Barua ya Vakorinto ya mbele 7
7
1Kyasia kiimba kya mboni tilya mundeshitisiṛia namwaṛua kuri: Llyo ṅwana nndumi atabaane nka. 2Kake kiimba kya ikwima waaisi nndumi woose ave na nka wamwi ye muni na nka woose ave na mmi wamwi ye muni. 3Nndumi aniinge nka wamwi kilya kisumani nae, mfo kuro na nka nae aniinge mmi wamwi kilya kisumani nae. 4Nka eetoṛio vvili wamwi ndi, kake ni mmi wamwi. Mfo kuro mmi eetoṛio vvili wamwi ndi, kake ni nka wamwi. 5Manya mutakwime kitaare nkwa iirikiana mwaanya, amu mukooye nato kyeeri kya itereva. Numa mukwanie lingi, amu Satana atakooye mwaanya wa imuteveta kiimba kya ituṛa walio kwanu. 6Kake nkee irera ifi, sheeli nammanya niń, ni ivavaso ndi. 7Kake kilya mfurie nkuri: Vandu woose vave sheeli niń nkai. Kake nndu woose mmwavie wavi lwamwi muni ni Iṛuva, uu kuri na uu kuri.
8Kake nkee iia valya kitaare vamaalika na misiketi: Llyo ṅwana vakaa sheeli niń nkai. 9Kake kwakooya vatamakii isisiria, vaalike. Amu llyo ṅwana yalika kita ikoṛwa ni ilanga. 10Kake valya vammaa ikwalikia navavavasa, ana nta nniń ndi, kake ni Nndumi: Manya nka atalakane na mmi wamwi. 11Kake kwakooya allakana nae, akaa kuri manya atakialikwa ana akwitanise na mmi wamwi. Lingi mmi manya atalakane na nka wamwi.
12Kake vandu vengi nkee ivaia niń ana nta ni Nndumi ndi: Mwanamae umwi wanu kwakooya awore nka wamwi atakusurie Iṛuva na nka to akundie ikaa nae, atalleye ndi. 13Na nka awore mmi wamwi atakusurie na mmi to eerikie ikaa nae, ataleye mmi wamwi ndi. 14Amu mmi atakusurie ailiswa ni nka wamwi, na nka ulya atakusurie ailiswa ni mmi wamwi. Kifo kitaare nkuro, vana vanu veevaa vesha ndi, kake alli vvasongori. 15Kake ulya atakusurie kalakana akulakanie. Io nndu nkristo ave wa kiwomi ana wa kika ni mfinge ndi. Amu Iṛuva antivaangia unambwe. 16Amu kumakii imanya are, iwe nka, akwaa kukiṛaa mmi wafo? Ana iwe nndumi kumakii imanya are akwaa kukiṛaa nka wafo?
17Kake sheeli Nndumi andeavia nndu woose kyamwi na sheeli Iṛuva andevaanga nndu woose, aende kuro da. Nkyo ikyo nkee ivavasa siṛi toose. 18Nndu llive kawaangwa ni Iṛuva akee nrine, manya atakiṛike. Nndu llive kawaangwa atakee nrine, manya atakirinwa. 19Irinwa nkindo ndi na ilea irinwa nkindo ndi, kake ni iindia mavavaso a Iṛuva. 20Nndu woose akaa na mikae ilya eekee nayo ilyo andevaangwa. 21A le kwavaangwa kukee iketi? Manya kutalolie nkikasha. Kake kwakooya kumakii ikutaua kutaue. 22Amu ulya andevaangio̱ Nndumi akee uketiń avva ntaue wa Nndumi. Mfo kuro na ito andevaangwa akee ntaue ni iketi lya Kristo. 23Mundeuṛwa na uuru uumu, manya mutave maketi a vandu. 24Vanavama, nndu woose na mikae ilya andevaangwa nayo akaa na Iṛuva.
25Kya vana va sambuṛa noore ivavaso lyukie kwa Nndumi ndi. Kake nkee irera makusaṛo akwa nkee nndu andelilio̱ ni Nndumi nava mukusurwa. 26Kyasia kilya llolie kikee kinuru nkyo iki: kiimba kya ngyukiva ti tiifo kyeeri kya alli kivaa kisha nndu akaa na mikae akee nayo. 27Kwakooya kwalungwa na nka le, manya kutatiṅwa iboṛomulwa. Kwakooya kutandealika manya kutaṛuye nka. 28Kake kwakooya kwaalika kuwore ilomi ndi. Ana sambuṛa ikaalikwa yoore ilomi ndi. Kake vandu sha iwo vakooyaa mavina a vvili, nań mfurie imuringa ifo. 29Kake nanumbua kuri, vanavama: Kiṛengo kya kyeeri ki kyamaangua. Kyasia kuuka alli valya vawore vaka vave sha vatawore. Na valya vakee iiya vave sha vatakee iiya. 30Na valya vawore ifura vave sha vatawore ifura. Na valya vakee yuṛa findo vave sha vatawore kindo. 31Na valya vakee ifuṛukania fa isanga vave sha vandu vakee ifuṛukana kya ruu. Amu isanga sheeli likai alli likee isia. 32Nań mfurie muve na yatarika ndi. Ulya kitaare amaalika akee ikwareesa na mboni ta Nndumi kasa asenyaa Nndumi. 33Kake ulya amaalika akee ikwatara na mboni ta isanga li kasa asenyaa nka wamwi kava na mirwe ivili. 34Na nka atakee na mmi akee ikwatara na mboni ta Nndumi, amu ave nsongori vvili na nrima, na mwana wa sambuṛa mfo kuro. Kake ulya amaalikwa akee ikwatara na mboni ta isanga li kasa asenyaa mmi wamwi. 35Narera ifi amu mmwelekie. Namuia ifi nta ni imureya ndi, kake nkwa kiimba kya filya fisenyie, lingi naamu mumakii iṛundia Nndumi kitaare mwaomulwa mfindo fiingi. 36Kake nndu na kava i kalolia sheeli atakee itania mwana wamwi wa sambuṛa sheeli kinsenyie, na kwakooya ito ankilisa usha lwa ukoo lwamwi na kwakooya kitinye-fo kindo, kyasia atane sheeli akundie. Antana kikasha ndi. Avaniinge muumu vaalikiani. 37Kake ulya akee nsaari kyumu ifo ngooń yamwi ataare ikabiṛio̱ kamakii ishilia mifurie yamwi, lingi eemmaa ikusongosia nrimiń wamwi iringa mwana wamwi wa sambuṛa, antana kinuru. 38Kyasia mfo na ulya akee yorisa mwana wamwi wa sambuṛa antana kinuru. Na ulya atakee imworisa aengeriaa itana kinuru kita. 39Nka afingie ili mmi wamwi akee na muu. Kake kwalooya mmi wamwi amfwa, mmwotoṛe aalikwa ni nndu woose ulya amfurie, kive kari ka Nndumi da. 40Kake ṅṅwana ikaa sheeli akai, nkuro niń llolie. Nań nkusurie sheeli niń nań noore Mumuyo wa Iṛuva.
Currently Selected:
Barua ya Vakorinto ya mbele 7: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
