɛb tʋ̃ɔ́ a Filisɩtɛ̃ mɩnɛ. À ŋá n'a a Sore tɩ ɩ a Ɩsɩrayɛl zɛb tʋ̃ɔ́ pẽlẽpẽlẽ.
13Bibir kãw, a ble deb daar, soja-gãdaar ata kãw tɩ cen na tɩ páw a Daviir a Adulam#23:13 Nyɛ̃ 1Sa 22.1. tãw bɔw pɛr. Filisɩtɛ̃ mɩnɛ tɩ be n a Erefayitɩ mɩnɛ fʋɔla pʋɔ. 14A Daviir tɩ be n a ʋ sɔwlʋ zie, ɛ́ Filisɩtɛ̃ bɛ mɩnɛ tɩ be a Bɛtɩlɛm. 15Bɛ wa bere na a Daviir háa nʋɔr yel a ʋ bʋ̃-bɔbra à ŋá: «Ãa n'ʋ pãa na wa n a Bɛtɩlɛm tẽw dɩ̃dɔr nʋɔr sa-bie-kʋ̃ɔ-bɔw kʋ̃ɔ wa kʋ̀ m ɩ̃ nyũ a?» 16Lɛ n'a a gãdaar ata bɛl tɩ tʋ̃ɔ́ ŋmʋr kpɛ a Filisɩtɛ̃ mɩnɛ laɩ pʋɔ, 'wɔ̃w a kʋ̃ɔ a Bɛtɩlɛm dɩ̃dɔr nʋɔr sa-bie-kʋ̃ɔ-bɔw pʋɔ, wa n wa kʋ̀ a Daviir. Ɛcɛ ʋ bɛ tɩ sàw na nyũ a ɩ. Ʋ tɩ cir a na bɛr tẽw, de kʋ̀ a Sore, 17ɛ́ yel à ŋá: «Sore e, ɩ̃ bɛ tɛr sɔ́r na nyũ a kʋ̃ɔ á ŋá ɩ! A ɩ na mɛ̃ a nɩbɛ bɛ ŋa na cen tɩ 'wɔ̃w a a zɩ̃ɩ tɔr za a, bɛl na tɩ cɛ kũu-pire a!» Ɛ́ tɩ zawrɩ a nyub.
A soja-gãdaar ata bɛ ŋa gãda-ton n'ɩ à ŋà.
18Avɩsaɩ na ɩ a Zowab yɛb, ɛ́ a bɛ mã dɩ kɛ́ Seruya a, tɩ pʋɔ nɩ a soja-yée bɛl na gùre a Daviir a pʋɔ. Ʋlɛ n'ʋ tɩ ìr bibir kãw ɓáw a ʋ kafin dɔ̃ dem kɔbr ata (300) ƴãw, kʋ bɛ. Lɛ n'a ʋ tɩ ɩ a ʋ yúor yi man a “Nɩbɛ ata bɛl na ɓã taa a” yúor. 19A “Nɩbɛ lɩzɛr'ɩ pie na ɓã taa a” pʋɔ a, a ʋ yúor mɩ̀ tɩ yi n yaga, mɔ̃ mɩ̀, ʋ wa ɩ n a bɛ nɩ-kpɛ̃ɛ, ɛcɛ ʋ bɛ tɩ dãw pʋɔ a “Nɩbɛ ata bɛl na ɓã taa a” pʋɔ ɩ.
20Yehoyada bidɛb, Benaya, na yi Kaviseyɛl a, tɩ tõ n gãda-tome yaga. A ʋ sãàkʋm tɩ ɩ n soja-gãdaa. A Benaya n'ʋ tɩ kʋ a Mowab tẽw Arɩɛl mɩnɛ ayi. Ʋlɛ mɩ̀ cãà n'ʋ tɩ siw sa-bie-kʋ̃ɔ-bɔw pʋɔ kʋ gbẽw, bibir kãw sa-pupure na tɩ lore a. 21Ʋlɛ mɩ̀ cãà n'ʋ tɩ kʋ Eziptɩ tẽw nɩr kãw na bɛ tɩ dɩ vuo, ɛ́ tɛr kafin a: dabɔl'ʋ ʋ tɩ tɛr zɛbr'ɩ a Eziptɩ tẽw nɩr, faa a ʋ kafin a ʋ nũú, kʋ n ʋ. 22A Benaya gãda-tome n'ɩ à á ŋá ʋ na tõ nyɛ̃ yúor man a “Nɩbɛ ata bɛl na ɓã taa a” yúor. 23A “Nɩbɛ lɩzɛr'ɩ pie na ɓã taa a” pʋɔ a, a ʋ yúor mɩ̀ tɩ yi n yaga, ɛcɛ ʋ bɛ tɩ pʋɔ a «a nɩbɛ ata na ɓã taa a» pʋɔ ɩ. A Daviir tɩ ƴãw na ʋ ɩ a sojarɩ na gùre ʋ a nɩ-kpɛ̃ɛ.
24Nɩbɛ bɛ ŋa nɛbɛ tɩ pʋɔ a «Nɩbɛ lɩzɛr'ɩ pie na ɓã taa a» pʋɔ: Zowab yɛb Asayɛl, Bɛtɩlɛm tẽw Dodo bidɛb Ɛlhanan, 25Harɔdɩ tẽw Sama nɩ Elika, 26Palti tẽw Helɛsɩ, Tekowa tẽw Ɩkɛsɩ bidɛb Ɩɩra, 27Anatɔtɩ tẽw Aviezɛɛr, Husa tẽw Mevunaɩ, 28Ahowa tẽw Salmon, Netofa tẽw Maraɩ, 29Netofa tẽw Baana bidɛb Helɛvʋ, Givea tẽw Irivaɩ bidɛb Ɩtaɩ, a Bɛ̃zamɛ tẽw pʋɔ, 30Pireaton tẽw Benaya, Gaasɩ bà-fʋɔlɩ tẽw Hidaɩ, 31Bɛtɩ-Araba tẽw Avɩ-alvon, Bahurim tẽw Azɩmawɛtɩ, 32Saalvon tẽw Eliyaba. A Yasɛn bidɛbr: Yehonatan, 33Haraar tẽw Sama, Araar tẽw Saraar bidɛb Ahiyam, 34Ahasɩbaɩ bidɛb Elifelɛtɩ na ɩ Maaka tẽw nɩr kãw yãw a, Gilo tẽw Ahitofɛl bidɛb Eliyam, 35Karmɛl tẽw Hɛsɩraɩ, Arabʋ tẽw Paaraɩ, 36Sova tẽw Natan bidɛb Yigeyal, Gadɩ tẽw Bani, 37Amɔ̃ tẽw dɔɔ Sɛlɛkɩ, Beerɔtɩ tẽw Naraɩ na mɩ́ tɩ tɛr a Zowab, a mã na tɩ dɩ kɛ́ Seruya a, zɛbr bome a, 38Ɩɩra nɩ Garɛvʋ na yi Yetɛɛr yir a, 39nɩ a Hititɩ dɔɔ Uuri. Bɛ za tɩ ɓã n taa ɩ nɩbɛ lɩzɛr'ɩ pie nɩ ayopõi.
La Bible en Dagara © Alliance Biblique du Burkina Faso, 2013.