2 Bibie za yel-manɩ 10
10
A ZUDA TẼ-ŊMÃA-KƲ̀RA NA-MƖNƐ YELE
10—36
A Sɩsɛm lãw wa n nɩ a Ɩsɩrayɛl naalʋ-tẽw bʋ́rʋ
(Nyɛ̃ 1Na 12:1-15)
1A Orobowam tɩ cen nɩ Sɩsɛm, bʋ̃ʋ n'ʋ vɛ̃, be n'a a Ɩsɩrayɛl lãw nɩbɛ za#10:1 Ɩsɩrayɛl lãw nɩbɛ za: A Ɩsɩrayɛl dɔwlʋ pie al na kpɩɛr a saa-pɛrɩ́-gʋba-lowr a, alɛ n'a bɛ bʋɔlɛ à à ŋá. Sɩsɛm: Nyɛ̃ 1Na 12.1 nɩ a manʋ. tɩ wa kɛ́ bɛ wa zɩɩlɩ ʋ, ʋ ɩ a nãà. 2A Nevatɩ bidɛb, Zerobowam, tɩ be n Eziptɩ tẽw ʋ na zɔ cen zãá nɩ a nãà Salomɔ̃ a. Ʋ na tɩ wõ bɛ ƴɛ̀r a Sɩsɛm tẽw kpaarʋ ŋa ƴɛ̀rʋ a, ʋ tɩ yi n a Eziptɩ lɛb wa. 3Bɛ tɩ tõ n nɩbɛ bɛ tɩ bʋɔlɩ ʋ ʋ wa páw a Ɩsɩrayɛl lãw nɩbɛ za. Bɛ tɩ ƴɛ̀r'ɩ a Orobowam zie à ŋá: 4«A fʋ sãà dɔwrɩ tɩ na mɛ̃ gbãgbaar a. Ʋ dɔwl'ɩ tuor na tɩbrɛ a, a tɩ bawŋmamɛ zu. Ƴɛrɛŋa a, a fʋ̃ʋ a, fʋ̃ʋ wa ɩ a tɩ tuor a ɩ zelfel blã a, tɩ na tone nɩ a fʋ tome.» 5A Orobowam tɩ sɔw bɛ na: «Nyɩ vɛ̃ ɩ̃ tɩɛrɩ kaa. Ka nɩ bibie ata a, nyɩ lɛb wa páw mɛ̃.»
Lɛ n'a bɛ tɩ tɔl cen. 6A nãà Orobowam tɩ yel'ɩ a nɩ-kore na tɩ tone a ʋ sãà Salomɔ̃ tome a lɛn daar ʋ na tɩ cãà vʋʋrɛ a, kɛ́ bɛ wul ʋ yã. Ʋ tɩ sowri bɛ nɩ à ŋá: «Sɔwfʋ buor'ʋ nyɩ wule mɛ̃ k'ɩ̃ɩ sɔw kʋ̀ a nɩbɛ bɛ ŋa?» 7A nɩ-kore tɩ yel ʋ na: «Fʋ̃ʋ wa wul nɔ̃wfʋ ɩb a nɩbɛ bɛ ŋa a, fʋ̃ʋ wa ɩ a lɛ bɛ na bɔbr a, fʋ̃ʋ wa ƴɛ̀r ƴɛ̀r-nʋʋr kʋ̀ bɛ a, bɛ na ɩ n a fʋ tõ-tõ-biir kʋralɛ.»
8Ɛcɛ a Orobowam bɛ tɩ tu a yã ʋl a nɩ-kore na wul ʋ a ɩ. Ʋ tɩ bɛr'a ɛ́ sowri a pɔlbili bɛl nɩ a ʋl na tɩ lãw bàa ɛ́ bɛ tone a ʋ tome a. 9Ʋ tɩ yel bɛ na: «A nɩbɛ bɛ ŋa yel k'ɩ̃ɩ ɩ a tuor a ɩ̃ sãà na dĩ nɩ bɛ a, a ɩ zelfel blã. A sɔwfʋ n'ɩ buor nyɩ na wule mɛ̃ k'ɩ̃ɩ sɔw bɛ a?» 10A ʋ pɔ́l-taabɛ tɩ yel ʋ na: «A nɩbɛ bɛ ŋa kone na a fʋ sãà na ɩ bɛ mɛ̃ gbãgbaar a, ɛ́ yel kɛ́ fʋ ɩ a tuor na dĩ bɛ a, a ɩ zelfel blã. Nyɛ̃ a lɛ fʋ na na sɔw bɛ a: “A ɩ̃ nobile bɛrmɛ na zuo a ɩ̃ sãà kpãkpãw. 11A ɩ̃ sãà tuo nyɩ nɩ tuor na tɩbrɛ a, mãa na tuo nyɩ nɩ tuor na tɩbrɛ zuo lɛ a. A ɩ̃ sãà fɔb'ɩ nyɩ nɩ fʋb-zawlɛ kpãà nyɩ, mãa na fɔb'ɩ nyɩ nɩ fʋbr na tɛr kure a kpãà nyɩ.”»
