1 Samɩɛl 2
2
A Ana yiele na puore nɩ a Sore yãanɩ
1A Ana tɩ puor'a yel à ŋá:
«A Sore n'ʋ so nʋ̃ɔ̀ ɩrɛ mɛ̃ yaga.
A Sore n'ʋ so ɩ̃ zɛw zu,
ɩ̃ na tʋ̃ɔ́ na ɩrɛ a ɩ̃ dɔ̃ dem laar.
Ɩ̃ cɩlɛ na: a Naaŋmɩn sõw mɛ̃ na.
2A Sore bɛ tɛr ʋ tɔ ɩ,
a tɩ Naaŋmɩn yõ n'ʋ ɩ Pìir.
Naaŋmɩn bɛ be, a bɛ ɩ a ʋl yõ ɩ.
3Nyɩ ta ƴɛ̀rɛ pɔ̀l-ƴɛ̀rʋ pilpile nɩ ɛ,
nyɔka-ƴɛ̀rʋ ta yi a nyɩ nʋɔrɩ́ ɛ,
bʋ̃ʋ n'ʋ vɛ̃, a Sore ɩ n Naaŋmɩn
na bãw bom za a,
ʋ mɩ́ jɛl'ɩ a nɩsaalbɛ ɩ-ɩrɩ za.
4A gãdaar tamɛ kár'a,
ɛ́ a bãbàalbɛ sɛ a kpɛnʋ mɛ̃ kpàwr a.
5A bɛlɩ dem na mɩ́ tɩ tɩw a
dier'ɩ tome dipɛ̃-ŋmale ƴãw,
ɛ́ a kɔ̃ dem pɩ̃ɛnɛ.
A pɔw-ãan dɔwr'ɩ gb'a ayopõi,
ɛ́ a bi-yaga mã bɛ cãà tɛr dɔwfʋ ɛ.
6A Sore n'ʋ ɩrɛ a nɩsaalbɛ kpiir
ɛ́ ʋlɛ n'ʋ ɩrɛ bɛ vʋʋrɛ,
ʋlɛ n'ʋ ɩrɛ bɛ siwr a kpɩmɛ tẽw,
ɛ́ ʋlɛ n'ʋ ɩrɛ bɛ lɛb yire a be dúor waar.
7A Sore n'ʋ tɩrɛ a nã́w nɩ a naalʋ,
ʋlɛ n'ʋ siwre, ɛ́ ʋlɛ n'ʋ mɩ̀ zɛwr.
8Ʋ mɩ́ nyɔw nɩ a bãbàal a tanɛ pʋɔ ʋ lɛb ìr,
ɛ́ ír a nã́w sob a sagɛ pʋɔ,
k'ʋʋ zɩɩlɩ bɛ na-mɩnɛ dà-kɔwr zu,
bɛlɛ nɩ a nɩ-yée.
A Sore so a tẽw za,
ʋlɛ n'ʋ dɔwl'ʋ a ʋ kpule zu.
9A bɛlɩ dem na ƴãwnɛ ʋ a,
ʋ mɩ́ gù n a bɛ nyɔ-vʋʋrʋ,
ɛ́ a ɩ-fa-maalbɛ kpiir a lige pʋɔ.
Bʋ̃ʋ n'ʋ vɛ̃, fãw bɛ n'a mɩ́ so a nɩsaal zɛb tʋ̃ɔ́ ɩ.
10A Sore dɔ̃ dem a,
bɛ na ƴɛ́r bɛ na ŋmɛr,
a bɛl ƴãw a, a Sore na be n a salom zu,
ɛ́ gbiwre mɛ̃ saa a,
bʋ̃ʋ n'ʋ vɛ̃, ʋlɛ n'ʋ dɩrɛ nɩ a tẽ-daa za a ƴɛ̀rʋ.
Ʋ na ɩ n a ʋ nãà ʋ kpɛmɛ,
ʋ na ɩ n a ʋ nɩ-kabra kpɛmɛ dɔwlɩ.»
11A yele á ŋá pùorí, a Ɛlkana tɩ lɛb'a kul a ʋ yir a Arama. Ɛcɛ a bie tɩ tone nɩ a Sore tome a bàwr-maalɛ Eli niŋé.
