Barua ya Filemon 1
1
1Niń Paulo nkee mfinge kiimba kya Kristo Yesu. Ise na Timoteo mwanamae weru takwisana iwe Filemon nkunde weru kukee ndundi wa mashora andu emwi neese. 2Takwisana nawe Apia kukee mfwamae weru na Arikipo nseṛo uroe weru tikaisana na siṛi yo ikee numba yafo. 3Uwoo lukaa neeni na unambwe fuukie kwa Iṛuva Nde yeru na kwa Nndumi Yesu Kristo.
4Nkee yaana Iṛuva wakwa mikonu yoose niikukumbuaa fiterewoń fakwa. 5Amu neeta mboni ta ikunda lyafo na ikusura kukee nalyo lya ikuwara na Nndumi Yesu na vasongori woose. 6Na ikuterevia nkee ikuterevia, amu ikusura lyafo kukee iṛundia nalyo vengi lireeke uṛango lwa imanya kindo kyoose kisha kikee kweru na itifingia Kristo. 7Nkya dede noore ukyesi wiingi na ilembwalembwa nnu kiimba kya ikunda lyafo, fulya mirima ya vasongori yawwiiṛio̱ muu ni iwe mwanama.
8Kwa ikyo na akwaa noore mwaanya — nkee na Kristo — wa ikuvavasa kilya kyakuwara, 9kake llolie llyo ṅwana nkutereve kiimba kya ikundana nawe, amu niń Paulo nkee nndu nkuu alii na mfinge kiimba kya Kristo Yesu. 10Ili nkee kuri, nakutereva kya mwanakwa nndemwiria kifingioń kyakwa, yye Onesimo. 11Amu lya mbele andekusenya ndi, kake alii akwelekaa nnu iwe andu emwi nań. 12Yye muni nankuwiiṛia, amu ye nkimwi na ngoo yakwa. 13Amu niń niifuriee akaa kwakwa, amu ashiṛundie kifingioń kyakwa andu afo kya nrumi shisha. 14Kake nndekunda nta itana kindo kitaare kwamiirikia ndi, amu usha lwafo lutave nkya ikabiṛia, kake nkya mifurie yafo. 15Fulya eeba nkyo kiteveto kalakaniswa nawe kwa kiṛengo, amu kukaa nae lingi miṛeṛe, 16atakive sha iketi, kake ave kilanya ya iketi mmwanamaa nkunde. Kashivia nnu kuro niń na kya mmwasi akuviaa iwe akee wafo kwa wili na alii kava wafo na kari ka Nndumi. 17Kyasia kwakooya kulolie sheeli niń nkee kimwi nawe, wwarie sheeli nniń shi muni. 18Kake kwakooya andekuretia kindo ana kwakooya ni nsile wafo, ikyo kushitaalie niń. 19Nniń Paulo natisiṛa kwa uko lwakwa shi muni: Nniń ntaa. Nnumbuaa ntawore sile yafo ndi. 20Ee mwanama, nkooye mbusha kwafo nkee na Nndumi. Wiiṛia nrima wakwa muu kukee na Kristo.
21Nakutisiṛia niikusuraa windi lwafo. Niishi namanya sheeli kutanaa fa mmwasi kita ifi nkee irera. 22Na andu emwi na ifo kushisongosie andu nshekaa, amu kiimba kya fiterewo fanu mukooyaa bule ya ishilolia. 23Veefo vakwisana, ni Epafira akee mfinge andu emwi nań kiimba kya Kristo Yesu 24na Mariko na Aristariko na Dema na Luka vakee vaaroe vakwa.
25Uwoo lwa Nndumi Yesu Kristo lukaa na mirima yanu! Amen.
Currently Selected:
Barua ya Filemon 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
