1 Pɩɛr 3
3
Pɔwbɛ nɩ a bɛ sɩrbɛ yele
1Lɛ mɩ̀ n'a, a nyɩɩm pɔwbɛ, nyɩ sàwr a nyɩ sɩrbɛ nʋɔr, kɛ̀ bɛ mɩnɛ saa wa zawrɩ a Naaŋmɩn ƴɛ̀rʋ sàw deb a, bɛ̃ɛ sàw de ɛ́ nɩr bɛ ƴɛ̀r ƴɛ̀rʋ ɛ, a bɛ pɔwbɛ na ɩrɛ vla a ƴãw. 2A nyɩ cenu na vɩɛl ɛ́ nyɩ ƴãwnɛ nɩbɛ a, a nyɛ́b tɛwr na sɛw bɛ na. 3Nyɩ ta mɩ́ ɩ a nyɩ vɩɛlʋ ɩ ƴã-gan vɩɛlʋ ɛ: a zu nyɩ na mɩ́ 'lẽ gãgoli a, a tokpamɛ nɩ a salm-zɩɛ pɩ̃ɛmɛ, a dɛpaal bʋ̃-suuri. 4A nyɩ vɩɛlʋ, a ɩ a nyɩ nɩsaal ʋl na sɔwlɩ a vɩɛlʋ, su-nʋ̃ɔ̀ tɩɛrʋ nɩ ƴã-ɓaarʋ tɩɛrʋ vɩɛlʋ na bɛ tɛr sãwfʋ a. A vɩɛlʋ ŋa ɩ n bʋ̃-sɩza a Naaŋmɩn zie. 5A dãwdãw pɔw-son na tɩ sàwr a bɛ sɩrbɛ nʋɔr ɛ́ tɩɛrɛ a Naaŋmɩn a, à ŋá n'a a bɛ vɩɛlʋ tɩ ŋmɛ̃. 6À ŋá n'a a Saara tɩ ŋmɛ̃: ʋ tɩ sàwr'ɩ a Abraham nʋɔr, bʋɔlɛ ʋ ʋ sore. Nyɩ lɩɛb'ɩ a ʋ pɔwyaar nyɩ na ɩrɛ vla a ɛ́ bɛ sàw dɛ̃bɩ̃ɛ kãw za tɛr nyɩ a.
7Lɛ mɩ̀ n'a, a nyɩɩm sɩrbɛ, nyɩ lãw kpɩɛr'ɩ a nyɩ pɔwbɛ, ɛ́ bãwnɩ a bɛ na bɛ tɛr fãw a. Nyɩ ƴãwnɛ bɛ, nyɩɩm nɩ a bɛl nɛbɛ lãw a gbã-dɩ-bom na ɩ a nyɔ-vʋʋrʋ a Naaŋmɩn na kʋ̀ nyɩ a. Nyɩ ɩrɛ a lɛ kɛ̀ bom za ta piw a nyɩ puoru ɛ.
A wone tuo a yel-mɩŋa ƴãw
8Ɩ̃ pãa yere na kʋ̀rɛ nyɩ za, nyɩ lãw taa tɩɛrʋ: nyɩ sõwne taa a kpɩɛrʋ pʋɔ, nyɩ nɔnɛ taa mɛ̃ yɛbr a, nyɩ ɩ su-ɓaarʋ nɩbɛ, nyɩ siwre nyɩ tʋɔra. 9Nyɩ ta mɩ́ yáa a yel-faa san ɛ, bɩɩ yáa a zʋm san ɛ. Nyɩ nɩ̃ɛ mɩ́ ƴɛ̀r nɔ-vla, bʋ̃ʋ n'ʋ vɛ̃, maalʋ n'ʋ a Naaŋmɩn yel k'ʋʋ na kʋ̀ nyɩ na, a lɛn daar ʋ na bʋɔlɩ nyɩ a. 10Bɛ sɛb'a kɛ́:
«Nɩr wa bɔbr k'ʋʋ nɔnɛ a nyɔ-vʋʋrʋ a,
nɩr wa bɔbr kɛ́ a ʋ nyɔ-vʋʋrʋ bibie nʋmɛ a,
a fɛr'a k'ʋʋ maal tɛr a ʋ zɛl a ƴɛ̀r-faa ƴãw,
ɛ́ gù a ʋ nʋɔr a ziri ƴãw,
11k'ʋʋ gùr pùor cɔw a yel-faa ɛ́ ɩrɛ a vla,
k'ʋʋ mɩ́ bɔbr a ƴã-ɓaarʋ ɛ́ tuur a ʋ pùor.»
