Mariko 14
14
1Ili ikiseere mikonu ivili kisuku kya Pasaka kive na kyeeri kya mikate itadookie, vakohani vanini na vaaṛia va mitisiṛie vakaraya shia ya iwwara na ntambwe, amu vawwaa. 2Fulya vanumbua: Manya kitave kyeeri ki kya kisuku, kaaṛa litave irabuule vanduń.
3Nae ili eekee Betania ifo numba kwa Simon ulya eelolee ivave, akee rembo shoongeń. Llyo asha na-wo nka arie kawembe kawore mafura a kisaamu a uuru unini. Kafunua kiwembe kilya kalletia nrweń wamwi. 4Na io veeyoo vandu vandesua mirimiń yawo vakanumbua: Naamu ki ili vakee ifwalafwala mafura va a kisaamu kuri? 5Amu mafura va eemakii ikumbwa na shilingi mayana araru na kilanya, tiniingwa vakiva. Vakaṅuṅuria nka ulya. 6Yesu kanumbua: Ntień! Nkiki ili mukee imwatarisa? Anshiṛundia ishoṛa isha. 7Amu vandu vakiva mukee nawo mikonu yoose, na kyeeri kyoose mufurie mumakii ivatania fisha. Kake niń mukee nań mikonu yoose ndi. 8Antana sheeli amakii. Atembeṛie yamba vvili wakwa mafura kiimba kya iṛikwa lyakwa. 9Nkue namuia: Kundo koose kukwanisyo̱o̱ nrumi ii shisha ya Iṛuva, na kindo ki akitana kisendwaa, nae akumbulwaa.
10Na Yuda Isikariote akee umwi wa valya ikumi na vavili kaenda kwa vakohani vanini, amu andiinge kwawo. 11Nawo ili vandeita vakafura vakanrekia inniinga fesa. Nae kaṛuya mwaanya uu uvaa anrambikie.
12Kyasia nkonu wa mbele wa ilya mikate itadookie ili vasikya yaanri lya Pasaka, llyo vanalosho vamwi vamwia: Nkwi kufurie teende tindesongosia andu kuliyaa Pasaka? 13Karuma vanalosho vamwi vavili kavaia: Endeń kulya muṛiń! Mfo mukwaniaa na nseṛo arie mura na nungu. Nsoṛeń numa. 14Na io aakiaa na-wo, ień muni numba: Llosha akuia vai: Nkwi numba ya veeni ikai, lliye-wo yaanri lya Pasaka andu emwi na vanalosho vakwa? 15Nae amoorasaa kiṛi kinini kya ringewu kikee kisongosie. Ifo mfo mutisongosiaa. 16Vanalosho valya vakakwimboo vakaenda muṛiń vakalolia sha lia avaia. Vakasongosia-wo Pasaka.
17Kyasia ili kundeva ukwawuń, kasha na-wo andu emwi na valya ikumi na vavili. 18Neeli vakee rembo veelyaa shoonga, Yesu kanumbua: Nkue namuia: Umwi wanu ashiṛiingaa, nae akee ilya shoonga andu emwi nań. 19Vakabooka inaria na imwuṛa umwi umwi: Kulla nniń naań? 20Nae kavaia: Ni umwi wanu ini ikumi na vavili, ni ito akee iliana nań kyashoń kimwi. 21Mwana wa nndu aendaa shia yamwi sheeli eentisiṛyo̱o̱. Kake ushi nndu to Mwana wa nndu asheṛiingwaa yye. Kiikee ṅwana kikooye kitaare nndu to awonika.
22Neeli veelyaa kaimboo nkate kaana Iṛuva kaufukyafukya. Kavaavia kanumbua: Ngyeń! Uu ni vvili wakwa. 23Kaimboo umbata kaana Iṛuva kavaniingia vakalunwa woose. 24Kavaia: Ilu ni usao lwakwa luvaa mma shiiya lwiritwaa kiimba kya veengi. 25Nkue namuia: Nkinwaa neeni minuye ii ya nsabibu ndi kumande nkonu ulya nndenwaa neeni miiya ifo umangiń lwa Iṛuva.
26Ili vandemaa iimba, vakasomuka vakaenda alya uroń lwa misenifu. 27Yesu kavaia: Ini mu woose mununuaa kiimba kyakwa. Fulya kikee kitisiṛe: Nkabaa mwisi na maanri anyanyakaa. 28Kake numa nammaa iṛuka mwiriaa mbele yenda kulya Galilaya. 29Petiro kamwia: Na kwakooya woose vanunuaa kiimba kyafo, niń nnunuaa ndi. 30Yesu kamwaṛua: Nkue nakwia: Kio ki kya nnu kitaare nguku ya shawu yamiikoro kavili kukooyaa kwanshikana kararu. 31Nae kaengeṛia nnu irera kanumbua: Na akwaa kyawara mfwe andu emwi nawe, nkukanaa kutu ndi. Na woose vakarera kuro.
