1 Samɩɛl 3
3
1A Samɩɛl ʋl na tɩ cãà ɩ pɔlbile a tɩ tone nɩ a Sore tome a Eli niŋé.
Naaŋmɩn bʋɔl'ɩ a Samɩɛl
A lɛn daar, a Sore bɛ tɩ ƴɛ̀rɛ cãcã a nɩbɛ zie ɩ, ɛ́ a ʋ nyɛ́b bɛ tɩ ɩ cãcã ɩ.
2Tɩ̃ɩsɔw kãw, a Eli na tɩ cɛ blã na zɔ̃w a tɩ gã nɩ a ʋ gaa zie. Ʋ bɛ tɩ cãà maal nyɛrɛ ɩ. 3A Naaŋmɩn fɩ̃tɩlɛ#3:3 Naaŋmɩn fɩ̃tɩlɛ: Nyɛ̃ Ety 27.20-21. bɛ tɩ kpiiri sɛr ɛ, ɛ́ a Samɩɛl tɩ gã a Sore yir pʋɔ, a be a Naaŋmɩn wõ-taa daga na tɩ be a. 4A Sore tɩ bʋɔl'ɩ a Samɩɛl, ʋ sɔw: «Mãa n'ɩ ŋan!» 5Ʋ tɩ ìr'a zɔ cen a Eli zie tɩ yel ʋ: «Fʋ na bʋɔlɩ mɛ̃ a, mãa n'ɩ ŋan!» A Eli tɩ sɔw na: «Ɩ̃ bɛ bʋɔlɩ fʋ ɛ, lɛb tɩ gã!» A Samɩɛl tɩ lɛb'a cen tɩ gã.
6A Sore tɩ lɛb'a maal bʋɔl'ʋ. Ʋ tɩ ìr'a cen tɩ páw a Eli yel ʋ: «Fʋ na bʋɔlɩ mɛ̃ a, mãa n'ɩ ŋan!» A Eli tɩ sɔw na: «Ɩ̃ bie e, ɩ̃ bɛ bʋɔlɩ fʋ ɛ. Lɛb tɩ gã.» 7A Samɩɛl bɛ tɩ bãw a Sore sɛr ɛ, bʋ̃ʋ n'ʋ vɛ̃, a Sore bɛ tɩ càarɩ ƴɛ̀r a ʋ zie sɛr ɛ.
8A gb'a ata sob, a Sore tɩ lɛb'a bʋɔlɩ a Samɩɛl, ʋ ìr cen tɩ páw a Eli yel ʋ: «Fʋ na bʋɔlɩ mɛ̃ a, mãa n'ɩ ŋan!» Lɛ n'a zʋ̀mɛ tɩ kpɛ a Eli, ʋ bãw k'aa Sore n'ʋ bʋɔlɛ a bie. 9A Eli tɩ yel'ɩ a Samɩɛl: «Lɛb tɩ gã, ɛ́ bɛlɛ wa bʋɔlɛ fʋ a, fʋ̃ʋ sɔw: “Ƴɛ̀rɛ Sore e, a fʋ tõ-tõ-bie bɛrɛ na wone.”» A Samɩɛl tɩ lɛb'a cen tɩ gã a ʋ gaa zie.
10A Sore tɩ wa na wa be a be. Ʋ tɩ lɛb'a bʋɔlɩ mɛ̃ a dãwdãw a: «Samɩɛl i, Samɩɛl i!» A Samɩɛl sɔw: «Ƴɛ̀rɛ, a fʋ tõ-tõ-bie bɛrɛ na wone.» 11A Sore tɩ yel'ɩ a Samɩɛl: «Ɩ̃ na ɩ n bʋ̃-kãw a Ɩsɩrayɛl bʋʋrɛ pʋɔ, kɛ̀ nɩr za wa wõ ʋ a, pʋ̀lá ʋ̃ʋ vʋ̃ɔ ʋ mɛ̃ saa na mɩ́ tanɩ a. 12A ʋlɩ bibir nɛ a, bom nɛ za ɩ̃ na yel a Eli nɩ a ʋ yir dem ƴãw a, ɩ̃ na ɩ ʋ na tɩ ɓɩɩlɩ. 13Ɩ̃ yere na kʋ̀rɛ ʋ k'ɩ̃ɩ ƴãwnɛ nɩ dɔwrʋ a ʋ yir kʋralɛ ƴãw, a ʋ sãwna zũú: ʋ tɩ bãwnɩ a na a ʋ bidɛbr na tʋʋr mɛ̃ a, ɛ́ bɛr bɛ bɛ ɩrɛ. 14Alɛ n'a so ɩ̃ pɔ yel a Eli yir: bom za, bàwr bɩɩ de-kʋ̀b bom bɛ íre a Eli yir sãwna bɛrɛ ɩ.»
15A Samɩɛl tɩ gã na a zie tɩ vɩɛ, ʋ ìr yuo a Sore yir pamɛ. Ʋ tɩ zɔrɛ nɩ dɛ̃bɩ̃ɛ, ʋ na na manɩ a lɛ ʋ na nyɛ̃ a kʋ̀ a Eli a. 16Ɛcɛ a Eli tɩ bʋɔl'ɩ a Samɩɛl yel ʋ: «Ɩ̃ bie Samɩɛl i!» Ʋ sɔw: «Mãa n'ɩ ŋan!» 17A Eli sowr'ʋ: «A Sore zãa yel'a kɛ́ bʋnʋ kʋ̀ b? Ɩ̃ zɛlɛ fʋ na, ta sɔwlɩ mɛ̃ bom ɛ. Fʋ̃ʋ wa sɔwlɩ mɛ̃ a ƴɛ̀rʋ ʋ na ƴɛ̀r kʋ̀ b, ƴɛ̀r-bi-been a, a Naaŋmɩn, ʋ dɔwrɩ fʋ, ɛ́ lɛb dɔwrɩ ƴãw pʋɔ.» 18Lɛ n'a a Samɩɛl tɩ manɩ a ƴɛ̀rʋ za kʋ̀ ʋ, bɛ sɔwl'ʋ bom ɛ. A Eli tɩ yel'a: «Ʋlɛ n'ɩ a Sore! Ʋ ɩ lɛ ʋ na bɔbr a!»
19A Samɩɛl tɩ bàa na ɩ nɩ-kpɛ̃ɛ. A Sore tɩ be n a ʋ zie, ʋ tɩ tu n a ƴɛ̀rʋ al za ʋ na tɩ ƴɛ̀r kʋ̀ a Samɩɛl a. 20Lɛ n'a nɩr za tɩ bãwnɩ a, a Ɩsɩrayɛl tẽw za pʋɔ, na tĩ a Dan ɛ́ tɩ sãá a Bɛɛr-Seva a, k'aa Samɩɛl sɩrɩ na ɩ a Sore ƴɛ̀r-manɛ. 21A Sore mɩ́ tɩ cãà na wul ʋ mɩŋa a Silo: bʋ̃ʋ n'ʋ vɛ̃, a Silo n'a ʋ mɩ́ tɩ wul ʋ tʋɔra a Samɩɛl, k'ʋʋ ɩ ʋ bãw a ʋ ƴɛ̀rʋ.
La Bible en Dagara © Alliance Biblique du Burkina Faso, 2013.