1 Pɩɛr 2
2
A Kɩrɩta n'ɩ a kʋsɩɛr na tɩɛ a yir tɛr a
1A na ɩ lɛ a, a po-tuolu bʋʋrɛ za nɩ a ziri za, a libelibe bʋʋrɛ za, a nyuur nɩ a tɔ yel-faar manʋ a, nyɩ bɛr a za a lo. 2Nyɩ bɔbr a Naaŋmɩn ƴɛ̀rʋ bʋ̀r-kʋ̃ɔ tɛwr mɛ̃ bi-pɩɩlɛ a, k'ʋʋ tʋ̃ɔ́ mɩ́ ɩ nyɩ kɛrɛ tɩ páw a faafʋ. 3Bʋ̃ʋ n'ʋ vɛ̃, Mɛ̃ a lɛ a Sɛb-sõw na yel a: «Nyɩ lɛm'a nyɛ̃ a lɛ a Sore na nʋmɛ a#2:3 Nyɛ̃ Ssy 34.9..»
4Nyɩ taw pɩɛlɩ a Sore: ʋlɛ n'ɩ a kʋsɛ-mimir ʋl a nɩsaalbɛ na jɛ bɛr, ɛ́ a Naaŋmɩn zie ʋ ɩ kʋsɛ-kaa-íra nɩ kʋsɛ-yúor a. 5A nyɩɩm mɩ̀, nyɩ ɩ mɛ̃ kʋsɛ-mimie bɛ na ŋmaarɛ nɩ yir Vʋʋrʋ Sõw na kpɩɛr a. Nyɩ ɩ Naaŋmɩn bàwr-maal-son maalɛ tɩɛrʋ bàwr a Naaŋmɩn na na tʋ̃ɔ́ sàw de a Yeezu Kɩrɩta zũú a. 6Lɛ so bɛ sɛb a Sɛb-sõw pʋɔ kɛ́:
«Mãa n'ɩ ŋa n ƴãwnɛ dacĩ-goraa kʋsɩɛr
a Sɩyɔ̃ tẽw pʋɔ, kʋsɛ-yúor ɩ̃ na kaa ír a.
Ʋlɩ sob na de a ʋ tɩɛrʋ ƴãw a ʋ ƴãw a,
ʋ kʋ̃ nyɛ̃ vĩ ɛ.»#2:6 Nyɛ̃ Ɩza 28.16.
7A na ɩ lɛ a, nyɩɩm na sàw de a Naaŋmɩn a, nyɩmɛ so ƴãwfʋ. Ɛcɛ a bɛlɩ dem na bɛ sàw de a ƴãw,
«a kʋsɩɛr ʋl a yir-mɩɛrbɛ na ír lɔb bɛr a,
lɩɛb'ɩ a yir pɛr kʋsɩɛr», nɩ kɛ́:
8«Ɛ́ ɩ a kʋsɩɛr ʋl ƴãw bɛ na mɩ́ ŋmɩɛr gbɛ́ɛ a,
pìir kʋsɩɛr na ɩrɛ bɛ lore a#2:8 A kan-nɛ́ɛ 7 nɩ a 8 ƴãw a, nyɛ̃ Ssy 118.22, Ɩza 8.14.»
A bɛlɩ dem na bɛ sàw de a, bɛ ŋmɩɛr'ɩ gbɛ́ɛ a ʋ ƴãw, a bɛ na bɛ sàw de a Naaŋmɩn ƴɛ̀rʋ a zũú. Ɛ́ lɛ n'a a tɩ fɛr k'aa ɩ a bɛ zie.
9Ɛcɛ nyɩɩm a, nyɩ ɩ n «Nɩ-bʋʋrɛ bɛ na kaa ír a, Nãà bàwr-maalbɛ, nɩ-son bʋʋrɛ, nɩbɛ Naaŋmɩn na ya de a», kɛ́ nyɩ manɛ a ʋ tõ-vɩɛlɩ, ʋl na bʋɔlɩ nyɩ a lige pʋɔ yi wa n a ʋ cãà na bɛ tɛr tɔ a pʋɔ a. 10Nyɩɩm na bɛ tɩ ɩ a ʋ nɩ-bʋʋrɛ a, ƴɛrɛŋa a, nyɩ ɩ n a Naaŋmɩn nɩ-bʋʋrɛ. Nyɩɩm na bɛ tɩ páw a ʋ su-ɓaarʋ a, ƴɛrɛŋa a, nyɩ páw ʋ na.
Nyɩ ɩrɛ mɛ̃ Naaŋmɩn tõ-tõ-biir a
11Ɩ̃ nɩ-nɔnɩ za na ɩ mɛ̃ nɩ-tɔlɩ nɩ nɩ-sãanbɛ a, ɩ̃ zɛlɛ nyɩ na, nyɩ ciir a ƴã-gan nʋ̃ɔ̀-faar vʋla na mɩ́ zɛbr'ɩ nyɩ a. 12Nyɩ cere dẽdẽ a nɩ-bʋʋr-yoru sɔgɔ, lɛ n'a a bom ʋl ƴãw bɛ na yere kɛ́ nyɩ ɩ n nɩ-faar a, a nyɩ ɩ-vɩɛlɩ na caalɩ bɛ, bɛ danɛ a Naaŋmɩn a ʋ waa bibir.
