Mariko 4
4
1Kabooka lingi ivalosha akee mbaai ya nruva. Syamu shiingi nnu vakakuumbia alya akai. Nae kaaṛukia ngalaveń kakaa rembo ifo nruveń. Na syamu ilya yoose iikee kundo kuumu mbaai ya nruva. 2Kavalosha findo fiingi na sumu. Neeli eeloshaa kavaia: Aranyiń! Nndu nremi akwimboo andeeṛa mbeu. 4Neeli eeṛaa, kiindi tikawa shień. Na ndee tikasha tikadola tikalya. 5Na tingi tikawa maweń ataare uteri wiingi. Imia tikamia lla kasa uteri lwikee waangu. 6Neeli mwi undevaa nnu, tikanaa, na fulya mirarii itaolokye si tikauma. 7Na tingi tikawa miingeń. Miinga ilya ikaṅina ikatifiṛa nta ivika filimu. 8Na tingi tikawa uteriń unuru tikaṅina na finya tikaṛengeka tikavika filimu. Ilya imwi ikavika makumi araru na ingi makumi arindaru na kumande iyana. 9Kanumbua: Ulya awore marwi a yaranya aaranye!
10Nae ili eekee kyaanya kyamwi, vandu valya vallengetye andu emwi na valya ikumi na vavili vakamwuṛa misendie ya sumu tilya. 11Nae kavaia: Ini mwanniingwa imanya kiṛisi kya umangi lwa Iṛuva. Kake iwo vakee wooṛo wo foose fivaviaa veekabio̱o̱ sumu. 12Naamu illa valle vataloliaa na yaranya vaaranye na marwi a wo nta na imanya misendie yayo, kaaṛa vataaṛuke vatio̱ mareko awo. 13Kavaia: Kwakooya mutamanyaa sumu ii, naare mumanyaań sumu ti tingi toose? 14Ulya mweeṛa mbeu nkirero kya Iṛuva andeeṛa. 15Kake iwo vakee mbaai ya shia, mfo kundo akee yeeṛa kirero. Nawo vakammaa ikiita, lia eni Satana kasha na-wo kauta-fo kirero kilya kyeemeeṛwaa mirimiń yawo. 16Mfo kuro na tilya tindeeṛwa maweń wwo valya vakee iita kirero. Lia eni vakakiwaria na ifura. 17Kake vawore mirarii mirimiń yawo ndi, kake vakee ikiwaria kyeeri kyaangu da. Na numa kwakooya ishaa ngatara ana mavaviso ana yumbutwa kiimba kya kirero kyo, lia eni vakanunua. 18Na tingi ntilya tindewa miingeń, vvandu valya vakee iita kirero da. 19Na yatarika lya isanga li na ulembi lwa masaa na ilanga lya findo fiingi fikavashea fikafiṛa kirero kilya kitavike nunda. 20Na tilya tindeeṛwa uteriń unuru vvalya vakee yaranya kirero na ikiwaria. Na ivika nunda umwi kavika makumi araru na ungi makumi arindaru na kumande iyana.
21Kavaia: A taa imakii inndwa irawa kwa si ya mengeto ana kwa si ya kiraa? Inndwaa se irawa andu ayo a kivanikoń? 22Amu kiifo kindo kifise kitamanyikaa ndi. Ana nta kiifo kyama kiṛike kitaṛambukaa na baa ndi. 23Nndu awore marwi a yaranya aaranye!
24Lingi kavaia: Manyiń nnu ifo mukee ifiita! Kyelelyo kilya mwelelyaa nakyo vengi nkyo neeni mwelelyo̱o̱ na yengeṛyo̱ mwengeṛyo̱o̱. 25Amu ulya awore masaa aengeṛyo̱o̱. Na ulya atawore kindo, na akwaa nkilya awore asokwaa.
26Lingi karera kanumbua: Umangi lwa iṛuvewu luvakani kuri: Nsha nndu andeeṛa mbeu ifo nremiń. 27Nae kalala na ikwimboo kio na nsanyiń. Na mbeu ilya ikamia na iṅina, ito muni ateeshi. 28Na uteri lukamirisa lo weni. Lya mbele ikava unyuṛi na numa ikareeka na numa kikava kyaa kiishule mbeke. 29Ili muni nrema alolia sheeli kilimu kyammaa iviṛa, karuma vaṛundi vamwi na ngyusu vandeminya, fulya iilula lyamfika.
30Lingi kanumbua: A umangi lwa Iṛuva tiluvakanisaa na kiki? Ana toongoyaań na sumu ingai? 31Luvakani na mbeu ya karadali. Neeli yeeṛwaa ifo si, nshinnya kita mbeu toose tikee yeeṛwa ifo si. 32Kake ikammaa yeeṛwa ikaṅina ikakilia filimu foose. Ikannde maṛamba manini na kumande ndee ta kwa si ya iṛuvewu tikakaa kwa si ya kiṛishwe kyayo.
33Kavaongoya kirero kyamwi kwa sumu shiingi ta mikae ii, sheeli vandemakii yaranya. 34Nta kindo arera nawo kitaare nkwa sumu. Kake vanalosho vamwi veni kavarambuya foose vakee kyaanya kyawo.
35Na nkonu ulya muni ili kundeva ukwawuń, kavaia: Ndefoń tiṛuke kwa kulya. 36Vakalakana na syamu ilya. Vakankurika akee ngalaveń ilya sheni. Na ngalava tingi tiriani andu emwi nae. 37Lia eni ikakwimboo mburaato ya uvivita unini. Mavia akakaba ngalava kumande yaishua mura. 38Nae muni eekee ifo ngalaveń taari ya numa alele ruo aekeṛie nrwe ntoń. Vakamwanta vakamwia: Llosha, nta kikuṛiikisie se kwakooya tikee imamia? 39Nae kakwimboo kanaya mburaato kaia nruva: Sia do do! Mburaato ikasia do na kimamia kikafika kua. 40Kavaia: Nki ili mukee veeṛei kuri? Muwore ikusura se? 41Vakaeṛea nnu vakauṛana: A nndu uu wwa mikae ki, ili mburaato imwirikie na nruva?
Currently Selected:
Mariko 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
