Mariko 13
13
1Neeli asomuka numba ya Iṛuva, umwi wa vanalosho vamwi kamwia: Llosha, lla te mawe va na numba ti kasa tiṅini! 2Yesu kamwaṛua kamwia: Kulolie numba ti kasa tikee nini? Nta iwe lisaa kwa ule ya lingi kitaare liburulwa. 3Neeli andekaa rembo kulya uroń lwa misenifu asumani na numba ya Iṛuva, Petiro na Yakobo na Yohane na Anderea vakamwuṛa kiṛisiń: 4Tiie te ifi fivaa iri ki? Nayo mmyorusie ki ilolikaa, ili ifi fikaa fitanike? 5Llyo Yesu abooka ivaia: Kusembekeń nndu atamulembe! 6Amu veengi vashaa na irina lyakwa veenumbuaa: Nniń ye. Nawo valembaa vandu veengi. 7Neeni ili mwitaa mboni ta fira na ntindi wa fira, manya mutakyangiswa! Kyawara ifi five, kake lyo ifurumia fiseere. 8Amu uruka lukwimboo lukabe lungi na fingi umangi lukabane na lungi. Kundo kungi na kungi si ireremaa, ivaa-fo na soto. Nafo mfo fibookie fa mavaviswa. 9Kake ini kwiiseń mu veni! Amu vamurwaa numbeń ta fikwena, na ifo numbeń tawo ta iterevia mukabyo̱o̱-fo. Neeni mukurikwaa mbele ya masiingo na kwa mamangi kiimba kyakwa, kive nkyo myorusie ifo kwawo. 10Kake kyawara mbele nrumi shisha ya Iṛuva ikwaniswa vanduń va masanga woose. 11Neeli vamukurikaa ini na imuṛiinga, manya mutaṛiikiswa nkindo mureraa-fo. Kake kilya muniingwaa kyeeri kyo kirereń. Amu nta ni ini mureraa-fo, mMumuyo Nsongori. 12Na mwanamae wa nndu aṛiingaa mwanamae awalwa, na ndee aṛiingaa mwana, na vana vakwimboo vasue vasuṛi vawo na ivawaa. 13Neeni musulwaa vvandu woose kiimba kya irina lyakwa. Kake ulya asisiriaa kumande ifurumia, yye akiaa.
14Io llyo mufwalukwaa mirimiń yanu, ili muloliaa usutu lwa ireta luselele andu atasumani nalo — na ulya asomaa ia kyawara akumbue. — Llyo iwo vakee kunu Yudaya varishie ngyuroń. 15Na nndu akee mmbeewu manya ataoloke-fo ana nta ataake numba yamwi aondue-fo kindo. 16Na ito akooyaa akee nremiń atauye numa aimboo nseto wamwi. 17Kake ushi iwo vakooyaa vakufingie na iwo vakee yosa vana mikonu yo. 18Kake tereveń Iṛuva, amu ifo fitave kyeeri kya kisie. 19Amu mikonu yo ivaa ya ukiva unini lutandelolyo̱ kuuka mabookioń a itana findo Iṛuva antana kumande alli ana lukilolyo̱o̱ lingi kutu ndi. 20Na kikooye Nndumi ataangusa mikonu yo, nta nndu umwi eekiaa. Kake kiimba kya vasaue iwo eewasauaa aangusaa mikonu yo. 21Na kwakooya nndu amuiaa: Lleń te Kristo akee ia ana akee kulya, manya mutamwirikie. 22Amu vakwimboo Makristo a wongo na vaauya fisuku va wongo, nawo vaorusaa myorusie minini na fa iṛiikisa itandelolyo̱ lingi, amu vakooye mwaanya wa ireta na valya vakee vasaue, kifo kiivaa. 23Neeni kulleń, fulya nambooka imuia foose.
24Kake ngyukiva ta mikonu ilya tikamaa iira llyo saa yaṛukaa ive llema na mwiri uretaa langa yayo. 25Na nyinyiri ta iṛuvewu tiwaa tuuka iṛuvewu, na finya ta iṛuvewu tiseniswaseniswaa. 26Io llyo valoliaa Mwana wa nndu eeshaa ariwa mmaṛumbe awore finya nini na tikisi. 27Io llyo ammaa vamalaika vasaṅiṛie vasaue andu emwi kuuka taari toose iinyi kuuka mbaai ya isanga na kumande mbaai ya iṛuvewu.
28Kulosheń na mikae ya nri wa nkuu! Maṛamba ayo akamfumbisa na yooṛa maru, mumanyaa sheeli iruuna lyamfika kufui. 29Neeni nkuro da: Ili muloliaa findo fi fiivaa, manyiń sheeli ansha kufui io mwaangoń. 30Nkue namuia: Kishuku ki kisiaa kutu ndi kumande ifi foose faawukiaa. 31Iṛuvewu na isanga fisiaa, kake firero fakwa fo fisiaa kutu ndi. 32Kake mboni ya nkonu to ana saa yayo ili ifikaa nta nndu eeshi, nta vamalaika vakee iṛuvewu ana nta Mwana kita Nde da. 33Kyasia kwiiseń, laleń rembo! Fulya muteeshi kyeeri nkonu to uvaa. 34Kivakani sheeli nndu aendaa kyaaṛo katia numba yamwi. Kavavasia masinga amwi nndu woose na ishoṛa lyamwi. Kavavasa nringi wa mwaango alale rembo. 35Kyasia neeni laleń rembo, fulya muteeshi kyeeri muni numba ashaa nakyo, akwaa ni ukwawuń ana akwaa nkio kari ana kyeeri nguku ya shawu yaikoro ana ngama kio. 36Amu atashe kibashuka akooye mulele. 37Na ikyo namuia ini, nakiia woose: Laleń rembo!
Currently Selected:
Mariko 13: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