12Bʋ̃ʋ n'ʋ vɛ̃,
«A Sore jɩ́rɛ nɩ a nɩ-mɩn,
ɛ́ bɛrɛ wone a bɛ puoru.
Ɛcɛ a Sore mɩ́ ŋmɛlɩ nɩ kpaar cɔw
a yel-fa-maalbɛ.»#3:12 A kan-nɛ́ɛ 10 tɩ tɔ a 12 ƴãw a, nyɛ̃ Ssy 34.13-17.
13Nyɩmɛ wa tʋlɛ a vla ƴãw a, ãa n'ʋ na ɩ nyɩ faa? 14Ɛcɛ nyɩmɛ saa na nyɛrɛ dɔwrʋ a mɩnʋ zũú a, zu-nʋ̃ɔ̀ dem n'ɩ nyɩ. Nyɩ ta zɔrɛ a nɩbɛ towtow ɛ, ɛ́ ta tɛr dɛ̃bɩ̃ɛ kãw za ɩ. 15Ɛcɛ nyɩ ƴãwnɛ a Kɩrɩta na ɩ Sore a, a nyɩ socie pʋɔ. Ɛ́ a Naaŋmɩn ƴãw nyɩ na ƴãw a nyɩ tɩɛrʋ a, nyɩ cɔbrɩ gù a tɩɛrʋ ŋa manʋ nɩr za nãà wa sowre nyɩ a pɛr a. 16Ɛcɛ nyɩ tɛr su-nʋ̃ɔ̀ nɩ ƴãwfʋ a ʋ manʋ pʋɔ, lãwnɩ tɩɛrʋ na vɩɛl a, k'aa bom ʋl tɔr za ƴãw a nɩbɛ bɛl na yere kɛ́ nyɩ sãw nɩ a nyɩ kɩrɩta-nɩr nyɔ-vʋʋrʋ pʋɔ a, bɛ nyɛ̃ vĩ. 17Bʋ̃ʋ n'ʋ vɛ̃, fʋ̃ʋ ɩrɛ vla ɛ́ wone tuo, a Naaŋmɩn pʋ-tɩɛrʋ wa n'ʋ bɔbr a lɛ a, alɛ sa fʋ na na ɩrɛ a faa a. 18A Kɩrɩta tɔr za wõ n tuo daƴen daadaa a yel-bebe ƴãw, ʋl na ɩ nɩ-mɩŋa a. Ʋ wõ n tuo a nɩ-faar ƴãw, k'ʋʋ tɛr nyɩ cen nɩ a Naaŋmɩn zie. Bɛ kʋ ʋ na, ʋ kpi a ƴã-gan kũu, ɛ́ a Vʋʋrʋ Sõw ɩ ʋ lɛb vʋʋrɛ. 19A Vʋʋrʋ ŋa fãw zũú n'a ʋ tɩ sʋ̃ɔmɩ cen tɩ kanɩ nɩ a kpɩmɛ na be a gaso pʋɔ a, 20a pɛr lɛ kɛ́ a bɛlɩ dem na tɩ dãw zawrɩ a Naaŋmɩn ƴɛ̀rʋ sàwfʋ a lɛn daar ʋ na tɩ nyɔw a ʋ suur, a bibie al a Nowe na tɩ maalɛ a gbor-kpɛ̃ɛ a. Nɩbɛ blãlelɛ tɛwr nɛbɛ, bɛ za tɩ ɩ n nɩbɛ ani, bɛlɛ nɛbɛ tɩ kpɛ a gbor-kpɛ̃ɛ pʋɔ a kʋ̃ɔ fáa bɛ. 21A kʋ̃ɔ á ŋá tɩ ɩ n a suob na faarɛ nyɩ a ƴɛrɛŋa a bãwfʋ: ɛcɛ ƴã-gan dɛwr-so-bɛrʋ bɛ n'ɩ a suob ɛ, a suob ɩ n socir vɩɛlʋ bɛ mɩ́ zɛlɩ a Naaŋmɩn zie. A suob faarɛ nyɩ nɩ a Yeezu Kɩrɩta kũu-pʋɔ-lɛb-yibu zũú, 22ʋl na do a tẽ-vla pʋɔ tɩ be a Naaŋmɩn dʋrʋ lowr dɩrɛ naalʋ a malkɩ mɩnɛ zu, a salom zu kpɛnʋ dem nɩ a fãw dem zu a.
Currently Selected:
1 Pɩɛr 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
