2 Bibie za yel-manɩ 32
32
Asiiri tẽw nãà, Senakerib, ŋmãa nɩ nɩ a Zuda naalʋ-tẽw zɛbr
(Mɩ̀ nyɛ̃ 2Na 18:13, Ɩza 36:1)
1A Ezekɩasɩ na tɩ wul à à ŋá k'ʋʋ tu n a Naaŋmɩn a, a pùorí, a Asiiri tẽw nãà Senakerib, tɩ kpɛ n a Zuda naalʋ-tẽw pʋɔ. Ʋ tɩ ìr'a lo a tẽ-kpɛn kpɛn zu bɔbr k'ʋʋ zɛb de a. 2A Ezekɩasɩ na tɩ nyɛ̃ a Senakerib ʋ pɩɛlɛ a Zerizalɛm bɔbr k'ʋʋ zɛb de ʋ a, 3ʋlɛ nɩ a ʋ nɩ-bɛrɛ nɩ a ʋ sojarɩ nɩ-bɛrɛ tɩ wõ n taa kɛ́ bɛ kpàr a kʋl-nɛ́ɛ za na bɛ be a tẽw pʋ̃ɔmɩ a. Bɛ tɩ nyɛ̃ nɩ a ʋ yã ɩ yã-vla. 4Lɛ n'a nɩbɛ tɩ ɓã taa yaga yaga ɛ́ kpàr a kʋl-nɛ́ɛ za, tɩ lãwnɩ a ʋl na tɩ puo pɔl a tẽw pʋ̃ɔmɩ zɔrɛ a. Bɛ tɩ yere na: «A Asiiri tẽw dem wa ta a ka a, bɛ̃ɛ ta nyɛ̃ kʋ̃ɔ a ʋr ɛ.»
5A Ezekɩasɩ tɩ nyɔw nɩ nyãa lɛb mɩɛr a tẽw dacin, a be ʋ na tɩ lo a. Ʋ tɩ mɛ n yir-cõcowli a do, ɛ́ ƴãw bɛ mɛ dacin kãw a yẽw. Ʋ tɩ ɩ n a Milo#32:5 Milo: Nyɛ̃ 1Na 9.15 nɩ a manʋ. ʋ kpɛmɛ a «Daviir Tẽ-kpɛ̃ɛ» pʋɔ, ɛ́ ƴãw bɛ maalɩ zɛbr bome yaga yaga nɩ zɛbr-kur-pãgalɩ. 6Ʋ tɩ kaa na ír sojarɩ nɩ-bɛrɛ kɛ́ bɛ de a tẽw dem niwn.
Ʋ tɩ bʋɔl'ɩ a nɩbɛ za ɓã taa a zie ʋl na pɩɛlɩ a tẽw dɩ̃dɔr a, ɛ́ mɔwlɩ bɛ yere nɩ: 7«Nyɩ kpɛmɛ ɛ́ dɩ kanyir. Nyɩ ta zɔrɛ bom za ɩ, ɛ́ ta zɔrɛ a Asiiri tẽw nãà nɩ a ʋ sojarɩ yaga yaga dɛ̃bɩ̃ɛ ɩ. Bʋ̃ʋ n'ʋ vɛ̃, a tɩ zie a, nɩr be n be ɩ kpɛ̃ɛ zuo a sob ʋl na be a ʋ zie a. 8Nɩsaal fãw tɛwr'a ʋ tɛr, ɛcɛ tɩɩm a, a Sore tɩ Naaŋmɩn be n a tɩ zie a tɩ sõwfʋ ƴãw, ɛ́ na zɛbr a tɩ zɛbr.» A Zuda nãà Ezekɩasɩ ƴɛ̀rʋ á ŋá tɩ mɔwl'ɩ a tẽw nɩbɛ za.