13Nɩsaal za na dɩ nɩ-kpɛ̃ɛnʋ a, nyɩ sàwr a ʋ nʋɔr a Sore ƴãw: a Ʋrɔm tẽw na-kpɛ̃ɛ n'ʋ bɩɩ, nyɩ sàwr a ʋ nʋɔr, ʋ na so bom za a zũú. 14A Ʋrɔm tẽw na-kpɛ̃ɛ-lɩɛrbɛ nɛbɛ bɩɩ, nyɩ sàwr a bɛ nʋɔr, a na-kpɛ̃ɛ n'ʋ ír bɛ ƴãw kɛ́ bɛ mɩ́ dɔwrɩ a ɩ-fa-maalbɛ ɛ́ mʋʋrɩ a nɩ-vɩɛlɩ. 15A Naaŋmɩn bɔbr'a kɛ́ nyɩ ɩrɛ ɩ-vɩɛlɩ, k'aa bɛlɩ nɩbɛ nɛ na bɛ bãw bom, ɛ́ bɛ bãw yã a, ta mɩ́ nyɛ̃ ƴɛ̀rʋ ƴɛ̀r ɛ. 16Nyɩ vʋʋrɛ mɛ̃ nɩbɛ na so bɛ tʋɔra a, ɛcɛ nyɩ ta de a só-nyɩ-tʋɔra pàw nɩ a nyɩ po-to-ɩb ɛ, nyɩ ɩrɛ mɛ̃ Naaŋmɩn tõ-tõ-biir a. 17Nyɩ ƴãwnɛ a nɩsaalbɛ za, nyɩ nɔnɛ a nyɩ yɛbr, nyɩ zɔrɛ a Naaŋmɩn, nyɩ ƴãwnɛ a na-kpɛ̃ɛ.
Tõ-tõ-biir i, nyɩ sàwr a nyɩ nɩ-bɛrɛ nʋɔr
18Tõ-tõ-biir i, nyɩ sàwr a nyɩ nɩ-bɛrɛ nʋɔr nɩ zɔba yaga za, a bɛl na ɩ nɩ-vɩɛlɩ nɩ nɩsaal-bàalʋ mɩnɛ a, nɩ a bɛl na kpɛ po-tuo a. 19Bʋ̃ʋ n'ʋ vɛ̃, nɩr na sàw a Naaŋmɩn nʋɔr de a tuo na bɛ sɛw a, a ɩ n maalʋ. 20Nyɩmɛ mɩ́ wa sàw de a dɔwrʋ nyɩ na sãw a ƴãw a, bʋ̃ʋ yúor'ʋ nyɩ na páw a pʋɔ? Ɛcɛ nyɩmɛ mɩ́ wa ɩ a vla baarɩ ɛ́ cãà sàw de a dɔwrʋ a, a ɩ n maalʋ nyɩ páw a Naaŋmɩn zie. 21À á ŋá tɔr za ƴãw n'a bɛ bʋɔlɩ nyɩ. A Kɩrɩta mɩŋa mɩ̀ wõ n tuo a nyɩ ƴãw, a ɩ wulu ʋ kʋ̀ nyɩ kɛ́ nyɩ tuur a ʋ gbɛ́ɛ, 22ʋl na bɛ maalɩ yel-bier, ɛ́ ziri mɩ̀ bɛ yi a ʋ nʋɔrɩ́ a, 23ʋl bɛ na mɩ́ tɩ tʋ, ʋʋ bɛ tʋ yáa a san a, ʋl na mɩ́ tɩ wone tuo ɛ́ bɛ ŋmɩɛr ƴãwn nɩr za a. Ʋ nɩ̃ɛ na mɩ́ tɩ de ʋ tʋɔra bɛr kʋ̀ a Naaŋmɩn na maalɛ a ƴɛ̀rʋ nɩ mɩnʋ a, 24ʋl na tuo a tɩ yel-bebe a ʋ ƴã-gan pʋɔ a da-gara zu, kɛ́ tɩ kpi ta cãà pʋɔ yel-bier pʋɔ, ɛ́ vʋʋrɛ vʋʋrʋ na tu yel-mɩnʋ a, a ʋl natɩɛ na sanɩ nyɩ a. 25Nyɩ tɩ bɔrɛ na gʋɔr mɛ̃ píir a, ɛcɛ ƴɛrɛŋa a, nyɩ lɛb'a cen a sob nɛ na ɩ a nyɩ cɩ̃ɩnɛ nɩ a nyɩ kaarɛ a zie.
Currently Selected:
1 Pɩɛr 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
