Urambuyo lwa Yohane 14
14
1Lingi nndeshewa mmyorusie: Nalolia ngarina ilya iselele uroń lwa Sion alya udooṛo. Na andu emwi nayo veeiyoo vandu fiku iyana na fiku makumi aani na fiini veekee vatisiṛe irina lyayo na lya Nde yayo fisanguń fawo. 2Naita ununga luuka iṛuvewu sha iidina lya mira minini na sha ununga lwa kiṛuṛumu kinini. Na ngyununga to nndetiita tiikee sha ta veembi va ngyura vakee ikaba ngyura tawo. 3Nawo vakaimba ufina wiiya mbele ya kifumbi kya kimangi na mbele ya makindo alya aani na vasuṛi valya. Ana nta nndu andemakii ikulosha ufina lua kita valya fiku filya iyana na fiku makumi aani na fiini valya vandetaulwa na yutwa isangeń ndi. 4Iva wwo kitaare vamaambwa ukwe lwa waaisi, amu mfilana. Iva wwo vasoṛaa ngarina ii kundo koose yendaa. Iva vantaulwa ifo vanduń vave va mbele vatauywa Iṛuva na ngarina ii. 5Na kaniń kawo indekooywa-fo wongo ndi. Amu vawore nta ilomi ndi.
6Nań nalolia malaika ungi eerumbukaa karumbuka kari ka iṛu-vewu arie nrumi shisha ya miṛeṛe ya ikwanisia iwo vakee isangeń na vandu va masanga woose na makanika woose na mirerie na ngyufwari. 7Karera na ununga unini kanumbua: Eṛeeń Iṛuva na ińńinisa, amu kyeeri kya uumisio lwamwi kyansha, wwoyeń ye andetana iṛuvewu na isanga na nruva na miso a mira. 8Na malaika ungi wa kavili kallatia kanumbua: wawwa, wawwa Babeli muṛi uu ukee nnini, amu nto undenisa vandu va masanga woose mfinyo wa uvaave lwa waaisi lwayo. 9Na malaika ungi wa kararu kavalatia eereraa na ununga unini: Nndu woose afukiyaa ifisi lyo nri na fwana yayo na iwaria kiringisio kilya kisanguń kyamwi ana ukoń lwamwi 10ito anwaa mfinyo woore uvaave lwa Iṛuva utakee nsande na mura wifo umbateń lwa ituṛuka lyamwi, nae aliswaa ukiva na muro wa kibalabala na saiye ya ifiṛa uṛoo kisanguń kya vamalaika vasongori na kya ngarina ilya. 11Na musu wa mavaviso awo ufumbiaa kumande miṛeṛe. Nawo nta vakooyaa iwiiṛio muu kio na nsanyiń iwo vandeindia ifisi lyo na fwana yayo na ulya woose arie kiringisio kya irina lyayo ndi. 12Io wwo lulolikiaa utirishi lwa vasongori iwo vawore mavavaso a Iṛuva na ikusura Yesu.
13Naita ununga luuka iṛuvewu lwishiia: ”Tisiṛa: Vva ngoma vafu va vafwa veekusuraa Nndumi kuuka alli. Mumuyo anumbua: Ee vaimuye ngatara tawo. Fulya mitanie yawo iriani nawo“.
14Lingi nalla nalolia iṛumbe yeelwa. Na kwa ule ya iṛumbe lyo eeifoo umwi afwani nndu wa vandu. Eeworee uṛeto lwa saabu nrweń wamwi, na ukoń lwamwi eeworee nndo mwoi. 15Na malaika ungi kasomuka numbeń ya Iṛuva kavaanga na ununga unini ulya eekee rembo iṛumbeń lia eemwiaa: Ruma nndo wafo kwilule, amu kyeeri kya iilula kyansha. Iilula lya isanga lyamuuma. 16Na ulya eekee rembo iṛumbeń kaeeṛa nndo wamwi isangeń na isanga likailulwa. 17Na malaika ungi kasomuka ifo numbeń ya Iṛuva ikee iṛu-vewu, ito nae eeworee nndo mwoi. 18Na malaika ungi kasomuka ifo kiraa kya Nndumi kikai, ito eeworee finya ya ishilia muro. Nae kavaanga ulya arie nndo ulya mwoi na ununga unini eemwiaa: Ruma nndo wafo mwoi usheminya nunda ta misabibu, amu tammaa iviṛa. 19Malaika kakumba nndo wamwi isangeń kailula nunda ta misabibu ya isangeń katieeṛa iriniń lya ikamia ilyo inini lya ituṛuka lya Iṛuva. 20Irina lia lya ikamia likavario̱-vario̱ ifo wooṛo ya muṛi. Na usao lukasomuka ifo iriniń lya ikamia lukarwa kumande ngoveń ta kana ka farasi, lukamaa weendo lwa maili mayana avili.
Currently Selected:
Urambuyo lwa Yohane 14: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
