2 Bibie za yel-manɩ 31
31
A Ezekɩasɩ lɛb'a cɔbrɩ a Ŋmɩn-yir-kpɛ̃ɛ pʋɔ tome
1À á ŋá za na wa baarɩ a, a Ɩsɩrayɛl nɩbɛ za na tɩ be a be a tɩ cen nɩ a Zuda tẽ-bɛrɛ pʋɔ, tɩ ŋmɛr ŋmɛr a kʋsɛ-teli, cɛ cɛ a dà-barɩ lɔb, ɛ́ sãw sãw a maalʋ-ziir nɩ a bàwr-maal-kube bɛr, a Zuda naalʋ-tẽw za pʋɔ, a Bɛ̃zamɛ, a Efarayim nɩ a Manase#31:1 Zuda, Bɛ̃zamɛ: A dɔwlʋ ayi á ŋá n'a tɩ ɓã taa ɩ a Saa-pɛrɩ́-dʋrʋ-lowr naalʋ-tẽw bɛ mɩ̀ na bʋɔlɛ a Zuda naalʋ-tẽw a. Efarayim, Manase: Alɛ n'a ɩ a dɔwlʋ bɛrɛ a Saa-pɛrɩ́-gʋba-lowr naalʋ-tẽw pʋɔ, bɛ mɩ̀ na bʋɔlɛ a Ɩsɩrayɛl naalʋ-tẽw a. dɔwlʋ pʋɔ. Al pùorí, ŋa za tɩ lɛb'a kul a ʋ tẽ-kpɛ̃ɛ pʋɔ a ʋ yir.
2A Ezekɩasɩ tɩ lɛb'a zɩɩlɩ a bàwr-maalbɛ nɩ a levitɩ mɩnɛ palɛ, ɛ́ kʋ̀ ŋa za a ʋ tõ-nʋɔr a ʋ pal pʋɔ. A Ŋmɩn-yir-kpɛ̃ɛ pʋɔ a, a bàwr-maalbɛ nɩ a levitɩ mɩnɛ tɩ so a nyɩw-a-za-bagɛ nɩ a lãw-taa bagɛ maalʋ nɩ a puoru yele na ɩ a Sore danʋ a. 3A nãà mɩ́ tɩ de nɩ a ʋ mɩŋa bʋ̃-tɛrɩ tɩr a biɓaarɛ nɩ a zaanʋɔrɛ nyɩw-a-za-bagɛ ƴãw, a pɩ̃ɛnʋ-bibir dem ƴãw, a cuw-paalɛ nɩ a cuwr al na cɛ a dem ƴãw, mɛ̃ a lɛ na sɛb a Sore Wulu pʋɔ a#31:3 A bagɛ yele ƴãw a, nyɛ̃ Sɔr-n 28—29 nɩ Ezek 45.22-24..
4Al pùorí, ʋ tɩ yel'ɩ a Zerizalɛm nɩbɛ kɛ́ bɛ kʋ̀ a bàwr-maalbɛ nɩ a levitɩ mɩnɛ bom nɛ za a na fɛr kɛ́ bɛ kʋ̀ bɛ a, lɛ n'a bɛ na tuur a Sore Wulu. 5A nɩbɛ na dɛ wa wone a ƴɛ̀rʋ ŋa a, a Ɩsɩrayɛl nɩbɛ tɩ wa n nɩ a bɛ kɔb bʋ̃-dan bɛ dɩ vuo ɩ: ble, divɛ̃, kãá, sɩwr nɩ a bʋ̃-kʋ́ɔrɩ al na cɛ a, nɩ a bɛ bʋ̃-dieri za ziir pie sob. 6A Saa-pɛrɩ́-gʋba-lowr naalʋ-tẽw Ɩsɩrayɛl nɩbɛ nɩ a Zuda nɩbɛ bɛl na kpɩɛr a Zuda naalʋ-tẽw tẽ-bɛrɛ pʋɔ a mɩ̀ tɩ wa n nɩ a bɛ dʋn ziir pie sob, nĩi nɩ bʋʋr, lãwnɩ de-kʋ̀b a Sore bɛ Naaŋmɩn na so a. Bɛ tɩ de nɩ a bome á ŋá za gbõ gbõ taa a bɛ dɩ vuo ɩ. 7A cuwr ata sob daar a, bɛ tɩ tĩ na gbone a bome taa, ɛ́ a cuwr ayopõi sob daar'a bɛ wa baarɩ. 8A Ezekɩasɩ nɩ a nɩ-bɛrɛ tɩ wa na wa nyɛ̃ a bome na gbõ taa a, ɛ́ puori a Sore nɩ a ʋ nɩ-bʋʋrɛ Ɩsɩrayɛl yãanɩ.
9A nãà Ezekɩasɩ tɩ sowr'ɩ a bàwr-maalbɛ nɩ a levitɩ mɩnɛ a bome na gbõ taa a yele. 10A bàwr-maal-kara Azarɩahu na ɩ a Sadɔkɩ dɔwlʋ nɩr a tɩ sɔw ʋ na: «A nɩbɛ na tĩ waar'ɩ a bɛ bʋ̃-dieri a Sore yir-kpɛ̃ɛ pʋɔ a, tɩ mɩ́ dɩ na tɩ tɩw ɛ́ a cãà guu, bʋ̃ʋ n'ʋ vɛ̃, a Sore maal'ɩ a ʋ nɩ-bʋʋrɛ. A al na guu a, alɛ n'ɩ à á ŋá na gbõ taa a.»