32Numa vakasha kumande nndeń livaangwaa Getisemane. Kaia vanalosho vamwi: Kaań rembo ia kumande mmaa itereva. 33Nae kaenda ariani na Petiro na Yakobo na Yohane. Nae kabooka iva-ṛikwa ni irima na isavaa. 34Kavaia: Nrima wakwa uwore unaari nnu kufui na ifwa. Kaań ia mulale rembo! 35Kaserika na kwa mbele kinnya. Kawa na si katereva Iṛuva eenumbuaa: Kwakooya kivaa, saa yo iire mbaai. 36Kanumbua: Abba Nde, ifo kwafo findo foose fimakii iva. Kyasia itań umbata lu kwaasha lushuuke! Kake manya kitave sheeli niń mfurie ndi, nsheeli iwe kufurie. 37Kasha kakooya valele ruoń. Kaia Petiro: Simon, kulele da? Kumakii ilala rembo nań nta saa imwi ndi? 38Laleń rembo mwiterevaa, amu mutawe nreyoń. Nrima to ufurie itomaa, kake vvili ni llemwa. 39Kaenda lingi katereva Iṛuva eereraa firero filya feni. 40Kauya lingi kakooya vallala, amu miso awo eemeemeriswaa nruo. Nawo nta vamanya kya imwaṛua ndi. 41Kasha lya kararu kavaia: Laleń kyeeri kingi na iimuya! Kifile kuri. Saa yammaa ifika. Mwana w nndu arawaa maa-koń a vandu varekwa. 42Kwimbooń teende! Lleń te ndiingi ulya ashiṛiingaa ansha kufui.
43Neeli eereraa kuri, lia eni Yuda kasha akee umwi wa valya ikumi na vavili, ariani na isyamu varie shombo na ndata, varumwa vvakohani vanini na vaaṛia va mitisiṛie na vasuṛi. 44Na ulya andiingie eevvaniingyaa myorusie eenumbuaa: Ulya mmwongaa miimo, yye muwwaraa munkurike kinsha. 45Neeli andefika, kanserikia kanumba: Llosha nini, kia! Kamwonga miimo. 46Nawo vakasaaṛa maako vakawwara. 47Na umwi wawo wa valya veeyoo kasomua shombo yamwi kakaba nayo iketi lya nkohani nnini kamminya kuri. 48Na Yesu kaaṛua kavaia: Mwansha murie shombo na ndata mushiware sheeli nkee kisoki. 49Nań mikonu yoose niikee neeni niiloshaa ifo numba ya Iṛuva, nta ishiwara. Kake kyawa kuro, amu mitisiṛie yawukie. 50Llyo vakantia-wo woose vakarisha. 51Na io eeyoo nseṛo nkoo ariani nae aṛee nseto mwelwa vviliń wamwi. Nawo vakafura iwwara. 52Nae kavaotoṛia nseto ulya mwelwa karisha akee kya ruu.
53Nawo vakakurika Yesu kwa nkohani nnini. Vakakusandia-wo vakohani vanini woose na vasuṛi na vaaṛia va mitisiṛie. 54Nae Petiro kallatia eendeaa kikwaasha, kumande afika wooṛo kwa nkohani nnini. Kakaa rembo andu emwi na maketi eeoraa muro io kwelwa.
55Kyasia vakohani vanini na vanini va kikwena vakaraya kindo kya imfingia, amu vakooye mwaanya wa iwwaa, nta ilolia. 56Amu weengi vamfingia findo fa wongo, kake uṛiingi lwawo lwave lumwi ndi. 57Na vengi vakasalala-wo vakamfingia findo fa wongo veenumbuaa: 58Ise tammwita eenumbaa: Niń mburuaa numba ii ya Iṛuva indetanwa na maako, lingi ntanaa ingi kari ka mikonu iraru kitaare yatanwa na maako. 59Lingi na akwaa nkuro uṛiingi lwawo lwave lumwi ndi. 60Llyo nkohani nnini akwimboo kasalala karikari. Kauṛa Yesu: Nta kureraa kyafo kya yaraa filya vandu iwo vakee ikuṛiinga nafo ndi? 61Nae kasia do, nta yaraa kirero. Nkohani nnini kamwuṛa lingi kamwia: Iwe ni iwe Kristo Mwana wa ulya aarafumwa? 62Yesu kanumbua: Nniń ye. Neeni muloliaa Mwana wa nndu akee rembo uko usha lwa muni finya, ashaa ariwa mmaṛumbe a iṛuvewu. 63Llyo nkohani nnini arandaranda miseto yamwi eereraa: Nkiki tikiṛuyaań lingi vakureki? 64Mwamiita firumu famwi fa irama Iṛuva. Mwaloliań are? Woose vakafukya: Kyawara awalwa. 65Na kiindi vakabooka immishia manyiiri na insikia miso na inkaba na ṅunde na imwia: Ringisia! Na maketi nawo akawwara akankaba na ngyui.
66Na Petiro eekee rembo io wooṛo. Kasha umwi wa masinga a kika wa nkohani nnini. 67Kalolia Petiro eeoraa muro. Kamulla kamwia: Na akwaa ni iwe kwikee andu emwi nae ye Yesu wa Nasareti. 68Kakana kanumbua: Niishi ndi ana niisile filya kukee irera ndi. Kasomuka wooṛo kafika io ngiṛiń. Na nguku ya shawu ikaikoro. 69Na isinga lia lya kika likallolia lingi likabooka iia valya veeyoo: Uu ni umwi wawo. 70Kakana lingi. Kwa numa kinnya valya veeselelee-wo vakaia Petiro. Nkue kukee umwi wawo, amu nawe kukee wa kulya Galilaya da. 71Nae kabooka ikudenga na ilya ikite: Niishi nndu uu mukee inumbua ndi. 72Na lia eni nguku ya shawu ikaikoro lya kavili. Petiro kakumbua kirero kilya Yesu eemwiaa: Kitaare nguku ya shawu yamiikoro kavili kushikanaa kararu. Neeli andekumbua kuro, kaiya.
Currently Selected:
Mariko 14: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
