Orom Sɛbɛ 2
2
A MƖNƐ A NAAŊMƖN NƆƆ GUORO A NƖBƐ ƳƐRƖ̃SƖ
1Ala-ɩ̃-sɔ a nɩ-bõ lɛ fʋ na ɩ ɩ̃ guoro a nɩrɛ kãw ƴɛrɩ̃, faa tɛrɛ ful-yifʋ jie wa, a-na-ɩ a bom ʋlɔ na saa a fʋ guoro a nɩrɛ ƴɛrɩ̃, fʋ mɩ lɩɛbʼã ƴɔnɔ a fʋ mɩ̃ɛ a ƴɛrɩ̃; a-na-ɩ a fʋ̃ʋ na guoro mɩ maala na a lɛ. 2Sɩ bɔ̃w na ka a Naaŋmɩn guoro na a bala na maala a yele ala ƴɛrɩ̃, tuure nɩ a yel-mɩ̃ɛ. 3Ala-ɩ̃-sɔ, a fʋna daba na guoro a bala na maala a yele ala ƴɛrɩ̃, ɩ̃ mɩ maala a lɛ, fʋ tɩɛr beeka fʋ na nyɛ na cɩ̃ɛfʋ jie a Naaŋmɩn ƴɛrɩ̃ guorfʋ bibir mɩ? 4Mu, fʋ mɛbɛ na a Naaŋmɩn yɛ̃ bɔ̃wfʋ na nyɩrɩ̃ ɩ a kpɛ̃ɛ, nɩ a ʋ su-nyɔwraa nɩ a ʋ su-ɓaar mɩɩ? Faa bɔ̃w ka a Naaŋmɩn yɛ̃-bɔ̃wfʋ tɔwrɔ fʋ na a fʋ na lɩɛb a fʋ yɛ̃ wa?
5Ɩ̃-cɛ a mɩnɛ a fʋ suur na kpɛmɛ, nɩ a mɩnɛ fʋ na ma bʋɔrɔ fʋ lɩɛb a fʋ yɛ̃ wa, fʋ dɔɔlɔ na a Naaŋmɩn su-tuo bine a fʋ mɩ̃ɛ ɩnɛ, gure nɩ a ʋ su-tuo bibir ʋlɔ a nɩbɛ na nyɛrɛ a mɩnɛ ʋ na guoro a ba ƴɛrɩ̃sɩ nɩ a ʋ torfʋ. 6A-na-ɩ a Naaŋmɩn na ya na a nɩbɛ ba jaa tu nɩ a ba tʋmɔ. 7A bala na ɩraa a cĩcĩ a tʋ̃-sono pʋɔ, bʋɔrɔ nɩ a yo-yifʋ, a ju-kpɛ̃ɛ nɩ a baafʋ na ma tɛrɛ a sãwfʋ wa, na pɔw na a baa-kɔ̃-tɛw. 8Ɩ̃-cɛ a bala na bʋɔrɔ a ba mɩ̃ɛ bɔb, na ba wõw nɩ a toor a yel-mɩ̃ɛ ɩnɛ, ɩ̃ wono a toor a maal-fãa ƴɛrɩ̃ pʋɔ, na pɔw na a Naaŋmɩn su-tuo nɩ a ʋ kpãafʋ. 9A won nɩ a tuo dɩfʋ na pɔw na a nɩrɛ lɛ na maala a bier; a Jufisɩ sɛr, nɩ a nɩ-bʋrɔ bʋrɔ ba jaa. 10Ɩ̃-cɛ a bala na maala a son na pɔw na a yo-yifʋ, a ju-kpɛ̃ɛ nɩ a pɩɛnfʋ, wa nyɔw nɩ a Jufisɩ, nɩ a nɩ-bʋrɔ bʋrɔ ba jaa jie go. 11A-na-ɩ a Naaŋmɩn ma ꞌwuoro a nɩbɛ kpee kpee wa.
12A bala ba jaa na ma bɔ̃w a Mowisi ƴɛr-kpɛn wa, ɩ̃ maala a fãa, ba na wɛ na, ɩ̃ aa ɩ a ana ƴɛr-kpɛn na saa wa. Ɩ̃-cɛ a bala na bɔ̃w a ƴɛr-kpɛn, ɩ̃ maal a fãa, a ƴɛr-kpɛn ala ba na de guorʼɩ̃ a ba ƴɛrɩ̃. 13A-na-ɩ aa ɩ a bala na bɔ̃w a ƴɛr-kpɛn ɩ̃ tor a Naaŋmɩn nii-sɔw wa, ɩ̃-cɛ a bala na jɔrɔ a ƴɛr-kpɛn, bala a Naaŋmɩn nɔɔ nyɛ a ba tor. 14A-na-ɩ a lɛdaar a nɩ-bʋrɔ bʋrɔ na ma saarɩ̃ bɔ̃w a Mowisi ƴɛr-kpɛn wa, ɩ̃ a ba maalfʋ wãa tuure a ana ƴɛr-kpɛn, ba miile na á ba tɛrɛ na a ƴɛr-kpɛn a ba pʋɔ. 15A-na-ɩ ba miilʼã a lɛ, áa ala a ƴɛr-kpɛn na bʋɔrɔ sɛbʼã a ba sube pʋʋr, ɩ̃ a ba mɩ̃ɛ bɔ̃wfʋ mɩ miile ba na a ʋna maalfʋ. A daar kãw a ba mɩ̃ɛ tɩɛrɩ̃sɩ ma ƴɔ̃w ba na a ƴɛrɩ̃, mɩɩ a yifʋ jie. 16A lɛ a na ta a ʋna bibirʼãa pʋɔ a Naaŋmɩn nɔɔ ƴɔnɔ a *Jeeju-Kirisi ʋ guoro a ƴɛrɩ̃sɩ ala na sɔɔlɩ̃ a nɩbɛ sube pʋʋr, tuure nɩ a ƴɛr-son ʋlɔ ɩ̃ na mana.