A Eli bidɛbr sãwna
12A Eli bidɛbr bɛ tɩ tɛr pɛr towtow ɛ, bɛ bɛ tɩ ŋmɛlɛ kaar a Sore ɩ. 13Bɛ na saa tɩ ɩ bàwr-maalbɛ a, nyɛ̃ lɛ bɛ na mɩ́ tɩ ɩrɛ a nɩbɛ zie a: nɩr mɩ́ wa cen bàwr maalʋ a, a bàwr-maalɛ tõ-tõ-bie mɩ́ tɩ tɛr'ɩ tɩr-jajaa na tɛr nyɩmɛ ata a, ƴãw a nũú taw ta n a nɛn na dʋwlɩ a pɛr. 14Ʋ mɩ́ tɩ tõ n a tɩr-jajaa a nɛn pʋɔ -- a sɩlba pʋɔ n'a o, a ziduwle pʋɔ n'a o, bɩɩ a lale pʋɔ n'a a -- ɛ́ bom nɛ za a tɩr-jajaa na cɔ̀r páw a, ʋ mɩ́ de ʋ na kʋ̀ a bàwr-maalɛ. À ŋá n'a a Eli bidɛbr tɩ ɩrɛ a Ɩsɩrayɛl nɩbɛ za na mɩ́ tɩ wa a Silo a zie.
15A mɩnɛ kãw mɩ̀, bɛ bɛ mɩ́ tɩ nyɩw#2:15 Nyɩw a nɛn-kãánɩ: Nʋɔr tɩ ƴãw na kɛ́ lãw-taa bàwr za na maalɛ a, bɛ de niwn nyɩw a nɛn-kãánɩ a Sore ƴãw. A Eli bidɛbr mɩ́ tɩ fɛr'a ƴãw bɛ de niwn ŋmãa kʋ̀ bɛ ɛ́ bãw nyɩw a Sore dem. Nyɛ̃ Lev 3.14-16. a nɛn-kãánɩ sɛr ɛ, ɛ́ a bàwr-maalɛ tõ-tõ-bie cen tɩ yel a sob nɛ na maalɛ a bàwr a: «Tɩr nɛn bɛ tɩ cɩ̃ɩ kʋ̀ a bàwr-maalɛ. Ʋ bɛ bɔbr a fʋ nɛn-bɩ̃ɩ ɛ, nɛn-kɛr'ʋ ʋ bɔbr.» 16A sob nɛ na maalɛ a bàwr a, wa yel: «Vɛ̃ bɛ nyɩw a nɛn-kãánɩ baarɩ, ɛ́ fʋ de al za fʋ na bɔbr a», ʋ mɩ́ yel'a: «Ʋ̃ʋ'hʋ̃! Kʋ̀ m a ƴɛrɛŋa, alɛ bɛ ɩ lɛ ɩ̃ na ír'a nɩ fãw!» 17À ŋá n'a a Eli bidɛbr yel-bier tɩ ɩ kpɛ̃ɛ bɛ tɛr tɛwr ɛ, a Sore niŋé, bʋ̃ʋ n'ʋ vɛ̃, bɛ bɛ tɩ ƴãwnɛ a bàwr de-kʋ̀b bome a nɩbɛ na tɩ kʋ̀rɛ a Sore a ɩ.
18A Samɩɛl na tɩ cãà ɩ pɔlbile a tɩ tone nɩ a ʋ tome a Sore niŋé. Lɛ̃ pɛn kparʋ n'ʋ ʋ mɩ́ tɩ su.
