Mitanie ya varumi 22
22
1Muṛe womi mukee vanavamae vakwa na vaande vakwa shaaranyiń nrere kyakwa alli ia mbele yanu. 2Ili vandeita eereraa nawo kwa mirerie ya kiebrania vakaengeṛia isia do. Nae kanumbua: 3Niń nkee nndu wa kiyuda, nairiwa Tariso muṛi wa Kilikia. Kake itirishwa natirishio̱ muṛiń uu. Naloshwa uvavaso lwa vaande yeru na usongovisi niiloshwaa ni nsuṛi ulya Gamalieli. Nava nndu mukabania Iṛuva sheeli neeni moose mukee kuri alli. 4Natuṛua vandu va shia ii shiya kumande ivawaa. Navafinga navarwaa kifingioń womi na vaka. 5Sheeli nkoani nnini amakii irambua andu emwi na vasuṛi va fikwena woose deń. Amu wwo vandeshiniinga barua niirwaye vandu veru neende nayo Damasiko, amu ninnde valya vakee ifo vaende Yerusalemu vakee vafinge, amu vasheumisio̱. 6Ili niikikee shień kufui mfike Damasiko kyeeri kya nsanyiń kwibari langa nini ikauka iṛuvewu ikashimulikia taari toose. 7Nawa si naita ununga lwishiaa: Saulo uu, Saulo uu, nkiki ili kukee ishituṛua? 8Nań naaṛua: Iwe ni iwe i Nndumi? Kashia: Niń nkee Yesu wa Nasareti uu iwe kukee intuṛua. 9Na valya variani nań valolia langa ilya, kake wo vandeita ununga lwa ulya anderera nań ndi. 10Nanumbua: Nndumi, nkiki kyashiwara ntane? Nndumi kashiia: Kwimboo kwende Damasiko, neefo kuio̱o̱ mboni ta findo foose favvavaswa kufitani. 11Na ili nteekiloliee kiimba kya langa ilya nini nawarwa maako vvalya niirianii nawo nafika Damasiko. 12Kyasia kulya eeifoo nndu umwi irina lyamwi ni Anania eekee mwindia mavavaso woose kisha, eeishiwaa kinuru vVayuda woose veekee ifo. 13Ye kashishea kasalala kufui nań kashiia: Mwanama Saulo lolia! Lia eni namwimboyo miso akwa. 14Kanumbua: Iṛuva wa vaande yeru ankusaua iwe kukooye imanya lya mifurie yamwi na ilolia ulya awore usumani na iita ununga luukaa kaniń kamwi muni. 15Amu kuvaa nrambua wamwi kari ka vandu woose wa irambua mboni tilya kwamiita na ilolia. 16Kyasia alli kuverień ki? Kwimboo kubatiswa kusangywa mareko afo kwisendaa irina lyamwi. 17Neeli nndemaa yuya Yerusalemu niiterevaa numbeń ya Iṛuva, nakooya nkee kari ka Mumuyo. 18Nallolia (Yesu) kashiia: Uka kunu Yerusalemu ree, ana nta vairikiaa irambua lyafo lya mboni takwa ndi. 19Nań nanumbua: Nndumi, wo veni veeshi sheeli niń niikee mufinga valya vakukusurie na ivakaba ifo numba tawo ta iterevia. 20Na usao lwa Stefano nrambua wafo lia lwiritwa, niń shi muni niiselelee io kufui niirikiaa awalwa niiringaa miseto ya valya vawwaa. 21Nae kashiia: Kwendie da, amu niń nkurumaa kwende kwaasha kwa vayavaṛumu.
22Vakamwaranya kumande kirero kyo vakarosa ngyununga tawo veenumbuaa: Uta uu isangeń, amu kisumani akaa na muu ndi. 23Ili veeṛoṛongyaa na ikumbakumba miseto yawo na ifwala funga na ule ringewu, 24nshili ulya nnini kavavasa anndwa na kunu muṛiń eenumbuaa auṛwa mboni tamwi eekabwaa, amu amanye kiimba kya indoṛongia mikae ii. 25Neeli vandemaa imfinga na nruu Paulo kaia nshili umwi wa vasikari akee kufui: Naare? Nkisumani ini ikaba nndu akee Nrome nae kitaare amaanduywa? 26Ili nshili ulya andeita kuri kaenda kandeongoya nshili ulya nnini eemwiaa: Kurie itana ki? Amu nndu uu ni Nrome. 27Nshili ulya nnini kasha ka-mwuṛa: Shiia kukee Nrome dede? Kanumbua: Ee. 28Nshili nnini kaaṛua: Niń nakooya kimia ki kya Varome kwa fesa shiingi. Paulo kanumbua: Nań nkiwore kuuka iiriwa lyakwa. 29Kyasia valya vee-nkusongosiaa imwuṛa na finya vakakwimboo vakantia-wo. Na nshili ulya nnini nae kaeṛea, ili andemanya sheeli ni Nrome, fulya ee-mmufingaa. 30Ili lya ndesi kafura imanya kisumani nkiteveto ki andeṛiingwa nakyo vVayuda. Kamwoṛomua kavavasa vakohani vanini na vayafikwena woose vakusandie. Kaolota Paulo kanseṛeesa mbele yawo.
Currently Selected:
Mitanie ya varumi 22: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