A JUFISƖ NƖ A ƳƐR-KPƐN ƳƐRƖ̃
17Ɩ̃-cɛ a fʋ̃ʋ, ba bʋɔlɔ fʋ na a Jufi nɩrɛ. Fʋ barʼɩ̃ na a ƴɛr-kpɛn nyãa, mɩ barʼɩ̃ a tɩɛrʋ̃ a Naaŋmɩn ɩnɛ. 18Fʋ bɔ̃w na a ʋ pʋ-tɩɛrʋ̃, a ʋ ƴɛr-kpɛn mɩ jaan fʋ na a fʋ de a ala na vɩɛlɛ. 19Fʋ tɩɛrʼã beeka fʋ̃ʋ ɩ jɔn-taara, mɩ ɩ nɩ a cãa a libe sɔɔlɩ̃sɔw. 20Fʋ lɛ tɩɛrʼã beeka fʋ̃ʋ ɩ a bala na ma bɔ̃w a bom wa mimiile, ɩ nɩ a bibiir jãjaana, a-na-ɩ a ƴɛr-kpɛn pʋɔ fʋ tɩɛrʼã beeka fʋ sɩrɩ̃ na tɛrɛ a bɔ̃wfʋ nɩ a yel-mɩ̃ɛ. 21Ala-ɩ̃-sɔ, a fʋ̃ʋ na jaana a nɩŋmɛɛ, mɩnɛ a ɩ a faa lɩɛb jaan a fʋ mɩ̃ɛ wa? A fʋ̃ʋ na ma hiere kʋrɔ a nɩbɛ a ba taa jure wa, ɩ̃ bõ ɩ a fʋ jure? 22A fʋ̃ʋ na ma yele a nɩrɛ ʋ taa wa gana nɩ pɔw kpee wa, ɩ̃ bõ ɩnɛ fʋ ma lɛ maal? A fʋ̃ʋ na ma kpɛrɛ a tɩbɛ, ɩ̃ bõ ɩ a fʋ ma lɛ kpɛ a tɩɩb diem jure. 23A fʋ̃ʋ na bar a tɩɛrʋ̃ a ƴɛr-kpɛn ɩnɛ, ɩ̃ bõ ɩnɛ fʋ sãw a ƴɛr-kpɛn, sãw nɩ a Naaŋmɩn yuor a lɛ? 24A mɩnɛ a Naaŋmɩn Sɛbɛ na yel: “A nyɩmɩ saa a nɩ-bʋrɔ bʋrɔ kpɛrɛ a Naaŋmɩn.”
25A fʋ̃ʋ jɔrɔ a ƴɛr-kpɛn, a fʋ yʋɔr ŋmaafʋ ɩ na bom. Ɩ̃-cɛ a fʋ̃ʋ ma jɔrɔ a ƴɛr-kpɛn wa, ɩ̃ saarɩ̃ ŋmaa a yʋɔr, a wɔ̃ na taa nɩ faa mɩ ŋmaa wa. 26Ɩ̃ a bala na ma ŋmaa a yʋɔr wa, ɩ̃ jɔrɔ a ƴɛr-kpɛn, a Naaŋmɩn kɔ̃ de ba a ba wɔ̃ taa nɩ a bala na ŋmaa wa? 27A ʋlɔ na ma ŋmaa a yʋɔr a ɩ̃gan buur pʋɔ wa, ɩ̃ jɔrɔ a ƴɛr-kpɛn, ʋ guorʼã a fʋ̃ʋ na ma jɔrɔ a ƴɛr-kpɛn wa ƴɛrɩ̃, a ala saarɩ̃ ɩ fʋ ŋmaa na a yʋɔr ɩ̃ mɩ tɛrɛ a ƴɛr-kpɛn sɛbɛ.
28A ʋlɔ na sɩrɩ̃ ɩ a Jufi nɩrɛ ma ɩ a ʋlɔ ba na nyɛ nɩ a mimie tɛw wa, ɩ̃ a ʋ yʋɔr ŋmaafʋ na ma mɩ ɩ a ʋ ɩ̃gan buur tɛw wa. 29A ʋlɔ na sɩrɩ̃ ɩ a Jufi nɩrɛ ɩ na a ʋlɔ a Naaŋmɩn na nyɛ ʋ mɩ ŋmaa a yʋɔr a ʋ suur pʋɔ. A ʋ yʋɔr ŋmaafʋ yi na a Naaŋmɩn Sɩɛ jie, ɩ̃ a kɔ̃ ɩ a ʋlɔ na yi a ƴɛr-kpɛn sɛbɛ pʋɔ wa. Aa ɩ a nɩbɛ jie a nɩ-lɛ ma pɔw a ʋ pɛwfʋ wa, ɩ̃-cɛ a Naaŋmɩn jie ʋ.
Currently Selected:
Orom Sɛbɛ 2: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
