2 Samɩɛl 22
22
A Daviir puore nɩ a Naaŋmɩn yãanɩ, ʋ na zɛb tʋ̃ɔ́ a ƴãw
(Nyɛ̃ Ssy 18)
1A Daviir tɩ yiel'ɩ yielu ŋa a Sore ƴãw, a ʋlɩ bibir a Sore na tɩ faa ʋ a ʋ dɔ̃ dem nɩ a Sawul nuru pʋɔ a:
2A Sore ɩ n pìir a ɩ̃ zie,
a ɩ̃ zɛbr-yir-kpɛ̃w na gù m a, a ɩ̃ faarɛ.
3A ɩ̃ Naaŋmɩn ɩ n pìir,
ɩ̃ na mɩ́ taw lanɩ a yel-faa daar a,
Zɛbr-kur-pãgala
na mɩ́ piw mɛ̃ a,
zɛbr-yir-kpɛ̃w pʋɔ
ɩ̃ na mɩ́ nyɛ̃ faafʋ a.
Ʋl zie n'a ɩ̃ mɩ́ sɔwlɩ,
a po-to-fãw dem
bɛ tʋ̃ɔ́ páw mɛ̃ ɩ.
4A Sore, ʋ tɛr danʋ!
Mãa wa bʋɔlɛ ʋ wa báarɛ a,
ʋ mɩ́ faa mɛ̃ nɩ
a ɩ̃ dɔ̃ dem nuru pʋɔ.
5A kũu kʋ̃ɔ-mie
tɩ pili na pàw mɛ̃,
a kũu tɩ ƴãw mɛ̃ nɩ pʋl-vʋ̃ɔ
mɛ̃ man na mɩ́ tuo
bom za cen nɩ a.
6A kpɩmɛ tẽw mie
tɩ vili vili mɛ̃ na,
a kũu bɛrɩ tɩ be n a ɩ̃ nisɔw.
7A ɩ̃ kpɩɛrʋ pʋɔ a,
ɩ̃ bʋɔl'ɩ a Sore,
ɩ̃ lɔb'ɩ cɛl kʋ̀ a ɩ̃ Naaŋmɩn.
Ʋ be n a ʋ yir pʋɔ,
ɛ́ wõ a ɩ̃ kɔkɔr,
a cɛl ɩ̃ na ŋmɛ a
lo n a ʋ tobrí.
8Lɛ n'a a tẽsɔw tɩ gbiwri
ɛ́ dam,
a salom pɛr tɩ dam'a,
a salom nɩ a tẽw tɩ dam'a,
a Sore suur na tɩ ìr a ƴãw.
9Zʋ̀ʋ́r tɩ yire nɩ
a ʋ nyɔbɔgɛ pʋɔ,
ɛ́ vũu dɩrɛ yire a ʋ nʋɔrɩ́,
lãwnɩ vũu-bi-cõcole.
10Ʋ tɩ taw nɩ a salom yuo
ɛ́ siw,
ɛ́ zũzuw-sɛbla be
a ʋ gbɛ́ɛ pile.
11Ʋ tɩ zɔm'ɩ seribɛ̃ ƴaw nɩ,
ɛ́ be a sɛsɛb pɩgɛ zu laarɛ.
12Lige n'a
ʋ tɩ pili pàw ʋ tʋɔra,
zũzuw-sɛblɛ pʋɔ n'a ʋ tɩ sɔwlɩ,
zũzuge na sɔb mɛ̃ kʋ̃ɔ-zulu a.
13Cãà tɩ de ʋ nɩ niwn,
ɩrɛ pʋ̀rpʋ̀rpʋ̀r.
14A Sore be n a salom zu,
ɩ a saa tanɩ,
a Naaŋmɩn-na-do-saa-bɛ-pɩɛl-a
kɔkɔr tɩ yi n kpɛ̃w kpɛ̃w za.
15Ʋ tɩ ɩ na a saa nyɩwrɩ
pàw a ziir za,
ʋ tɩ tɛ n pime bɛr a ziir za.
16Sore e, a fʋ tanʋ
nɩ a fʋ suur sɛsɛb,
tɩ ɩ na a kʋ̃ɔ-kpɛ̃ɛ pɛr sãá,
a tẽsɔw-kɔbr pɛr sãá.
17A Sore tɩ be n a salom zu
ɛ́ tur a nũu nyɔw mɛ̃,
ʋ tɩ yaarɩ mɛ̃ nɩ a kʋ̃ɔnɩ pʋɔ.