A ƴɛ̀rʋ a Senakerib na ƴɛ̀r a Zerizalɛm nɩbɛ zie a
(Mɩ̀ nyɛ̃ 2Na 18:17-37, Ɩza 36:2-22)
9A yele á ŋá pùorí, a Asiiri tẽw nãà Senakerib tɩ be n Lakisɩ#32:9 Lakisɩ: Nyɛ̃ 2Na 14.19 nɩ a manʋ. nɩ a ʋ zɛbr-nɩbɛ za, ɛ́ tõ nɩbɛ a Zerizalɛm, a Zuda nãà Ezekɩasɩ zie nɩ a Zuda naalʋ-tẽw nɩbɛ za na tɩ cãà be a Zerizalɛm a zie, kɛ́ bɛ tɩ yel bɛ: 10«À ŋá n'a a Asiiri tẽw nãà Senakerib yere: “Ãa ƴãw n'a nyɩ ƴãw a nyɩ tɩɛrʋ zɩ̃ nɩ a Zerizalɛm? 11A Ezekɩasɩ yel'a kʋ̀ nyɩ k'aa Sore nyɩ Naaŋmɩn na faa nyɩ nɩ a ɩ̃ nuru pʋɔ. Ʋ bɛ̀lɛ nyɩ na, ɛ́ nyɩ na kpi n kɔ̃ nɩ kʋ̃ɔ-nyúur nyɩ za. 12A Ezekɩasɩ ʋl bɛ n'ʋ sãw a maalʋ-ziir nɩ a bàwr-maal-kube bɛr ɛ́ yel k'aa Zuda nɩ a Zerizalɛm nɩbɛ puore bàwr-maal-kuur been niŋé, ɛ́ maalɛ a bagɛ a be yõ ɩ? 13Nyɩ nɔ̃w bɛ bãw bom nɛ mãa nɩ a ɩ̃ sãà mɩnɛ na ɩ a tẽ-daa nɩ-bʋʋrɛ a bɩɩ? A tẽ-daa ten ten ŋmɩmɛ sɩrɩ na tʋ̃ɔ́ faa bɛ a ɩ̃ nuru pʋɔ ɔ? 14A ten á ŋá za a ɩ̃ sãà mɩnɛ na kʋ pàw pɛr a pʋɔ a, a tẽ-buor ŋmɩmɛ n'a tʋ̃ɔ́ faa bɛ a ɩ̃ nuru pʋɔ, ɛ̀ nyɩɩm Naaŋmɩn na wa tʋ̃ɔ́ faa nyɩ a ɩ̃ nuru pʋɔ? 15Ƴɛrɛŋa a, nyɩ ta bɛr a Ezekɩasɩ ŋmarɛ ziri bɛ̀lɛ nɩ nyɩ ɛ, nyɩ ta sàw de a ʋ ƴɛ̀rʋ ɛ, bʋ̃ʋ n'ʋ vɛ̃, tẽw kãw za bɩɩ naalʋ-tẽw kãw za ŋmɩn kʋ̃ tʋ̃ɔ́ faa a ʋ nɩ-bʋʋrɛ a ɩ̃ nuru pʋɔ nɩ a ɩ̃ sãà mɩnɛ nuru pʋɔ ɩ, lɛ so a nyɩ ŋmɩmɛ mɩ̀ kʋ̃ faa nyɩ ɛ.”» 16A Asiiri tẽw nãà Senakerib tõ-tõ-biir tɩ cãà na ƴɛ̀rɛ tʋʋr'ɩ a Sore Naaŋmɩn nɩ a ʋ tõ-tõ-bie Ezekɩasɩ.
A Senakerib tʋʋr'ɩ a Sore
(Mɩ̀ nyɛ̃ 2Na 19:14-19, Ɩza 37:14-20)
17A Asiiri tẽw nãà mɩ̀ tɩ sɛb'ɩ sɛb-tʋɔla k'ʋʋ tʋ a Sore, a Ɩsɩrayɛl Naaŋmɩn. À ŋá n'a ʋ tɩ yere a sɛbɛ pʋɔ: «Mɛ̃ a lɛ a tẽ-daa ten ten ŋmɩmɛ na bɛ tʋ̃ɔ́ faa a bɛ nɩ-bʋʋrɛ a ɩ̃ nũú a, a Ezekɩasɩ Naaŋmɩn mɩ̀ kʋ̃ faa a ʋ nɩ-bʋʋrɛ a ɩ̃ nũú ɛ.»
18A Senakerib tõ-tõ-biir tɩ cɩɩr'ɩ kpɛ̃w kpɛ̃w za nɩ a ebre kɔkɔr, a Zerizalɛm nɩbɛ na tɩ be a dacin zu a zie. Bɛ tɩ bɔbr'a kɛ́ bɛ vʋ̃ɔ bɛ pʋ̀lá, bɛ tɩɛ bɛr, bɛ tʋ̃ɔ́ zɛb de a tẽw mɔlɛ mɔlɛ. 19Bɛ tɩ ƴɛ̀rɛ nɩ a Zerizalɛm Naaŋmɩn ƴɛ̀rʋ mɛ̃ a lɛ bɛ na tɩ ƴɛ̀rɛ a tẽ-daa nɩ-bʋʋrɛ ŋmɩmɛ ƴɛ̀rʋ a, al na ɩ nɩsaal nuru bʋ̃-maalɩ a.
A Asiiri tẽw nɩbɛ lɩɛb'a zɔ
(Mɩ̀ nyɛ̃ 2Na 19:15,35-37, Ɩza 37:15,36-38)
20Lɛ n'a a nãà Ezekɩasɩ nɩ a naaŋmɩn-ƴɛ̀r-manɛ Ɩzayi na ɩ Amɔtɩsɩ bidɛb a, tɩ puori zɛlɩ a Naaŋmɩn sõwfʋ. 21A Sore tɩ tõ n malkɩ kãw a Asiiri tẽw nɩbɛ laɩ pʋɔ ʋ tɩ kʋ a soja-gãdaar za nɩ a sojarɩ nɩ-bɛrɛ za. Vĩ tɩ nyɔw nɩ a Asiiri tẽw nãà ʋ lɛb kul'ɩ a ʋ tẽw. Bibir kãw ʋ na tɩ kpɛ a ʋ ŋmɩn yir a, a ʋ bidɛbr tɛɛ za tɩ cɔ̀r ʋ na kʋ.
