Barua ya Varome 14
14
1Ulya akee wa ikusura yaangu wwarień, manya mutaumisie makusaṛo amwi. 2Ulya umwi akusurie sheeli foose filiwaa, na ungi akee ntanyari akuliyaa nyań da. 3Ulya akee ilya foose manya atabiṛe ulya atakee ilya foose ndi. Na ulya atakee ilya foose manya ataumisie ulya akee ilya foose ndi. Amu Iṛuva ammuwaria nae. 4Eewe ni iwe i kuumisiaa iketi lya ungi? Kwakooya aselele ana awa, foose akee iṛundia nndumi wamwi da. Kake aseṛeeswaa, amu nndumi amakii imwimboo. 5Nndu umwi akee isaua mikonu kiindi kari ka mikonu kaiindia, ungi akee iindia mikonu yoose. Kilya nndu allolia ifo nrimiń wamwi atanie utomari ikilatia. 6Ulya akee iindia mikonu aindia Nndumi nayo. Ulya akee ilya foose afiliya Nndumi, amu akee yaana Iṛuva. Na ulya atakee ilya foose atania Nndumi, nae akee yaana Iṛuva. 7Amu eefo nndu kari keru akuwaria muu wamwi ye muni ndi ana eefo akufiya kwa miimu yamwi ndi. 8Kyeeri tikee na muu ni Nndumi tikee indundia nato. Kyeeri tikee ifwa ni Nndumi tikee imfiya. Kyasia tikakaa na muu ana tikafwa ise tikee va Nndumi. 9Amu kwa ikyo nkyo Kristo afiya na iva lingi na muu, amu ashilie vafu na veefo na muu. 10Kake iwe naare? Nkiki ili kukee yumisia mwanamae wafo? Ana iwe naare? Nkiki ili kwilie mwanamae wafo? Amu ise ti woose tisalalaa mbele ya kifumbi kya uumisio kya Iṛuva. 11Amu nkitisiṛe: ”Nndumi arera: Niń nkee na muu, nri toose tikufwiṛiaa mbele yakwa na ngyulumi toose tirambuaa Iṛuva”. 12Kyasia nkuro, nndu woose weru asalaliaa kyamwi ye muni kisanguń kya Iṛuva.
13Kyasia manya titaengeṛie yumisiana, kake nkisha nndu akwime eetanaa kindo kya iteveta mwanamae ana kya intuula. 14Niishi, lingi nammanyiswa ni Nndumi Yesu sheeli kiifo kindo kiwore teve kwa kimia kyayo ndi. Kake ito ye alolie sheeli kindo nkikasha, kwamwi ye kindo kyo nkikasha. 15Na mwanamae wafo kankooya unari kiimba kya shoonga yafo, kwallakana na ikunda. Kiimba kya shoonga yafo manya kutakasheese nndu ulya ye Kristo andemfiya. 16Kyasia usha lo lwanu lwa kwa Iṛuva manya lutarumwa vvandu. 17Amu umangi lwa Iṛuva mmiliye ana minuiye ndi, kake ni usumani na unambwe na ifura fikee iniingwa mMumuyo Nsongori. 18Amu ulya akee iṛundia Kristo na findo fo akee isenya Iṛuva, lingi airikio̱o̱ vvandu. 19Kyasia kwakooya nkuro tilatie findo finnde unambwe na findo feelekiaa ilungana ti veni na ti veni. 20Kiimba kya shoonga manya ikasheesa mashoṛa a Iṛuva! Dede foose mfisha, kake kwa nndu ulya alyaa kindo kinniingaa inunua kwamwi ye nkikasha. 21Nkisha ilea ilya nyama ana inwa wari ana itana kindo kyoose kilya kitevetaa mwanamae wafo. 22Ikusura lyo kukee nalyo va nalyo imanyeń lyafo mbele ya Iṛuva! Wwa ngoma nndu ulya atakuumisiaa ye muni imanyeń lyamwi kya kindo kilya eenkiirikiaa. 23Kake ulya alyaa akee na inunua amuumisio̱ sheeli awore ilomi, fulya alya liteefo ikusura. Na uṛundi loose lutawore ikusura ni ireko.
Currently Selected:
Barua ya Varome 14: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