A Samɩɛl yir dem
19Yome za, a Samɩɛl mã mɩ́ tɩ sɛ n kpar-kpɛ̃ɛle tɩ kʋ̀ a ʋ bidɛb, a lɛn daar ʋlɛ nɩ a ʋ sɩr na mɩ́ tɩ cen a Silo kɛ́ bɛ tɩ maalɩ a yome-za-bàwr kʋ̀ a Sore a. 20A Eli mɩ́ tɩ ƴɛ̀r'ɩ nɔ-vla kʋ̀ a Ɛlkana nɩ a ʋ pɔw. Ʋ mɩ́ tɩ yel'a: «A Sore, ʋ sàw a pɔw ŋa dɔw nɩbɛ kʋ̀ b, lɩɛr'ɩ a ʋl ʋ na de kʋ̀ ʋ a.» Al pùorí, bɛ mɩ́ tɩ lɛb'a kul a Ɛlkana yir. 21A Sore tɩ maal'ɩ a Ana: ʋ tɩ tɛr'ɩ pʋɔ dɔw bidɛbr ata nɩ pɔwyaar ayi.
A Samɩɛl ʋl na tɩ cãà ɩ pɔlbile a tɩ kɛrɛ nɩ a Sore niŋé.
A Eli yere nɩ a ʋ bidɛbr
22A Eli tɩ kor'a tɩ kor. Ʋ tɩ wone na bɛ manɛ a lɛ a ʋ bidɛbr na tɩ ɩrɛ a Ɩsɩrayɛl nɩbɛ za zie a, ɛ́ mɩ̀ tɩ wõ kɛ́ bɛ ganɛ nɩ nɩ a pɔwbɛ na mɩ́ ɓã taa a tuor-taa pɛn-sɛw dɩ̃dɔrɩ́ a. 23Lɛ n'a ʋ tɩ yel bɛ à ŋá: «Bʋ̃ʋ n'ʋ so nyɩ ɩrɛ à à ŋá? Ɩ̃ wone nɩ a faa a nɩbɛ za na yere a nyɩ ƴãw a. 24Ɩ̃ bibiir i, nyɩ ta cãà ɩrɛ a lɛ ɩ! A nyɩ ƴɛ̀rʋ a Naaŋmɩn nɩ-bʋʋrɛ na ƴɛ̀rɛ ɩ̃ wone a, a bɛ maal'ɩ wob ɛ! 25Nɩsaal wa sãw ʋ nɩsaal-tɔ a, Naaŋmɩn na bãw nɩ a sãwna sob. Ɛcɛ nɩsaal wa sãw Naaŋmɩn a, ãa n'ʋ na tʋ̃ɔ́ bãw a sãwna sob?» Ɛcɛ, bɛ bɛ tɩ bɛr wõ a bɛ sãà ƴɛ̀rʋ ɛ. A Sore tɩ sɩrɩ na yel k'aa fɛr'a kɛ́ bɛ kpi.
26A Samɩɛl ʋl na tɩ cãà ɩ pɔlbile a, ʋ tɩ kɛrɛ na, ɛ́ ɩrɛ a pɛlɛ a Sore pʋɔ nɩ a nɩsaalbɛ pʋɔ.
A Eli nɩ a ʋ yir dem na nyɛ̃ nɩ dɔwrʋ
27Naaŋmɩn nɩr kãw tɩ wa na wa páw a Eli yel ʋ à ŋá: «À ŋá n'a a Sore yere: Ɩ̃ wul'ɩ ɩ̃ tʋɔra a fʋ sãàkʋm-kore, a lɛn daar bɛ na tɩ be a Faarawɔ̃ nuru pʋɔ a Eziptɩ a: 28Ɩ̃ kaa na ír a fʋ sãàkʋm, a Ɩsɩrayɛl dɔwlʋ za pʋɔ, k'ɩ̃ɩ ɩ ʋ ɩ a ɩ̃ bàwr-maalɛ, maalɛ a bagɛ kʋ̀rɛ mɛ̃ a ɩ̃ bàwr-maal-kuur zu, nyɩwr a tɩ-suur-zɔ̃-na-nyùur-vla-vla-a, suur a bàwr-maal-kara nyãa-kpale#2:28 Bàwr-maal-kara nyãa-kpale: A