12A Zerobowam nɩ a nɩbɛ za tɩ wa n a bibie ata sob wa páw a Orobowam mɛ̃ a lɛ ʋ na tɩ yel kʋ̀ bɛ a. 13A nãà tɩ bɛr'ɩ a yã ʋl a nɩ-kore na wul ʋ a, ɛ́ sɔw sɔwfʋ na kpɛmɛ a kʋ̀ a nɩbɛ, 14tu n a yã a ʋ pɔ́l-taabɛ na wul ʋ a. Ʋ tɩ yel'a: «Ɩ̃ sãà tuo nyɩ nɩ tuor na tɩbrɛ a, mãa na tuo nyɩ nɩ tuor na tɩbrɛ zuo lɛ a. Ɩ̃ sãà fɔb'ɩ nyɩ nɩ fʋb-zawlɛ kpãà nyɩ, mãa na fɔb'ɩ nyɩ nɩ fʋbr na tɛr kure a kpãà nyɩ.» 15À ŋá n'a a nãà bɛ tɩ bɛr wõ a nɩbɛ ƴɛ̀rʋ ɛ. Alɛ ɩrɛ mɛ̃ bom'ʋ a, a Sore Naaŋmɩn n'ʋ tɩ tõ a nũú k'aa lɛ ʋ na tɩ ƴãw a ʋ ƴɛ̀r-manɛ Ahiya na yi Silo a ƴɛ̀r a Nevatɩ bidɛb Zerobowam zie a, tu.
A naalʋ-tẽw põ nɩ ziir ayi
(Nyɛ̃ 1Na 12:16-25)
16A Ɩsɩrayɛl lãw nɩbɛ za na tɩ nyɛ̃ k'aa nãà bɛ bɛr wõ a bɛ ƴɛ̀rʋ a, bɛ yel ʋ na:
«Tɩ bɛ pʋɔ Daviir yele pʋɔ ɩ,
tɩɩm nɩ Zese bidɛb bɛ lãw bom za ɩ!
Ɩsɩrayɛl nɩbɛ ɛ, nyɩ ɩ tɩ lɛb kul a tɩ yie pʋɔ.
Ɛ́ fʋ̃ʋ, Daviir bʋʋrɛ ɛ,
pãa kaarɛ a fʋ naalʋ-tẽw zie!»
Lɛ n'a bɛ tɩ lɛb kul a bɛ yie pʋɔ. 17A Ɩsɩrayɛl nɩbɛ bɛl na tɩ kpɩɛr a Zuda tẽ-ŋmãa-kʋ̀ra pʋɔ a, bɛl tɛwr nɛbɛ tɩ sàw a Orobowam naalʋ-dɩb. 18A na saa tɩ ɩ à ŋá a, a nãà Orobowam tɩ cãà na tõ a pɔ̃tɔrɩ tome nɩ-kpɛ̃ɛ, Adoram#10:18 Adoram: Nyɛ̃ 1Na 12.18 nɩ a manʋ., a Saa-pɛrɩ́-gʋba-lowr Ɩsɩrayɛl nɩbɛ zie. Ɛcɛ bɛ tɩ lɔb'ɩ ʋ nɩ kʋsɛbɛ kʋ. A tɩ cɛ nɩ zaa pʋrɩ, ɛ́ a Orobowam tʋ̃ɔ́ do a ʋ zɛbr-torko pʋɔ zɔ cen a Zerizalɛm. 19À à ŋá n'a a Saa-pɛrɩ́-gʋba-lowr Ɩsɩrayɛl nɩbɛ dɔwlʋ tɩ zawrɩ a Daviir yir nɩ-kpɛ̃ɛnʋ a bɛ zu, ɛ́ à à ŋá n'a a yele cãà ŋmɛ̃ a dɩ̃a.
La Bible en Dagara © Alliance Biblique du Burkina Faso, 2013.