18Ʋ tɩ faa mɛ̃ nɩ a ɩ̃ dɔ̃ dem
na tɛr fãw a nuru pʋɔ,
a ɩ̃ dɔ̃ dem
na kpɛmɛ zuo mɛ̃ a.
19Bɛ tɩ wa n a ɩ̃ ƴãw,
a ɩ̃ baw-bio bibir,
ɛcɛ a Sore tɩ wa na wa tɩɛ mɛ̃,
20ʋ ír mɛ̃ na bɛr k'ɩ̃ cere,
ʋ faa mɛ̃ na,
ʋ na nɔnɛ mɛ̃ a ƴãw.
21A Sore ɩrɛ nɩ à ŋá a ɩ̃ zie,
a ɩ̃ mɩnʋ zũú,
ʋ ɩrɛ mɛ̃ nɩ à ŋá,
a ɩ̃ nuru tõ-vɩɛlɩ ƴãw.
22Bʋ̃ʋ n'ʋ vɛ̃,
ɩ̃ tu n a Sore sɛ́ɛ,
ɩ̃ bɛ ɩ ɩb kãw
sãw a ɩ̃ Naaŋmɩn ɛ.
23Ɩ̃ tuur'ɩ a lɛ za ʋ na yel a,
a lɛ na tu sɔ́r ʋ yel a,
ɩ̃ bɛ zawrɩ bɛr ɛ.
24Ɩ̃ bɛ tɛr sãwna a ʋ zie ɩ,
ɛ́ gù ɩ̃ tʋɔra yel-bier za ƴãw.
25Lɛ n'a a Sore maalɩ mɛ̃
tu n a ɩ̃ mɩnʋ,
tu n a ɩ̃ vɩɛlʋ
ʋ na nyɛ̃ nɩ mimir a.
26Sore e, fʋ ŋmɛ̃ n fʋ ŋmɛ̃a,
a sob nɛ
na bɛ lɛbr pùor a zie,
fʋ bɛ tɛr sãwna,
nɩr na bɛ tɛr sãwna a zie ɩ.
27Fʋ vɩɛl'ɩ parpar
nɩr na vɩɛl parpar a zie,
ɛ́ wul kɛ́ fʋ cɩ n
a yã-faa sob zie.
28Fʋ̃ʋ n'ʋ mɩ́ faa
a su-siwri dem,
ɛ́ ɩ a pɔ̀lʋ dem su zuru.
29Sore e, mãa zie a,
fʋ ɩ n fɩ̃tɩlɛ,
Sore e, fʋ̃ʋ n'ʋ caalɛ
a ɩ̃ tɩ̃ɩsɔw lige.
30Fʋ̃ʋ n'ʋ ɩ̃ mɩ́ lãw nɩ
ƴaw gãw a bɔw,
a fʋ̃ʋ ɩ̃ Naaŋmɩn zũú n'a
ɩ̃ na tʋ̃ɔ́ ƴaw gãw
a dacĩ-kpɛ̃ɛ.
31A Naaŋmɩn ɩ n sɔr-wule na vɩɛl ʋ za a,
a ʋ ƴɛ̀rʋ bɛ tɛr bʋnʋ ɛ.
Bɛlɩ dem za na mɩ́ zɔ kpɛ a ʋ naayir a,
ʋ ɩ na mɛ̃ zɛbr-kur-pãgala na mɩ́ piw bɛ a.
32Ãa n'ʋ ɩ Naaŋmɩn, ʋ bɛ ɩ a Sore?
Ãa n'ʋ ɩ pìir a tɩ ƴãw,
ʋ bɛ ɩ a tɩ Naaŋmɩn?
33A Naaŋmɩn ŋa n'ʋ
mɩ́ piw mɛ̃ tɛr'ɩ fãw,
ʋ mɩ́ wul mɛ̃ nɩ a sɔr-vla,
34ʋlɛ n'ʋ mɩ́ ɩ ɩ̃ zɔrɛ fɔ̃w
mɛ̃ wala a,
ɛ́ ɩ ɩ̃ be ziir na kɛrɩ a zu.
35Ʋlɛ n'ʋ
mɩ́ zanɛ nɩ mɛ̃ a zɛbr,
ɛ́ mɩ́ sõw mɛ̃ ɩ̃ dúori tam
na kpɛmɛ jɩjɩ a.