bàwr-maal-kara nyãa-kpale pʋɔ n'a a kpan-bie mɩ́ tɩ be, a Naaŋmɩn pʋ-tɩɛrʋ bãwfʋ ƴãw. a ɩ̃ niŋé. Ɩ̃ kʋ̀ n a fʋ sãàkʋm a Ɩsɩrayɛl nɩbɛ de-kʋ̀b bome za. 29Ɛ́ bʋ̃ʋ n'ʋ so nyɩ bɛ ƴãwnɛ a bàwr nɩ a de-kʋ̀b bome ɩ̃ na yel kɛ́ bɛ kʋ̀rɛ mɛ̃ a ɩ̃ kpɛb zie a? Bʋ̃ʋ n'ʋ so nyɩ 'wɔbr a ɩ̃ nɩ-bʋʋrɛ Ɩsɩrayɛl de-kʋ̀b bome nɛn-vɩɛlɩ 'wɔrɛ nɩ? Bʋ̃ʋ n'ʋ so fʋ ƴãwnɛ a fʋ bidɛbr zuo a mãa tɔr za? 30A na ɩ à ŋá a, a mãa Sore, a Ɩsɩrayɛl Naaŋmɩn, à ŋá n'a ɩ̃ yere kʋ̀rɛ fʋ: ɩ̃ tɩ yel'a k'aa fʋ yir nɩbɛ nɩ a fʋ dɔwlʋ nɩbɛ mɔ̃ mɩ̀ na ɩ n a ɩ̃ bàwr-maalbɛ kʋralɛ. Ɛcɛ ƴɛrɛŋa a, mãa n'ʋ yere: lɛ bɛ cãà n'a ɩ. Bʋ̃ʋ n'ʋ vɛ̃, ɩ̃ ƴãwnɛ nɩ bɛlɩ dem na ƴãwnɛ mɛ̃ a, ɛ́ bɛlɩ dem na bɛ ƴãwnɛ mɛ̃ a, bɛ mɩ̀ kʋ̃ nyɛ̃ ƴãwfʋ ɛ. 31Ɩ̃ kʋ̃ yaa kɛ́ ír a fʋ yir nɩ a fʋ dɔwlʋ nɩ-kpɛn za ɩ, lɛ n'a dɛb-nyãw kʋ̃ cãà a fʋ yir pʋɔ ɩ. 32Kʋralɛ n'a pʋl-vʋ̃ɔ na mɩ́ tɛr fʋ. Bom za na ɩrɛ nɩ vla a Ɩsɩrayɛl nɩ-bʋʋrɛ ƴãw, ɛcɛ a fʋ yir pʋɔ a, dɛb-nyãw kʋ̃ bãw be be ɩ. 33Ɛcɛ, ɩ̃ na cãà na ƴãw a fʋ nɩr kãw ʋ pɩɛlɩ a ɩ̃ bàwr-maal-kuur, k'aa nyuur nɩ a tɩɛrʋ kʋ b. Ɛ́ a fʋ yir nɩbɛ za na cɛ a, bɛ na kpi n a bɛ pɔ̀lʋ daar.»
34«A bãwfʋ n'ɩ a bom nɛ na na ta a fʋ bidɛbr ayi a, a Pɩnasɩ nɩ a Hɔfɩnɩ: bibi-been, bɛ na kpi n bɛ za ayi. 35Al pùorí, ɩ̃ na kaa na ír bàwr-maalɛ na bɛ lɛbr pùor a, a ɩ̃ ƴãw. Ʋ na ɩrɛ nɩ lɛ za ɩ̃ na bɔbr a. Ɩ̃ na kʋ̀ ʋ nɩ nɩbɛ na ɩrɛ bàwr-maalbɛ lɩɛrɛ taa bɛ tɛr bɛ́rʋ a, bɛ pɩɛlɩ a ɩ̃ nɩ-kabra. 36Lɛ n'a a fʋ yir nɩr na na cɛ a na mɩ́ cen tɩ lo gbĩ dume a bàwr-maalɛ pile, k'ʋʋ páw libi-cãpile bɩɩ dipɛ̃-ŋmale, ɛ́ yel ʋ à ŋá: “Ɩ̃ zɛlɛ fʋ na, kʋ̀ m tõ-nʋɔr kãw za, a bàwr-maalbɛ zie, ɩ̃ tʋ̃ɔ́ mɩ́ páw bʋ̃-dɩra dɩ”.»
La Bible en Dagara © Alliance Biblique du Burkina Faso, 2013.