1 Kɔrɛ̃tɩ Sɛbɛ 10
10
A SƖ MƖ̃Ɛ TƐRƐFƲ A TƖBƐ YELE JIE
1Yɛɛr, ɩ̃ buɔrɔ na nyɩ cãa bɔ̃w nɩ a ala na dãa ta a sɩ sãa-kʋnbɔ a Mowisi na dãa tɛrɛ a wɛkar pʋɔ. Ba jaa dãa na be a dɔ̃dɔrɩ̃ma pulẽe, ɩ̃ ba jaa mɩ gãw na a Man Jɩ̃ɛw#10.1 A Man Jɩ̃ɛw ʋlɔ ɩ na a man ʋlɔ a Mowisi na dãa maal a kʋ̃ɔ ʋ ŋma, ɩ̃-cɛ a Ɩsɩrayɛl nɩbɛ gãw a ba Ejibti-tẽw yifʋ daar.. 2A ba jaa mʋrʼã a kʋ̃ɔ a dɔ̃dɔrɩ̃ma nɩ a man pʋɔ lɩɛb ɩ Mowisi nɩbɛ. 3Ba jaa mɩ dɩ na a dɩb ala a Naaŋmɩn Sɩɛ na kʋ ba, 4ɩ̃ mɩ nyu a Naaŋmɩn Sɩɛ kʋ̃ɔ ba jaa. A-na-ɩ ba nyu na a kʋ̃ɔ ʋlɔ na dãa yi a Naaŋmɩn Sɩɛ kusɩpan pʋɔ na dãa tuure ba, ɩ̃ a ʋna kusɩpan naa dãa na ɩ a *Kirisi. 5Ɩ̃-cɛ a ba pʋɔ, a yaw jie maalfʋ ma dãa nʋmɔ a Naaŋmɩn wa; ala-ɩ̃-sɔ a ba fa lo kpi a wɛkar pʋɔ.
6A ana yele naa ta na a lɛ na tʋɔ ɩ sɩ bõ-miilaa a sɩ taa ɩ a yel-fã-ꞌlaarba a mɩnɛ ba na dãa wɔ̃ wa. 7Nyɩ taa mɩ ɩ a tɩb-puorbo a mɩnɛ a ba ŋmɛɛ na dãa wɔ̃ wa, a mɩnɛ a Naaŋmɩn Sɛbɛ na yel: “Aa nɩbɛ bala jɛ na dɩ nyu nɩ, ɩ̃ pãa ir ɓolo sɛbɛ nɩ a bɩnɛ.” 8Sɩ taa mɩ maala a burbur gana nɩ taa a ba ŋmɛɛ kaarɩ̃ wa. A bala na maal a lɛ, nɩbɛ ture lɩjɛrʼɩ̃-ata lo na kpi a bibir bõ-ƴen. 9Sɩ taa mɩ bɩɩrɛ a Nɩ-kpɛ̃ɛ a mɩnɛ a ba ŋmɛɛ na dãa maal, a wɩɩr dʋn ba kú wa. 10Nyɩ taa mɩ hũhune a Naaŋmɩn a mɩnɛ a ba ŋmɛɛ na mɩ dãa maal, a Wɛwɛlɛ wɛl ba bar wa.
11A ala a jaa ta ba na, na ɩ sɩ bõ-miilaa ba na mɩ sɛb kpãkpana nɩ a sɩmɩ na be a tẽw baarfʋ daar. 12Ala-ɩ̃-sɔ, a ʋlɔ na tɩɛr bɔ̃w ka ʋ ɩraa na cĩcĩ, ú bɔ̃w ɩraa kɔ̃ wa lo wa. 13Bɩɩrfʋ kãw ma ta nyɩ ɩ̃ a ala ma ɩ a ala na ma ta a nɩbɛ ba jaa ʋ wa. Naaŋmɩn ɩ na dẽdẽ. ꞌWaa sɔwrɔ a bɩɩrfʋ ʋlɔ na gãw nyɩ ʋ tara nyɩ wa. Ɩ̃-cɛ a bɩɩrfʋ wa ta nyɩ, ʋ na miil nyɩ na a yifʋ jie, ku nɩ nyɩ a kpɛ̃w ʋlɔ nyɩ na ɩrɛɛ nɩ.
14Ala-ɩ̃-sɔ ɩ̃ badɛɛ, nyɩ́ taw yi a tɩbɛ pʋɔ. 15Ɩ̃ ƴɛrɛ nɩ nyɩ na a mɩnɛ nyɩ na ɩ a yɛ̃-tɛrbɛ. Nyɩ́ pɛ a ala ɩ̃ na yele je kãa. 16A ŋman ʋlɔ sɩ na mɔɔ nyuure nɩ, pɛwrɛ nɩ a Naaŋmɩn a ʋ maal-vɩlaa ɩnɛ, maa lɩɛb sɩ a sɩ ɓã taa ɩ bõ-ƴen nɩ a Kirisi a ʋ jɩ̃ɩ ɩnɛ wa? Ɩ̃ a buru sɩ na mɔɔ ŋmara poro, maa mɩ lɩɛb sɩ a sɩ ɓã taa ɩ bõ-ƴen nɩ a Kirisi a ʋ ɩ̃gan ɩnɛ wa? 17A mɩnɛ sɩ na saarɩ̃ waa, ɩ̃ tɛrɛ a bur-bõ-ƴen tɛw, a lɩɛb sɩ na a sɩ ɩ ɩ̃gan bõ-ƴen, a-na-ɩ sɩ jaa ma po na a ʋna bur-bõ-ƴen.
