1 Kɔrɛ̃tɩ Sɛbɛ 9
9
A ALA NA SƐW NƖ A NƖ-TƲNAA A MAALFƲ
1A maa, maa tɛrɛ sɔr na maal a bom lɛ ɩ̃ na bʋɔrɔ wa mɩɩ?
Maa ɩ *nɩ-tʋnaa wa mɩɩ? Maa mɩ nyɛ a sɩ Nɩ-kpɛ̃ɛ *Jeeju wa mɩɩ? Ɩ̃ a nyɩmɩ, nyaa ɩ a wɔmɔ ala ɩ̃ na pɔw a Nɩ-kpɛ̃ɛ tʋmɔ pʋɔ wa mɩɩ? 2A ala ɩ maa ɩ nɩ-tʋnaa a nɩŋmɛɛ jie wa, ɩ̃-cɛ a nyɩ jie ɩ̃ ɩ na nɩ-tʋnaa. A mɩnɛ nyɩ na lɩɛb ɩ a Nɩ-kpɛ̃ɛ ben, a miile na á ɩ̃ sɩrɩ̃ na ɩ a nɩ-tʋnaa.
3Nyɛ a ala ɩ̃ na tɛrɛ yele a bala na hũhune ma: 4Saa tɛrɛ sɔr na de a ala sɩ na dɩrɛ, nɩ a ala sɩ na nyuure a sɩ tʋmɔ ɩnɛ wa mɩɩ? 5Saa mɩ tɛrɛ sɔr na tɛrɛ pɔw na ɩ a popuoro yʋɔrɔ nɩ, a mɩnɛ a *nɩ-tʋnɩsɩ ŋmɛɛ, a Nɩ-kpɛ̃ɛ yɛɛr, nɩ a Pɩɛr na ma maala wa mɩɩ? 6Mɩɩ a maa nɩ a Banabasɩ tɛw ɩ̃ sɛw na tʋnɔ a tʋmɔ pɔwrɔ a sɩ dɩb? 7Sɔdaal-buor ɩ̃ dãa ya a ʋ mɩ̃ɛ a sɔdaalsɩ tʋmɔ pʋɔ? Ala ɩ̃ dãa sɛl tɩɛ ɩ̃ ma lɛ ꞌwɔbɔ a ʋ wɔmɔ wa? Mɩɩ ala ɩ̃ dãa cɩɩnɛ dʋn ɩ̃ ma lɛ pɩɛnɛ a bʋrɩ̃ wa?
8Nyɩ taa tɩɛr bɔ̃w ka a ala na tara a nɩbɛ sɔ̃w tɛw ɩ̃ tɔɔ ƴɛrɛ wa. A *Naaŋmɩn ƴɛr-kpɛn ma mɩ yel a lɛ wa mɩɩ? 9A-na-ɩ a sɛbʼã a Mowisi ƴɛr-kpɛn pʋɔ: “Taa lũ a naab ʋlɔ nʋɔr pɔw fʋ na ƴɔ̃w ʋ ŋmeere fʋ a ci wa.” A Naaŋmɩn tɩɛrɛ nɩ na nii mɩɩ? 10Aa ɩ a sɩmɩ tɛw ɩnɛ ʋ yele wa? Ɔɔ, a ɩ na a sɩmɩ ɩnɛ ba sɛb. A sɛw na a ʋlɔ na kʋɔrɔ a puo nɩ a ʋlɔ na ŋmeere a ci, ba tʋnɔ tɩɛrɛ nɩ a ala ba na pɔwrɔ, 11A sɩmɩ na dãa bʋr a sɩɛ bom a nyɩ jie, a lɛ ɩ na bõ-kpɛ̃ɛ a ala ɩ̃ ɩ sɩ pɔwrɔ na yele a nyɩ jie mɩɩ? 12A ala ɩ̃ ɩ a ŋmɛɛ tɛrɛ na a sɔr diere a nyɩ yele, saa tɛrɛ sɔr gãw ba wa mɩɩ?
Ɩ̃-cɛ sɩ barʼã a ʋna sɔr. Sɩ sɔw na a yele a jaa a mɩnɛ sɩ kɔ̃ wa var a *Kirisi ƴɛr-son bar wa. 13Nyɩ bɔ̃w na bɔ̃w ka a bala na tʋnɔ a Naaŋmɩn puor-yir kpɛ̃ɛ pʋɔ, a be ba ma pɔw a ba dɩb. A bala na mɩ ɩ a Naaŋmɩn baar-lorbo, a baar lofʋ jie ba mɩ dɩrɛ. 14A lɛ ʋ mɩ, a Nɩ-kpɛ̃ɛ mɩ ƴɔ̃w na a bala na hiere a ʋ ƴɛr-son á bá mɩ pɔwrɔ a ba dɩb a ala ɩnɛ.
