Barua ya Timoteo ya kavili 4
4
1Narambua mbele ya Iṛuva na mbele ya Kristo Yesu ulya asheumisiaa veefo na muu na vamfwe niirambuaa sheeli ashaa lingi aseṛeese umangi lwamwi. 2Kwanisa kirero kyo, kukudeerie kwakooya vandu vakundaa ana kwakooya vatakundaa. Kuvakandare na ivanaya na ivaikimba na ulalamboo loose na miloshie minuru yoose. 3Amu kishaa kyeeri valeaa miloshie ya ikiṛa mirima, kake vairikiaa ilanga lyawo veni, vakuṛuiyaa valosha vawo mbumbu, fulya marwi a wo afurie. 4Nawo veewukaa vataite filya fikee fa dede na yaṛukia sumu ta wongo. 5Kake iwe ṛangua findoń foose. Sisiria ngatara. Kwanisa mboni shinuru ya ikia. Awutia uṛundi lwafo. 6Amu niń kyanshishea iva kirasio na nkonu wa yawulwa lyakwa wansha kufui. 7Nammaa ikabana fira shinuru, nammaa imarisia weendo lwakwa, nanringa ikusura. 8Kiseere ni uvingo lwa usumani mfisie lua Nndumi mwumisia nsumani ashiniingaa nkonu ulya, ana nniń shi muni ndi, kake wandu woose valya vaveree isha lyamwi. 9Kutomarise kufike kwakwa ree. 10Amu Dema anshirea ankunda isanga li lya alli kaenda Tesalonike. Kiresike ameenda Galatia. Tito ameenda Dalimatia. 11Ulya akee ia andu emwi nań lLuka ye muni. Imboo Mariko kushe andu emwi nae, amu ashiviaa mwelekia uṛundiń. 12Kake Tikiko nndenruma Efeso. 13Ili kushaa sheendie ikoti lia nndelirea Karipo ifo Tiroa, kunnde na fitabu filya, mmwasi filya fa shoni. 14Alekisandero mfuru ulya nkaba minya andeshitania fikasha fiingi. Nndumi antaa kisumani na mitanie yamwi. 15Na akwaa ni iwe kuringe kiimba kya nndu uu, amu andeila nnu firero feru. 16Ifo mbooko ya mwaandu wakwa nta umwi andekaa taari yakwa, woose vandeshirea. Vatataalio̱ teve kiimba kya ikyo. 17Kake Nndumi andeshisalalia kashiniinga finya. Kikava kuro, amu mikwanisie ya nrumi shisha imarisio̱ nniń, vayavaṛumu woose vaikooye. Nań nakiṛwa kaniń ka miiso. 18Nndumi eengeṛiaa ishiuta mitambweń yoose mikasha na ishikiṛa eeshifitaa umangiń lwamwi lwa iṛuvewu. Ye eetikiswa miṛeṛe na miṛeṛe! Amen.
19Shiisania Pirisika na Akwila na valya va numba ya Onesiforo. 20Erasto asaa Korinto, Tirofimo nanrea kulya Mileto alole. 21Kutomarise isha kitaare kyeeri kya mbioo kyamfika. Eubulo akwisana na Pudensi na Lino na Kilaudia na vanavamae woose. 22Nndumi akaa na nrima wafo! Uwoo lukaa neeni!
Currently Selected:
Barua ya Timoteo ya kavili 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