22À ŋá n'a a Sore faa a Ezekɩasɩ nɩ a Zerizalɛm nɩbɛ a Asiiri tẽw nãà Senakerib nuru pʋɔ nɩ a bɛ dɔ̃ dem za nuru pʋɔ, ɛ́ kʋ̀ bɛ a ƴã-ɓaarʋ a ziir za. 23Nɩ-yaga tɩ wa n nɩ de-kʋ̀b bome a Sore ƴãw a Zerizalɛm, nɩ bʋ̃-kʋ̀rɩ wa kʋ̀ a Zuda nãà Ezekɩasɩ. A na tĩ a ʋlɩ daar nɛ a n'a a nɩ-bʋʋrɛ ƴãwnɛ a Ezekɩasɩ.
A Ezekɩasɩ naalʋ baarʋ
(Mɩ̀ nyɛ̃ 2Na 20:1-21, Ɩza 38:1-8, 39)
24A alɩ bibie nɛ pʋɔ, bàalʋ kãw na kʋrɛ a tɩ nyɔw nɩ a Ezekɩasɩ. Ʋ tɩ puor'ɩ a Naaŋmɩn, ʋ sɔw nɩ bãwfʋ na wul k'ʋʋ na sanɩ na a#32:24 Nyɛ̃ 2Na 20.8-11.. 25Ɛcɛ a Ezekɩasɩ bɛ tɩ puori a Naaŋmɩn yãanɩ a maalʋ ŋa ƴãw ɛ. Ʋ nɩ̃ɛ na tɩ ɩrɛ pɔ̀lʋ a Sore suur tɩ ìr a ʋ ƴãw, a Zuda ƴãw nɩ a Zerizalɛm ƴãw. 26Ɛcɛ a Ezekɩasɩ nɩ a Zerizalɛm nɩbɛ tɩ sàw nɩ a bɛ sãwna, a Sore suur ɩ-ɩrɩ bɛ lo a bɛ zu a Ezekɩasɩ naalʋ-dɩb daar ɛ.
27A Ezekɩasɩ tɩ tɛr'ɩ na-bome yaga ɛ́ a ʋ yúor tɩ yi yaga. Ʋ tɩ ƴãw na bɛ mɛ diru a salm-pla, a salm-zɩɛ, a kʋsɛ-bi-nyɩlɩ, a kãá-nyuure, a zɛbr-kur-pãgalɩ nɩ a ʋ bʋ̃-yée za binu ƴãw. 28Ʋ mɩ̀ tɩ ƴãw na bɛ mɛ diru a kɔb bʋ̃-dieri binu ƴãw, a divɛ̃ nɩ a kãá ƴãw, lãwnɩ nazaw a ʋ nĩi nɩ a ʋ píir ƴãw, lãwnɩ dʋn a mɩnɛ zaw. 29Ʋ tɩ ƴãw na bɛ mɛ tẽ-bɛrɛ kʋ̀ ʋ, ʋʋ tɩ tɛr dʋn bɛ dɩ vuo ɩ, píir, bʋʋr nɩ nĩi, bʋ̃ʋ n'ʋ vɛ̃, Naaŋmɩn tɩ kʋ̀ ʋ nɩ na-bome yaga yaga.
30A Ezekɩasɩ cãà n'ʋ dɛ a Gihon kʋ̃ɔnɩ ƴãw a zɔrɛ siwr a pile, a «Daviir Tẽ-kpɛ̃ɛ» mʋ̃tɔ̃w-kpɛb-lowr.
Bom za tɩ tu n a Ezekɩasɩ. 31Alɛ so, a lɛn daar a Babɩlɔn tẽw nɩ-bɛrɛ na tɩ tõ nɩbɛ a ʋ zie kɛ́ bɛ tɩ sowri bãw a nɔ-ɓãa-yel ʋl na ɩ a ʋ tẽw pʋɔ a#32:31 A na ɩ n a yel nɛ ƴɛ̀rʋ bɛ na ƴɛ̀r a kan-zu ŋa kan-nɛ́ɛ 24 sob pʋɔ a., a Naaŋmɩn tɩ bɛr ʋ na. A Naaŋmɩn tɩ bɔbr'a k'ʋʋ ɩ ʋ kaa nyɛ̃ lɛ ʋ na ŋmɛ̃ a.
32A Ezekɩasɩ ɩ-ɩrɩ al na cɛ a, nɩ a ʋ puoru tome a, a sɛb'a ƴãw a naaŋmɩn-ƴɛ̀r-manɛ Ɩzayi, Amɔtɩsɩ bidɛb, yel-nyɛra sɛbɛ pʋɔ nɩ a Zuda nɩ a Ɩsɩrayɛl na-mɩnɛ sɛbɛ pʋɔ. 33Ʋ na wa kpi a, bɛ ũù ʋ nɩ a Daviir bʋʋrɛ yaa pʋɔ, a zu-sɔw. A ʋ kũu daar, a Zuda nɩ a Zerizalɛm nɩbɛ za tɩ ƴãw ʋ na. A ʋ bidɛb Manase n'ʋ tɩ lɩɛrɩ ʋ dɩ a naalʋ.
La Bible en Dagara © Alliance Biblique du Burkina Faso, 2013.