36Sore e,
fʋ mɩ́ piw mɛ̃ na tɛr,
mɛ̃ zɛbr-kur-pãgala a,
ɛ́ faa mɛ̃,
fʋ mɩ́ sàw nɩ a ɩ̃ bʋɔlʋ,
ɛ́ ɩ k'ɩ̃ kpɛmɛ.
37Fʋ̃ʋ n'ʋ mɩ́ ɩ ɩ̃ dɔl gbɛ́r,
ɛ́ a ɩ̃ gbɛnakɔɛ bɛ vir ɛ.
38Ɩ̃ diwr'ɩ a ɩ̃ dɔ̃ dem,
ɩ̃ kʋ bɛ na pàw pɛr,
ɛ́ ɩ̃ bɛ lɛbr pùor,
mãa bɛ wa kʋ bɛ baarɩ a ɩ.
39Ɩ̃ gɔr gɔr bɛ na,
ɩ̃ kʋ bɛ na,
bɛ kʋ̃ lɛb tʋ̃ɔ́ ìr ɛ,
bɛ gã nɩ tẽw,
ɩ̃ dĩ nɩ bɛ nɩ gbɛ́ɛ.
40Fʋ kʋ̀ m'ɩ fãw a zɛbr ƴãw,
a bɛlɩ dem na ìr a ɩ̃ ƴãw a,
fʋ ɩ na ɩ̃ tʋ̃ɔ́ bɛ.
41Fʋ ɩ na a ɩ̃ dɔ̃ dem
lɩɛb zɔ a ɩ̃ niŋé,
ɛ́ ɩ ɩ̃ tʋ̃ɔ́ a bɛlɩ dem
na hɩ̃ɛn mɛ̃ a pẽlẽpẽlẽ.
42Bɛ cɩɩrɛ na,
ɛ́ faarɛ bɛ ka be ɩ,
a Sore n'ʋ bɛ cɩɩrɛ bʋɔlɛ,
ʋʋ bɛ sɔwr ɛ.
43Ɩ̃ nɛb bɛ na ŋmɛr ŋmɛr,
ɩ̃ ɩ na bɛ lɩɛbɩ uuru,
ɩ̃ nɛb nɛb bɛ na,
mɛ̃ sɛ́ɛ zu mɛ̃mɛrɛ a.
44Fʋ faa mɛ̃ nɩ
a ɩ̃ nɩbɛ na ìr zɛbr'ɩ mɛ̃ a
nuru pʋɔ,
fʋ ɩ na k'ɩ̃ de
a nɩ-bʋʋr-yoru niwn.
Nɩbɛ ɩ̃ na bɛ bãw a
tone nɩ a ɩ̃ tome,
45zawlbɛ waar'a
wa ƴɛ̀rɛ nɔ-kãá a ɩ̃ zie,
mãa wa ƴɛ̀rɛ lɛ pɛ a,
bɛ mɩ́ sàw nɩ a ɩ̃ nʋɔr.
46A bɛ fãw báarɛ na,
bɛ màwr'a
wa yire nɩ a bɛ sɔwlʋ ziir.
47A Sore vʋʋrɛ na!
A sob nɛ na ɩ a ɩ̃ pìir a, tɛr'ɩ puoru!
A Naaŋmɩn ɩ n kpɛ̃ɛ,
ʋlɛ n'ɩ a ɩ̃ pìir nɩ a ɩ̃ faarɛ!
48A Naaŋmɩn ŋa n'ʋ
mɩ́ ɩ k'ɩ̃ yáa a san,
ɛ́ mɩ́ dĩ nɩbɛ bin a ɩ̃ pile.
49Sore e, fʋ mɩ́ faa mɛ̃ nɩ
a ɩ̃ dɔ̃ dem nurú,
fʋ mɩ́ ɩ na ɩ̃ tʋ̃ɔ́ a ɩ̃ fɛr-fɛrbɛ,
fʋ mɩ́ faa mɛ̃ nɩ
a po-to-fãw dem nuru pʋɔ.
50Lɛ so ɩ̃ danɛ fʋ
a nɩ-bʋʋrɛ sɔgɔ, Sore e,
ɛ́ yiele íre nɩ a fʋ yúor.
51A Sore mɩ́ ɩ na
a ʋ nãà zɛb tʋ̃ɔ́,
zɛb-bɛrɛ pʋɔ,
ʋ maalɛ nɩ a ʋ nɩ-kabra vla,
a Daviir nɩ a ʋ bʋʋrɛ,
kʋrakʋralɛ.
La Bible en Dagara © Alliance Biblique du Burkina Faso, 2013.