15Ɩ̃-cɛ a maa, maa de bom kãw wa. Ɩ̃ maa sɛb a sɛbɛ na bʋɔrɔ nyɩ ma kʋ ma wa. A kũu sa ma na gãw a ana yele defʋ. Nɩrɛ ma be na vara ma a ʋna yo-bɔfʋ bara wa. 16A Naaŋmɩn ƴɛr-son ƴɛrfʋ ma ɩ ma yo-bɔfʋ wa, ɩ̃ fɛraa ɩ̃ fɛrɛ ma, a-na-ɩ a maa ma ƴɛr a ƴɛr-son kʋ a nɩbɛ wa, a na ɩ ma na nabier. 17A ala dãa ɩ a maa vɛl ir a ʋna tʋn, ɩ̃ naa ma de na yar. Ɩ̃ aa ɩ maa ɩ̃ vɛl ir wa; *yel-ꞌwuoro ba ƴɔ̃w ma ɩ̃ ɩ. 18Ɩ̃ bõ ɩ̃ na ɩ a ɩ̃ yar? A ɩ na ɩ̃ ƴɛrɛ a Naaŋmɩn ƴɛr-son a pɔrɔ kʋrɔ a nɩbɛ, kɔ̃ diere nɩ a yele ala na dãa sɛw nɩ ma a ƴɛr-son ƴɛrfʋ ɩnɛ wa.
19Ɩ̃ sɔ na a ɩ̃ mɩ̃ɛ. Maa ɩ nɩrɛ kãw gbãgbaa wa, ɩ̃-cɛ ɩ̃ de na a ɩ̃ mɩ̃ɛ lɩɛb ɩ a nɩbɛ ba jaa gbãgbaa, a mɩnɛ ɩ̃ na tʋɔ nyɩrɩ̃ pɔw a nɩbɛ kʋ a Kirisi. 20A lɛdaar ɩ̃ na ma ta a Jufisɩ sɔ̃w, ɩ̃ ma lɩɛbʼã wɔ̃ taa nɩ a Jufi nɩrɛ, a mɩnɛ ɩ̃ na tʋɔ tɔw ba ƴɔ̃w a Kirisi pʋɔ. A ala saarɩ̃ ɩ maa be a Mowisi ƴɛr-kpɛn pʋɔ wa, ɩ̃-cɛ ɩ̃ ma lɩɛbʼã a ɩ̃ mɩ̃ɛ wɔ̃ taa nɩ ɩ̃ be na a ana ƴɛr-kpɛn pʋɔ, a mɩnɛ ɩ̃ na tʋɔ pɔw a bala na jɔrɔ a ana ƴɛr-kpɛn. 21A maa wa mɩ ta a bala na ma bɔ̃w a Mowisi ƴɛr-kpɛn wa sɔ̃w, ɩ̃ ma mɩ lɩɛbʼã wɔ̃ a ba kaarɩ̃, a mɩnɛ ɩ̃ na tʋɔ pɔw ba. A lɛ ma bʋɔrɔ a yel á maa jɔrɔ a Naaŋmɩn ƴɛr-kpɛn wa, a-na-ɩ ɩ̃ be na a Kirisi ƴɛr-kpɛ̃w pʋɔ. 22A maa Wa mɩ ta a bala ƴɔ̃w-nyãa na pab jie, ɩ̃ ma mɩ barʼã a ɩ̃ ƴɔ̃w-nyãa ʋ mɩ pab, a mɩnɛ ɩ̃ na tʋɔrɔ pɔwrɔ ba. A nɔhɔ̃ ɩ̃ ma de na a ɩ̃ mɩ̃ɛ bar a yele a jaa pʋɔ, a nɩbɛ ba jaa jie, a mɩnɛ ɩ̃ na tʋɔ nyɛ a sɔr faa a nɩbɛ ŋmɛɛ. 23Ɩ̃ maala na a yele a jaa a nɔhɔ̃ a Naaŋmɩn ƴɛr-son ɩnɛ, a mɩnɛ ɩ̃ na mɩ tʋɔ pɔw a ʋ yel-sono.
24Nyɩ bɔ̃w na bɔ̃w ka a bala na ma dãwna taa, ma jɔrɔ na ba jaa, ɩ̃-cɛ bõ-ƴen tɛw ɩ̃ ma pɔw a bom. Ala-ɩ̃-sɔ, nyɩ́ mɩ jɔrɔ a lɛ na tʋɔ pɔw a bom. 25A bala na cɔɔrɔ a ba mɩ̃ɛ a dãw-taa ɩnɛ ma bɔ̃w na tɛrɛ a ba mɩ̃ɛ a yele a jaa pʋɔ. Ba ma maala na a lɛ na tʋɔ pɔw a dãdãw sʋbɔ sapi na maa yaarɩ̃ sãw wa. Ɩ̃-cɛ a sɩmɩ, a sapi ʋlɔ sɩ na jɔrɔ wa pɔwrɔ na be na be daadaa kpoolaa. 26Ala-ɩ̃-sɔ ɩ̃ mɩ kpo ƴɔ̃w a bom ʋlɔ ɩnɛ ɩ̃ na jɔrɔ, ɩ̃ ma mɩ ŋmeere bara a vuo pʋɔ wa. 27Ɩ̃-cɛ ɩ̃ kpowro na a ɩ̃ ɩ̃gan tɛrɛ nɩ ʋ cĩcĩ, a mɩnɛ a lɛdaar ɩ̃ na hiere kʋrɔ a nɩbɛ, a Naaŋmɩn kɔ̃ wa jaar ma bar wa.
Currently Selected:
1 Kɔrɛ̃tɩ Sɛbɛ 9: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