18Nyɩ́ tɩɛr a Ɩsɩrayɛl puorfʋ tʋmɔ nyɛ. A bala na dɩrɛ a baar lofʋ yele maa ɓã taa ɩ bõ-ƴen nɩ a Naaŋmɩn na sɔ a baar-lofʋ jie wa? 19Bõ ɩ̃ bʋɔrɔ ɩ̃ yel a lɛ? Áa baar-lo-bom ɩ na bom, mɩɩ áa tɩɩb ɩ na bom mɩɩ? 20Aa ɩ lɛ ɩ̃ yel wa. Ɩ̃ ɩ̃ yelʼã á ana yele a tɩbɛ deme na ma loro nɩ a baar, á aa ɩ Naaŋmɩn ba ma kʋrɔ wa; a kɔ̃tɔnsɩ ba ma kʋ. Ɩ̃ maa bʋɔrɔ nyɩ ɩ bõ-ƴen nɩ a kɔ̃tɔnsɩ wa. 21Nyaa tʋɔrɔ nyuure nɩ a Nɩ-kpɛ̃ɛ ŋman nɩ a kɔ̃tɔnsɩ ŋman wa. Nyaa mɩ tʋɔrɔ tune a Nɩ-kpɛ̃ɛ ŋman pʋɔ, nɩ kɔ̃tɔnsɩ ŋman pʋɔ wa. 22Mɩɩ sɩ bʋɔrɔ sɩ maal a Nɩ-kpɛ̃ɛ nyuur ʋ ir? Nyɩ tɩɛrʼã beeka sɩ tɛrɛ na kpɛ̃w gãw ʋ mɩɩ?
NYƖ́ MAALA A YELE A JAA KÃKARA NƖ A NAAŊMƖN
23A ŋmɛɛ ma yelʼã á baa ciire bom maalfʋ wa. Sɩrɛ jaa ʋ, ɩ̃-cɛ aa ɩ a yele a jaa ɩ̃ vɩɛlɛ a maalfʋ wa. Bom ma ciire maalfʋ ʋlɔ wa, ɩ̃-cɛ aa ɩ a yele a jaa ɩ̃ sũono a nɩbɛ a ba karɛɛ wa. 24Nɩrɛ kãw ʋ taa maala a ala na nʋmɔ a ʋ mɩ̃ɛ wa, ɩ̃-cɛ ú maala a ala na nʋmɔ a ʋ tɔ sʋbɔ.
25Nyɩ tɛrɛ na sɔr na ŋmaa a nɩn lɛ ba na daara a daa pʋɔ, kɔ̃ bʋɔrɔ nyɩ bɔ̃w a nɩn ʋlɔ yifʋ jie a nyɩ tɩɛrɩ̃sɩ damfʋ ɩnɛ wa. 26A-na-ɩ a Naaŋmɩn Sɛbɛ yelʼã: “A Nɩ-kpɛ̃ɛ ɩ̃ sɔ a tẽw, nɩ a yele a jaa na be a ʋ juu.”
27A nɩrɛ ʋlɔ na ma puoro wa wa bʋɔl fʋ dɩb ɩnɛ a fʋ wa sɔw cen, dɩ a bom lɛ ʋ na bine a fʋ nii-sɔw, kɔ̃ soor ʋ bom kãw a fʋ tɩɛrɩ̃sɩ damfʋ ɩnɛ wa. 28Ɩ̃-cɛ a nɩrɛ wa yel fʋ á tɩɩb nɩn ʋ, taa wa ꞌwɔbɔ wa. A ʋlɔ na yel, nɩ a ʋ tɩɛrʋ̃ damfʋ ɩnɛ, fʋ sɛw na jaar. 29Aa ɩ a fʋ̃ʋ mɩ̃ɛ tɩɛrʋ̃ damfʋ ɩnɛ wa, ɩ̃-cɛ a ʋlɔ na yel fʋ ɩnɛ ʋ.
Nyɩ na tʋɔ na soor ma: “A ala ɩ̃ ɩ ɩ̃ tɛrɛ na a sɔr maala a bom a lɛ, bõ ɩnɛ a nɩrɛ na lɛ tʋɔ koro ma a ʋ tɩɛrɩ̃sɩ damfʋ ɩnɛ? 30A ala ɩ̃ ɩ ɩ̃ puorʼã a Naaŋmɩn ɩ̃ dɩrɛ a bom, bõ ɩnɛ a nɩrɛ na lɛ koro ma a ala ɩ̃ na sʋɔr a Naaŋmɩn ƴɔ̃w ɩ̃ dɩrɛ ɩnɛ?”
31Ala-ɩ̃-sɔ, a nyɩmɩ dɩrɛ a dɩb, mɩɩ a bom nyɩ nyuure, mɩɩ a bom jaa lɛ nyɩ na maala, nyɩ́ maala kʋrɔ nɩ a Naaŋmɩn a ju-kpɛ̃ɛ. 32Nyɩ taa wa maala bom a wa cɩɛrɛ a Jufisɩ, mɩɩ a nɩ-bʋlsɩ, mɩɩ a Naaŋmɩn-puorbo wa. 33Nyɩ́ maala a ɩ̃ kaarɩ̃. Ɩ̃ bʋɔrɔ na ɩ̃ maala a yele a jaa a na nʋmɔ a nɩbɛ ba jaa. Maa bʋɔrɔ ɩ̃ mɩ̃ɛ bom wa, ɩ̃ ɩ̃ bʋɔrɔ na a nɩbɛ ba jaa son, a mɩnɛ a ba na tʋɔ pɔw a faafʋ.
Currently Selected:
1 Kɔrɛ̃tɩ Sɛbɛ 10: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