11A Ezekɩasɩ tɩ yel'a kɛ́ bɛ cɔbrɩ diru a pɩɛlɩ a Ŋmɩn-yir-kpɛ̃ɛ. Bɛ na wa cɔbrɩ a baarɩ a, 12a nɩbɛ tɩ waar'ɩ nɩ a bʋ̃-kʋ́ɔrɩ bome, a tɛra ziir pie sob nɩ a de-kʋ̀b bome wa ƴãwnɛ a pʋɔ. A levitɩ Konanɩahu n'ʋ bɛ tɩ kaa ír k'ʋʋ kaarɛ a zie, ɛ́ a ʋ yɛb Simeyi tu a ʋ zu. 13A lɛ a nãà Ezekɩasɩ nɩ a bàwr-maal-kara Azarɩahu na kaarɛ a Ŋmɩn-yir-kpɛ̃ɛ zie a, na tɩ yel a zũú, nɩbɛ bɛ ŋa nɛbɛ a Konanɩahu nɩ a ʋ yɛb Simeyi tɩ ƴãw bɛ piwre a yele: Yehɩɛl, Azazɩa, Nahatɩ, Asayɛl, Yerimɔtɩ, Yozavadɩ, Elɩɛl, Yisɩmakɩahu, Mahatɩ nɩ Benayahu. 14A Yimina bidɛb Koore na ɩ levitɩ, ɛ́ tɩ ɩ a saa-pɛrɩ́ dɩ̃dɔ-gùre a n'ʋ tɩ kaarɛ a de-kʋ̀b bome bɛ na nɔnɛ kʋ̀ a Naaŋmɩn a zie. Ʋlɛ n'ʋ mɩ̀ mɩ́ tɩ põ a de-kʋ̀b bome a Naaŋmɩn yõ na so a, nɩ a de-kʋ̀b bome al na cɛ a. 15Nɩbɛ bɛ ŋa nɛbɛ ʋ tɩ tɛr a bàwr-maalbɛ tẽ-bɛrɛ pʋɔ kʋralɛ tone nɩ: Edɛn, Minyamin, Yesua, Semayahu, Amarɩa nɩ Sekanɩahu. A nɩbɛ bɛ ŋa nɛbɛ tɩ pone a bʋ̃-dɩrɩ a bɛ taabɛ, a nɩ-bɛrɛ bɩɩ a bibiir, tu n a bɛ palɛ. 16A bɛlɩ dem yée na sɛb a nɩ a yome ata nɩ dɔwlɛ dɛbli, bɛl tɛwr bɛ nɛbɛ bɛ mɩ́ tɩ kʋ̀ a bome ɩ, bɛ mɩ̀ mɩ́ tɩ kʋ̀ n a bɛlɩ dem na waar bibie za a Ŋmɩn-yir-kpɛ̃ɛ pʋɔ wa tone a bɛ puoru tome mɛ̃ a lɛ a bɛ pal na tuur a. 17Yie yie n'a bɛ tɩ sɛb a bàwr-maalbɛ yée, ɛ́ a levitɩ mɩnɛ na tɛr yome lɩzɛr'ɩ dɔwlɛ a, bɛ tɩ sɛb'ɩ a bɛ yée tu n a bɛ tõ-nʋɔr nɩ a bɛ pal. 18Bɛ mɩ́ tɩ sɛb'ɩ bɛlɛ nɩ a bɛ yie dem za, pɔwbɛ, bidɛbr nɩ pɔwyaar, nɩ a bɛ nɩbɛ bɛl za na na tʋ̃ɔ́ dɩrɛ kʋralɛ a de-kʋ̀b bome a Naaŋmɩn na so a yée. 19A bàwr-maalbɛ, a Aarɔ̃ bʋʋrɛ, na tɩ kpɩɛr a kura na pɩɛlɩ a bàwr-maalbɛ ten a pʋɔ a, bɛ tɩ sʋ̃ɔmɩ na bul kaa ír nɩbɛ a tẽw za pʋɔ bɛ pone a bàwr-maalbɛ a bɛ dɩb, lãwnɩ a levitɩ mɩnɛ a yée na sɛb ƴãw a sɛb-bɛrɛ pʋɔ a.
20À à ŋá a Ezekɩasɩ na tɩ ɩ a ʋ naalʋ-tẽw za pʋɔ a, ʋ tɩ ɩ n a lɛ na vɩɛl ɛ́ tu sɔ́r a, a lɛ a Sore ʋ Naaŋmɩn na nɔnɛ a. 21Ʋ na tɩ maalɛ a Naaŋmɩn yir ƴãwn, ɛ́ ƴãw bɛ tuur a Naaŋmɩn wulu nɩ a ʋ nɛ-ƴãwnɩ a, ʋ tɩ ƴãw nɩ fãw k'ʋʋ bãw a Naaŋmɩn pʋ-tɩɛrʋ. Ʋ tɩ ɩ n à à ŋá nɩ ʋ pʋɔ za, ɛ́ a Naaŋmɩn ɩ a yele za tu vla a ʋ ƴãw.
La Bible en Dagara © Alliance Biblique du Burkina Faso, 2013.