Lukasi 6:27-49

Alisi ndimuwila inwe hovene muligwa, Muvatogwe vanisi vinwe, muvitile tusoga hovene valimugaya inwe; muvadosye hovene valimusemelela inwe; muvalombele hovene valimuleva inwe. Homwene alikutula kwitama limo umugalulile na liye; na homwene alikupuzya mwenda gwako, uleke kumuhangilizya na nhanzo. Na homwene alikulomba umupage; na homwene alikupuzya chako, uleke kukova akisyoche. Na kitisi mulikova vanhu vamwitile inwe, sisyo sisyene muvitile venavo. Ulu mulivatogwa venavo valimutogwa inwe, kisa kinwe kili kuhe? Kwisi vakenaguzi vene valivatogwa venavo valivatogwa. Ulu mulivitila tusoga venavo valimwitila inwe tusoga, kisa kinwe kili kuhe? Kwisi vakenaguzi vene valita sisyo. Na ulu mulivagopisya venavo mulisigizya kupiwa hangi kuwavo, kisa kinwe kili kuhe? Kwisi vakenaguzi valivagopisya vakenaguzi, kigele vapiwe genaya gene hangi. Alisi muvatogwe vanisi vinwe, na mwite tusoga na kugopisya vuduhu kwisigizya kusyokeziwa hangi, na vusyokeziwa winwe vukuvi vuhanya, na mukuvi vana va Mwenuyo ali kwigulya, kwisi uyo alivitila tusoga venavo vakavile na kalumbilo na vavi. Muve na kigongo kitisi Vava winwe ali na kigongo. Mukayangule ngʼo, na inwe kuyangulwa ngʼo; na mukataganizye ngʼo mu kitanga, na inwe kutaganiziwa ngʼo mu kitanga. Mutondole, na inwe mukutondolwa. Mupane, na inwe mukupiwa, ngelo yokalile na yakindagililwe na kusugusiwa na kuseseka vakumupa inwe mwitango linwe; kwisi na ngelo yeniyi muligeleka, inwe vene mukugelekelwa hangi. Alisi wavawilaga mukolani, Muhofu alikovola kumutonga muhofu mwiye? Kinahe, venava vavili kugwila ngʼo mwikandilo? Muhemba akavile muhanya kukila ise vuhemba, alisi homwene alimala kuhembekwa akuvi kitisi muhembeki wakwe. Kuki ulikavona kapalala mu linso lya muduguyo, alisi ukaguwine mugamba mu linso lyako? Lumehoki ulikovola kumuwila muduguyo, Mudugu, leka nakinje kapalala mu linso lyako, alisi ukaguwine mugamba mu linso lyako. Mugulumi! Ugwinje hambele mugamba mu linso lyako, na haho ukuvona sisoga kukinja kapalala mu linso lya muduguyo. Kuduhu muti musoga gulifyambya fisumo fivi, ninga muti muvi kufyambya ngʼo fisumo fisoga, kwisi kila muti gulimanikiziwa ha fisumo fyago; kwisi vakavile kuyava nkuyu ku vulula, ninga ngʼo matunda ku mavutundulu. Munhu musoga alifumya tusoga ku mbiko yakwe nsoga ya moyo, na muvi alifumya tuvi ku mbiko yakwe mbi, kwisi mulomo gwakwe guliyomba ku genaya galigokazya moyo. Kuki mulinitana nene Guku, Guku, na inwe mukavile kwita genaya ndiyomba? Homwene aliza kuwane na aliyigwa na kuyilindila mihayo yane, nkumolecha inwe mwenuyo alimwikola. Alimwikola munhu homwene wayizengaga numba na wayisimbilaga hasi na wagutulaga musingi gwayo kwigulya nʼitale; na aho likamilamasenga lizaga mongo gwayipamaga numba yeniyo na gukakovolile kuyitinginya, kunguno yavagi yizengilwe sisoga. Alisi homwene aliyigwa vuduhu kwita, alimwikola munhu homwene wayizengaga numba hʼisenga vuduhu kuyisimbila hasi, na mongo gwayipamaga na itungo lili yagwaga, na vugwe wayo wavagi vuhanya.